Pe Saʻo Tala a le Tusi Paia e Uiga i le Lalolagi?

NA SEʻI faatoʻā goto lava le la i Palesitina. O le tausaga lena e 1799. Ina ua tuanai se aso vevela o le savaliga, na tolauapi ai loa le Vaegaau a Falani, ma ua malōlō le taʻitaʻiau sili o Napoleone i lona faleie. I le malamalama o se molīgaʻo, o loo faitau leotele mai ai e se tasi o ana auauna se Tusi Paia i le gagana Falani.

E foliga mai e masani ona tupu lenei mea i le taimi e tolauapi ai le vaegaau a Napoleone i Palesitina. Sa ia toe manatua mai ana faamaumauga e faapea: “Pe a tolauapi i mea na faaleagaina o na aai anamua, latou te faitauina leotele le Tusi Paia i po uma lava . . . Sa iloga le tutusa ma le moni o faamatalaga: o loo fetaui lelei pea ma lenei atunuu ina ua mavae le tele o senituri ma suiga.”

O le mea moni, o ē e malaga atu i Sasae Tutotonu na latou iloaina le faigofie ona faafetaui mea o loo taʻua i le Tusi Paia ma laufanua o loo iai i aso nei. A o leʻi faatoilaloina e le Vaegaau a Falani Aikupito, e laitiiti lava se mea na iloa e tagata asiasi e uiga i le laueleele anamua. Sa amata ona faailoa atu i le lalolagi e saienitisi ma tagata suesue, ia na aumaia e Napoleone i Aikupito, faamatalaga auiliili o le matagofie sa iai muamua Aikupito. Ua faigofie ai i lea mea ona vaai faalemafaufau i “galuega mamafa” sa pologa ai tagata Isaraelu i se tasi taimi.—Esoto 1:13, 14.

I le po na faasaolotoina ai i latou mai Aikupito, na faapotopoto ai tagata Isaraelu i Ramese ona savavali atu ai lea ‘i le pito o le vaomatua.’ (Esoto 12:37; 13:20) I lenei mea, na poloaiina ai e le Atua i latou ina ia latou “liliu ane” ma “to lauapi . . . e lata ane i le sami.” O lenei gaoioiga uigaese sa malamalama i ai e faapea o se ‘fememeai i le nuu,’ ma na ō atu le tupu o Aikupito ma lana autau ma kariota tau e 600 ina ia toe puʻe mai ai ana uluai pologa.—Esoto 14:1-9.

Le Esoto

E tusa ai ma Josephus, o se tusitala o talafaasolopito o le uluai senituri T.A., na tuliloa atu e le autau a Aikupito tagata Isaraelu i “se nofoaga vaapiapi” ma maileia ai i latou “i se mato e latalata i le sami.” O le nofoaga tonu la na sopoia ai e tagata Isaraelu le Sami Ulaula e lē o matuā iloa tonu i le taimi nei. Peitai, e faigofie ona vaai faalemafaufau i le mea na tupu mai le  tumutumu o se atumauga agaʻi i le faatausiʻusiʻuga o le itu i matu o le Sami Ulaula. Ma ua taʻua lea mauga o Jebel ʽAtaqah, o lona uiga o le “Mauga o le Faasaoina.” I le va o lenei atumauga ma le Sami Ulaula o loo iai se tamai laugatasi e faasolo atu ina lauitiiti i le auvaemauga lea e toetoe lava oo i le sami. I le isi itu e faafeagai ma le Sami Ulaula, o loo iai se laufanua e taʻua o Ayun Musa, e tele ai vaipuna, o lona uiga o “vaieli a Mose.” O le ilititai i le va o nei itu e lua e mafai ona goto mālie ifo, a o isi vaega e faafuaseʻi ona goto ifo e tusa o le 30 i le 60 futu le loloto.

Ua taumafai faifeau lē faatuatua o Kerisinetoma e teena le moni o le vavega a le Atua na faia ina ua ia vaeluaina vai o le Sami Ulaula ma mafai ai e tagata Isaraelu ona sosola i le eleele matūtū. Sa latou toe faatulagaina le mea na tupu i se taufusi papaʻu i le itu i matu o le Sami Ulaula. Peitai e lē talafeagai lena mea ma faamaumauga a le Tusi Paia, lea o loo taʻu soo mai ai e faapea na latou sopoiaina le Sami Ulaula, lea sa sua tutuʻi i vai e mafai ona malelemo ai Farao ma lana autau atoa, ioe, ia latou magoto ifo i ai.—Esoto 14:26-31; Salamo 136:13-15; Eperu 11:29.

I le Vao o Sinai

O tulaga faigata na maua i le Penisula o Sinai o loo manino ona faamatalaina mai i le Tusi Paia i faamaumauga o savaliga a Isaraelu. (Teuteronome 8:15) O lea la, pe na mafai ea e le nuu atoa ona faapotopoto i le auvae o le Mauga o Sinai e talia le Tulafono a le Atua ae mulimuli ane ō ese ma “tutū mamao atu”? (Esoto 19:1, 2; 20:18) Pe e iai ea se nofoaga e lava lona telē e faia ai se gaoioiga faapena a se motu o tagata e tusa ma le tolu miliona lona faitau aofai?

Na asiasi atu se tagata faimalaga ma o se tagata aʻoga foi o le Tusi Paia o lona 19 o senituri, o Arthur Stanley i le Mauga o Sinai, ma faamatalaina le vaaiga na ia vaaitino i ai ma lana vaega ina ua uma ona latou aʻea Ras Safsafa e faapea: “O la matou faaiʻuga, e pei ona faamatalaina e i latou uma lava na vāaitino i ai, e matuā moni lava. . . . O se fanua laugatasi e maualalo ma lautele e samasama atoa e oo lava i le taʻele o le tofē . . . A manatu la i le toetoe lava a aunoa ma ni faamatalaga o na fesootaiga o laugatasi ma le mauga i lenei vaega, o se faamaoniga lea e sili ona tāua o le moni o le tala, e mafai ona maua sea fesootaiga, ma o loo iai lea i totonu o tuaoi o Sinai anamua.”

 Le Nuu o le Folafolaga

I lona 40 o tausaga o le savaliga a Isaraelu i le vaomatua, na tuuina atu ai e Mose lenei faamatalaga e faatatau i le uiga moni o le laueleele lea o le a latou ulu atu i ai: “Auā o le a faaooina oe e Ieova lou Atua i le nuu lelei, o le nuu o vaitafe, o vaipuna, atoa ma vai tetele e puna mai i vanu ma mauga.”—Teuteronome 8:7.

Sa leʻi pine lava ae latou iloaina le saʻo aʻiaʻi o lenei folafolaga ina ua faapotopoto faatasi le nuu atoa—o tane, o fafine, o tamaiti, ma tagata ese—i le vanu lafulemū o Sekema i le va o le Mauga o Evalu ma le Mauga o Keresema. Sa tutū ituaiga e ono i le auvae o le Mauga o Keresema. A o isi ituaiga e ono sa faapotopoto faatasi i le isi itu o le vanu i auvae o le Mauga o Evalu e faalogologo i faamanuiaga mai le Atua, na o le a olioli ai le nuu pe afai latou te usiusitai i le Tulafono a Ieova, ma malaia e oo i ai pe afai e lē taulau ona latou tausia le Tulafono a le Atua. (Iosua 8:33-35) Peitai, pe sa lava ea le avanoa mo le nuu ina ia ofi ai i totonu o lena vanu lauitiiti? Ma pe na faapefea ona lagona e i latou uma e aunoa ma se mea faaleotele leo faaonaponei?

Sa ono mafai e Ieova le Atua ona faamalosia faavavega leo o le au sā Levī. Peitai, e foliga mai sa lē manaomia sea ituaiga o vavega. E matuā lelei le faalogo i se leo i totonu o lenei vanu. Na tusia e se tagata aʻoga o le Tusi Paia o Alfred Edersheim o le senituri lona 19 e faapea: “E ioe tagata femalagaai uma i faasinoga nei e lua: 1. E leai se faigata o le faalogo atu ma le manino mai Evalu ma Keresema i so o se mea sa fetalai mai ai i totonu o le vanu. 2. O nei mauga e lua sa mafai ona lava lelei mo le potopoto ai o Isaraelu uma.”

O se tasi foi o tagata aʻoga o le Tusi Paia o le senituri lona 19 o William Thomson, na ia faamatalaina i lana tusi The Land and the Book le mea na tupu ia te ia i le vanu lena e faapea: “Sa ou valaau leotele ina ia lagona pe toe foi mai le leo, ma manatunatu ai i le tulaga sa iai i le taimi na alalaga atu ai le au sa Levī i ni leotetele e faalauiloa atu . . . ‘Ia malaia le tagata na te faia so o se faatusa, le mea e inosia e Ieova.’ Ona sosoo ai lea ma le AMENE! e faasefuluina le leotele, mai le faapotopotoga toatele, ua tutū ma alalaga, ma ua toe lagonaina ai leo mai Evalu i Keresema, ma mai Keresema i Evalu.”—Faatusatusa i le Teuteronome 27:11-15.

Le Vanu o Isereelu

I le itu i matu o Sekema o loo taatia mai ai se isi vanu lafulemu, o se vanu e amata mai i lalo ifo o le sami ma faasalafa aʻe e avea ma laugatasi telē. O lenei vaega atoa e taʻua o le Vanu o Isereelu ma sa maua mai lona igoa i le aai o Isereelu. I le itu i matu o le vanu e iai mauga o Kalilaia lea sa iai le aiga o Iesu, i le nuu o Nasareta. Ua faamatalaina i le tusi a George Smith o le Historical Geography of the Holy Land e faapea: “O Nasareta, e i totonu o se vaimauga; ae o le taimi e te aʻea ai le pito o lenei vaimauga, . . . e maeu se vaaiga e te iloa! [O le Vanu o Isereelu] e taatia mai i ou luma, ma ona . . . malae o le taua . . . O se faafanua lea o le talafaasolopito o le Feagaiga Tuai.”

I lenei vanu laugatasi, na eliina ai e tagata suesue i le palapala ni mea na faaleagaina o malo na faatoilaloina e Isaraelu i aso o Iosua, ia e taʻua o Tanaka, o Mekito, o Iokeneama, faapea foi ma Katesa. (Iosua 12:7, 21, 22) I lenei lava laufanua, i aso o le Faamasino o Parako ma le Faamasino o Kitiona, na faasaoina faavavega ai e Ieova ona tagata mai le ave faamalosia e nuu malolosi sa fai ma fili.—Faamasino 5:1, 19-21; 6:33; 7:22.

I senituri mulimuli ane ai, na tietie atu ai le Tupu o Ieu i luga o lenei vanu agaʻi i le aai o Isereelu ina ia faaooina le faasalaga a Ieova ia Iesepela ma le aiga aposetate o Aapo. Mai le olomatamata i Isereelu, atonu e faigofie ai ona iloa atu i le itu i sasae le faalatalata mai o Ieu ma lana itu taua i se mamao e 12 maila [19 kilomita]. O lea, sa tatau ona lava le taimi mo le Tupu o Ioramo e auina atu ai lana avefeau muamua ma lona lua i solofanua, ma mulimuli ane, mo tupu o Isaraelu o Ioramo ma Aasaia o Iuta e feosofi i a la kariota ma faafetaiaia Ieu a o leʻi oo mai o ia i le aai o Isereelu. Sa vave ona faaumatia e Ieu Ioramo. Na sola Aasaia peitai na mulimuli ane lavea, ma oti ai o ia i Mekito.  (2 Tupu 9:16-27) E tusa ai ma malae o taua e pei ona taʻua i luga, na tusia ai e George Smith e faapea: “E matuā mataʻina lava ona e leai ma se tala . . . e iai sina faamatalaga e lē talafeagai.”

E leai la se taumasalosalo o le pogai lea sa masani ai ona silasila ifo Iesu i le Vanu o Isereelu ma mafaufau loloto i manumalo ofoofogia na tutupu ai i inā, i lona iloa faapea o ia o le Mesia folafolaina, sa muai tofia e faataunuuina le tulaga o Iosua Sili, o Parako Sili, o Kitiona Sili, ma Ieu Sili i le taʻumamāina o le pule silisiliese a Ieova. O le mea moni, o loo faaaogāina e le Tusi Paia Mekito, le aai sili e fai ai taua i lenei vanu laugatasi, o se faatusa o le nofoaga o le taua a le Atua o Ha-Maketo (o lona uiga o le “Mauga o Mekito”). O le a avea lena o se taua i le lalolagi aoao, lea o le a faaumatia ai e Iesu Keriso, o le Tupu o tupu, fili uma o le Atua ma fili o le faapotopotoga Kerisiano, o tagata moni o le Atua.—Faaaliga 16:16; 17:14.

Ua taʻua i le Tusi Paia e faapea sa taumafai tagata Iutaia o Nasareta na feita ia Iesu e lafoina ifo o ia ina ia oti i “le tofē o le mauga ua tu ai la latou aai.” (Luka 4:29) Ma e mautinoa, i le itu i saute sisifo o le aai o Nasareta i ona po nei, o loo iai se tofē e 40 futu [12 mita] le maualalo atonu sa ono tupu ai lenei mea. Na sola ese Iesu mai ona fili, ma ua faaopoopo mai le Tusi Paia e faapea, “ona maliu ifo lea o ia i Kapanaumi.” (Luka 4:30, 31) O le mea moni, o Kapanaumi, i le Sami o Kalilaia, e sili atu ona maualalo lona tulaga.

O nei mea ma le tele o isi auiliiliga ua uunaia ai isi e pei o Napoleone, e faaalia le maofa i le saʻo aʻiaʻi o tala a le Tusi Paia e uiga i le lalolagi. Na tusia e Thomson i le tusi The Land and the Book e faapea: “O faamatalaga a le [Tusi Paia] i mea tau faafanua ma nofoaga e matuā lē mafaitaulia, ma e faamalieina atoatoa ai.” Na taʻua foi e Stanley i le Sinai and Palestine e faapea: “E faigata ona lē maofa se tasi i le ioe pea o talafaasolopito faamaumauina ma tala masani o le lalolagi o loo i le Feagaiga Tuai ma le Feagaiga Fou.”

O le ofoofogia o le saʻo aʻiaʻi o le Tusi Paia e tusa ai ma mataupu o tala i le lalolagi ua na o se tasi lea o faamaoniga e iloa ai e lē na o se tusi o le amataga o le tagata. O isi mataupu muamua e tolu o Le Olomatamata o loo iai mataupu faapea e uiga i le Tusi Paia. Matou te valaauliaina oe ina ia e mauaina ma olioli i isi vaega e tolu o lenei faasologa.

[Faafanua i le itulau 7]

(Tagaʻi i le lomiga mo le ata atoa)

VANU O ISEREELU

Isereelu

Nasareta

Tanaka

Mekito

Iokeneama

Katesa

MATU

SAMI O KALILAIA

SAMI TELE

maila

kilomita

5

10

10

20

[Ē Ana le Ata]

Based on a map copyrighted by Pictorial Archive (Near Eastern History) Est. and Survey of Israel.

[Ata i le itulau 5]

Na talia e Isaraelu le Tulafono i le Mauga o Sinai

[Ē Ana le Ata]

Pictorial Archive (Near Eastern History) Est.

[Ē Ana le Ata]

Based on a map copyrighted by Pictorial Archive (Near Eastern History) Est. and Survey of Israel.