Suia e Ieova Taimi ma Tau i Romania

NA AOFIA atoa Europa i Sasae i le suiga o tau i le 1989. I le faagasologa o ni nai masina, na suia ai pulega a malo ia na tutū e pei o ni autau faaauupegaina ina ua faatoilaloina ma ua toilalo atoatoa. Faatasi ai ma suiga o faiga faapolotiki, sa iai foi suiga faavafealoai, suiga tau tamaoaiga, atoa ma le mea sa sili ona naunau i ai Molimau a Ieova, o suiga tau tapuaiga. Mai lea atunuu i lea atunuu, na tuuina atu ai i Molimau a Ieova se faalauiloaga faalemalo, ma le saolotoga o la latou galuega faaletapuaiga ua toe faafoisia atu ia te i latou.

Peitai e foliga mai e eseese ma mea i Romania. Ua matuā taofi mau e le malo tagata na e foliga mai e itiiti so latou aafiaga i le tele o suiga o le a oo mai. Ae ina ua faalogo Molimau a Ieova i inā i mea na tutupu i isi atunuu i le itu i Sasae o Europa, ona latou fesili ifo lea ia i latou lava, ‘Pe o le a mafai ea ona tatou olioli i le saolotoga e fai ai la tatou tapuaiga a o leʻi oo mai Amaketo?’ Ua leva ona latou faanaunau mo se taimi o le a mafai ai ona latou potopoto faatasi i sauniga faa-Kerisiano faatasi ma o latou uso ma tuafāfine faaleagaga, ma talaʻi atu le tala lelei i le lautele, ma saoloto e suesue a latou lomiga faale-Tusi Paia, e aunoa ma le toe tau faia faananā i taimi uma. O na mea uma e foliga mai ua na o se miti.

Ae na faafuasei ona taunuu le miti! Na tupu lena mea ia Tesema 1989. Na faateʻia i latou uma ina ua suia faafuasei le pulega a Ceauşescu. Na faafuasei ona maua e na Kerisiano le mapusaga. Ia Aperila 9, 1990, na faatagaina ai faaletulafono Molimau a Ieova e avea o se faalapotopotoga faaletapuaiga i Romania. Na suia e Ieova taimi ma tau mo le 17,000 Molimau maelega i inā.—Faatusatusa i le Tanielu 2:21.

Se Talafaasolopito Umi

I le 1911, na toe foi mai ai Carol Szabo ma Josif Kiss i Romania mai le Iunaite Setete o Amerika, le mea na la aʻoaʻoina ai le upu moni o le Tusi Paia ma tuuina atu ai o la ola ia Ieova e faia lona  finagalo. Ua la mananao e fetufaai le tala lelei ma tagata o lo la atunuu. O le taimi lava na la taunuu ai i Romania, na amata ai loa ona talaʻi. Ina ua pā le Taua Muamua a le Lalolagi, ona puʻeina ai lea o i laʻua ona o le la galuega sa fai. Ae, o fatu o le Malo na la lūlūina, sa amata ona fua mai ai ni iʻuga lelei. I le 1920, ina ua iloaina le galuega e le malo, e tusa ma le 1,800 le au talaʻi o le Malo sa iai i Romania.

O le taimi lena na malosi ai le agaga fouvale lea na sasao aʻe i Balkans ma sa faateteleina i Romania, ma salalau solo ai le au faatupu faalavelave. E ui lava i na taimi faigata, ae na faaauau pea e o tatou uso faaleagaga le galuega. I le 1924, na tatalaina ai e le Sosaiete o le Olo Matamata se ofisa i le 26 Regina Maria i le Aai i Cluj-Napoca mo le vaaia o le galuega i Romania, Hagakeri, Palakeria, Yugoslavia, ma Alapania.

Ioe, na faateleina pea le tulaga o faiga faapolotiki, e lē gata o faalavelave mai pule faalemalo, ae o faalavelave foi i totonu o le faalapotopotoga. Na lipotia mai i le 1930 Year Book e faapea: “Talu ai ona o le lē faamaoni o lē na auina mai e le Sosaiete i inei, na taapeape solo ai uso ma tuafāfine ma ua matuā lūlūina ai foi lo latou mautinoa. Na toe sailia foi e le Sosaiete nisi avanoa e toe faaolaolaina ai le galuega i lena vaipanoa, ae peitai, sa faasāina e pulega a le atunuu so o se mea, ma e tatau ona tatou faatali i le Alii na te tatalaina se auala e sili atu ona talafeagai.” Ma i le 1930, na tofia ai se Molimau i Romania sa papatiso i le 1922, e avea ma auauna fou i le lālā, ma na mulimuli ane siitia atu le ofisa i le 33 Crişana Street, Bucharest. Ina ua mavae se taimi umi o tauiviga, na lesitalaina ai loa le Sosaiete e avea o se faalapotopotoga ua faatagaina faaletulafono i Romania i le 1933.

Faaauau Tulaga Faigata

Na faaauau pea sauaga matuitui i Molimau i Romania. Na lipotia mai i le 1936 Year Book e faapea: “E aunoa ma se taumasalosalo, e leai lava se isi vaega o le lalolagi e sili atu ona tele faigata na oo i ai i le galuega na i lo Rumania.” E ui lava i nei feuiaiga faigata uma, ae na taʻua mai i le lipoti o le tausaga faaleauaunaga o le 1937 e faapea, e 75 faapotopotoga ma le au talaʻi  e 856 i Romania. E 2,608 na auai i le Faamanatuga.

A o amata le Taua Lona Lua a le Lalolagi, e leʻi faapea na tumau ai le lē aafia o Romania. Ia Setema o le 1940, na puʻea ai le pule e General Ion Antonescu ma amata ai se pulega i le malo e tali tutusa lava ma le pulega a Hitila. Sa avea gaoioiga taufaamataʻu ma mea ua masani ai. E faitau afe o tatou uso ma tuafāfine na faafalepuipuiina, sasaina, ma faataugāina. Ia Setema 1942, na faafalepuipuiina ai le uso o Magyarosi, peitai sa mafai lava ona ia vaaia le galuega mo Transylvania mai le falepuipui.

Sa faaauau pea sauaga ina ua aofia atoa le atunuu e fitafita a Hitila i le 1944. Na faamatala e se lipoti mai Bucharest le tulaga na iai i le taimi o le pulega a Nasi e faapea: “Na matuā sauāina lava Molimau a Ieova i lenei atunuu. Na faafalepuipuiina faatasi ma Komunisi, na tuuaʻia e le au failotu o ē na lagolagoina Hitila e faapea, e sili atu ona leaga Molimau a Ieova na i lo Komunisi, o lea na faasalaina ai le toatele o i matou i le falepuipui mo le 25 tausaga, mo le olaga atoa, po o le faasalaina i le oti.”

Mulimuli ane ia Iuni 1, 1945 ina ua uma le taua, na toe amataina ai galuega a le ofisa o le Sosaiete i Bucharest. E ui lava i faafitauli mo le mauaina o pepa, peitai na lomia lava e le au faigaluega tuutoina atu le silia i le 860,000 tamai tusi ma le sili atu i le 85,000 kopi o le Watchtower i le gagana Romania ma le gagana Hagakeri. Na matuā faamanuiaina e Ieova a latou galuega mamafa. E oo atu i le 1946, ua tusa ma le 1,630 ē fou na papatisoina. O le mea mataʻina i lena tausaga o le tauaofiaga faavaomalo lea na faia i Bucharest ia Setema 28 ma le 29. Sa taumafai malosi taʻitaʻi lotu i le malosi latou te mafaia ina ia faalavelaveina ma taofia ai lenei tauaofiaga, peitai sa lē manuia a latou taumafaiga, ma pe tusa ma le 15,000 tagata na auai i le lauga lautele. O le taimi muamua lea ua mafai ai e uso i Romania ona faia se tauaofiaga faapea.

Na auina atu e le Sosaiete le Uso o Alfred Rütimann mai le lālā i Swiss i Romania. Ia Aokuso 1947, na mafai ai ona ia maua le avanoa e lauga atu ai i uso e sili atu i le 4,500 i oganuu e 16 o loo nonofo ai, e faalaeiauina ai i latou e  faatatau i mea o le a tutupu. E leʻi leva ae toe oo mai foi omiga i Molimau, ma o le taimi lea, o omiga mai pulega faa-Komunisi. Ia Fepuari 1948, na faasāina ai e le pulega faalemalo ona toe lomia ni tusi, atoa ai ma le galuega talaʻi. Ma ia Aokuso 1949, na osofaia ai le ofisa i le 38 Alion Street. E toatele uso, e aofia ai ma le uso o Magyarosi, na puʻea. O le taimi lena, na molia ai i latou faapea o ē lagolagoina pulega a emeperoa, na tuuina atu ai i latou i falepuipui po o nofoaga foi e nofo vaavaaia ai ma faigaluega ai. Mo le isi 40 tausaga, na faasāina ai le galuega, ma na matuā mafatia tele ai Molimau a Ieova. E lē gata i o latou puapuaga mai le malo, ae ua faaopoopo atu foi ma fili e faatupuina fevaevaeaiga i totonu lava o le faalapotopotoga. Mulimuli ane, na paʻū le pulega a Ceausescu’s i le 1989, ma latou saoloto ai loa! O le ā o le a latou faia nei i lo latou saolotoga?

Toe Talaʻi atu i le Lautele

Sa leʻi faamaimauina e Molimau sina taimi. Na amata ai loa lava i le taimi lena ona latou talaʻi atu mai lea fale i lea fale. Peitai ane, sa lē o se mea faigofie lenei mo i latou ua faitau tausagā o faaauau ma le lototele le galuega i se tulaga faalilolilo e ala i le molimau atu lē fuafuaina. Sa latou meia ona o lea ua mafai ona talaʻi atu i le lautele. O le toatele lava o i latou, latou te leʻi faia lava faapea le talaʻiga muamua, ma o le taimi mulimuli lava na faia ai e so o se tasi o i latou le galuega lea o le talaʻi atu mai lea fale i lea fale, o le vaitaimi mai le 1941 e oo i le 1949. O ā ituaiga o iʻuga ua latou maua? Ia seʻi o tatou vāai la i ai.

O se nofoaga lelei lava e amata ai o le laumua lea i Bucharest, lea pe tusa ma le 2.5 miliona tagata e nonofo ai. Sa na o le fā lava faapotopotoga na iai i le aai i le lua tausaga ua mavae. Ae i le taimi nei, ua sefulu faapotopotoga, ma le sili atu i le 2,100 i latou na auai i le faamanatuina o le Faamanatuga i le 1992. Atonu ua toeitiiti nei faatutūina nisi faapotopotoga fou, ona o le agaʻigaʻi i luma o le tele o suesuega faale-Tusi Paia ua faia.

I le itu i saute sisifo o le atunuu, o loo iai le aai o Craiova e tusa ma le 300,000 tagata e nonofo ai. E oo mai i le 1990, e na o le toʻa 80 Molimau sa iai i le aai atoa. Ia ona tupu aʻe ai lea o le agaga faapaeonia i inā, lea na mafai ai ona vave agaʻi i luma le galuega. I le na o le 1992 lava ia, e 74 tagata na papatisoina, ma le sili atu i le 150 suesuega faale-Tusi Paia na faia. Ona ua sili atu i le 200 le au talaʻi, o lea ua latou sailia ai ma le naunautai se nofoaga talafeagai e fausia ai se Maota o le Malo.

I Tirgu-Mures, na ō atu ai ni Molimau o se tuafafine ma ni uso se toʻalua i le patele o le lotu Orthodox ina ia aveesea le igoa o le tuafafine mai le lisi o le aulotu. Ina ua iloa e le patele le mafuaaga o la latou asiasiga, ona ia valaauliaina lea o i latou e ō atu i totonu, ma na faia ai sa latou talanoaga manaia. Ona fai atu lea o le faifeau: “Ou te ita tele ia te outou ae e lē i se auala leaga. E ao ona matou faia le galuega lena tou te faia. E matuā leaga tele ona o le lotu Orthodox o se “sauai matamoe”! Na talia e le faifeau le polosiua Pe Ao ona E Talitonu i le Tolutasi? ma le kopi o Le Olomatamata. Ua fiafia le tuafafine ona e lē o toe avea o ia ma se tasi o lea ituaiga o lotu.”—Faaaliga 18:4.

E ese le moni o lenei mea e faapea, o le toatele o i latou ua aʻoaʻoina le upu moni i aso nei o le au talavou. Aiseā? Ona e foliga mai sa latou faamoemoe faapea pe a suia le malo, o le a tele se lelei e maua mai ai, peitai sa faaseseina i latou. Ua latou fiafia e aʻoaʻoina faapea e na o le Malo lava o Ieova e mafai ona aumaia se vaifofo tumau mo o tatou faafitauli.—Salamo 146:3-5.

Mea Tetele na Tutupu i Nofoaga Laiti

O Ocoliş o se nuu laitiiti i le itu i matu o Romania. I le 1920, na toe foi mai ai se tamaloa e igoa ia Pintea Moise mai le tafā o le taua i Rusia, lea na ave ai o ia ma pagota o le taua. Na avea o ia ma Katoliko i se tasi taimi, peitai na avea o ia ma tagata lotu Papatiso a o leʻi toe foi mai. I le tolu vaiaso mulimuli ane, na asiasi atu ai ia te ia ni Tagata Aʻoga o le Tusi Paia, e pei ona faaigoa ai Molimau a Ieova i lena vaitaimi. Ina ua uma lena asiasiga a Molimau, na ia faapea mai: “O lea ua ou mauaina le upu moni e uiga i le Atua!” E oo atu i le 1924, ua iai se vaega o tagata e toʻa 35 i Ocoliş.

I aso nei, mai le aofai o tagatanuu o le aai e 473, ua iai tagata talaʻi o le Malo e 170 i inā. Ua  tuuina atu i tagata talaʻi taitoatasi aiga e lua e asiasi i ai e fai ma ana oganuu, ma latou te galulue foi i isi nuu o loo siomia ai. Ae o loo tumau pea lo latou fiafia. Faatoʻā uma lava ona fausia lo latou Maota fou o le Malo e tusa ma le 400 nofoa e ofi ai. O na galuega uma na faia lava e Molimau i le faapotopotoga.

I le 1914, na taunuu ai Uso o Szabo ma Kiss i Valea Largă ma nonofo ai. I le 1991, mai le 3,700 o ē na aināina lena aai, e valu faapotopotoga na iai ma le au talaʻi o le Malo e 582. I le Faamanatuga o le 1992, e 1,082 na auai—toetoe lava toʻatasi mai le toʻatolu tagata i lenei vanu.

Saunia e Paeonia Faapito le Ala

Ua faia e paeonia faapito se galuega tele i le faaooina atu o le tala lelei i tagata i oganuu e mamao ese. I le taimi lava na maua ai le saolotoga e faia le talaʻiga, na amata ai ona galue Ionel Alban i aai e lua, i le faaaluina lea o aso e lua o vaiaso taitasi i Orşova ma aso e lima i Turnu-Severin.

Sa leai ni Molimau i Orşova i le taimi na taunuu atu ai Ionel. I le vaiaso muamua lava, na ia amataina ai se suesuega faale-Tusi Paia ma se tamaitiiti e 14 tausaga le matua. Sa faia e le tama ni suiga se tele i le lua masina, lea na ala ai ona amata e lana uō ma lona tuaoi ona suesueina le Tusi Paia. Ua faia e le tuaoi o Roland, na avea muamua ma Katoliko, se agaʻigaʻi i luma uigaese. Ina ua mavae le masina e tasi ma le afa o faia le suesuega, ona ia aufaatasi atu lea ma Ionel i le galuega talaʻi, ma i lona lima o masina na papatiso ai loa o ia. Ona ulu atu loa lea o ia i le faiva faasauatoa. Na amata ai foi e lona tinā ona suesue ma na papatisoina i le tausaga e 1992 i le Tauaofiaga Itumalo “O Ē Faasusulu atu le Malamalama.” O le taimi la lenei, ua toʻa sefulu le au talaʻi i Orşova, ma ua latou faia ni suesuega faale-Tusi Paia se 30.

O le tagata muamua lava na ia taliaina le upu moni i Turnu-Severin o se tagata talitelefoni i le faletalimalo lea sa nofo ai Ionel. Ina ua mavae le lua masina, ona avea lea o lenei tamaloa ma tagata talaʻi e leʻi papatisoina. Ua avea nei o ia o se tasi o le toʻa 32 o tagata talaʻi i inā o loo faia ni suesuega faale-Tusi Paia i aiga e 84.

O le tasi paeonia faapito, o Gabriela Geica, o se tuafafine, sa auauna o se paeonia sauatoa e ui lava i lena taimi na faasāina ai le galuega. O lona faanaunauga o le galue lea i le mea o loo tele ai le manaomia. Sa tofia o ia i se oganuu e matuā mamao ese lava. I nisi taimi e malaga ai o ia mai le 60 i le 100 maila [100 i le 160 kilomita] e asiasi atu i tagata loto naunau. O le tasi aai sa ia galue ai o Motru, e na o le toafā lava Molimau na iai. Fai mai o ia: “Talu ai ona o le faateleina o galuega i Motru, na amata ai e faifeau ma isi vaega faalotu ona tetee ia i matou. Na latou uunaia pulenuu ma leoleo ina ia tuu atu ni omiga i aiga ia sa ou nofo ai. Na latou tuli faamalosi ese aʻu, o lea e toetoe lava o masina uma ou te vaavaai solo ai mo se nofoaga ou te nofo ai.”

Na amata e Gabriela se suesuega ma se fafine i Orsova e lē talitonu i le Atua, o lē na faapea mai e lē fiafia i le lotu po o le Tusi Paia. Peitai, ina ua mavae le fā masina o fai le suesuega, ona amata loa lea e le fafine ona talitonu ma le mausalī i le Tusi Paia. E ui lava ina taofia e lana tane o ia i fafo mai le fale i le po ma faamataʻu o ia e tatala le faaipoipoga po o le fasioti o ia, ae sa tumau pea lona faamaoni. E oo lava i le taimi e leʻi papatiso ai o ia, ae sa ia faia ni suesuega faale-Tusi Paia se sefulu.

Faamoemoega Ofoofogia mo le Lumanai

Ia Aokuso 1992, na ausia ai e Romania se tumutumuga e 24,752 le au talaʻi i faapotopotoga e 286. E sili atu i le 66,000 na auai i le Faamanatuga. I le tamai ofisa i le lālā i Bucharest, e toʻa 17 o loo galulue ai i le faia o le mea e sili latou te mafaia mo le vaaia o manaoga faaleagaga o o latou uso. O loo latou vāai atu i se lumanai lata mai mo le fausiaina o se lālā telē i inā.

Ua matuā maofa Molimau a Ieova i Romania ona o suiga tetele ua latou maua i nai tausaga ua tuanai atu. Ua latou matuā loto faafetai ia Ieova le Atua ona ua avea i latou ma vaega o le faapotopotoga faavaomalo lea o loo faalauiloaina lona suafa ma tataʻia tagata i le poto saʻo e uiga ia te ia ma ana fuafuaga lē masuia. Ina ua mavae le tele o tausaga o faigata ma sauaga, maeu so latou loto faafetai ia Ieova ona o lona suia moni o taimi ma tau i Romania!

[Faafanua i le itulau 23]

(Tagaʻi i le lomiga mo le ata atoa)

HAGAKERI

ROMANIA

Bucharest

Cluj-Napoca

Craiova

Tirgu-Mures

Orşova

Turnu-Severin

Motru

Turda

PALAKERIA

[Ata i le itulau 24, 25]

1. E tusa ma le 700 Molimau na faapotopoto i lalo o laau i le 1947

2. Le pepa sa faasalalauina mo le lauga lautele i le 1946

3. Le fonotaga i Alba Iulia i le 1992

4. Le molimau atu i Cluj-Napoca i aso nei

5. Le Maota o le Malo e latalata i Turda

6. Le Aiga Peteli i Bucharest