Lipoti a Ē Faalauiloa le Malo

Ua Ia Maua se Faamoemoe i le Olaga

NA FETALAI Iesu, na te iloa ana mamoe. (Ioane 10:14) Afai e lelei le loto o se tagata ma alofa i le filemu ma le amiotonu, o le a tosina atu lena tagata i soʻo o Iesu. O le a maua e lena tagata se faamoemoe i le olaga, e pei ona maua e se tasi fafine i Peleseuma. O lana tala lenei:

“A o tuʻituʻi mai Molimau a Ieova i loʻu faitotoa, ae o le taimi lea o loo oʻu mafatia ma ou mafaufau o le a ou pule i loʻu ola. Sa ou fiafia i le talanoa mai a Molimau e uiga i se vaifofō i faafitauli o lenei lalolagi faamaʻia, ae sa ou lē fiafia i le manatu faapea o le a aafia ai le Atua. I le valu tausaga ua mavae, ou te leʻi toe alu lava i se lotu, ona sa ou inoino i faiga pepelo na ou vaaia ai i inā. Ae i Molimau, sa ou iloa o le upu moni lea na latou fai mai ai ma na ou iloa ai, e faigata ona ola e aunoa ma le Atua.

“E faanoanoa, ona ina ua uma ni nai asiasiga, sa ou lē toe maua se fesootaiga ma Molimau. Sa oo ia te aʻu se faalogona lē lelei. Sa ou ulaina pepa sikaleti e lua i le aso ma tagofia foi fualaau faasāina. I loʻu manao e talanoa atu i loʻu tuaā ua maliu, sa ou saili atu ai i faiga faataulaitu. O le iʻuga sa ou matuā fefevale pe a na o aʻu i le po, ona sa ou lagona le osofaia o aʻu e temoni! E tele masina sa tupu ai lenei mea. O po uma lava, sa ou matuā fefe ai i loʻu nofo toatasi.

“Ona oo lea i se tasi aso, sa ou alu ai ou te savalivali, sa ou ui atu i se auala e ese mai le auala e masani ona ou ui ai, ma na ou oo atu ai i se nofoaga telē o loo fau ai se fale. Sa ou matuā ofo i loʻu vaaia o se motu o tagata e toatele i inā. Sa ou faalatalata atu, ma ou vaaia ai o Molimau a Ieova o loo faagasolo le fauina o se Maota o le Malo. Sa ou manatua asiasiga na faia e Molimau a Ieova i loʻu fale, ma sa ou manatu ai faapea, maeu le matagofie na semanū e iai le lalolagi pe ana faapea e mafai ona ola tagata uma o le lalolagi e pei o nei tagata.

“Sa ou moomoo lava maimau pe ana toe foi atu Molimau i loʻu fale, o lea na ou talanoa atu ai i nisi na galulue ai i le maota. Sa ou tatalo i le Atua, ma i le sefulu aso mulimuli ane ai, na oo mai ai le tamāloa lea na ia uluai faafesootaia aʻu i loʻu fale. Sa ia fautua mai ina ia toe faaauau le ma suesuega faale-Tusi Paia, ma sa ou malie i ai ma le fiafia. Sa ia valaaulia foi aʻu i le taimi lava lena i sauniga i le Maota o le Malo. Sa ou talia. Ou te leʻi vaai lava i se mea faapea muamua! Ua leva ona ou sailia tagata e fealofani ma fiafia. Ma o lenei faatoʻā ou maua!

“Mulimuli ane, sa ou alu i sauniga uma. Ina ua mavae pe tusa o le tolu vaiaso, sa ou taofia laʻu masani leaga o le ulaula. Sa ou lafoaia aʻu tusi faavaaifetu ma musika faasatani, ma sa ou lagona ua mataga atu temoni ma aʻu. Sa ou faatulaga lelei loʻu olaga e tusa ai ma tapulaa faale-Tusi Paia a Ieova, ma ina ua mavae le tolu masina, sa amata loa ona ou talaʻi atu le tala lelei. Ina ua mavae le ono masina, sa ou papatiso loa. I le lua o aso talu ona uma loʻu papatisoga, sa amata ai laʻu paeonia lagolago.

“Ou te faafetaia Ieova mo mea lelei uma na ia faia mo aʻu. Ua iai nei se faamoemoe o loʻu olaga. Ioe, o le suafa o Ieova o le ʻolo malosi lea ua ou maua ai le sulufaiga ma le puipuiga. (Faataoto 18:10) Ua ou lagona moni lava e pei o le faisalamo ina ua ia tusi mai faapea i le Salamo 84:10: ‘E sili le aso e tasi i ou lotoā i lo le afe. E sili loʻu manao ia aʻu tu i le faitotoa o le fale o loʻu Atua, i le manao e mau i fale ie o e amio leaga.’”

Ua maua e lenei fafine loto maulalo se faamoemoe i lona olaga. O lena foi le tulaga e mafai ona maua e so o se tasi o lē saili ia Ieova ma le loto lelei.