Fonotaga Faaletausaga

OKETOPA 2, 1993

O LE FONOTAGA FAALETAUSAGA a sui o le Watch Tower Bible and Tract Society of Pennsylvania o le a faia ia Oketopa 2, 1993, i le Maota Fono o Molimau a Ieova, 2932 Kennedy Boulevard, Jersey City, New Jersey. O le a faia muamua se fonotaga faapitoa mo sui i le 9:30 i le taeao, ona sosoo ai lea ma le fonotaga lautele faaletausaga i le 10:00 i lena lava taeao.

E ao i sui uma o le Faalapotopotoga ona faafesootai le Ofisa o le Failautusi i le taimi nei pe afai ua sui o latou tuātusi o le tausaga ua teʻa ina ia maua vave atu ai tusi masani o faasilasilaga ma tusi e faamaonia ai le auai pe leai pe a mavae Aokuso 1.

O tusi faamaonia ia o le a aauina atu i sui faatasi ai ma le faaaliga o le fono faaletausaga, e tatau ona toe faafoi mai ina ia taunuu i le Ofisa o le Failautusi o le Sosaiete ia lē silia le aso 15 o Aokuso. E ao i sui taitoatasi ona faatumu ma vave faafoi mai lana tusi, e taʻu mai ai po o le a ia auai totino i le fonotaga pe leai. O faamatalaga e tusia mai i tusi taitasi e ao ona maʻoti i lenei mataupu, talu ai ona o le a faalagolago iai le mautinoa o ē o le a auai mai.

E faatalitalia faapea o le fonotaga atoa, e aofia ai le fono aloaia faapisinisi ma lipoti, o le a faaiʻuina i le 1.00 i le afiafi po o se taimi tau lata ane. O le a leai se vaega i le afiafi. Ona o le lē lava o le avanoa, o lea na o ē lava ua iai pepa faamaonia e taliaina i totonu. E leai ni fuafuaga e faia mo le fesootai atu o le fonotaga faaletausaga e auala i laina telefoni i isi maota fono.