O Ieova—O le Atua Moni ma Lē o Soifua

SA TAUTALA faamaualuga ma le faasausili Farao o Aikupito ina ua ia fesili faapea: “O ai ea Ieova?” (Esoto 5:2) E pei ona faaalia i le mataupu na seʻi mavae atu, o lena uiga na aumaia ai mala ma le oti i tagata Aikupito, e aofia ai ma se tuugamau vai mo Farao ma ana vaegaau.

I Aikupito anamua, sa faamaonia ai e Ieova le Atua lona silisiliese i luga o atua pepelo. Ae e tele nauā isi mea e tatau ona aʻoaʻoina e uiga ia te ia. O ā nisi o vala o lona peresona? Ma o le ā o loo ia manaomia mai ia i tatou?

Lona Suafa ma Lona Taʻutaʻua

Ina ua tapā e le Atua mea manaomia mai ia Farao o Aikupito, sa leʻi faapea atu Mose: ‘Ua  fetalai mai le Alii e faapea ma faapea.’ Sa manatu Farao ma isi tagata Aikupito i le tele o o latou atua sese o ni alii. E leai, sa faaaogā e Mose le suafa o le Atua, o Ieova. Sa faalogo iai o ia lava o taʻu mai lugā a o iai o ia i le vao na mu i le nuu o Mitiana. Fai mai le faamaumauga faagaeeina:

“Ua fetalai mai foi le Atua ia Mose, o loo faapea mai ia te ia, O aʻu nei o Ieova. . . . O aʻu foi na ou faalogo i le feoi o le fanauga a Isaraelu, o e ua faapologaina e Aikupito, ua ou manatua foi laʻu feagaiga. O lenei, fai atu i le fanauga a Isaraelu, O aʻu o Ieova, ou te aumaia outou i lalo o avega mamafa a Aikupito; ou te laveai mai foi ia te outou ai a latou galuega, ou te faaolaina mai foi outou i le lima faaloaloa ma sala tetele. Ou te faia outou moʻu nuu, e fai foi aʻu mo outou Atua; tou te iloa foi o aʻu lava o Ieova, o lo outou Atua, o le aumaia outou i lalo o avega mamafa a Aikupito. Ou te faaooina atu foi outou i le nuu [o Kanana] na ou siitia ai loʻu lima [“ma ou tauto ai,” NW] ou te avatu ia [i o outou tamā o] Aperaamo, ma Isaako, ma Iakopo, ou te avatu ai ia te outou ma tofi; o aʻu nei o Ieova.”—Esoto 6:1-8.

O le mea tonu lava lena na faia e Ieova. Sa ia faasaolotoina tagata Isaraelu mai noataga i Aikupito na mafai ai ona latou aināina le nuu o Kanana. E pei ona folafolaina, na faapogaia e le Atua nei mea uma ia tutupu. Maeu le fetaui lelei! O lona suafa o Ieova, o lona uiga “o Ia ua Pogai ai Ona Iai.” Ua faasino atu e le Tusi Paia ia Ieova i taʻu e pei o le “Atua,” o le “Alii Pule Silisiliese,” o “Lē na Foafoaina Mea,” o le “Tamā,” o “Lē e Ona le Malosi Uma,” ma “Lē Silisili ona Maualuga.” Peitai o lona suafa o Ieova ua mātauina ai o ia o le Atua moni o lē na te faataunuuina faasolosolo mai ana fuafuaga silisili.—Isaia 42:8.

Afai tatou te faitauina le Tusi Paia i ona uluai gagana na lomia ai, o le a tatou maua ai, e faaafe ona taʻua ai le suafa o le Atua. I le faa-Eperu ua suia e konesane e fā o Yod He Waw He (יהוה), ua taʻua o le Tetragrammaton (mataitusi e fa), e faitauina mai le taumatau i le tauagavale. O i latou e tautatala i le gagana Eperu sa latou tuuina i ai vaueli ina ia maua ai ni faaleoga, ae ua lē mautinoa e tagata i aso nei po o ā na vaueli. A o fiafia nisi i le sipelaga o le Yahweh, a ua taatele lava le upu Ieova (Jehovah) ma ua faailoa mai ai ma le talafeagai Lē na Foafoaina i tatou.

O le faaaogāina foi o le suafa o Ieova, ua faaesea ai le Atua mai lē ua taʻua o “loʻu Alii” i le Salamo 110:1, lea o loo faapea mai se isi faaliliuga: “Ua fetalai mai le ALII [i le faa-Eperu, יהוה] i loʻu Alii, Ia e nofo i loʻu itu taumatau, seia ou faia ou fili ma mea e tū ai ou vae.” (King James Version) I le iloa lelei o le iai o le suafa o le Atua i inei i le Tusi Paia Eperu, ua faitauina faapenei le Tusi Paia Samoa: “Ua tulei mai le afioga a Ieova i loʻu Alii, Ia e nofo i loʻu itu taumatau, seia ou faia e ua ita ia te oe ma mea e tu ai ou vae.” O na tuleiga a Ieova, sa faasino faavaloaga ia Iesu Keriso, o lē na taʻua e le tusitala o lenei salamo o “loʻu Alii.”

Na faia e Ieova se suafa mo ia lava i aso o Farao. E ala ia Mose, na taʻu atu ai e le Atua i lena tupu loto maʻaʻa e faapea: “Auā o ona po nei lava ou te tuuina atu ai aʻu mala uma lava i luga ia te oe, ma au auauna, ma lou nuu, ina ia e iloa ai e leai lava se tasi e tusa ma aʻu i le lalolagi uma lava. Auā o le a aʻu faaloaloa nei loʻu lima, ou te taia oe ma lou nuu i le faamaʻi, ina ia fano ai oe i le nuu. E moni lava, o le mea lava lea ua ou faatuina ai oe, ina ia ou faaali ai loʻu mana ia te oe, ma ia taʻua loʻu igoa i le lalolagi uma lava.”—Esoto 9:14-16.

E faatatau i le malaga ese atu o tagata Isaraelu mai Aikupito, ma le faatoilaloina o nisi o tupu o Kanana, na taʻu atu ai e le fafine o Raava o Ieriko i sipai Eperu e toalua e faapea: “Ua ou iloa ua foaiina atu e Ieova le nuu ia te outou [tagata Isaraelu], ma ua oo mai lo outou matautia ia te i matou, ma ua faavaivaia ona o outou o i latou uma e nonofo i le nuu. Auā ua matou faalogo na faamateina e Ieova le suāsami o le sami Ulaula ona o outou, ina  ua outou o mai mai Aikupito; i le ma mea na outou faia i tupu e toalua o sa Amorī o Sekono ma Oko, o e sa i le la itu o Ioritana, na outou faaumatia i laua. Na matou faalogo i ia mea, ona liu suāvai ai lea o matou loto ua le toe ai lava se malosi i se tagata, ona o outou; auā o Ieova lo outou Atua, o le Atua ia i le lagi i luga, ma le lalolagi i lalo nei.” (Iosua 2:9-11) Ioe, sa salalau atu le taʻutaʻua o Ieova.

O Ieova ma Ona Uiga

Sa faaalia e le faisalamo lenei faanaunauga mai le loto e faapea: “Ina ia iloa e i latou, o oe, e ou le suafa o Ieova, na o oe lava o le Silisili Ese i le lalolagi uma.” (Salamo 83:18) Ona o le pule silisiliese a Ieova e aofia ai le lagi ma le lalolagi, o lea, sa mafai ai ona tatalo soʻo na sauāina o Iesu: “Le Alii e, o le Atua oe, o le na faia le lagi, ma le lalolagi, ma le sami, ma mea uma lava o i ai.” (Galuega 4:24) Ma maeu se faamafanafanaga ina ua iloa faapea o Ieova o le “Faafofoga tatalo”!—Salamo 65:2.

O le uiga sili o Ieova o le alofa. E moni, o le “Atua o le alofa”—e tutasi o ia i lenei uiga. (1 Ioane 4:8) E lē gata i lea, “o loo ia te ia le poto ma le malosi.” O Ieova e ona le poto uma ma le malosi uma, ae lē taitai ona ia faaaogāseseina lona malosi. (Iopu 12:13; 37:23) E mafai foi ona tatou mautinoa faapea o le a feutagai pea ma le tonu Ieova ma i tatou, auā o le “amiotonu ma le faamasinoga o loo tumau ai lona nofoālii.” (Salamo 97:2) Afai tatou te sese ae ua salamō, e mafai ona tatou maua le faamafanafanaga i le iloa faapea o Ieova o “le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) E letioa ona tatou maua le olioli i le auauna atu ia Ieova!—Salamo 100:1-5.

Le Tupu Faalelagi e lē Mafaatusalia

Na fetalai mai le Alo o Ieova, o Iesu Keriso: “O le Atua o le agaga lava ia.” (Ioane 4:24) O lea, e lē mafai ona vaaia Ieova e mata faaletagata. O le mea moni, na taʻu atu e Ieova ia Mose e faapea: “E te le mafaia ona vaai mai i oʻu mata; auā e le mafai ona vaai mai lava se tagata ia te aʻu, ma ola pea ia.” (Esoto 33:20) E matuā mamalu lava lenei Tupu faalelagi o lea, e lē mafai ai ona ola pea pe tumau se tagata pe a vaai ia te ia.

E ui lava e lē mafai ona tatou vaaia Ieova, ae tele faamaoniga e molimau i lona soifua pea e avea o se Atua e ou le Malosi Uma lava. E moni, “o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua.” (Roma 1:20) O le lalolagi—ma lona mutia, laau, fua o laau, laau ʻaina ma fugalaau—ua molimau i le tulaga tau Atua o Ieova. I le lē pei o atua o faatusa le aogā, o Ieova na te aumaia le timu ma fuata o laau. (Galuega 14:16, 17) Tagaʻi foi i fetu o le lagi i le po. Pagā se faamaoniga ofoofogia o le tulaga tau Atua o Ieova ma lona tomai e faamaopoopo ai mea uma!

Ua faamaopoopoina foi e Ieova ana foafoaga agaga atamamai i le lagi. I le avea o se  faalapotopotoga autasi, ua latou faia ai le finagalo o le Atua, e pei ona fai mai le faisalamo e faapea: “Faamanū atu ia ia Ieova outou ana agelu o e malolosi tele, o e faia lana afioga, o loo faalogo i lona siufofoga. Faamanū atu ia ia Ieova outou ana ʻau uma lava, o outou ana auauna, o e faia lona finagalo.” (Salamo 103:20, 21) Ua faamaopoopoina foi e Ieova ona tagata i le lalolagi. Sa lelei ona faamaopoopoina le nuu o Isaraelu, ma sa faapena foi uluai soʻo o le Alo o le Atua. E faapena foi i aso nei, o loo iai se faalapotopotoga a Ieova i le lalolagi aoao, o Molimau maelega o loo faalauiloa atu le tala lelei faapea ua lata mai lona Malo.—Mataio 24:14.

O Ieova o le Atua Moni ma Lē o Soifua

O le tulaga tau Atua o Ieova sa faatinoina i le tele naʻuā o auala! Sa ia faatoilaloina atua sese o Aikupito ma aumaia ma le saogalemu tagata Isaraelu i le Nuu o le Folafolaga. Ua aumaia e le foafoaga, le anoanoai o molimau e faamaonia ai le tulaga tau Atua o Ieova. Ma e matuā leai lava se faatusatusaga i le va o ia ma atua o faatusa lē aogā a lotu pepelo.

Na faaalia e le perofeta o Ieremia se eseesega tele i le va o Ieova, le Atua soifua, ma tupua e leai ni ola na faia e tagata. Ua faamatalaina lelei lava lena eseesega i le Ieremia mataupu 10. Faatasi ai ma isi mea, na tusia faapea e Ieremia: “O Ieova o le Atua moni ia, o ia lava o le Atua soifua, ma le Tupu e faavavau.” (Ieremia 10:10) O le Atua moni ma o loo soifua pea, o Ieova, na faia mea uma lava. Na ia laveaiina tagata Isaraelu ua vaivai ona o noataga i Aikupito. E leai se mea e faigata ia te ia.

O Ieova, “le Tupu o le vavau,” o le a ia tali mai i le tatalo: “Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (1 Timoteo 1:17; Mataio 6:9, 10) O le Malo Faa-Mesia faalelagi, ua iai nei i aao o Iesu Keriso, ua lē o toe umi se taimi ona gaoioi loa lea faasaga i ē amio leaga ma faaumatia fili uma o Ieova. (Tanielu 7:13, 14) O le Malo foi lena o le a na aumaia se laloalgi fou o faamanuiaga e lē uma mo tagata usiusitai.—2 Peteru 3:13.

E tele lava nisi mea e ao ona aʻoaʻoina e uiga ia Ieova ma ana fuafuaga. Aiseā e lē faia ai sau filifiliga maumauai e aveina i fale lena poto saʻo ma gaoioi e tusa ai ma lena poto? Afai e te faia lenei mea, o le a faaeaina oe e olioli i le ola e faavavau i se parataiso faalelalolagi i lalo o le pulega a le Malo. O le a e ola pea e vaai ua mavae atu le faanoanoa, tigā, ma e oo lava i le oti, ma o le a faatumuina le lalolagi i le malamalama o Ieova. (Isaia 11:9; Faaaliga 21:1-4) E mafai ona e maua na mea uma i le lumanai pe afai e te saili, maua, ma gaoioi e talafeagai ma tali e faavae mai le Tusi Paia i le fesili, “O ai ea Ieova?”

[Ē Ana le Ata i le itulau 7]

Pictorial Archive (Near Eastern History) Est.