O le Tele o Oa e Mafai ona Tofotofoina ai Lou Faatuatua

O LE tele o oa e mafai ona tofotofoina ai le faatuatua o se tagata amio saʻo. O le tauivi ina ia mauoa i le faaletino, e mafai ona leiloa ai le faatuatua. (1 Timoteo 6:9, 10) Ae e mafai foi e le tele o oa ona tofotofoina ai le faatuatua i se isi auala. Pe a mātauina e se tagata amiotonu faapea e toatele lava tagata amioletonu o loo mauoa i mea faitino ae o loo puapuagatia o ia, e mafai ona tofotofoina ai o ia e tuliloa se auala lē amioatua. Ioe, o lenei mea sa iʻu ai ina masalomia e oo lava i nisi o auauna a Ieova le tāua o le ola i se olaga amio saʻo!

O le mea lenei na tupu i se tagata fatu pese sa Levī o Asafo i le taimi o le pulega a le tupu o Isaraelu o Tavita. Sa fatuina e Asafo salamo sa faaaogā i le tapuaiga lautele. Faatasi ai ma Hemana ma Iutana, sa ia valoia foi le avatua ia Ieova le Atua o le viiga ma le faafetai faatasi ma pesega. (1 Nofoaiga a Tupu 25:1; 2 Nofoaiga a Tupu 29:30) E ui lava sa maua e Asafo faaeaga, ae ua faaalia i le Salamo 73 e faapea, sa avea le mauoa o tagata amio leaga ma tofotofoga tele i lona faatuatua.

Le Uiga Mataʻutia o Asafo

“E moni lava, e agalelei mai le Atua ia Isaraelu, o e ua mamā o latou loto. A o aʻu nei, e toe ina papeva oʻu vae; e toetoe lava ina see oʻu vae.” (Salamo 73:1, 2) E ala i nei upu, na faailoa atu ai e Asafo faapea sa agalelei Ieova i le nuu o Isaraelu. Ae maise lava ia i latou sa “mamā o latou loto,” auā o lo latou faanaunauga ia tuutoina atu i le Atua ma saosaolaumea i le faapaiaina o lona suafa paia. Afai e iai ia i tatou lena uiga, o le a tatou faamanūina la Ieova e ala i le tautala lelei e uiga ia te ia e tusa lava pe matuā tofotofoina ai i tatou ona o le mauoa o ē amio leaga pe ala i so o se isi lava tulaga.—Salamo 145:1, 2.

E ui lava ina sa iloa e Asafo le agalelei o Ieova, ae na toetoe lava a see ese ona vae mai le ala amiotonu. Sa foliga mai e pei lava o loo sesee i se laufanua aisā i le taimi o se marafoni ua vaivai ai. Aiseā na matuā vaivai ai lona faatuatua? Na ia faamatala mai faapea: “Auā na ou mataua i e vālea; na ou vaai i le manuia o e ua amio leaga. Auā e leai ni o latou puapuaga e oo i le oti; a ua puputa pea o latou tino. E le oo ia te i latou puapuaga faatagata ola, e le pesia [malaia, “NW”] foi i latou faatasi ma isi tagata.—Salamo 73:3-5.

O le mauoa faaletino o tagata amio leaga na mataua ai Asafo ia i latou. E foliga mai sa olioli pea i latou i se olaga filemu, e ui lava sa latou maua a latou oa i auala faaʻoleʻole. (Faatusatusa i le Salamo 37:1.) E ui lava i a latou galuega leaga, ae foliga mai i fafo sa saogalemu pea i latou. Ioe, e foliga mai sa iʻu lava o latou olaga e aunoa ma ni tiga e oo i le oti! I nisi taimi sa oti filemu ma le mautinoa i latou, e aunoa ma le iloa o se manaoga faaleagaga. (Mataio 5:3) I le isi itu, sa tigaina nisi o auauna a le Atua i maʻi tiga ma le oti, ae na ia tausia i latou, ma ua latou maua le faamoemoe ofoofogia o le toetu.—Salamo 43:1-3; Ioane 5:28, 29.

E toatele tagata amio leaga e leai ni faafitauli o le soifua malōlōina e taofia ai i latou mai le olioli i le anoanoai o a latou meaʻai. “Ua puputa pea o latou tino,” ua lapopoa o latou manava. E lē gata i lea, e lē oo ia i latou “puapuaga faatagata ola,” auā e lē pei o le anoanoai o tagata, latou te lē tautigā ina ia maua mea manaomia o le olaga. Na faaiʻu mai e  Asafo faapea, o ē amio leaga “e lē pesia foi i latou faatasi ma isi tagata.” Ae maise lava e lē oo ia i latou mala na o loo tofo i ai tagata o le Atua auā o i latou na o loo pipiimau i tapulaa amiotonu a Ieova i le lalolagi amio leaga a Satani.—1 Ioane 5:19.

Ona o le mauoa o tagata amio leaga, na faaauau ai ona faapea mai Asafo e uiga ia i latou: “O le mea lea ua asoa ai i latou i le faamaualuga; o le saua ua fai ma ofu latou te oofu ai. Ua lululu o latou mata; latou te faasilisili i manatu o le loto. Ua latou tauemu, ma ua tautala leaga i le saua; ua latou tautala faamaualuga. Ua upuvale o latou gutu i le lagi; ua feoai foi o latou laulaufaiva i le lalolagi.”—Salamo 73:6-9.

Ua fai ma “asoa” a ē amio leaga le faamaualuga, ma ua matuā tele a latou galuega sauā ‘ua ufitia ai i latou e pei o se ofu.’ Ona o lo latou loto maʻaʻa e faia o latou lava ala, ua latou faifaiupu ai i isi. E lē oomo mata o ē amio leaga ona o le lē lava o a latou meaʻai ae ua ‘lululu ona o le puputa,’ ua veveni ona o le ʻai tetele. (Faataoto 23:20) O le matuā taulau o a latou taumafaiga ua oo lava ina latou ‘lē amanaia ai manatu o o latou loto.’ Ua latou tautala faasausili ma “faamaualuga” i a latou oa e maua i le faaʻoleʻole. Ioe, ‘ua upu vale o latou gutu i le lagi, ma o latou laulaufaiva ua feoai i le lalolagi’! E matuā leai se faaaloalo i se tasi i le lagi po o le lalolagi, ua latou taʻu faatauvaaina tagata ma upu vale i le Atua.

E foliga mai, sa lē na o Asafo sa aafia i mea na ia vaai i ai. Na faapea mai o ia: “O le mea lea na [faafoi, “NW”] mai ai e [“e ia”] lona nuu iinei; e faainumia foi i latou i le vai e tele. E faapea a latou, Pe faapefea ona silafia e le Atua? Pe silafia ea e lē Silisili ese?” (Salamo 73:10, 11) O le mau faa-Eperu e mafai ona uiga faapea, ona e foliga mai sa mauoa ē amio leaga, o lea sa faaaogā ai e nisi tagata o le Atua se manatu sese ma pei ai lava i latou o tagata solitulafono, i le faapea mai: ‘E lē silafia e le Atua le mea o loo tupu ma o le a leai se mea na te faia i le amio leaga.’ I le isi itu, o le vaai atu i tagata amio leaga o faia le solitulafono ae lē o faasalaina, ua pei o loo inu i se vai oona, e faapogaia ai le tagata amio saʻo e fesili: ‘E mafai faapefea ona faapalepale le Atua i nei mea? Pe lē o silafia ea e ia le mea o loo tupu?’

I le faatusatusaina o lona tulaga ma ē amio leaga, na faapea mai ai Asafo: “Faauta, o i latou nei o e amio leaga, e ua manuia i le olaga nei; e faateleina o latou oloa. E moni lava, ua ou faamamāfuaina loʻu loto, ma aʻu fafano oʻu lima ina ua ou le sala, a e fai fua lava. Ua taia lava aʻu i aso fai soo, ua aoaiina foi aʻu i taeao uma lava.” (Salamo 73:12-14) Sa lagona e Asafo faapea e lē aogā ona ola i se olaga amio saʻo. O loo mauoloa tagata amio leaga, ma faapena ona ‘faateleina a latou oloa’ ona o auala faaʻoleʻole. E foliga mai e mafai ona latou sao mai faasalaga mo mea sili ona leaga na latou faia, ae sa tiga pea Asafo “i aso fai soo”—mai lava i le taeao ina ua ia ala mai seia moe o ia i le po. Sa ia lagona faapea sa aoaiina o ia e Ieova i taeao uma. Ona sa foliga mai e lē fetaui lenei mea, o lea na tofotofoina ai le faatuatua o Asafo.

Suia Manatu

I le iʻuga, ina ua iloa e sese ona manatu, na taʻua ai e Asafo e faapea: “Afai ou te faapea ane, Ou te taʻutaʻu atu faapena; faauta, ona ou faaʻoleʻole lea i le tupulaga o lau fanau. Na ou mafaufau lava ia aʻu iloa lenei mea; o le mea faatiga lava lea i loʻu manatu; ua oo i le aso na ou alu atu ai i le malumalu o le Atua; ona ou iloa ai lea o lo latou iuga. E moni lava, na e tuuina atu i latou i mea maseesee; na e faapaūina atu i latou i mea faatafunaina. Aue! ua faafuasei ona faatafunaina o i latou; ua fano i latou, ua faaumatia lava ona o mea matautia. “E pei o le miti ina o tulaʻi se tasi, e faapea foi oe le Alii i lou maleifua, e te taʻu faatauvaaina lo latou ata”.—Salamo 73:15-20.

O se mea lelei ona sa leʻi faaleoina atu e Asafo se faitioga, auā o le faapea atu i le lautele e lē aogā ona auauna ia Ieova, atonu o le  a faalotovaivaia ai tagata o ē auai i le tapuaiga pe atonu e ōia ai foi lo latou faatuatua. Maeu le sili ona lelei pe a aua le fai atu se upu, ae faia le mea sa faia e Asafo! I le iloaina o le pogai e foliga mai ai e sao le tagata amio leaga mai ana mea sese na fai, ae o loo puapuagatia le tagata amio saʻo, na alu ai loa o ia i le malumalu o le Atua. O lena siomaga sa mafai ona mafaufau lemū ifo ai Asafo faatasi ma tagata tapuai o Ieova, ma sa suia ai ona manatu. O lea, i aso nei afai tatou te fenuminumiaʻi ona o mea ua tatou vaaia, seʻi faapena foi ona tatou sailia tali o a tatou fesili e ala i lo tatou auaufaatasi ma tagata o le Atua na i lo o le faaesea o i tatou lava.—Faataoto 18:1.

Sa oo ina iloa e Asafo faapea sa tuu e le Atua ē amio leaga “i mea maseesee.” Ona sa faaautū o latou olaga i mea faitino, sa lamatia ai i latou i le oo iai o se paʻū faafuasei. Ma i le iʻuga, o le a oo ia i latou le oti pe a tagata matutua, ma o a latou oloa na maua i auala lē faamaoni o le a lē faamautinoa ai se ola faafualoa mo i latou. (Salamo 49:6-12) O a latou oloa o le a pei o se miti e vave mavae atu. Atonu e oo foi ina faamasinoina i latou a o leʻi oo ina tagata matutua, a o latou seleseleina mea na latou lūlūina. (Kalatia 6:7) Talu ai ona ua latou fulitua i Lē ua na o ia e mafai ona maua mai ai le fesoasoani mo i latou, ua tuua ai i latou ua lē mafesoasoania, e aunoa ma se faamoemoe. Pe a gaoioi Ieova faasaga ia i latou, o le a silasila ma le inoino o ia i o latou ‘faatusa’—o latou tulaga faaalialia ma o latou tofi.

Leoleo Ou Faalogona

I lona lē faaalia o ni uiga lelei i mea na ia vaaia, na ioe ai Asafo faapea: “Auā na tigaina ai loʻu loto; na tuia ai foi lou manatu [fatugaʻo, “NW”]. O aʻu foi, na fai aʻu ma vale, ma le le iloa; ua avea aʻu i ou luma e tusa ma le manu vaefa. A o aʻu, e le aunoa ona ta faatasi ma oe; na e taofiina loʻu lima taumatau. E te taʻitaʻi ia te aʻu i lau pule, a e mulimuli ane e te talia mai aʻu i le manuia.”—Salamo 73:21-24.

O le mafaufau i oloa a ē amio leaga ma le puapuagatia o ē amio saʻo, e mafai ona tiga pe ogotia ai le loto o se tagata. I totonu—i ona fatugaʻo—o le ita o le loto o Asafo i lenei tulaga na faapogaia ai ona matuā tiga o ia. Mai le silafaga a Ieova, sa pei o ia o se manu e leai se mafaufau i le tali atu e faavae i na o ni faalogona valea. Ae, o Asafo ‘sa faatasi pea ma le Atua, o lē na taofia lona lima taumatau.’ A tatou sese i o tatou manatu ma saili le fautuaga a Ieova e pei ona sa faia e Asafo, o le a taofia o tatou lima e le Atua, e lagolago ma taʻitaʻia i tatou. (Faatusatusa i le Ieremia 10:23.) E na o le faatatauina lava o lana fautuaga e mafai ona taʻitaʻina ai i tatou i se olaga fiafia i le lumanai. Atonu tatou te pagātia i le faalumaina mo sina taimi, ae o le a faafoisia i tatou e Ieova, ma ‘ave i tatou i le manuia,’ po o le mamalu.

I le talisapaia o le manaoga ia faatuatua ia Ieova, na faaopoopo mai ai Asafo: “O ai ea se ua ia te au i le lagi? e leai foi se tasi i le lalolagi ou te fiafia i ai, na o oe. E vaivai loʻu tino ma loʻu loto, a o le Atua, o le papa ia o loʻu loto ma loʻu tofi e faavavau. Auā faauta, e fano lava o e faamamao ma oe; e te faaumatia i latou uma lava o e o ese ia te oe e faitaaga ai. A o aʻu nei, ou te faalatalata atu i le Atua ou te lelei ai; ua ou faia le Alii o Ieova ma ou malu, ina ia ou taʻuina o au galuega uma.”—Salamo 73:25-28.

 I le pei o Asafo, ua na o Ieova lava o lē tatou te faalagolago i ai mo le saogalemu moni ma faamafanafanaga. (2 Korinito 1:3, 4) O lea, na i lo o le tuʻinanau o se tasi i oa faalelalolagi, seʻi o tatou auauna ia i le Atua ma faaputuina oa faalelagi. (Mataio 6:19, 20) O le iai o se tulaga faamaonia ma Ieova, e ao ona avea ma o tatou fiafiaga sili. E tusa lava po ua lē taulau o tatou totoga ma le fatu, ae o le a ia faamalosia i tatou ma aumaia ia i tatou le lotomau ina ia aua neʻi leiloa lo tatou faamoemoe ma le lototele i tulaga faigata. O se faiā vāvā lalata ma Ieova, o se mea totino e lē mafai ona faatauina. O le lafoaia o lena mea o lona uiga o se mala mo i tatou atoa ma i latou uma o ē ua latou lafoaiina o ia. O lea la, i le pei o Asafo, seʻi o tatou tosina vāvā lalata atu i le Atua ma lafo atu ia te ia mea uma tatou te popole ai. (1 Peteru 5:6, 7) E siitia ai e lenei mea lo tatou lelei faaleagaga ma uunaia ai i tatou e taʻu atu i isi e uiga i galuega ofoofogia a Ieova.

Tumau i le Faamaoni ia Ieova

Sa mataua Asafo ona sa ia vaaia le tele o oa a tagata amio leaga i lona nuu moni o Isaraelu. Faatasi ai ma auauna faamaoni a Ieova, sa iai foi “e ua amio leaga” sa agasala i lo latou gugutu, faasausili, sauā, faatauemu, ma faaʻoleʻole, ma ē na faafitia le silafia e le Atua o mea na latou faia. (Salamo 73:1-11) Maeu se lapataiga! Ina ia faafiafiaina Ieova le Atua, e tatau ona tatou faamamao mai le faaalialia o na uiga mitavale, sauā, faatauemu, ma le lē faamaoni. I le pei o Asafo, seʻi ‘ō maia auauna uma a Ieova i le malumalu sili o le Atua’ e ala i le faapotopoto faatasi ma Ona tagata tapuai faamaoni. O le mea moni, o i latou uma o e alolofa ia Ieova, seʻi o latou ‘faalatalata atu ia i le Atua,’ ia faalagolago ia te ia na te tausia i latou i mafatiaga, e tusa lava po o ā mea e fai mai ai pe faia foi e nisi.—Salamo 73:12-28; 3 Ioane 1-10.

E moni, o oloa faitino a ē amio leaga e mafai ona tofotofoina ai lo tatou faatuatua, e pei ona sa faia ia Asafo. Peitai, e mafai ona tatou onosaia lenei tofotofoga pe a faaautū o tatou olaga i le auaunaga a Ieova. O le a tauia i tatou i le faia o lenei mea auā ‘e le amioletonu le Atua, na te lē faagalogaloina a tatou galuega ma le alofa na tatou faaalia i lona suafa.’ (Eperu 6:10) O o tatou tofotofoga e “mamasagia ma le vave mavae” pe a faatusatusa atu i lo tatou taui. (2 Korinito 4:17) E tusa lava pe 70 pe 80 ni tausaga o puapuaga, ae e matuā puupuu lava, pe a faatusatusa atu i le olaga fiafia e faavavau ua folafola mai e Ieova i ana auauna faamaoni.—Salamo 90:9, 10.

Tau ina ia aua lava neʻi o tatou faatagaina le mauoa faaletino o ē amio leaga pe a faatusatusa atu i o tatou puapuaga ona o le amiotonu, e taofia ai i tatou mai le faaalia o le faatuatua o se fua lena o le agaga paia o le Atua. (Kalatia 5:22, 23; 1 Peteru 3:13, 14) O le a fiafia Satani pe afai tatou te faataʻitaʻi i ē amio leaga, o ē masani ona mauoa ona o le lē faamaoni. Na i lo o lea, seʻi o tatou āva i le suafa o Ieova e ala i le tetee atu i faaosoosoga e lafoaia ana tapulaa amiotonu. (Sefanaia 2:3) Seʻi aua neʻi o tatou tiga ona o le manuia o ē amio leaga, auā, o le mea sili, e na o oa faaletino lava e mafai ona latou maua. Ma o le ā le aogā o lena mea? E lē mafai ona faatusatusaina ma le oa faaleagaga ua olioli ai i latou o ē faaalia le faatuatua i le Alii Pule Silisiliese o Ieova.