Tali atu i Folafolaga a le Atua e Ala i le Faaalia o le Faatuatua

“Ua ia [o Ieova le Atua] folafolaina mai ai o mea e silisili ese lava ma le aoga.”—2 PETERU 1:4.

1. O le ā ua mafai ai ona tatou faaalia le faatuatua moni?

E FINAGALO Ieova ina ia tatou faatuatua i ana folafolaga. Peitai, “e le o i tagata uma le faatuatua.” (2 Tesalonia 3:2) O lenei uiga, o se fua o le agaga paia po o le malosi galue, o le Atua. (Kalatia 5:22, 23) Ua na o i latou la ua taʻitaʻia e le agaga o Ieova e mafai ona faatuatua.

2. Ua faapefea ona faamatalaina e le aposetolo o Paulo le “faatuatua”?

² Ae o le ā le faatuatua? Ua taʻua e le aposetolo o Paulo, “o le mautinoa lea o mea e le o vaaia.” O le faamaoniga o nei mea moni e lē o vaaia e matuā malosi, ma ua mafai ai ona faatutusa ma le faatuatua. Ua taʻua foi le faatuatua “o le faalagolago lea i mea ua faamoemoe i ai” auā o i latou o loo iai lenei uiga, ua ia i latou se faamaoniga e faapea o mea uma lava ua folafola mai e Ieova le Atua e matuā mautinoa le lelei e pei ua faataunuuina.—Eperu 11:1.

Le Faatuatua ma Folafolaga a Ieova

3. O le ā o le a tupu i Kerisiano faauuina pe afai latou te faatuatua?

³ Ina ia faafiafia Ieova, e tatau ona tatou faatuatua i ana folafolaga. O le manatu lena na faaalia e le aposetolo o Peteru i lana tusi faagaeeina lona lua, na tusia pe tusa o le 64 T.A. Na ia taʻua ai afai e faatuatua ona uso Kerisiano faauuina, o le a vāai i latou i le faataunuuga o mea a le Atua na ‘folafolaina mai, e silisili ese lava ma le aogā.’ O le iʻuga, o le a ‘tofusia ai i latou i le amio Atua’ e avea ma suli faatasi ma Iesu Keriso i le Malo faalelagi. Ona o le faatuatua, ma le fesoasoani a Ieova le Atua, ua mafai ai ona latou sosola ese mai noataga o uiga masani ma faiga iʻuvale o lenei lalolagi. (2 Peteru 1:2-4) Ma seʻi tagai faalemafaufau! O i latou e moni lo latou faatuatua, ua olioli i lea lava saolotoga e lē mafaatusalia i aso nei.

4. O ā uiga e ao ona tatou faaopoopo atu i lo tatou faatuatua?

⁴ O le faatuatua i folafolaga a Ieova ma le loto faafetai mo lo tatou saolotoga mai le Atua e ao ona uunaia ai i tatou e faia le mea silisili ina ia avea ai o ni Kerisiano e fai ma faaaʻoaʻoga lelei. Na faapea mai Peteru: “Ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le le gaoiā i le poto, ma ia faaopoopo le onosai i le le gaoiā, o le amio Atua foi i le onosai, ia faaopoopo foi le alofa i le au uso i le amio Atua, o le alofa foi i le alofa i le au uso.” (2 Peteru 1:5-7) O lena ua aumaia ai e Peteru ia i tatou se lisi e lelei ona tatou teulotoina. Seʻi o tatou matuā tilofaia la nei uiga.

O Manaoga e Matuā Tāua i le Faatuatua

5, 6. O le ā le amio lelei, ma e faapefea ona tatou faaopoopoina atu i lo tatou faatuatua?

⁵ Na taʻua e Peteru, e tatau i le amio lelei, le poto, le lē gaoiā, le onosai, le amio Atua, le alofa i le au uso, ma le alofa ona fefaaopoopoai, ma ia faaopoopo atu foi i lo tatou faatuatua. E tatau ona tatou tinoū ina ia faia nei uiga o ni manaoga e matuā tāua i lo tatou faatuatua. Mo se faataʻitaʻiga, o le amio lelei o se uiga e lē mafai ona  tatou faaalia e aunoa ma le faatuatua. Ua taʻua e le tagata e tusia lomifefiloi o W. E. Vine e faapea, i le 2 Peteru 1:5, “ua faaopoopo atu le amio lelei e avea o se uiga e sili ona manaomia i le faaaliaina o le faatuatua.” O isi uiga taitasi sa taʻua e Peteru, e ao foi ona avea ma vaega o lo tatou faatuatua.

⁶ Muamua, e tatau ona tatou faaopoopo atu le amio lelei i lo tatou faatuatua. O le amio lelei o le faia lea o le mea lelei i le silafaga a le Atua. O le upu Eleni o loo faaliliu i ai le “amio lelei,” o loo faaaogā i ai e isi faaliliuga o le Tusi Paia le upu “agalelei” (“goodness”). (Tusi Paia Samoa; The Jerusalem Bible; Today’s English Version) E uunaia i tatou e le amio lelei ina ia alofia le faia o mea leaga po o le faatupuina o ni mea e faatiga ai i isi uso a tagata. (Salamo 97:10) E faamaite ai foi gaoioiga lototele i le faia o mea lelei mo le manuia faaleagaga, le faaletino, ma faalogona o isi.

7. Aiseā e ao ai ona tatou faaopoopo atu le poto i lo tatou faatuatua ma le amio lelei?

⁷ Aiseā ua uunaia ai i tatou e Peteru ina ia faaopoopo le poto i lo tatou faatuatua ma le amio lelei? Auā pe a tatou fesagaʻi ma ni mea fou e luʻia ai lo tatou faatuatua, tatou te manaomia le poto ina ia tatou iloa ai ona faaeseese le lelei ma le leaga. (Eperu 5:14) E atili faalauteleina lo tatou poto e ala i le suesueina o le Tusi Paia, le tomai i le faatatauina o le Afioga a le Atua ma le faaalia o le poto e aogā i le olaga i aso uma. O le iʻuga o lenei mea, o le a mafai ai ona tatou tausisia lo tatou faatuatua ma faia ai pea le mea lelei pe a tofotofoina i tatou.—Faataoto 2:6-8; Iakopo 1:5-8.

8. O le ā le lē gaoiā, ma ua faapefea ona fesootai atu i le onosai?

⁸ E manaomia ona faaopoopo atu le lē gaoiā i lo tatou poto, ina ia mafai ona tatou maua le faatuatua e faafetaiaia ai tofotofoga. O le upu Eleni mo le “le gaoiā” ua faaalia ai le tomai ina ia puleaina i tatou. O lenei fua o le agaga o le Atua ua fesoasoani ia i tatou ina ia pulea mafaufauga, o upu, ma amioga. O le maumauai i le faaalia o le faatuatua, e mafai ai ona tatou faaopoopo atu i ai le onosai. O le upu Eleni mo le “onosai” e faailoa ai le tūtūmau ma le lototele, ae lē o ni foliga faanoanoa ona o ni faigata ua lē maalofia. Ona o le olioli sa tepa taulai atu i ai Iesu na ia onosaia ai le satauro. (Eperu 12:2) O le malosi mai le Atua faatasi ma le onosai, ua lagolagoina ai lo tatou faatuatua ma fesoasoani ia i tatou ina ia olioli i tofotofoga, ia teena faaosoosoga, ma alofia ai le faagutugutulua pe a sauāina.—Filipi 4:13.

9. (a) O le ā le amio Atua? (e) Aiseā e ao ai ona faaopoopo atu le alofa i le au uso i lo tatou amio Atua? (i) E mafai faapefea ona tatou faaopoopo atu le alofa i lo tatou alofa i le au uso?

⁹ E tatau ona tatou faaopoopo atu i lo tatou onosai, le amio Atua—o le faamamaluina, le tapuaiga, ma le auaunaga ia Ieova. E faatupulaia lo tatou faatuatua a o tatou faaalia le amio Atua, ma iloaina le auala e feutagai ai Ieova ma ona tagata. Peitai, ina ia faaalia le amio Atua, tatou te manaomia le alofa i le au uso. Ae maise ai, “o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai.” (1 Ioane 4:20) E ao ona uunaia i tatou e o tatou loto e faaalia le alofa moni mo isi auauna a Ieova ma ia saili mo lo latou lelei i taimi uma. (Iakopo 2:14-17) Ae aiseā ua faatonuina ai i tatou ina ia faaopoopo atu le alofa i lo tatou alofa i le au uso? E foliga mai o le uiga o upu a Peteru e tatau ona tatou alolofa i tagata uma, ae lē na o o tatou uso. Ua faaalia lenei alofa ae maise lava i le talaʻia o le tala lelei ma le fesoasoani atu i tagata i le itu faaleagaga.—Mataio 24:14; 28:19, 20.

Āuga e Tuufaafeagai

10. (a) O le a faapefea ona tatou gaoioi pe afai e faaopoopo atu le amio lelei, le poto, le lē gaoiā, le onosai, le amio Atua, le alofa i le au uso, ma le alofa, i lo tatou faatuatua? (e) O le ā e tupu pe afai e lē o iai i sē o loo faapea mai o se Kerisiano nei uiga?

¹⁰ Afai tatou te faaopoopoina le amio lelei, le poto, le lē gaoiā, le onosai, le amio Atua, le alofa i le au uso, ma le alofa, i lo tatou faatuatua, o le a tatou mafaufau ai, tautatala, ma gaoioi i auala e faamaonia e le Atua. Ae i le isi itu, pe a lē taulau se tasi o loo faapea mai o se Kerisiano, i le faaalia o nei uiga, e oo ina tauaso faaleagaga o ia. Na te ‘pupuni ona mata i le malamalama’ mai le Atua ma galo ai ia te ia ua uma ona faamamāina mai ana agasala ua teʻa. (2 Peteru 1:8-10; 2:20-22)  Seʻi aua lava neʻi o tatou lē taulau i lena itu ma tatou lē faatuatua ai i folafolaga a le Atua.

11. O le ā ua talafeagai ona tatou faatalitalia mai i ē faamaoni ua faauuina?

¹¹ E faatuatua Kerisiano faamaoni faauuina i folafolaga a Ieova ma latou te faamalolosi ina ia faamautinoa le valaauina ma le filifilia o i latou e ia. E tusa lava pe iai ni mea e tutaʻia ai o latou ala, ae tatou te faatalitalia lava lo latou faaalia o uiga faaleatua. Mo ē faamaoni ua faauuina, ‘ua ia i latou le oa o le ulu atu i le malo e faavavau o Iesu Keriso’ e ala i lo latou toetutū aʻe i le olaga agaga i le lagi.—2 Peteru 1:11.

12. O le ā lo tatou malamalamaga i upu o le 2 Peteru 1:12-15?

¹² Sa mautinoa e Peteru ua latalata lona oti, ma sa ia faatalitalia se toetu aʻe i le olaga i le lagi. O le umi lava na ola ai o ia i “lenei fale apitaga”—lona tino faaletagata—sa ia taumafai ina ia faatupuina le faatuatua o ona uso talitonu ma uunaia i latou e ala i le faamanatu i ai o mea sa manaomia mo le mauaina o le finagalo malie o le Atua. Ina ua oti o ia, sa mafai e uso ma tuafāfine faaleagaga o Peteru ona faamalosia lo latou faatuatua e ala i le manatuaina o ana upu.—2 Peteru 1:12-15.

Faatuatua i le Afioga Faavaloaga

13. Na faapefea ona saunia e le Atua le molimau e faamalosia ai le faatuatua e uiga i le maliu mai o Keriso?

¹³ Na tuuina mai e le Atua lava ia se molimau e faamalosia ai le faatuatua e uiga i le mautinoa o le maliu mai o Iesu “ma le mana ma le mamalu tele.” (Mataio 24:30; 2 Peteru 1:16-18) E aunoa ma ni faamaoniga, na taʻuina atu ai e faitaulaga faapaupau tala pepelo e uiga i o latou atua, ae o Peteru, Iakopo ma Ioane o ni molimau vāai tino i le mamalu o Keriso ina ua faaliliuina. (Mataio 17:1-5) Sa latou vaaia lona faamamaluina ma latou faalogo i le siufofoga o le Atua lava ia o loo  faailoa mai ai Iesu o Lona Alo pele. O lena faailoaga ma le faaaliga pupula na tuuina atu ia Keriso sa faaee atu ai ia te ia le faaaloaloga ma le mamalu. Ona o lenei faaaliga mai le Atua, na faaigoa ai e Peteru le laufanua, e latalata i le tuasivi o Heremoni, “o le mauga paia.”—Faatusatusa i le Esoto 3:4, 5.

14. E ao faapefea ona aafia lo tatou faatuatua i le faaliliuina o Iesu?

¹⁴ E ao faapefea ona aafia lo tatou faatuatua i le faaliliuina o Iesu? Na faapea mai Peteru: “O loo ia te i tatou foi le upu o le valoaga e sili lona mausali, e lelei ona outou naunau i ai, e pei o se lamepa e mumū i le mea pogisa, seia tafa mai ata, seia alu ae foi le fetu ao i o outou loto.” (2 Peteru 1:19) O “le upu o le valoaga” e foliga mai e lē na o valoaga i Tusitusiga Eperu e uiga i le Mesia sa aofia ai, ae sa aofia ai foi ma le faamatalaga a Iesu e faapea o le a maliu mai o ia “ma le mana ma le mamalu tele.” Sa faapefea i lena upu ona “sili lona mausali” e ala i le faaliliuina? O lena mea, na faamaonia ai le upu faavaloaga e uiga i le maliu mai faamamaluina o Keriso i le mana o le Malo.

15. O le ā ua aofia ai i le uaʻi atu i le upu faavaloaga?

¹⁵ Ina ia faamalosia lo tatou faatuatua, e tatau ona tatou uaʻi atu i le upu faavaloaga. E aofia ai le suesueina o lea upu, le talanoaina i sauniga faa-Kerisiano, ma le faatatauina o ana fautuaga. (Iakopo 1:22-27) E tatau ona tatou faia e pei o “se lamepa e mumū i le mea pogisa,” e faamalamalamaina ai o tatou loto. (Efeso 1:18) E na o lea le auala o le a taʻitaʻia ai i tatou seia oo ina faaalia mai e le “fetu ao,” po o le “fetu ao pupula,” o Iesu Keriso o ia lava i le mamalu. (Faaaliga 22:16) O lena faaaliga o le faaumatiaga lea mo ē lē faatuatua, ae o ni faamanuiaga mo i latou o loo faatuatua.—2 Tesalonia 1:6-10.

16. Aiseā e mafai ai ona tatou faatuatua, o le a faataunuuina folafolaga faavaloaga uma o loo i le Afioga a le Atua?

¹⁶ O perofeta a le Atua sa lē na o ni tagata popoto latou te faia ni valovaloga poto, auā na faapea mai Peteru: “Ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.” (2 Peteru 1:20, 21) Mo se faataʻitaʻiga, na faapea mai Tavita: “O aʻu na fetalai ane ai le Agaga o Ieova.” (2 Samuelu 23:1, 2) Ma na tusia faapea e Paulo: “O Tusi Paia uma lava e mai le Agaga o le Atua ia.” (2 Timoteo 3:16) Talu ai sa faagaeeina e le agaga o le Atua ana perofeta, tatou te faatuatua foi la o le a faataunuuina folafolaga uma o loo i lana Afioga.

Sa Latou Faatuatua i Folafolaga a le Atua

17. O le ā le folafolaga na faavae ai le faatuatua o Apelu?

¹⁷ O folafolaga a Ieova o le faavae lea mo le faatuatua o le ‘motu e toatele’ o ana molimau sa iai a o leʻi oo mai Keriso. (Eperu 11:1–12:1) Mo se faaaʻoaʻoga, sa faatuatua Apelu i le folafolaga a le Atua e uiga i le “fanau” o le a tuʻimomomoina le ulu o “le gata.” Sa iai se faamaoniga o le faataunuuga o le faasalaga a le Atua i mātua o Apelu. I fafo atu o Etena, sa aai ai Atamu ma lona aiga ma le afu ona sa tutupu aʻe i le eleele na fetuuina, o laau tuitui ma laau talatala. Atonu foi na mātauina e Apelu le faananau atu o le loto o Eva i lana tane ma vaaia foi le pulepule tutū o Atamu ia Eva. E mautinoa sa ia taʻua le tiga o lona maʻitō. Ma sa leoleoina le faitotoa i le faatoaga o Etena e kerupi ma le peluafi sa mumū saesae. (Kenese 3:14-19, 24) O nei mea uma sa avea o se ‘faataʻitaʻiga manino’ e faamautinoa ai ia Apelu e faapea, o le a oo mai le faaolataga e ala i le Fanau folafolaina. Ona o le faatuatua, na ofo atu ai e Apelu se taulaga i le Atua, lea na mautinoa le sili atu o lona aogā na i lo le taulaga a Kaino.—Eperu 11:1, 4.

18, 19. O ā auala na faaalia ai le faatuatua o Aperaamo ma Sara?

¹⁸ Sa faatuatua foi tamā anamua o Aperaamo, Isaako, ma Iakopo i folafolaga a Ieova. Sa faatuatua Aperaamo i le folafolaga a le Atua e faapea o le a manuia aiga uma o le lalolagi ona o ia [Aperaamo], ma o le a foaiina atu foi i lana fanau se laueleele. (Kenese 12:1-9; 15:18-21) O lona atalii o Isaako ma le atalii o Isaako o Iakopo sa “tofia faatasi ma ia i lea lava mea na folafolaina.” O le faatuatua o Aperaamo “sa āumau ai o ia i le nuu na folafolaina” ma faatalitali ai i “se aai  ua faavaeina,” o le Malo faalelagi o le Atua, lea o le a ia toetu aʻe e mau ai i le lalolagi. (Eperu 11:8-10) Po o faapena ea foi lou faatuatua?

¹⁹ O le avā a Aperaamo o Sara, e tusa ma le 90 ona tausaga ma na matuā teʻa mamao le tausaga sa ono mafai ai ona fanau o ia, ae sa faatuatua i le folafolaga a le Atua ma ia maua ai le malosi “e fanau ai” ma na ia fanaua ai Isaako. O lea, o Aperaamo na 100 ona tausaga o lē “na oti” e tusa ai ma le fanautama, ae na mulimuli ane “tutupu mai ai . . . le toatele [o fanau e] pei o fetu o le lagi.”—Eperu 11:11, 12; Kenese 17:15-17; 18:11; 21:1-7.

20. E ui lava sa leʻi vāai tamā anamua i le faataunuuga atoatoa o folafolaga a le Atua ia i latou, ae o le ā na latou faia?

²⁰ Na maliliu tamā faatuatua anamua ae latou te leʻi vāai i le faataunuuga atoatoa o folafolaga a le Atua ia i latou. Peitai, na “iloa ai e i latou [mea na folafolaina] a e mamao, na mautinoa foi, ma latou talia ma le fiafia, ma latou taʻutino mai o tagata ese i latou ma āumau i le lalolagi.” Na mavae atu augātupulaga a o leʻi avea le Nuu Folafolaina ma mea totino a le fanau a Aperaamo. Peitai, a o faagasolo o latou olaga, sa faatuatua tamā anamua o ē sa matataʻu i le Atua, i folafolaga a Ieova. Talu ai le tumau o lo latou faatuatua, ua lē o toe mamao ai ona faatutūina aʻe lea o i latou i le ola i le nofoaga faalelalolagi o le “aai” sa saunia e le Atua mo i latou, o le Malo lea faa-Mesia. (Eperu 11:13-16) I se tulaga tutusa, e mafai e le faatuatua ona faatumauina lo tatou faamaoni ia Ieova e tusa lava pe tatou te lē o vāaia i le taimi nei le faataunuuga o ana folafolaga ofoofogia uma. O lo tatou faatuatua o le a uunaia ai foi i tatou e usiusitai i le Atua, e pei foi ona sa faia e Aperaamo. Ma e pei ona faasolo atu i lana fanau lona tofi faaleagaga, e faapena foi ona mafai ona tatou fesoasoani atu i a tatou fanau ina ia faatuatua i folafolaga tautele a Ieova.—Eperu 11:17-21.

E Matuā Tāua le Faatuatua mo Kerisiano

21. Ina ia taliaina e le Atua i aso nei, o le ā e tatau ona aofia ai i lo tatou faaalia o le faatuatua?

²¹ O le mea moni, e tele atu nisi mea e aofia i le faatuatua na i lo le na ona iai o se mautinoa i le faataunuuga o folafolaga a Ieova. I le gasologa o talafaasolopito o le tagata, ua talafeagai ai ona faatuatua i le Atua i auala eseese pe afai tatou te fia olioli i lona finagalo malie. Na taʻua e Paulo faapea, “a leai foi se faatuatua e le mafai ona fiafia mai [Ieova le Atua], auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) Ina ia taliaina se tasi e Ieova i aso nei, e tatau ona ia faatuatua ia Iesu Keriso ma i le taulaga togiola na saunia e le Atua e ala mai ia te ia. (Roma 5:8; Kalatia 2:15, 16) E pei ona fetalai Iesu lava ia: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.”—Ioane 3:16, 36.

22. O le ā le folafolaga o le a faataunuuina e le Malo faa-Mesia?

²² Ua faia e Iesu se vaega e matuā tāua i le faataunuuga o folafolaga a le Atua e uiga i le Malo lea e tatalo i ai Kerisiano. (Isaia 9:6, 7; Tanielu 7:13, 14; Mataio 6:9, 10) E pei ona faaalia e Peteru, o le faaliliuina ua matuā faamaonia ai le upu faavaloaga e uiga i le maliu mai o Iesu i le mana ma le mamalu o le Malo. O le a faataunuuina e le Malo faa-Mesia le isi folafolaga a le Atua, auā na tusia e Peteru e faapea: “E faatalitali i tatou i le lagi fou ma le lalolagi fou, pei o  lana na folafola mai, e mau ai le amiotonu.” (2 Peteru 3:13) E faapena foi le valoaga na faataunuuina ina ua toe nofoia e tagata Iutaia na faaaunuua i Papelonia, lo latou laueleele i le 537 T.L.M. i le taimi o le pulega a le kovana o Serupapelu, ma le faitaulaga sili o Iosua. (Isaia 65:17) Peitai sa faasino atu e Peteru i se taimi i le lumanai, pe a faia e le “lagi fou”—le Malo faa-Mesia i le lagi—lana pulega i “le lalolagi fou,” le sosaiete o tagata amiotonu o loo nonofo i lenei lalolagi atoa.—Faatusatusa i le Salamo 96:1.

23. O ā fesili e faatatau i le amio lelei o le a sosoo ai ona tatou talanoaina?

²³ I le avea o i tatou ma auauna faamaoni a Ieova ma o ni soʻo o lona Alo pele, o Iesu Keriso, ua tatou moomoo ai i le lalolagi fou ua folafola mai e le Atua. Ua tatou iloa le lata mai, ma tatou te faatuatua o le a faataunuuina folafolaga tautele uma a Ieova. Ina ia taliaina i tatou e lo tatou Atua, e tatau ona faamalosia lo tatou faatuatua e ala i le faaopoopo atu i ai o le amio lelei, le poto, le lē gaoiā, le onosai, le amio Atua, le alofa i le au uso, ma le alofa. * Ona o lenei mea, atonu e ono fesiligia ai, Pe mafai faapefea ona tatou faaalia le amio lelei? Ma o le a faapefea ona aogā ia i tatou ma isi lo tatou amio lelei, ae maise lava i a tatou aumea faa-Kerisiano, o ē ua tali mai i folafolaga a Ieova e ala i lo latou faatuatua i ai?

[Faaopoopoga i lalo]

O ā Au Tali?

□ E faamatalaina faapefea le “faatuatua”?

□ E tusa ai ma le 2 Peteru 1:5-7, o ā uiga e ao ona faaopoopo atu i lo tatou faatuatua?

□ O le ā le aafiaga e ao ona iai i lo tatou faatuatua ona o le faaliliuina o Iesu?

□ O ā faaaʻoaʻoga o le faatuatua na faaalia e Apelu, Aperaamo, Sara, ma isi o aso anamua?

[Fesili mo le Suʻesuʻega]

[Ata i le itulau 15]

Po o e iloa le auala e mafai ai ona aafia le faatuatua o se tagata i le faaliliuina o Iesu?