E Fesoasoani le Aiga Kerisiano i Ē Matutua

“Aua e te lafoai ia te au i ona po ou te toeaina ai; aua e te tuulafoai mai ia te au pe a mavae atu loʻu malosi.”—SALAMO 71:9.

1. O faapefea ona tausia ē matutua i le tele o atunuu?

“NA TAʻUA e le Wall Street Journal e faapea: “Ua faaalia e suesuega le toetoe lava o le toaono mai le toafitu (86%) o ē matutua ua lē lelei ona tausia, ua faileagaina e o latou lava aiga.” Na taʻua e le mekasini o le Modern Maturity e faapea: “O le lē lelei ona tausia o ē matutua, ua na o le pau lea o faiga sauā i totonu o aiga o loo iai i le taimi nei, ua aliae ma ua matuā faaalialia atu i nusipepa i le Iunaite Setete.” Ioe, ua avea tagata matutua ma ē ua matuā faileagaina ma tuulafoaia i le tele o atunuu. Ua matuā faamaonia lava i o tatou taimi le toatele o ē “e alolofa i latou ia i latou, . . . e le faafetai, o e amio leaga, o e le lotoaiga.”—2 Timoteo 3:1-3.

2. E tusa ai ma le Tusi Paia Eperu, o le ā le silasila a Ieova i ē matutua?

² Peitai, e lē o le ala lena sa tatau ona tausia ai tagata matutua i Isaraelu anamua. Na taʻua i le Tulafono: “Ia e tulai atu i luma o le ua ulu sinā, ia e ava foi i luma o le toeaina, ma ia e mataʻu i lou Atua; o aʻu o Ieova.” Ua fautua mai ia i tatou le tusi faagaeeina o faataoto atamai e faapea: “Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.” Ua poloai mai foi e faapea: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā.” Na aʻoaʻoina e le Tulafono faa-Mose le faaaloalo ma le āva i ē matutua uma. E manino la, e finagalo Ieova ina ia ava i ē matutua.—Levitiko 19:32; Faataoto 1:8; 23:22.

Tausiaina o Ē Matutua i Aso Anamua

3. Na faaalia faapefea e Iosefa le alofa mutimutivale mo lona tamā ua matua?

³ Sa tatau ona faaalia le faaaloalo e lē i na o upu ae i gaoioiga magafagafa. Na matuā alofa mutimutivale Iosefa i lona tamā ua matua. Sa ia manao e faimalaga mai Iakopo nai Kanana e agaʻi atu i Aikupito, o se mamao e silia i le 200 maila. O lea na auina atu ai e Iosefa ia Iakopo “asini e sefulu ua ave ai mea lelei a Aikupito, ma asini fafine e sefulu ua ave ai saito, ma areto, atoa ma mea e ʻai mā lona tamā i le malaga.” Ina ua taunuu atu Iakopo i Kosena, ona alu atu ai lea o Iosefa ia te ia “ona fusi ai lea ia te ia, ma tagi pea lava i lona ua.” Sa matuā faaalia e Iosefa lona alofa loloto i lona tamā. Maeu se faaaoaoga faagaeeina o le manatu mamafa mo ē matutua!—Kenese 45:23; 46:5, 29.

4. Aisea ua avea ai Ruta o se faaaoaoga lelei e mulimuli i ai?

⁴ O le isi faaaoaoga e sili ona lelei e faataitai i ai o le agalelei i tagata matutua, o Ruta. E ui o ia o se tagata o Nuu Ese, ae na mafana atu pea o ia i le tina matua o lana tane, le loomatua Iutaia ua oti lana tane o Naomi. Na lafoaia e Ruta ona lava tagata ae uia se tulaga e ono lē toe maua ai se isi ana tane. Ina ua augani atu i ai Naomi e toe foi i lona nuu, na tali mai Ruta i nisi o upu e sili ona tāua o loo iai i le Tusi Paia e faapea: “Aua e te finau ia te au ina ia ou tuulafoai ia te oe, ia le mulimuli atu ia te oe; auā o le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu moʻu nuu; e fai lou Atua moʻu Atua; o le mea e te oti ai, ou te oti ai, e tanu  ai foi aʻu; ia faapea ona faia e Ieova ia te au, ma ia faaopoopo i ai, pe afai e tuueseeseina i taua ma oe i se tasi mea seʻi vagana le oti.” (Ruta 1:16, 17) Na faaalia foi e Ruta uiga lelei ina ua malie o ia e faaipoipo atu i le tamaloa matua o Poasa e tusa ai ma le aiaiga tau faaipoipoga pe a maliu le tane po o le avā a se tasi.—Ruta, mataupu 2 e oo i le 4.

5. O ā uiga na faaalia e Iesu i ana feutagaiga ma tagata?

⁵ Na faataatia foi e Iesu se faaaoaoga faapena i ana feutagaiga ma tagata. Na onosai o ia, na alofa mutimutivale, na agalelei, na avea o ia o sē e faafouina ai isi. Na naunau moni o ia i se tagata mativa o lē na lē atoatoa le malosi o lona tino, ma lē mafai ona savali mo le 38 tausaga, ma sa faamaloloina o ia e Iesu. Sa magafagafa foi o ia i fafine ua oti a latou tane. (Luka 7:11-15; Ioane 5:1-9) E oo lava i le taimi o le luluti o ona tiga i le oti i le satauro, sa ia manao e faamautinoa o le a lelei ona tausiaina lona tinā, atonu po ua iai i le tauamatamataga o le 50 o ona tausaga. Sa avea Iesu o se uo e faafouina ai tagata uma, seʻi vagana ona fili talapepelo. O lea na mafai ai ona ia faapea atu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga.”—Mataio 9:36; 11:28, 29; Ioane 19:25-27.

O Ai e Tatau ona Manatunatu i Ai?

6. (a) O ai ua tatau i ai le tausiga faapitoa? (e) O ā fesili tatou te ono fesili ifo ai ia i tatou lava?

⁶ Talu ai na faataatitiaina e Ieova le Atua ma lona Alo, o Iesu Keriso, na faaaoaoga lelei o le manatu mamafa, ua matuā talafeagai ai foi la i Kerisiano tuuina atu ona faataitai ia la faaaoaoga. O loo tatou iai faatasi ma nisi o ē o loo matuā mafatia ma gasea mo le tele o tausaga—o uso ma tuafāfine matutua ua pulapula lagoto lo latou soifua. O nisi atonu o o tatou mātua po o tuaa o o tatou mātua. Po o tatou manatu māmā ea ia i latou? Po o tatou tuuina atu ea i ai le fesoasoani ma le lagolagosua ia i latou? Po o tatou talisapaia moni ea lo latou tomai e tele ma le atamai? E moni, o nisi o i latou e tofotofoina ai lo tatou onosai, ona o le maumauai i ni mea latou te fiafia i ai ma ni masei ua masani ai tagata ua matutua. Ae fesili ifo ia te oe lava, ‘Po o ua lē o le mea ea foi lea o le a ou iai pe a ou oo i ia tulaga?’

7. O le ā ua faataitaia mai ai le manaoga o le iai o ni faalogona alofa mo tagata matutua?

⁷ Ua iai se tala faamomoiloto mai i Sasae Tutotonu, i se teineitiiti o lē sa mutimutivale lona alofa i se tagata matua. A o fesoasoaani le tina o lona tinā i feau i le umukuka, na faafuasei ai lava ona paʻū ia te ia se ipu mafolafola mataetae ma nuti ai. Na ita le loomatua ia te ia lava ona o lona faavasivasi; ae na sili ai ona ita lana tama teine, le tinā o le teineitiiti. Ona tuli lea e le tama teine a le loomatua lana teineitiiti i le faleoloa e faatau mai se ipu mafolafola laupapa e lē mafai ona taʻe e faaaogā e le loomatua. Na foi mai le teineitiiti ma ipu mafolafola laupapa e lua. Na fesili atu ma le ita lona tinā: “Aisea ua e faatau mai ai ipu mafolafola e lua?” Na tau faatautu le teineitiiti ona ia tali mai lea: “O le isi ipu e mo le loomatua a o le isi ma oe pe a e matua.” Ioe, i lenei lalolagi, o loo tatou faatalitalia uma ai lava le oo atu ina matutua. Pe tatou te lē talisapaia ai ea la se tausiga i le onosai ma le agalelei?—Salamo 71:9.

8, 9. (a) E ao faapefea ona tatou tausia ē matutua o loo tatou faatasi? (e) O le ā e manaomia ona manatua e nisi o ē e leʻi leva ona avea ma Kerisiano?

⁸ Aua lava neʻi faagaloina, o le toatele o o tatou uso ma tuafāfine ua matutua, o loo iai so latou talaaga umi o a latou galuega faamaoni faa-Kerisiano i taimi ua teʻa. Ua matuā ono ma tatau ai la ia i latou lo tatou āva ma le magafagafa i ai, la tatou fesoasoani agalelei ma faalaeiauga. Na faapea mai ma le saʻo le tagata poto: “O le pale matagofie le ulusinā, pe a ua i ai i le ala o le amiotonu.” Ma o lena ulusinā, po o se tamā po o se tinā, e ao ona faaaloalogia. O nisi o nei tamā ma tinā matutua o loo auauna pea ma le faamaoni o ni  paeonia, ma o le toatele o tamā o loo auauna faamaoni i le avea o ni toeaina i faapotopotoga; o nisi o loo latou faia ni galuega ua fai ma faaaoaoga lelei, i le avea ma ovasia faimalaga.—Faataoto 16:31.

⁹ Na fautua atu Paulo ia Timoteo: “Aua e te aoai atu i se toeaina, a ia aioi atu i ai, peiseai se tamā; o taulelea foi, peiseai o uso; o loomatutua, peiseai o tinā; o fafine muli foi, peiseai o tuafafine ia, ma ia le gaoiā lava.” (1 Timoteo 5:1, 2) O i latou ua faatoʻā ō ese mai le lalolagi lē faaaloalo ma ua iai nei i le faapotopotoga Kerisiano, e ao ona latou matuā teuloto upu a Paulo, ia e faavae aʻe i le alofa. O outou talavou, aua neʻi outou faataitai atu i uiga leaga atonu o loo outou vaaia i aʻoga. Aua neʻi outou teena le fautuaga agalelei a Molimau matutua. (1 Korinito 13:4-8; Eperu 12:5, 6, 11) Petai ane, afai e manaomia e se tagata matua se fesoasoani ona ua lē lelei lona soifua maloloina po o iai ni ona faafitauli tau tupe, o ai o loo iai le tiute tauave autū i le fesoasoani atu ia i latou?

Le Matafaioi a le Aiga i le Tausia o Ē Matutua

10, 11. (a) E tusa ai ma le Tusi Paia, o ai e ao ona taimua i le tausiga o ē ua matutua? (e) Aisea e lē faigofie ai pea i taimi uma le tausiaina o ē matutua?

¹⁰ I le faapotopotoga a uluai Kerisiano, na mapuna aʻe ai ni faafitauli i le tausiaina o fafine ua oti a latou tane. Na faaalia faapefea e le aposetolo le tatau ona tausia o na manaoga? “Ia ava i fafine ua oti a latou tane, o e ua ausage lava. Afai foi o i ai i se fafine ua oti lana tane ni ana tama po o fanau a ana tama, ia aʻoaʻoina i latou ia muamua ona agalelei i lo latou lava aiga, ma taui atu i o latou mātua; auā o le mea lelei lea ma le mālie i luma o le Atua. A e afai e le tausi e se tasi i lona aiga,  afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.”—1 Timoteo 5:3, 4, 8.

¹¹ I taimi o manaoga, e ao ai ona taulamua tagata moni o le aiga i le fesoasoani atu i tagata matutua. * O lenei itu e mafai ai e tamaiti matutua ona talisapaia le tele o tausaga o le alofa, o galuega ma le tausiga na faia e o latou mātua mo i latou. Atonu e lē faigofie lenei mea. A o faasolo ina matutua tagata, e masani lava ona gese a latou gaoioi, ma o nisi e oo lava ina lē toe sagatonu le mafaufau e faia ai ni mea. O nisi e oo ina mananao e fai atu mea uma lava mo i latou, ma soona tagisa, ae atonu latou te lē o mafaufauina. Ae i le taimi a o avea i tatou ma pepe, pe tatou te leʻi mananao ea foi e fai uma atu mea mo i tatou ma tatou soona tagisa? Ma pe leʻi vave ea ona tuu mai e o tatou mātua le fesoasoani sa tatou manaomia? Ua suia nei foi le tulaga o mea mo i latou. O le ā la e manaomia? O le alofa mutimutivale ma le onosai.—Faatusatusa i le 1 Tesalonia 2:7, 8.

12. O ā uiga e manaomia mo le tausiaina o ē matutua—ma isi uma i le faapotopotoga Kerisiano?

¹² Na avatu e le aposetolo o Paulo se fautuaga aogā ina ua ia tusia e faapea: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina; ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.” Afai e tatau ona tatou faaalia atu lenei ituaiga o alofa mutimutivale i le faapotopotoga, po ua lē ao foi la ona tatou matuā faaalia atu atili i le aiga?—Kolose 3:12-14.

13. O ai, e ese mai mātua ua matutua po o tuaa o mātua, e ono manaomia foi se fesoasoani?

 ¹³ O nisi taimi e manaomia ai lenei fesoasoani, e lē gata o mātua po o tuaa o mātua, ae faapea foi i isi tauaiga ua matutua. O nisi tagata matutua e leai ni a latou fanau, ua auauna faamisionare mo le tele o tausaga, le faiva femalagaai, ma isi auaunaga faataimi atoa. Ua latou faamuamuaina moni lava le Malo i o latou olaga atoa. (Mataio 6:33) Po ua lē talafeagai ai ea la ona faaalia ia i latou le agaga o le fia tausi i ai? E mautinoa ua tatou iloa le faaaoaoga matagofie i le auala o loo tausia ai e le Sosaiete o le Olo Matamata ona tagata Peteli ua matutua. I le ofisa ulu o le Peteli i Brooklyn ma le tele o isi lālā o le Sosaiete, ua faatulaga ai se tausiga i aso taitasi mo uso ma tuafāfine ua matutua, e tofia i ai isi sui o le aiga ua aʻoaʻoina lelei mo lenei tiute. E fiafia i latou e tausia nei tagata matutua e pei lava o ni o latou mātua moni po o tuaa o o latou mātua. I le taimi foi e tasi, ua tele ai mea latou te aʻoaʻoina mai mea na tutupu i olaga o nei tagata matutua.—Faataoto 22:17.

Le Matafaioi a le Faapotopotoga i le Tausiga

14. O le ā le sauniuniga sa faia mo ē matutua i le faapotopotoga a uluai Kerisiano?

¹⁴ E tele atunuu i aso nei o loo iai a latou faatulagaga mo ni tupe e maua mo tagata matutua, faapea foi ma se tausiga faafomai ua saunia e le malo mo ē matutua. E mafai e Kerisiano ona maua aogā mai nei sauniuniga, pe afai ua talafeagai i ai i latou. Peitai sa leai ni sauniuniga faapena i le uluai senituri. O lea na faia ai e le faapotopotoga Kerisiano se gaoioiga lelei ina ia fesoasoani atu ai i fafine ua oti a latou tane sa ausage. Na faatonu atu Paulo e faapea: “Aua neʻi faitauina se fafine ua oti lana tane [i le lisi o fesoasoani a le faapotopotoga] seia oo i ona tausaga e onogafulu, sa toatasi foi lana tane; o loo taʻuleleia foi ona o ana galuega lelei, pe afai ua tausia e ia ni fanau, pe afai ua na alofa i tagata ese, pe afai ua na mulumulu i vae o tagata paia, pe afai ua na agalelei atu i e ua puapuagatia, pe afai ua na tausisi i galuega lelei uma lava.” Na faaalia la e Paulo e faapea, e iai foi se matafaioi a le faapotopotoga i le fesoasoani atu i ē matutua. O fafine taumatuaina faaleagaga o ē sa lē talitonu a latou fanau, na agavaa mo lena fesoasoani.—1 Timoteo 5:9, 10.

15. Aisea e ono manaomia ai se fesoasoani ina ia mafai ona maua le fesoasoani mai le malo?

¹⁵ I atunuu o loo faia ai sauniuniga a le malo mo le tausiaina o ē matutua, e masani lava ona aofia ai le faatumuina o ni pepa na e oso ai le fiu i nisi taimi. I tulaga la faapena, ua talafeagai ai i ovasia o le faapotopotoga ona fuafua e fesoasoani atu i ē matutua i le faia o a latou talosaga, le talaina mai o a latou tupe, e oo foi i le toe talosaga mo se toe faatelega o lea fesoasoani. O nisi taimi o le suia o tulaga ua oo i ai, e mafai ona faateleina ai le penisione. Ae iai foi le tele o isi itu aogā e mafai ona fuafuaina e ovasia ina ia mafai ai ona tausia ē matutua. O ā nisi o nei itu?

16, 17. I ā auala eseese tatou te ono faaalia atu ai le talimalo i ē ua matutua o le faapotopotoga?

¹⁶ O le faaalia o le talimalo o se tu na amata mai lava i aso anamua. I aso nei, i le tele o atunuu i Sasae Tutotonu, ua faaalia atu ai le talimalo i tagata ese, e tusa lava pe na o le ofo atu i ai o se ipu kofe. Ua lē o se mea la e ofo ai, le tusi atu o Paulo e faapea: “Ia tufatufa atu ni a outou mea i le mativa o le au paia, ia tausisi i le alofa i tagata ese.” (Roma 12:13) O le upu Eleni mo le talimalo, o le phi·lo·xe·niʹa, o lona uiga moni o le “alofa i (naunau mo, po o le agalelei i) tagata ese.” Afai e tatau ona talimalo se Kerisiano i tagata ese, po ua lē tatau la ona sili atu lona faia faapea i ē latou te aiga i le faatuatua? O se valaaulia ina ia faiʻaiga faatasi e faaali atu ai lou naunau alofa e faamapu mai le tagata matua mai ana faasologa. Afai e te fia faalogo atu i le atamai ma ni tala fiafia o mea na tutupu pe a outou faatasitasi faasamasamanoa, ia faaaofia ai la tagata matutua.—Faatusatusa i le Luka 14:12-14.

 ¹⁷ E tele itu e mafai ona faalaeiau ai i tagata matutua. Afai tatou te fuafua e ō atu faatasi i se taavale i le Maota o le Malo po o se fonotaga, po o tou ofoina atu ea ni avanoa i nisi tagata matutua tou te faimalaga faatasi atu ai? Aua le faatali seiloga e mananao mai i latou. Ia ofo atu e ave i latou. O le isi fesoasoani aogā o le faia lea o a latou faatau. Ae afai e mafai ona latou ō, po o tatou ō ea ma ave i latou i a tatou faatauga? Ae ia mautinoa o iai ni nofoaga e mafai ona latou malōlō ma faafouina ai pe afai e talafeagai. E mautinoa o le a manaomia ai le onosai ma le agalelei i le faia o lena tulaga, ae o se faafetai moni e fai mai e se tagata matua, o se matuā taui tele lea.—2 Korinito 1:11.

O se Oloa Matagofie i le Faapotopotoga

18. Aisea ua avea ai ē matutua o se faamanuiaga i le faapotopotoga?

¹⁸ Maeu se faamanuiaga o le vaai atu i nisi o ē ua sinasina o latou ao o loo iai i le faapotopotoga! O lona uiga, i le malaulau ma le malosi o ē talavou, ua ia i tatou foi sina vaega toaitiiti o le atamai ma le poto masani—o se oloa tāua lea i so o se faapotopotoga. O lo latou poto ua pei o se vai e faafouina ai, lea e tatau ona asu aʻe mai se vaieli. Ua pei lava ona taʻua ai e le Faataoto 18:4: “O upu a le gutu o le tagata, o vai loloto ia; o le puna o le poto, o le alia ola lava lea.” Maeu se faalaeiauina o ē matutua pe a latou iloa o loo manaomia ma talisapaia i latou!—Faatusatusa i le Salamo 92:14.

19. Ua faapefea ona faia e nisi ni faataulagaina mo o latou mātua ua matutua?

¹⁹ O nisi o loo i le auaunaga faataimi atoa, ua manatu e fia faamuta o latou faaeaga ina ia toe foi atu i aiga e tausi o latou mātua ua matutua ma mamai. Ua latou faataulagaina i latou, mo ē sa faia foi ni faataulagaina ona o i latou. O se tasi ulugalii na muai avea o ni misionare, sa toe foi atu i laua i lo la aiga ina ia tausia o la mātua ua matutua, ae o loo iai pea i le auaunaga faataimi atoa. Na la faia lenei mea mo le silia i le 20 tausaga. I le fa tausaga ua mavae, sa tatau ai ona tuu le tinā o le tane i le fale e tausi ai tagata matutua. O lenei tane ua silia nei i le 60 ona tausaga, e asiasi atu o ia i lona tinā ua 93 tausaga lona matua, i aso uma lava. Ua ia faamatala mai e faapea: “E faapefea ona ou lafoaia o ia? O ia o loʻu tinā!” I nisi tulaga, ua ofo atu ai faapotopotoga ma tagata taitoatasi mo le vaavaaiga o ē matutua ina ia mafai ai ona tumau pea a latou fanau i o latou tofiga. O lena alofa lē faapito ua matuā ono ma tatau i ai le tele o le faamālō. E ao ona taulimaina ma le faaeteete tulaga taitasi, auā e lē tatau ona lafoaiina ē ua matutua. Ia e faaali atu e te alofa i ou mātua ua matutua.—Esoto 20:12; Efeso 6:2, 3.

20. O le ā le faaaoaoga ua aumai e Ieova ia i tatou i le tausiaina o ē ua matutua?

²⁰ Ioe, o o tatou uso ma tuafāfine ua matutua, o le pale matagofie lea mo se aiga po o se faapotopotoga. Na fetalai Ieova: “E oo ina e toeaina, o aʻu lava o ia, e oo foi ina ulusina, o aʻu lava ou te tauave ia te oe; o aʻu na ou faia, ou te siitia foi, ou te tauave, ma ou laveaiina oe.” Tau ina ia tatou faaali atu lea lava onosai ma le tausiga i o tatou uso ma tuafāfine ua matutua o loo iai i le aiga Kerisiano.—Isaia 46:4; Faataoto 16:31.

[Faaopoopoga i lalo]

E te Manatua?

□ O ā faaaoaoga a le Tusi Paia ua tatou iloa e faatatau i le tausiaina o ē matutua?

□ E ao faapefea ona tatou tausia ē matutua?

□ E mafai faapefea e tagata o le aiga ona tausia ē pele ua matutua?

□ O le ā e mafai ona faia e le faapotopotoga e fesoasoani atu ai i ē matutua?

□ Aisea ua avea ai ē matutua o se faa- manuiaga ia i tatou uma?

[Fesili mo le Suʻesuʻega]

[Ata i le itulau 23]

Na agalelei ma faaaloalo Ruta i le loomatua o Naomi

[Ata i le itulau 24]

O ē matutua o ni tagata e tāua i le faapotopotoga