Pe Mafai ona Maua se Puipuiga Moni?

I SE tasi taimi, na faalauiloa mai ai e se tagata tusitala o tala pupuu o Waldo Emerson e faapea: “O tagata vālea e talitonu i le laki . . . A o tagata popoto ma malolosi tau amio e talitonu i le pogai ma le iuga.” Ioe, o se tagata e faatuatua i le malosi o tapui faataulaitu ma tapui o laki, ua ia tuuina atu lona olaga e pulea e agaga lē vaaia. Na te teena mafaufauga saʻo ma pogai, a ua pulea e le fefe valea i faiga faataulaitu.

Ae peitai, ua mafai e le Tusi Paia ona faasaoloto se tasi mai na mea e fefe ai. Ua faaalia i le Tusi Paia le leai o se uiga ma le leai o se malosi i na tapui. E faapefea? Ia, e tusa ai ma le faamatalaga a le New Encyclopædia Britannica e faapea, “o tapui ua manatu i ai faapea e maua lo latou malosi mai i ona fesootaiga ma isi malosi faalenatura.” O nei malosi atonu po o ‘agaga o ē ua oti’ po o ‘le mana o le laki.’ Ae ua faaalia manino mai e le Tusi Paia e faapea, o ē ua oti “latou te le iloa se mea.” (Failauga 9:5) O lea, e leai ni agaga o ē ua oti e mafai ona fesoasoani pe faatiga i tagata o loo ola; e leai foi se malosi lē vaaia e pei o se laki e mafai ona galue mo oe.

I taimi o le Tusi Paia, sa tausalaina e le Atua i latou na tuua o ia, i latou na faagaloina lona mauga paia, i latou “o ē laulau le ʻai mo [“le  atua o Laki,” NW] ma faatumu le taulaga i mea e inu mo Meni.” Na i lo o le maua ai o le puipuiga, o i latou na lagolagoina le atua o laki, sa tuuina atu mo le faaumatiaga. “Ou te faitauina atu outou mo le pelu,” ua fetalai mai ai Ieova le Atua.—Isaia 65:11, 12.

I le faia o faiga faataulaitu, sa faatuatua atu ai foi le malo o Papelonia i le puipuiga a malosi uigaese. Peitai, sa pagatia foi Papelonia i le mala. Na tuuina atu e le perofeta o Isaia se luitau i le faapea atu: “Ia e tausisi i au apere ma le matautia o au togafiti faataulaitu. Atonu latou te fesoasoani ia te oe . . . Ae leai! e ui lava i le tele o au togafiti faataulaitu, ae ua leai sou malosi.” (Isaia 47:12, 13, The New English Bible) I lena taimi, na matuā faaumatia atoatoa ai lena malo. E mautinoa lava o le faatuatua i togafiti faataulaitu, e lē aogā. E faapena foi i aso nei ona leai o ni tapui faataulaitu e mafai ona fesoasoani pe puipuia ai oe.

O se Ituaiga o Ifoga i Tupua

E tumau pea ona lē iloa e nisi le afaina o le tauaveina o se tioata, se vae lapiti, po o se pine faalelotu. Po ua lē na o ni mea faatauvaa ea nei mea e lē afaina ai? E leai e tusa ai ma le manatu o le Tusi Paia. Ua faapea mai le Tusi Paia, o mea e faia ai faiga faataulaitu e matuā afaina moni ai lava.

O le faaaogāina o tapui o se ituaiga o tapuaiga—o se mea ua manino le tausalaina e le Afioga a le Atua. (Esoto 20:4, 5) E moni atonu e manatu se tagata faapea e lē o tapuai tuusao atu o ia i se tapui. Ae pe lē o faaalia ai ea se uiga migao e pei lava o loo tapuai atu i le malosi o agaga leaga lē vaaia pe a na ona umia e se tasi o se tapui? Ma pe lē moni ea o faiga faatapuaiga e pei o le sogi e masani lava ona fai i se tapui? Ae ua fautua mai le Tusi Paia i le 1 Ioane 5:21 i Kerisiano: “Ia leoleo outou ia te outou ia taumamao i tupua.” Pe lē aofia ai ea i lenei mea tapui faalelotu?

Le Mailei o Togafiti Faataulaitu

E ala i le faaaogāina o tapui, ua maileia ai foi le toatele e ala i togafiti faataulaitu. E moni, atonu e tauaveina e nisi se tioata po o se mea faamaneta e mafua ona o se tu na i lo o se talitonuga. Ae e pei lava ona iu le faia o evaga ma se fafine talitane ina e pisia ai i le faamaʻi o le AIDS, o le miomiō foi la ma togafiti faataulaitu e mafai ona iu ai i mala. Sa iai ni mafuaaga aogā na faasaina ai e le Atua le nuu o Isaraelu mai le faia o togafiti faataulaitu, valovaloga, ma le valoiaina o le lumanai. Ua lapatai mai le Tusi Paia e faapea: “E inosia e Ieova o i latou uma o e faia na mea.”—Teuteronome 18:10-14.

Aisea ua maumauai ai lenei faasasaaga? Auā o malosi po o agaga lē vaaia o loo i tua o na faiga, e lē o agaga o ē ua oti, e lē o le malosi foi o le laki, ae o Satani le Tiapolo ma ana temoni. * Ma o le faaaogāina o tapui ua fesootai tuusao atu ma le tapuaiga i temoni. Ua faapea mai le Vine’s Expository Dictionary of Old and New Testament Words: “I faiga faaapere, o le faaaogāina o fualaau faasaina, e tusa lava pe vaivai pe malolosi, sa masani ona faia faatasi ma upu faataulaitu ma talosaga i le mana o togafiti faataulaitu, e ala i le saunia o tapui eseese ma isi mea faapena.”

O sē na te umia se tapui e fai ai togafiti faataulaitu, ua ia faapipii atu ia lava i faiga faataulaitu. Ua lamatia o ia i taaʻiga agasala ma le pule a “le atua o le lalolagi nei”—o Satani le Tiapolo. (2 Korinito 4:4) O se mafuaaga lelei la, ua poloaiina ai i tatou e le Tusi Paia ina ia  alofia so o se ituaiga o faiga faataulaitu.—Kalatia 5:19-21.

Saoloto mai Faiga Faataulaitu

Ae peitai, ua matauina e le World Book Encyclopedia e faapea: “Atonu o le a iai lava se vaega a faiga faataulaitu i le olaga pe afai e fefe le tasi tagata i le isi ma iai uiga lē mautinoa e faatatau i le lumanai.” Ae ua fesoasoani atu Molimau a Ieova e faasaoloto le toatele mai togafiti faataulaitu e afaina ai. Ua manatua ai e se fafine mai Aferika i Saute e faapea: “Sa faalavelavea aʻu e agaga leaga, ma sa tumu loʻu fale i muti o ni vai faaleatunuu e puipuia ai aʻu mai na agaga leaga.” Sa fesoasoani Molimau a Ieova ia te ia e iloa le matautia o le taaloalo i togafiti faataulaitu. O le ā lana tali mai? Ua faapea mai o ia: “Sa amata ona ou lafoai mea uma na ou maua sa fesootai atu ma faiga faatemoni. Na faaleleia loʻu soifua maloloina. Ma ou tuuina atu ai loa loʻu ola e auauna ai ia Ieova ma ua papatisoina aʻu.” Ua saoloto nei o ia mai faiga faataulaitu ma agaga leaga.

Manatu foi i se tagata fai vai faataulaitu i Nikeria o lē na ia faafesootaia ana vai e faamalolo ai ma faiga faaagaga leaga. I le faaaogāina soo o le faamataʻu ma le faamalaiaina o tagata, sa fai ai ma ana masani le tutuliese o Molimau a Ieova pe a asiasi atu i lona aiga. I se tasi taimi, sa oo ai lava ina ia paluina se vai faapitoa, ma ia fai atu i ai ni upu faataulaitu ma feula atu i mata o se Molimau! Sa ia eē atu faapea: “E toe fitu aso ona e oti loa lea!” I le fitu aso mulimuli ane, sa toe foi atu le Molimau, ma na nanati mai le fai vai i fafo ma lona fale e vaai i le Molimau, sa manatu o ia o se agaga lea ua ia vaaia! Sa faaalialia loa le lē aogā o lana togafiti faataulaitu, sa malie o ia e faia se suesuega faale-Tusi Paia, ma mulimuli ane ai avea o ia ma Molimau.

E mafai foi ona e saoloto mai le saisaitia i le fefe ma faiga faataulaitu. O le mea moni, e lē o se mea faigofie lenei mea. Atonu sa e ola aʻe i se aganuu e taatele ai le faaaogāina o tapui. Sa fesagai foi Kerisiano i Efeso ma lena luitau. Sa latou ola i ni aganuu e matuā taaina malosi e agaga leaga. O le ā na latou faia ina ua latou aʻoaʻoina le upu moni mai le Afioga a le Atua? Ua faapea mai le Tusi Paia: “E toatele foi o e na fai togafiti faataulāitu na faapotopoto e i latou a latou tusi, ma susunu ai i luma o tagata uma; ona latou faitau lea i a latou faatusa, ua iloa ai ua lima sefulu o afe o tupe ario.”—Galuega 19:19.

Mauaina o le Puipuiga a le Atua

Afai e te momotuesea oe lava mai fesootaiga uma ma faiga faataulaitu, po o le a tuua ai ea oe e aunoa ma se puipuiga? I le tuufaafeagai, “o le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” (Salamo 46:1) O le a faaalia moni lava le puipuiga a Ieova pe a ia faaumatia lenei faiga leaga o mea. “Ua silafia e le Alii [“o Ieova,” NW] se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou.”—2 Peteru 2:9; faatusatusa i le Salamo 37:40.

 I aso nei, ‘o le taimi ma le mea e tupu ai e oo ia i tatou uma.’ (Failauga 9:11) E lē o folafolaina mai e le Atua faapea o le a ola ana auauna i se olaga e puipuia ai mai faigata, po o le a ia malutia i latou mai mea uma e afaina ai. Ae peitai, ua ia folafola mai na te puipuia i tatou i le itu faaleagaga ma la tatou faiā ma ia. (Salamo 91:1-9) E faapefea? O se tasi o mea, ua ia tuuina mai ia i tatou tulafono ma mataupu silisili e mafai ona aogā mo i tatou ma puipuia ai i tatou mai taaʻiga iuvale a Satani. (Isaia 48:17) O lo tatou malamalama i ala o Ieova, ‘o le a faafeaoina ai i tatou e le mafaufau, o le faautauta foi, na te leoleoina i tatou’—mo se faaaoaoga, mai gaoioiga lē aogā ma afaina ai.—Faataoto 2:11.

O le isi auala e puipuia ai i tatou e le Atua, e ala lea i le saunia o “le matuā tele o le mana” i taimi o tofotofoga. (2 Korinito 4:7) Ma pe afai ua amata ona faavaivai se Kerisiano i se mea, e mafai e “le manuia [“filemu,” NW] mai le Atua, o loo silisili lava i mea uma e manatu i ai” ona leoleoina o tatou loto ma malosi faalemafaufau. (Filipi 4:7) Ioe, ua faaaupegaina le Kerisiano ina ia “mafaia ona tetee atu i togafiti a le tiapolo.”—Efeso 6:11-13.

E mafai faapefea ona e maua lena puipuiga? E amata mai le aveina i fale o le poto e uiga ia Ieova ma lona Alo, o Iesu Keriso. (Ioane 17:3) E tele mea e mafai ona faia e Molimau a Ieova e fesoasoani atu ai ia te oe e tusa ai ma na mea. A o e atiina aʻe se faiā mafana ma Ieova, o le a amata ai loa ona e tofo i lana puipuiga alofa. Ua fetalai mai le Atua, e pei ona tatou faitau ai i le Salamo 91:14: “Ona ua naunau mai o ia ia te au, o le mea lea ou te faaolaina ai o ia; ou te faamamalu ia te ia ona ua iloa e ia loʻu igoa.”

O le mea moni, afai e te faamaoni ia te ia, o le a iu ina faamanuiaina oe e le Atua i le ola e faavavau i le lalolagi fou o loo fotuai mai. Ua faamautinoaina e Ieova i latou o le a mafai ona ola ai i lena taimi e faapea: “E leai foi se na te faamatau mai; auā ua faapea ona tūlei mai ai le siufofoga o Ieova o ʻau.” (Mika 4:4) O le a lē toe iai ni maʻi ma le oti. (Faaaliga 21:4) O lea, e oo lava i le taimi nei, o loo mafai lava ona e olioli i le saogalemu—pe afai o e atiina aʻe se faiā vavalalata ma Ieova. I le pei o le fai salamo, o le a mafai ona e fai atu: “O loʻu fesoasoani mai ia Ieova lea, o le na faia le lagi atoa ma le lalolagi.”—Salamo 121:2.

[Faaopoopoga i lalo]

[Ata i le itulau 6]

Sa lafoaia e Kerisiano i Efeso mea uma sa fesootai ma togafiti faataulaitu

[Ata i le itulau 7]

I lalo o le Malo o le Atua, o le a lē toe iai se fefe