Aisea e Alofa ai i Lou Tuaoi?

O LE ola e faavavau, e faalagolago i lo tatou alofa i le Atua ma tuaoi. Na faailoa mai lena manatu i se talanoaga na faia i le toetoe lava 2,000 tausaga ua mavae.

Sa fesili atu ia Iesu Keriso se tagata Iutaia e poto i le Tulafono Faa-Mose e faapea: “Se a se mea ou te faia ina ia ou maua ai le ola e faavavau?” Na tali atu Iesu: “O le a ea ua tusia i le Tulafono? O le a lau faitau?” I le sii mai o le Tulafono, na faapea atu ai le tamaloa: “E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe.” Na fetalai atu Iesu: “Ua tonu lau tali. Ia e faapea ona fai, e te ola ai.”—Luka 10:25-28.

Ona fesili atu lea o le tamaloa ia Iesu: “O ai foi le tagata ma te tuaoi?” Na i lo o le tali saʻo atu o Iesu, sa ia faamatalaina se talafaatusa e uiga i se tagata Iutaia o lē na faoa ana mea ma fasi e tagata faomea ma tuu ai i le ala ua tāli oti. Ona ō mai ai lea o isi tagata Iutaia e toalua—muamua o le faitaulaga, ona sosoo ai lea ma le sa Levī. Sa iloa e i laua uma nei le tulaga o lo la uso Iutaia, ae leai se mea na la faia e fesoasoani ai ia te ia. Ona sau ai lea o se tagata Samaria. Ona o lona alofa, sa ia fusifusi ai i manuʻa o le tagata Iutaia, ma ave ia te ia i se fale e tali ai mālō, ma tausia atili ai o ia.

Sa fesili atu Iesu i le tamaloa: “O ai so latou nei o le toatolu ua fai ma tagata la te tuaoi ma le na maua e tagata fao mea?” Ma le manino lava, o le Samaria agalelei. I lea na faaalia ai e Iesu faapea o le alofa faaletuaoi moni, e faalautele atu lea i tagata latou te lē nuu faatasi.—Luka 10:29-37.

Le Leai o se Alofa i Tuaoi

I aso nei, ua tupu tele ai le feainai i le va o tagata i nuu eseese. Mo se faataitaiga, talu ai nei, na lafoina ai i lalo se tagata e leoleo Nasi i aso nei i Siamani ma soli i o latou seevae mamafa, ma gauia ai toetoe lava o ona ivi asoaso uma. Ona latou sasaa lea i lona tino o se vailaau e pei o se sipili ma susunu ai o ia. O le tamaloa lea na tuu ua tāli oti, na mafua ona osofaia ona sa latou manatu faapea o ia o se tagata Iutaia. I se isi foi mea na tupu e ese mai ai, o se fale e latalata i Hamburg i Siamani, sa faatamaia i pomu afi, ma mu ai ni tagata e toatolu e tupuga mai i Take ma maliliu ai—o le tasi o i latou o se teineitiiti e sefulu tausaga.

I le atu Balkans ma isi nuu mamao i sasaʻe, na fasiotia ai le faitauafe o tagata i taua i le va o tagata eseese. O isi na feoti i fetauaiga a tagata o ituaiga eseese i Bangladesh, Initia, ma Pakisitana. Ma i Aferika, na fasiotia ai le toatele o tagata i feteenaiga a ituaiga ma lanu.

E toatele tagata ua loto vaivai i na faiga sauā ma e lē taitai lava ona latou faia se mea e faamanualia ai o latou tuaoi. O le mea moni, e anoanoai solo tetee a tagata ua faia i Siamani e faaalia ai le lē fiafia i faiga sauā a tagata ese. Peitai, ua faapea mai le New Encyclopædia Britannica: “O tagata i le toetoe lava o tu ma aganuu uma i le lalolagi, ua manatu faapea e sili auala o o latou olaga i lo o isi, e oo lava i o latou tuaoi vavalalata.” O na manatu ua punitia ai le alofa i tuaoi. Faamata e iai se mea e mafai ona faia i lenei mea, ae maise lava ona sa fetalai Iesu faapea o le ola e faalagolago i le alofa i le Atua ma tuaoi?

 [Ē Ana le Ata i le itulau 2]

Faavaa: Jules Pelcog/Die Heilige Schrift

[Ē Ana le Ata i le itulau 3]

The Good Samaritan/The Doré Bible Illustrations/Dover Publications, Inc.