Tumau i le Auaunaga Faa-Paeonia

E TUSA ma le 4,500,000 Molimau a Ieova o loo faalauiloaina le tala lelei i le lalolagi aoao. I lena aofaiga, o loo iai le sili atu i le 600,000 paeonia po o ē folafolaina faasauatoa le Malo. O i latou o loo i lenei autau o paeonia e aofia ai ē laiti e oo i ē ua litaea ua silia i le 90 o latou tausaga. E eseese uma atunuu ma talaaga o o latou olaga.

O le mea moni, o nei faifeau sauatoa uma o loo mananao ina ia manuia la latou faiva faapaeonia. O le toatele o i latou o loo faanaunau ina ia avea le paeonia ma a latou galuega i le olaga atoa. O nisi e lē mafai ona paeonia ona o mafuaaga patino. E ui i lea, o loo mafai lava e nisi ona faaauau le paeonia e ui i ni faafitauli tau tupe, le lē lelei o le soifua maloloina, le faalotovaivaiina, ma isi lava faafitauli. O lea, e mafai faapefea e faifeau sauatoa ona faafetaiaia na faafitauli ma tumau ai pea i le auaunaga faapaeonia?

Faafetaiaia o Manaoga Tau Tupe

I le tulaga masani, e galulue ai paeonia i galuega totogi mo le faafetaiaia o a latou tupe faaalu, e pei ona sa faia e le aposetolo o Paulo. (1 Tesalonia 2:9) I le tele o atunuu o le lalolagi, latou te feagai ai ma le siisii pea i luga o le tau o mea taumafa, o lavalava, o fale, atoa ma femalagaaiga. E masani foi ona faafaigata ona maua se galuega totogi faavaitaimi latou te manaomia. Afai foi o maua ni galuega totogi faapena, e masani ona ofoina mai ai ni totogi pito maulalo e aunoa ma ni manuia faaletino e maua ai.

Afai tatou te ‘faaauau pea ona faamuamua le sailia o le Malo o le Atua ma lana amiotonu,’ e mafai ona tatou faatuatua o le a saunia e Ieova mea faaletino tatou te manaomia. O lea, pe afai o le a omia i tulaga tau tupe, e lē tatau i paeonia ona ‘popole i mea o le isi aso.’ (Mataio 6:25-34) A o latou faia ni taumafaiga naunautai ina ia foia na faafitauli, o le faatuatua malosi ia Ieova o le a latou sao ai mai ia popolega e lē manaomia.

Pe afai o le a feagai se tagata ma ni faigata tau tupe, atonu e mafai ona faaitiitia tupe faaalu. O le suia o le auala e faaaogā ai tupe, e ono mafai ona faafetaiaia ai ma le tonu manaoga tatau, ae lē o le manaonao atu fua i isi meafaitino. Ina ia faaitiitia tupe faaalu, ua nonofo faatasi ai nisi paeonia ma isi Kerisiano ina ia saosaolaumea ai i le totogiina o le fale. I nisi taimi, e fesoasoani ai mātua i a latou fanau ina ia paeonia e ala lea  i le nonofo fua o i latou i le fale, pe totogi foi na o sina tupe itiiti. O nisi tagata latou te fesoasoani i paeonia i meaai po o le totogi o o latou pasese. Peitai, e ao i paeonia ona aua neʻi avea i latou ma avega mamafa i isi tagata, auā o la latou tiute faale-Tusi Paia, o le tausia lea o i latou lava.—2 Tesalonia 3:10-12.

E mafai ona faaitiitia tupe e totogi mo femalagaaiga pe a felagolagomai ma isi paeonia. Afai e toalua ni paeonia, e tofu uma i laua ma taavale, atonu e lelei ona fuafua e faaaogā le taavale e tasi pe a galulue faatasi i le talaʻiga i se oganuu e tasi, o le a faasaoina ai le tupe e alu i taavale e lua. O paeonia e leai ni a latou taavale, e mafai ona latou galulue faatasi ma i latou o loo iai taavale ma saosaolaumea i le totogiina o tupe mo femalagaaiga. O se isi auala e faaitiitia ai tupe alu mo feoaiga, o le galulue lea i oganuu latalata e mafai ona savavali i ai. I le tele o atunuu, e feoai ai paeonia i auala faitele e taugofie mo femalagaaiga.

Ua aofia ai Newton Cantwell ma lana avā ia i latou o ē sa mafai ona foia faafitauli tau tupe ma tumau ai pea i le auaunaga faasauatoa. Na faatau atu le la faatoaga ae amata ona paeonia faatasi ma le toaono o le la fanau e toafitu i le 1932, i le taimi tonu o le Mala Tele Tautamaoaiga. Na tusia e Cantwell e faapea: “E leʻi leva lava ae uma ona faaaogā a matou tupe na maua mai i le faatauina atu o le faatoaga—ae maise lava i le totogiina o pili a fomai. Matou te manatuaina foi le taimi na matou ō ai i lo matou tofiga lona lua, na toetoe lava a lē lava le tupe na muai totogi ai lo matou fale mo le lua vaiaso ma na o le lima talā na totoe ai. E ui i lea, na matou iloa e saunia pea e Ieova mea e manaomia pe afai matou te faia pea ma le maelega la matou auaunaga. . . . Sa matou iloa faasoasoa tatau le tupe i auala eseese. Mo se faaaoaoga, ina ua matou siitia atu i se oganuu fou, ou te talanoa atu ai i nisi o pule o pamu penisini, ma faamatala iai a matou taavale e tolu o loo faaaogāina i aso taitasi mo la matou galuega faa-Kerisiano. O le iuga, sa masani ona paʻū ai le tau o a matou penisini. E leʻi umi ae iloa e oʻu atalii ona faaleleia a matou taavale, ma na faasaoina ai tupe e ono totogi atu i fale inisinia.” Sa foia ma le manuia ia luʻi tau tupe e le aiga o Cantwell ma tumau ai pea i le auaunaga faasauatoa. Sa iai pea le uso o Cantwell i le lisi o le au paeonia seia oo ina maliu i le 103 o ona tausaga.

Mauaina o se Galuega Faavaitaimi

O le toatele o paeonia latou te tausia i latou lava i tulaga tau tupe e ala i galuega totogi faavaitaimi. Ina ia tausia ia lava i lana faiva i Korinito, sa galue ai Paulo o se fai faleie faatasi ma ana aumea talitonu o Akula ma Pisila. (Galuega 18:1-11) I aso nei, e fiafia foi uso faaleagaga e ofo atu i paeonia ni galuega totogi faavaitaimi. O nisi paeonia, latou te maua ia galuega totogi mai lālā o matagaluega e pulea tagata faigaluega o loo ofo mai ai ni galuega lē tumau. E tāua tele le faatuatua i le Atua ma tatalo faatauanau mo lana taitaiga i le faia o faaiuga mo ni galuega.—Faataoto 15:29.

Na faapea mai se tasi paeonia: “Ina ua ou maua le tele o le malosi mai i aʻu iloiloga i le tatalo, sa ou logoina loa loʻu pule e faapea o laʻu galuega i le faiva o se avega tauave totino e sili ona tāua, ma o le a ou lē taliaina ai se tulaga o le galue faataimi atoa. I le aso Lulu na sosoo ai, na talosagaina ai aʻu, pe mafai ona ou toe iloiloina le galuega na tuu mai ae o le a fai i se tulaga faavaitaimi. Sa ou taliaina ma le fiafia.” Aua lava nei e manatu faatauvaa i le malosi o le tatalo, ma ia gaoioi e tusa ai ma au tatalo.

Atonu e aogā i paeonia ona talanoa ia i latou o faamoemoe e faafaigaluegaina i latou e uiga i lo latou sini o le sailia o ni galuega faavaitaimi ina ia faatumauina ai i latou i la latou faiva. E mafai ona latou taʻuina i ai aso latou te avanoa ai, ma le aofai o itula i vaiaso taitasi e mafai ona faaaluina i ia galuega. Sa mafai e ni tuafāfine se toalua (o se auuso) ona la vaeluaina se galuega faataimi atoa i se ofisa e ofoina mai ai fautuaga faaletulafono, ma faatagaina ai i laua e galulue e taʻi lua ma le ʻafa aso i le vaiaso. Sa tausia i laua o ni paeonia e lenei galuega, seia oo ina la auai atu i le Aʻoga i Kiliata ma mauaina ai ni o la tofiga faamisionare.

E tele ituaiga o galuega e talafeagai ma mataupu silisili e mafai ona maua, pe a talanoa atu i uso talitonu ma isi, pe faafesootai foi faasalalauga i nusipepa. E aogā tele le  lotomaulalo, e mafai ai ona taofia paeonia mai le ʻai filifili i ituaiga o galuega latou te fia faia. (Faatusatusa i le Iakopo 4:10.) Ina ia faaauau pea i le galuega paeonia, atonu e manaomia ona latou faia galuega totogi ia e manatu i ai le toatele o tagata, o ni galuega e palapalā ma faatauvaa. Afai o le a maua sea ituaiga o galuega ae e ese se isi mea o loo e faananau i ai, atonu la o le a mulimuli ane suia le galuega.

Lē Lelei le Soifua Maloloina ma le Faavaivai

O nisi ua tatau ona tuua la latou auaunaga paeonia ona o ni faafitauli matuia tau i le soifua maloloina. Ae afai e lē soona nanati vale paeonia i lea tulaga, atonu e mafai ona togafitia le gasegase, pe toe faaleleia le soifua maloloina i se tulaga lelei, ona toe faaauau ai lea o le paeonia. E mafai lava ona paeonia le toatele e ui i ni faafitauli i le soifua maloloina, ona o loo faia ia i latou ni togafitiga faafomai, le tausisi i meaai e talafeagai, lava le malōlō ma fai ni faamalositino. Sa matauina e se ovasia faimalaga se tasi tuafafine paeonia sa maua i le gugu ma sa manaomia ai se fesoasoani e savali ai i le auaunaga mai lea fale i lea fale. (Galuega 20:20) E ui i lea faigata, ae sa la faia ma lona toalua ni suesuega faale-Tusi Paia se 33 ma fesoasoani ai i tagata e 83 ina ia talia le upu moni a le Atua. Sa faasolo ina faaleleia le soifua maloloina o le tuafafine, ma i le 11 tausaga mulimuli ane, sa auai ai o ia i le Aʻoga o le Auaunaga Paeonia.

O le faavaivai e ono tuu ai e nisi tagata le auaunaga faapaeonia. (Faataoto 24:10) Na taʻu atu e se tasi paeonia i se ovasia femalagaai e faapea: “O le ā faamuta laʻu paeonia. . . E tele aʻu pili e tatau ona totogi.” Sa ia moomia se matatioata faitautusi e 20 tālā Amerika le tau. Na fesili atu le ovasia: “O le ā tuu lau paeonia ona o lena 20 tālā e te manaomia?” Sa fautuaina le paeonia e alu e faigaluega mo se aso e tasi i le faatoaga kofe a lena atunuu ia maua ai le 20 tālā e faatau ai le matatioata, ma faaauau ai pea ona paeonia. O nisi talanoaga atili na faaalia ai le aa autū o le faavaivai, ona o le taugata o le totogi o le faaleleia o lana taavale. Sa fautuaina le paeonia e lelei pe a galueaiina oganuu latalata i lo le alu mamao, ina ia faaitiitia ai le tupe alu i le taavale. Sa fautuaina foi o ia ina ia tausia pea lona itu faaleagaga. Sa faatatauina e le paeonia le fautuaga, ma i le ono masina mulimuli ane ai, sa valaaulia o ia ina ia auai atu i le Aʻoga i Kiliata. Ina ua uma lona faauuga, sa tofia o ia i se atunuu ese ma sa auauna ai ma le faamaoni i inā mo le tele o tausaga seia oo i lona maliu. Ioe, e tele faamanuiaga e iu i ai pe afai tatou te lē faatuutuu i le faavaivai ae ia teu i manatu o loo faatasi mai pea Ieova ia te i tatou.

Faatauaina Lou Faaeaga o le Auaunaga

E ui i faigata e pei o mea e manaomia, ma taimi e leai ai ni meaai, ae sa manatu Paulo i lana faiva e pei o se oa. (2 Korinito 4:7; 6:3-6) I le feagai ai ma faigata ma sauaga i aso nei, e toatele auauna a Ieova i Aferika, Asia, Europa i Sasae, ma isi nofoaga o loo tumau pea i lo latou faaeaga o le paeonia. Pe a fetaiai ma omiga, latou te faia ni taumafaiga malolosi ina ia tumau ai i lenei auaunaga faaeaina mo le viiga o Ieova.

E toatele paeonia ua mafai ona latou ulu atu i le paeonia sauatoa ona ua latou faafaigofieina o latou lava olaga. I le pei o Paulo, ua latou teena ai faatosinaga o le pupū atu i meafaitino ae atiina aʻe le loto malie i “mea e aai ai ma oofu ai.” Ina ia tumau i le auaunaga faapaeonia, e manaomia ona latou loto malilie i mea e tatau mo i latou. (1 Timoteo 6:8) O le olioli e maua mai i le faatauaina o o tatou faaeaga mai le Atua, e sili mamao atu i lo le faamuamuaina o meafaitino.

Ina ia faataitai: sa faaeaina Anton Koerber e faailoa atu manaoga o le Malo i pule o le Malo i Washington D.C. Sa paeonia o ia mo sina taimi ma na avea foi o se ovasia matagaluega mai le 1952 seia oo i le 1959. I se tasi taimi, na faatalanoa ai o ia e nisi o ana aumea faipisinisi i se fuafuaga na te mauaina ai se tupe mamā mo ia e miliona tālā. Peitai, ina ia faia faapea, e foliga mai e manaomia ona tuuina atu uma lona taimi mo se tausaga atoa e faataunuuina ai lea galuega faapisinisi. Ina ua uma se tatalo mo se taitaiga ma le pulea lelei o le mafaufau, ona ia faapea atu lea: “E lē talafeagai mo aʻu ona lafoaia loʻu faaeaga matagofie o le auauna ia Ieova mo le tausaga e tasi, e tusa lava pe ofoina mai tupe uma  o le lalolagi. E tāua tele loʻu auauna mo oʻu uso i inei i Washington, ma ua ou iloa ua faamanuiaina aʻu e Ieova. Atonu e lē masalomia loʻu mauaina o se miliona tālā, peitai i le iuga o le tausaga o sea ituaiga o olaga, o le a faapeī loʻu tulaga faaleagaga po o loʻu itu faaletino?” O lea na ia teena ai le ofo. O le faatauaina o o latou faaeaga i se auala faapena, o le a fesoasoani i le toatele ina ia tumau ai pea i le auaunaga paeonia.

Maeu ni faaeaga silisili o loo olioli ai paeonia! O se faamanuiaga le faaalu o le tele o itula e taʻutaʻu atu ai le nofoaiga tautupu mamalu a Ieova. (Salamo 145:11-13) Ona o le tuutoina atu o le tele o le taimi i le faiva, ua faamanuiaina ai paeonia i le avatuina o ni faamafanafanaga faaleagaga i ē matitiva ma ē mafatia, i ē mamai ma ē faavauvau, ma isi tagata o loo matuā faanoanoa ma o loo manaomia se faaamoemoe mautinoa. O lea, pe a faatagaina i tatou e o tatou tulaga ina ia auai i le galuega talaʻi faasauatoa, e mautinoa o le a tatou olioli i le tele o faamanuiaga. O le “faamanuia a Ieova o lea e faatamaoaiga aʻi.” (Faataoto 10:22) Ma faatasi ai ma lana fesoasoani ma lana faamanuiaga, ua mafai ai e le toatele o ē folafolaina le Malo ona tutumau ma le olioli i le auaunaga faapaeonia.