Tatalaina le Mealilo e Uiga i le Suafa Silisili

E fiafia ona e faasino uma le Korana a Musalimi ma le Tusi Paia Kerisiano i le suafa silisili. O le a faamalamalamaina i lenei talanoaga le uiga ma le tāua o le suafa silisili. O le a faaalia ai foi le auala ua faaaafia ai e lena suafa tagata uma lava faapena foi ma lo tatou lumanai i inei i le lalolagi.

E FAITAU miliona tane ma fafine ua ola ma maliliu i luga o lenei lalolagi. Ma o le toatele lava o i latou ua maliliu ma ua galo atu foi ma o latou igoa, ma ua lē toe manatua i latou. Ae o nisi igoa tautaua—e pei o Avicenna, Edison, Pasteur, Beethoven, Gandhi, ma Newton—o loo manatua pea. O nei igoa ua manatua pea ona o ni gaoioiga na latou faia, ni mea na latou amataina, ma ni mea na faia e i latou o loo tauaveina nei igoa.

Ae peitai, e iai se igoa po o se suafa e silisili i lo o nei igoa uma. O mea ofoofogia uma na faia i le vateatea i aso ua mavae ma le taimi nei, ua tuuina uma atu i lea suafa. Ioe, o le pogai o le faamoemoe o tagata mo se olaga fiafia faafualoa ua fesootai atu ma lea suafa!

E toatele ua latou mananao ina ia iloa lea suafa. Ua leva ona latou sailiili ma fesilisili e uiga i ai, ae latou te leʻi maua lava. Ua tumau pea ona avea o se mealilo ia i latou. Ae o le mea moni, e lē mafai e se tagata ona iloa lea suafa seʻi vaganā lava ua faailoa atu ia te ia e Lē e Ona lea suafa. Ae e fiafia lava ona ua tatalaina nei le mealilo e uiga i lea suafa silisili. Ua faia e le Atua lava ia lenei mea ina ia mafai ai e i latou o ē talitonu ia te ia ona iloa o Ia. Sa Ia faaali atu lona suafa ia Atamu, ona sosoo ai lea ma Aperaamo, ia Mose, ma i isi o Ana auauna faamaoni i aso anamua.

Le Sailiga mo le Suafa Silisili

Ua taʻu mai e le tusi o le Korana e uiga i se tasi “sa matuā poto i Tusi Paia.” (27:40) I le faamatalaina o lenei fuaiupu, ua faapea mai ai se faamatalaga a se tusi na lauiloa o le Tafsīr Jalālayn: “O Asafo le atalii o Perekia sa o se tagata amiotonu. Sa ia iloa le suafa silisili o le Atua, ma so o se taimi lava e valaau i ai o ia, sa talia mai.” Ua faamanatu mai ai e lenei mea ia i tatou e uiga i le tusitala o le Tusi Paia o Asafo, o lē na faapea mai i le Salamo 83:18: “Ina ia iloa e i latou, o oe, e ou le suafa o Ieova, na o oe lava o le Silisili Ese i le lalolagi uma.”

I le Korana 17:2, ua tatou faitau ai e faapea: “Na matou tuuina atu ia Mose le Tusi Paia ma faia ina ia avea ma taiala mo tagata Isaraelu.” I na Tusi Paia, o loo faapea atu ai Mose i le Atua: “Pe a aʻu alu atu i le fanauga a Isaraelu, ma aʻu fai atu ia i latou, Ua auina mai aʻu ia te outou e le Atua o outou tamā; ona latou fai mai lea ia te au, O ai ea lona suafa? Se a ea saʻu e fai atu ai ia te i latou?” Ona tali mai lea o le Atua ia Mose ua faapea mai: “Ia faapea ona e fai atu i le fanauga a Isaraelu, Ua auina mai aʻu ia te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foi o Iakopo, o loʻu igoa lena e faavavau.”—Esoto 3:13, 15.

I aso anamua, sa iloa e tagata Isaraelu lenei suafa sili o le Atua. Sa faaaogāina foi e faia aʻe  ai o latou lava igoa. E pei o se tasi o igoa o iai nei o Abdullah, o lona uiga “Auauna a le Atua,” ma sa iai foi i tagata Isaraelu anamua le igoa Opetaia, o lona uiga, “Auauna a Ieova.” O le tinā o le perofeta o Mose sa faaigoaina ia Iokapeta, lea e mafai ona uiga, “E Mamalu Ieova.” O le uiga o le igoa Ioane, “Ua Agalelei Tele Ieova.” Ma o le igoa o le perofeta o Elia, o lona uiga, “O Loʻu Atua o Ieova.”

Sa iloa e perofeta lenei suafa sili ma sa faaaogā ma le matuā faaaloalo loloto i ai. O loo maua lea suafa e sili atu i le 7,000 taimi i le Tusi Paia. Sa faamatilatila mai e Iesu Keriso le alo o Maria lenei suafa ina ua ia tatalo i le Atua: “Ua ou faaali atu lou suafa i tagata na e foai mai ia te au . . . Ua ou faailoa atu foi lou suafa ia te i latou, ou te faailoa atu ai foi; ina ia i totonu ia te i latou le alofa ua e alofa mai ai ia te au.” (Ioane 17:6, 26) I lana faamatalaga tautaua i le Korana, ua faamatala mai ai e Bayḍāwī i le Korana 2:87, i le faapea mai, sa faaaogā e Iesu le “suafa silisili o le Atua e faaolaina ai tagata na maliliu.”

Ae o le ā la le mea na tupu ua avea ai lena suafa ma mealilo? O le ā le aafiaga o i tatou taitoatasi i le lumanai e tusa ai ma lena suafa?

Na Faapefea ona Avea le Suafa ma Mealilo?

Ua manatu nisi faapea, o “Ieova” i le faa-Eperu o lona uiga o “Allah” (Atua). Ae o “Allah” e tutusa lea ma le upu Eperu ʼElo·himʹ, o le numera tele o le malualii o le upu ʼelohʹah (atua). Ae ona sa tupu mai i tagata Iutaia se talitonuga i faiga faataulaitu, o le mea lena na taofia ai lo latou faaleoina o le suafa tauatua, o Ieova. O le mea lea, pe a latou faitauina le Tusi Paia ma vaaia ai le suafa o Ieova, sa avea ma a latou tu le taʻu o le upu ʼAdho·naiʹ, o lona uiga, “Alii.” I nisi vaipanoa, ua oo lava ina latou suia le uluai upu Eperu anamua o “Ieova” ae tuu i ai le ʼAdho·naiʹ.

Ua mulimuli ai foi taʻitaʻi lotu o Kerisinetoma i lea lava auala. Ua latou suia le suafa Ieova i le upu “Atua” (“Allah” i le faa-Arapi) ma le “Alii.” Sa faia se sao o lena mea i le tupu aʻe o le aʻoaʻoga sese o le Tolutasi, lea e matuā leai lava sona faavae faale-Tusi Paia. Ona o lenei mea, ua tapuai sese atu ai le faitau miliona o tagata ia Iesu ma le agaga paia, ma manatu ai ia i laua e tutusa ma le Atua. *

O lea, e tofu sao uma lava taʻitaʻi o le Lotu Iutaia ma Kerisinetoma i le tuuaiga ona o le faasalalauina atu o le lē taualoaina o le suafa silisili. Ae na valoia e le Atua: “Ou te faapaiaina loʻu igoa mamalu, . . . e iloa ai foi e nuu ese o aʻu lava o Ieova.” Ioe, o le a faalauiloa atu e Ieova lona suafa i nuu uma lava. Aisea? Auā e lē o ia o se Atua mo na o tagata Iutaia po o se nuu po o se ituaiga o tagata e tasi. O Ieova o le Atua o tagata uma lava.—Esekielu 36:23; Kenese 22:18; Salamo 145:21; Malaki 1:11.

Le Suafa Silisili ma lo Tatou Lumanai

Ua faapea mai le Tusi Paia: “E faaolaina i latou uma o e valaau i le suafa o le Alii [“o Ieova,” NW].” (Roma 10:13) O lo tatou faaolataga i le aso o le faamasinoga, o le a fesootai ma lo tatou iloaina o le suafa o le Atua. O le iloa o lona suafa, e aofia ai ma le iloa o ona uiga, ana galuega, ma ana fuafuaga ma ola e ogatasi ma ana mataupu silisili ona maualuluga. Mo se faaaoaoga, sa iloa e Aperaamo le suafa o le Atua, ma valaau atu i lena suafa. O le iuga, sa ia maua se faiā lelei ma le Atua, faaalia le faatuatua ia te ia, faalagolago ia te ia, ma usiusitai ia te ia. I lea, na avea ai Aperaamo ma uo a le Atua. E faapena foi, o le iloa o le suafa o le Atua, ua tosina vavalalata ai i tatou ia te ia ma fesoasoani foi ia i tatou ia atiina aʻe se faiā totino ma ia, ma pipiimau pea i lona alofa.—Kenese 12:8; Salamo 9:10; Faataoto 18:10; Iakopo 2:23.

Ua tatou faitau faapea i le Tusi Paia: “Ua liliu mai foi e Ieova ona fofoga, ma ua faafofoga  mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.” (Malaki 3:16) Aisea e tatau ai ona tatou ‘mafaufau’ i le suafa silisili? Ona o le suafa o Ieova, o lona uiga moni lava, “O Ia ua Pogai ai ona Iai.” Ua faaalia ai i lenei mea o Ieova o Ia Lē na pogai ai ona avea o ia lava ma Lē e faataunuuina folafolaga. Na te faataunuuina pea ana fuafuaga. O Ia o le Atua e ona le malosi uma lava, na o Lē na Foafoaina mea, o lē e ona uiga lelei uma. E matuā leai lava se upu e tasi e mafai ona faamatalaina atoatoa ai uiga tauatua o le Atua. Ae na filifilia e le Atua mo ia lava le suafa silisili—o Ieova—ma e faamanatu mai ai ona uiga lelei uma ma fuafuaga.

I le Tusi Paia, ua taʻu mai ai e le Atua ia i tatou e uiga i ana fuafuaga mo tagata. Na foafoaina e Ieova le Atua le tagata ina ia olioli i se olaga fiafia e faavavau i le Parataiso. O lona finagalo mo tagata e faapea, ia faia aʻe i tagata uma lava se aiga e tasi, e autasi i le alofa ma le filemu. O le a faataunuuina e le Atua alofa lenei fuafuaga i le lumanai lata mai.—Mataio 24:3-14, 32-42; 1 Ioane 4:14-21.

Ua faamatala mai e le Atua mafuaaga mo mafatiaga o tagata ma faaalia ai faapea e mafai ona maua le faaolataga. (Faaaliga 21:4) I le Salamo 37:10, 11, ua tatou faitau ai e faapea: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava. A o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Tagai foi i le Korana 21:105.

Ioe, o le a lauiloa le Atua i lona suafa silisili. O le a iloa e nuu uma o ia lava o Ieova. Maeu se faaeaga ofoofogia o le iloa o le suafa silisili, fai ma molimau i ai, ma ia pipiimau i ai! I lena auala, o le a faataunuuina ai le fuafuaga fiafia a le Atua ia i tatou taitoatasi: “Ona ua naunau mai o ia ia te au, o le mea lea ou te faaolaina ai o ia; ou te faamamalu ia te ia ona ua iloa e ia loʻu igoa. E valaau mai o ia ia te au, ona ou tali atu ai lea ia te ia. . . . O le olaga faafualoa e mālie ai o ia ia te au; ou te faaali atu foi ia te ia laʻu faaolataga.”—Salamo 91:14-16

[Faaopoopoga i lalo]

[Ata i le itulau 5]

I le laau talatala na mu, na faailoa atu ai e le Atua ia lava ia Mose faapea o ‘Ieova, o le Atua o Aperaamo’

[Ē Ana le Ata]

Moses and the Burning Bush, by W. Thomas, Sr.