Atiina aʻe le Mataʻu Faaleatua

“Ia e mataʻu ia Ieova, ia ʻalo ese i le leaga.”—FAATAOTO 3:7.

1. Mo ai sa tusia i ai le tusi o Faataoto?

O LOO i le tusi o le Tusi Paia o Faataoto le oa o fautuaga faaleagaga. Na saunia e Ieova lenei tusi o se taiala muamua e faatonu ai lona nuu faapitoa o Isaraelu. I aso nei, ua saunia e lenei tusi faamatalaga atamai mo lona nuu paia faa-Kerisiano, “o e ua aulia mai ai tausaga e gata ai.”—1 Korinito 10:11; Faataoto 1:1-5; 1 Peteru 2:9.

2. Aisea ua sili ai ona talafeagai le lapataiga o loo i le Faataoto 3:7 i aso nei?

² I le liliu atu i le Faataoto 3:7, tatou te faitau ai e faapea: “Aua e te faafiapoto; ia e mataʻu ia Ieova, ia ʻalo ese i le leaga.” Talu mai  lava le taimi o o tatou uluai mātua, ina ua faaseseina e le Gata Eva i le folafola atu o lo la ‘iloaina o le lelei ma le leaga,’ ua lē taulau ai i le poto o le tagata lava ia ona tali atu i manaoga o le tagata. (Kenese 3:4, 5; 1 Korinito 3:19, 20) E leai lava se vaitaimi i le talafaasolopito ua sili atu ona taunuu ai lenei mea na i lo o lenei 20 o senituri—o nei “aso e gata ai” ina ua seleseleina e tagata fua o le lē talitonu o loo soifua le Atua, o mafaufauga faaevolusione, le faaleagaina e ala i le faailoga lanu, le faasaua, ma ituaiga uma lava o amioga lē mamā. (2 Timoteo 3:1-5, 13; 2 Peteru 3:3, 4) O se ‘pulega fou a le lalolagi’ lea e lē mafai e Malo Aufaatasi, e oo lava i lotu laiti o le lalolagi ona faasaʻosaʻoina.

3. O ā taualumaga sa valoiaina mai mo o tatou aso?

³ Ua faailoa mai e le Afioga faavaloaga a le Atua ia i tatou e faapea, ua ō atu ʻau a temoni i “tupu o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava . . . i le mea ua igoa i le upu Eperu o Amaketo.” (Faaaliga 16:14, 16) Ua lē o toe umi ae oo mai loa le faamatauga mai ia Ieova, i na tupu po o pulega. O le a pei o le gatete lea na i luga o tagata Kanana ina ua oo atu Iosua ma tagata Isaraelu e faaoo le faasalaga faafaamasinoga ia i latou. (Iosua 2:9-11) Ae i aso nei, o lē ua fai ma sui o Iosua, o Keriso Iesu—le “Tupu o tupu ma le Alii o alii”—o lē o le a na ‘taiaina nuu, e pule foi o ia ia te i latou i le tootoo uamea’ ona o le “toasa mamafa o le Atua e ona le malosi uma lava.”—Faaaliga 19:15, 16.

4, 5. O ai o le a mauaina le faaolataga, ma aisea?

⁴ O ai o le a na maua le faaolataga i lena taimi? O i latou o le a faasaoina, o le a lē o i latou ua faatumulia i le fefe, ae o i latou uma lava o ē atiina aʻe le mataʻu tatau ia Ieova. Na i lo o le faafiapopoto i o latou lava manatu, o i latou nei ua “liliu ese i le leaga.” Ua latou fafagaina o latou mafaufau i mea lelei ona o le loto maulalo, ina ia matuā aveesea atoatoa ai le leaga mai o latou mafaufauga. Ua latou tuuina atu se faaaloalo loloto mo le Alii Pule Silisiliese o Ieova, “o le na te faamasinoina le lalolagi uma,” o lē o le a na faaumatia i latou uma o ē taofi pea i le leaga, e pei lava ona sa ia tafiesea tagata leaga o Sotoma. (Kenese 18:25) O le mea moni, i tagata o le Atua lava ia, “o le mataʻu ia Ieova, o le puna o le ola lea, e ʻalo ese ai i mailei e oti ai.”—Faataoto 14:27.

⁵ I lenei aso o le faamasinoga mai le Atua, o i latou uma lava o ē ua tuuina atu atoatoa i latou lava ia Ieova ona o le mataʻu ina neʻi faia se mea e lē fiafia ai o ia, o le a latou iloaina le moni o upu o loo tusia faafaatusa i le Faataoto 3:8: “E fai [le mataʻu ia Ieova] ma mea e malosi ai lou pute, ma mea e su ai ou ivi.”

Ia Faapaiaina Ieova

6. O le ā e ao ona uunaia ai i tatou e utagiaina le Faataoto 3:9?

⁶ O lo tatou mataʻu ma le loto talisapaia mo Ieova, faatasi ma le alofa naunautai mo ia, e ao ona uunaia ai i tatou e utagiaina le Faataoto 3:9: “Ia e ava ia Ieova i lou oa, ma le faapolopolo o au mea uma e tutupu.” E lē o faamalosia i tatou ina ia āva ia Ieova i taulaga tatou te ofoina atu ia te ia. E ao ona faia i le lotomalie, e pei ona faaalia mai pe tusa ma le 12 taimi le Esoto 35:29 e oo i le Teuteronome 23:23, e tusa ai ma taulaga i Isaraelu anamua. O nei uluai fua mo Ieova, e ao ona avea o ni meaalofa e silisili ona lelei e mafai ona tatou ofoina atu, ina ia faailoa atu ai le alofa ma le agalelei lea o loo tatou olioli ai i ona aao. (Salamo 23:6) E ao ona atagia atu i na meaalofa lo tatou lotomau ina ia “muai saili le malo o le Atua ma lana amiotonu.” (Mataio 6:33) Ma o ā iuga tatou te maua mai i le āva ia Ieova i a tatou oa? “Ona tutumu ai lea ou fale saito i le mau; e feosofi foi au tuugāuaina i le uaina fou.”—Faataoto 3:10.

7. O ā uluai fua e ao ona tatou ofoina atu ia Ieova, ma o le ā o le a iu i ai?

⁷ O le auala sili ua faamanuiaina ai i tatou e Ieova, o le itu faaleagaga. (Malaki 3:10) O uluai fua la tatou te ofoina atu ia te ia, e ao ona faamuamua i le itu faaleagaga. E ao ona faaaogāina o tatou taimi, le malosi, ma le  uunaiga tāua i le faia o lona finagalo. O le a iu lea i le fafagaina ai o i tatou, e pei lava ona avea lena galuega o se “meaai” na faafouina ai Iesu. (Ioane 4:34) O le a tutumu ai o tatou faleteuoa faaleagaga, ma o lo tatou olioli, e faatusaina i uaina fou, o le a taumasuasua. E lē gata i lea, a o tatou tatalo atu ma le lē masalosalo mo meaai faaletino ia lava mo aso taitasi, e mafai ona tatou foai atu e lē aunoa ma le agalelei mai i mea ua tatou maua mo le lagolagoina o le galuega o le Malo i le lalolagi aoao. (Mataio 6:11) O mea uma tatou te maua, e aofia ai mea faitino, ua tatou maua mai i lo tatou Tamā alofa faalelagi. O le a ia liligi atili mai faamanuiaga, ina ia tatou faaaogāina ai le tele o nei oa mo lona viiga.—Faataoto 11:4; 1 Korinito 4:7.

Aoaiga o le Alofa

8, 9. E ao faapefea ona tatou manatu i faasaʻoga ma aoaiga?

⁸ I fuaiupu e 11 ma le 12, ua toe taʻua ai foi e le Faataoto mataupu e 3 le faiā fiafia i le va o le tamā ma le atalii, lea e iai i aiga faaleatua, e pei ona iai i le va o Ieova ma lana fanau pele faaleagaga i le lalolagi. Tatou te faitau i ai e faapea: “Loʻu atalii e, aua le faatauvaa ia te oe le aoaiga a Ieova; aua foi e te ʻinoʻino pe a aoaiina oe e ia. Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.” E inoino tagata o le lalolagi i le aoaiga. Ae ao i tagata o Ieova ona latou fiafia e taliaina. Na sii mai e le aposetolo o Paulo nei upu mai le Faataoto i le faapea mai: “Loʻu atalii e, aua le faatauvaa  i lou manatu le aoaiga a le Alii; aua foi le faavaivai pe a aoaiina oe e ia. Auā o le ua alofagia e le Alii, ua aoai atu o ia ia te ia . . . O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.”—Eperu 12:5, 6, 11.

⁹ Ioe, o aoaiga o se vaega talafeagai o le toleniina o i tatou uma taitoatasi, pe tatou te maua mai i o tatou mātua, pe ala mai i le faapotopotoga Kerisiano, po o le maua foi i lo tatou mafaufau loloto i le Tusi Paia i le taimi o a tatou suesuega totino. O se vaega e faalagolago i ai lo tatou ola ma le oti o le utagiaina o aoaiga, e pei ona tusia foi i le Faataoto 4:1, 13 e faapea: “Faalogo mai ia, outou le fanau e, i le aʻoaʻo atu a le tamā, ma uai mai o outou taliga ina ia faaatamamaiina outou. Ia e taofi mau i upu e aʻoaʻoina, aua neʻi tuuina atu; ia e leoleo i ai; auā o lou ola lava lea.”

Le Fiafiaga Sili

10, 11. O ā nisi o vala o upu matagofie o loo i le Faataoto 3:13-18?

¹⁰ Maeu le manaia o le faaupuga o loo sosoo mai nei, o le mea moni ‘e matagofie ma tonu upu moni’! (Failauga 12:10) O nei upu faagaeeina a Solomona ua faamatalaina ai le fiafiaga moni. O ni upu e ao ona teu i o tatou loto. Tatou te faitau i ai e faapea:

¹¹ “Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina; ma au mea faafiafia uma lava e le tusa ma ia. O loo i lona lima taumatau le ola tuluʻi; a o i lona lima tauagavale le oloa ma le viiga. O ona ala o ala matagofie; ma ona magāala uma o i ai le manuia. O ia o le laau o le ola i e tago atu ia te ia; amuia foi i latou o e taofi atu ia te ia.”—Faataoto 3:13-18.

12. E ao faapefea ona aogā le poto ma le faautauta ia i tatou?

¹² Poto—maeu le taʻua soo o lenei upu i le tusi o Faataoto, e 46 lona aofaiga atoa! “O le mataʻu ia Ieova o le amataga o le poto lea.” O le poto faaleatua lenei, o le poto aogā e faavae i luga o le iloa lelei o le Afioga a le Atua, lea e mafai ai e ona tagata ona faafoeina se ala e malupuipuia ai mai i matagi tetele matautia o loo taia ai le lalolagi a Satani. (Faataoto 9:10) O le faautauta, o loo faasino i ai e 19 taimi i le Faataoto, e fuifui lua ma le poto, e fesoasoani ia i tatou ina ia tetee atu ai i togafiti a Satani. Ua faitau meleniuma le poto masani o le Fili sili, i lona faataulauina o ana gaoioiga taufaaʻoleʻole. Ae peitai, ua ia i tatou se mea e sili atu ona tautele, na i lo o le na o se faiaoga ua iai le poto masani—o le faautauta lea faaleatua, o le tomai e iloa ai le lelei ma le leaga, ma filifilia ai le ala saʻo e ui ai. O le mea lenei ua aʻoaʻoina ai i tatou e Ieova e ala mai i lana Afioga.—Faataoto 2:10-13; Efeso 6:11.

13. O le ā e mafai ona puipuia ai i tatou i taimi o faigata tau tamaoaiga, ma e faapefea?

¹³ O le pagatia tau tamaoaiga i le lalolagi i aso nei, o se faailoga lea o le faataunuuga o le valoaga i le Esekielu 7:19 e faapea: “E lafoai e i latou a latou ario i fafo, ma a latou auro e fai ma mea leaga ia; o a latou ario ma a latou auro e le mafai ai ona laveaiina o i latou i le aso o le ita o Ieova.” O le tamaoaiga faaletino uma i luga o le lalolagi, e lē mafai ona faatusatusaina i le malosi o le poto ma le faautauta e faasaoina ai. Na tusia e le tupu poto o Solomona i se tasi taimi e faapea: “Ua fai le poto ma mamalu, ua fai foi tupe ma mamalu; a o le aoga lenei o le poto ua maua, e ola ai e ua i ai.” (Failauga 7:12) Ua fiafia moni i latou uma o ē o loo savavali i aso nei i ala laulelei o Ieova, ma ē ua filifili ma le poto le “ola tuluʻi,” le ola e faavavau, o le meaalofa a le Atua ia i latou uma lava o ē faaalia le faatuatua i le taulaga togiola a Iesu!—Faataoto 3:16; Ioane 3:16; 17:3.

Atiina aʻe le Poto Moni

14. I ā auala ua faaalia mai ai e Ieova le poto e faaaʻoaʻo i ai?

¹⁴ O se mea ua talafeagai mo i tatou uma lava, o tagata na faia i le faatusa o le Atua, ona tauivi e atiina aʻe le poto ma le faautauta, o  uiga na faaalia e Ieova lava ia i le faatinoina o ana galuega mamana o le foafoaga. “O le poto na faavae ai e Ieova le lalolagi; ua faatumauina le lagi i le mafaufau.” (Faataoto 3:19, 20) Sa ia finagalo e faia meafaiola, e lē ala mai i se faiga faaevolusione faalilolilo e lē mafai ona faamatalaina, ae e ala i galuega tuusao o le foafoaga, e taitasi “ma lona uiga” ma e mo se fuafuaga atamai. (Kenese 1:25) Ina ua uma ona faia le tagata ma se atamai ma ona tomai e sili atu na i lo o meaola, atonu sa lagona ai le taalili o le lagi i le alalaga o atalii agelu o le Atua. (Faatusatusa i le Iopu 38:1, 4, 7.) O le tofa mamao a Ieova, o lona poto, ma lona alofa, ua aliali manino mai i ana galuega uma i le lalolagi.—Salamo 104:24.

15. (a) Aisea e lē lava ai le na ona atiina aʻe o le poto? (e) O le ā le faamautinoaga e ao i le Faataoto 3:25, 26 ona faamanatu mai pea ia i tatou?

¹⁵ Tatou te manaomia e lē na o le atiina aʻe o uiga o Ieova o le poto ma le faautauta, ae ia taofi mau foi i ai, aua neʻi faapaie i a tatou suesuega o lana Afioga. Ua augani mai o ia ia i tatou e faapea: “Loʻu atalii e, aua neʻi teʻa ese nei mea i ou luma; ia e taofi mau i le poto ma le mafaufau; e fai ia mea ma ola o lou agaga, ma mea matagofie i lou ua.” (Faataoto 3:21, 22) I lea, e mafai ai ona tatou savavali i le saogalemu ma le filemu o le mafaufau, e tusa lava pe ua latalata mai le aso e pei o le gaoi, le “fano faafuasei” lea o le a oo mai i luga o le lalolagi a Satani. (1 Tesalonia 5:2, 3) I le taimi o le puapuaga tele lava ia, “aua e te mataʻu i le fefe faafuasei, ma le malaia o e amio leaga, pe a oo mai. Auā o Ieova, e fai o ia mou faatuatuaga; na te leoleo foi i lou vae, neʻi maua.”—Faataoto 3:23-26.

Fiafia i le Faia o le Mea Lelei

16. O le ā le gaoioiga ua manaomia mo Kerisiano e faaopoopo atu i le maelega i le faiva?

¹⁶ O aso nei e faaalia ai le maelega i le talaʻiina o le tala lelei o le Malo e fai ma molimau i nuu uma. Ae o lenei galuega o le molimau atu, e ao ona lagolagoina e isi gaoioiga faa-Kerisiano, e pei ona taʻua i le Faataoto 3:27, 28 e faapea: “Aua neʻi e faafiti se mea lelei i e ua tatau i ai, pe a ua e mafai ona faia. Aua neʻi e fai atu i lē lua te tuaoi, Alu ia, ina toe sau, a taeao, ona ou avatu ai lea; a o loo i ai lava le mea ia te oe.” (Faatusatusa i le Iakopo 2:14-17.) Ona o le toatele o le lalolagi ua pagatia i le mativa ma le oge, ua valaaulia faanatinati ai i tatou e fesoasoani atu i o tatou uso a tagata, ae maise lava o tatou uso faaleagaga. Ua faapefea ona tali atu Molimau a Ieova?

17-19. (a) O le ā le manaoga faanatinati na faamalieina i le 1993, ma o le ā le tali atu i ai? (e) O le ā e faataitaia ai e faapea o o tatou uso na puapuagatia ua “manumalo aiai i nei mea uma lava”?

¹⁷ Seʻi aumai se faaaoaoga se tasi: I le tausaga ua mavae, na sau ai se valaau faanatinati mo se fesoasoani mai le atunuu na taʻua muamua o Yugoslavia. Na ofoofogia le tali vave atu i ai a uso i atunuu na latou tuaoi. I masina o le tau malulu na teʻa nei, sa mafai ai e loli laʻu uta ona oo atu i laufanua o taua, ma uta o lomiga fou, o ofu mafanafana, o mea taumafa, ma vailaau mo Molimau na manaomia. I se tasi o mea na tupu, na talosaga ai ni uso mo ni pemita e ō atu ai e avatu tone e 15 o mea mo le fesoasoani, peitai, ina ua latou mauaina le pemita, o le pemita mo le 30 tone! Sa vave loa ona aauina atu e Molimau a Ieova i Oseteria isi loli tutumu e tolu. I le tuufaatasiga, e 25 tone na taunuu lelei i le mea na faamoemoe e taunuu i ai. Maeu se fiafia o o tatou uso ina ua latou mauaina le tele o nei taumafa faaleagaga ma sauniuniga faaletino!

¹⁸ Sa faapefea ona tali atu i latou na mauaina na fesoasoani? I le amataga lava o le tausaga nei, na tusi atu ai se toeaina e faapea: “O loo soifua pea ma maua e uso ma tuafāfine i Sarajevo le soifua maloloina lelei, ma o le mea e silisili ona tāua, o loo matou malolosi pea faaleagaga e tumau ai i lenei taua valea. Sa matuā faigata tele le tulaga e tusa ai ma meaai. Tau ia ina ia faamanuia mai Ieova ma tauia outou mo taumafaiga uma na outou faia mo i matou. Ua faaalia e faipule silisili le faaaloalo faapitoa mo Molimau a Ieova, ona o la latou faaaoaoga lelei i le olaga, ma ona o lo  latou faaaloalo mo faipule silisili. Matou te faafetai tele foi mo meaai faaleagaga sa outou auina mai mo i matou.”—Faatusatusa i le Salamo 145:18.

¹⁹ Ua faaalia foi e nei uso o loo i se tulaga lamatia le agaga talisapaia, e ala lea i lo latou maelega i le faiva i le fanua. E toatele tuaoi ua gasolo ane ia i latou ma molimanao ane i ai mo le faia o ni suesuega faale-Tusi Paia i o latou aiga. I le aai o Tuzla, lea na aauina atu i ai tone e lima o meaai ina ia fesoasoani ai ia i latou, e toʻa 40 le au talaʻi na lipotia mai, ma e taʻi 25 itula a le tagata e toatasi i le auaunaga i se fua faatatau i le masina, faatasi ai ma le lagolagosua malosi na tuuina ane e paeonia e toaiva a le faapotopotoga. Sa iai se aofaiga mataina e 243 na auai i le Faamanatuga o le maliu o Iesu. O nei uso pele, o le mea moni ua “manumalo aiai i nei mea uma lava, ona o ia ua alofa mai ia te i tatou.”—Roma 8:37.

20. O le ā le “fai faatatau” na faaalia i le mea na uluai taʻua o le Soviet Union?

²⁰ O le agaga o le lima foai na faatinoina i le solo tele o loli laʻu uta o meaai ma ofu mafanafana na auina atu i le mea na taʻua muamua o le Soviet Union, ua matuā tutusa lelei ma le maelega o uso i inā. Mo se faaaoaoga, i Moscow, e tusa ma le 7,549 na auai i le faamanatuga i le tausaga nei, e faatusatusa atu i le 3,500 na auai i le tausaga ua teʻa. I lena lava vaitaimi, na faateleina ai foi faapotopotoga i lea lava aai mai le 12 e oo i le 16. I le atunuu atoa na uluai taʻua o le Soviet Union, (e lē lavea ai le Baltic States), o le faatelega o faapotopotoga e 14 pasene, i le au talaʻi o le Malo e 25 pasene, ma i paeonia e 74 pasene. Maeu se agaga o le maelega ma le faataulagaina totino! Ua faamanatu mai ai se mea na tupu i le uluai senituri ina ua iai le “fai faatatau.” O Kerisiano sa iai mea totino faaleagaga ma faaletino, sa latou faia ni foai ma le agalelei ia i latou sa i tulaga faaletonu, a o faaalia e nei tagata na pagatia le maelega, na aumaia ai le olioli ma faalaeiauga i ē na ofoina atu meaalofa.—2 Korinito 8:14.

Inoino i le Leaga!

21. Ua faapefea ona faaeseeseina ē popoto mai ē valelea i upu faaiu o le Faataoto mataupu e 3?

²¹ Ona sosoo ai lea ma le aumaia e le mataupu e tolu o le Faataoto o se faasologa o faaeseesega, ma faaiuina ai i le lapataiga lenei: “Aua e te mataua i le tagata faasaua; aua foi e te filifili i se tasi o ona ala. Auā e inosia e Ieova le tagata agapiopio; a e fefaauoai o ia ma e ua sao a latou amio. O le fetuu a Ieova o loo i le fale o lē amio leaga; a ua faamanuia e ia le mea e nofo ai ē amiotonu. O e tauemu e tauemua foi i latou e ia; a e foai mai e ia le alofa tunoa i e agamalu. O e popoto e fai mo latou tofi le viiga; a o e valelea, e fai mo latou tomai le mā.”—Faataoto 3:29-35.

22. (a) Atonu e faapefea ona tatou alofia le faitaulia faatasi ma ē valelea? (e) O le ā e inoino i ai ē popoto, ae o le ā ua latou atiina aʻe, faatasi ma le ā le taui?

²² Tatou te ono alofia faapefea le iai faatasi ma ē valelea? E ao ona tatou aʻoaʻo e inoino i le leaga, ioe, inoino i mea e inoino i ai Ieova—o auala faapiopio uma a lenei lalolagi sauā ma le faamasaatoto. (Tagai foi i le Faataoto 6:16-19.) I le faaeseesega, e ao ona tatou atiina aʻe le mea ua lelei—le amio saʻo, le amiotonu, ma le agamalu—ina ia avea ai le loto maulalo ma le mataʻu ia Ieova, ma itu tatou te maua ai “le oloa lea, ma le viiga, ma le ola.” (Faataoto 22:4) O le a avea lenei ma taui ia i latou uma o ē e faatatauina ma le faamaoni le fautuaga: “Ia e faatuatua ia Ieova ma lou loto atoa.”

O le ā Lau Tali?

□ Ua faapefea ona faatatauina i aso nei le mau autū o lenei suesuega?

□ E mafai faapefea ona tatou āva ia Ieova?

□ Aisea e lē tatau ai ona tatou manatu māmā i aoaiga?

□ O fea e maua ai le fiafiaga sili?

□ E mafai faapefea ona tatou fiafia i le mea ua lelei ae inoino i le leaga?

[Fesili mo le Suʻesuʻega]

[Ata i le itulau 18]

O i latou o ē e ofoina atu a latou mea silisili i le taulaga ia Ieova o le a fau ma soloi i ai faamanuiaga