E Manaomia e Tagata le Poto e Uiga i le Atua

“Ona e lagona ai lea o le mataʻu ia Ieova, ma e maua ai le poto e uiga i le Atua.”—FAATAOTO 2:5, NW.

1. Aisea e mafai ai ona faapea atu o le fatu o le tagata o se galuega ofoofogia lea o le foafoaga a le Atua?

PE TUSA ma le 5,600,000,000 fatu o tagata o loo tātā i le lalolagi i le taimi lava lenei. O aso taitasi e faaselauafe ona tātā ai lou lava fatu ma pamuina atu le tusa ma le 2,000 kalone [7,600 lita] o le toto i totonu o lou tino i le mamao e 60,000 maila [100,000 kilomita] i le faiga e aofia ai le fatu ma ālā toto. E leai se isi musele e sili atu ona galue mamafa, nai lo lenei galuega ofoofogia o le foafoaga a le Atua.

2. E faapefea ona e faamatalaina le loto po o le fatu faafaatusa?

² E iai foi le 5,600,000,000 o loto (fatu faafaatusa) o loo gaoioi i le lalolagi. O loo i totonu o le loto o tatou faalogona ootia, o uunaiga o o tatou loto, o o tatou faanaunauga. O le nofoaga lea o o tatou manatunatuga, o tatou malamalamaga, ma o tatou manaoga. E mafai e le loto ona faamaualuga pe faamaulalo, e faanoanoa pe fiafia, e faapogisaina pe faamalamalamaina.—Neemia 2:2; Faataoto 16:5; Mataio 11:29; Galuega 14:17; 2 Korinito 4:6; Efeso 1:16-18.

3, 4. Ua faapefea ona pāʻia loto i le tala lelei?

³ E mafai e Ieova le Atua ona silafia le loto o le tagata. Ua faapea mai le Faataoto 17:3: “E fai le ipu e tunu ai le ario, ma le ogaumu e tunu ai le auro; a o Ieova, na te tofotofoina loto.” E ui i lea, nai lo le na ona faitau o mea o loo i loto taitasi ma fofoga mai ai le faamasinoga, o loo faaaogā e Ieova ana Molimau ina ia pāʻia loto o tagata i le tala lelei. Ua ogatusa lenei manatu ma upu a le aposetolo o Paulo e faapea: “ʻE faaolaina i latou uma o ē valaau i le suafa o Ieova.’ Ae ui i lea, o le a faapefea ona latou valaau atu i le ua latou lē faatuatua i ai? Pe faapefea foi ona latou faatuatua i le ua latou lē faalogo atu  i ai? Pe faapefea foi ona latou faalogo atu, pe a leai se talaʻi atu? Pe faapefea foi ona latou talaʻi atu, pe afai ua lē aauina atu i latou? E pei lava ona tusia: ‘E matagofie naʻuā o latou vae o ē folafola atu le tala lelei o mea lelei!’”—Roma 10:13-15, NW.

⁴ Ua fiafia Ieova e aauina atu ana Molimau i tuluʻiga uma o le lalolagi ina ia “folafola atu le tala lelei o mea lelei” ma ia sailia i latou o loo iai loto talisapaia. Ua iai nei so tatou aofaiga e silia i le 5,000,000—o se faatatauga e tusa e 1 le Molimau i ni tagata e 1,200 i le lalolagi. O le oo atu o le tala lelei i le faitau piliona o tagata i le lalolagi e lē faigofie. Ae o loo faatonutonuina e Ieova lenei galuega e ala ia Iesu Keriso, ma o loo tosina atu i ai ē loto faamaoni. Ua faamaonia ai i lea le moni o le valoaga o loo faamauina i le Isaia 60:22 e faapea: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.”

5. O le ā le poto, ma o le a faapefea ona faamatalaina le atamai o le lalolagi?

⁵ O lena taimi, o nei, ma e tasi le mea ua manino mai—e manaomia e le faitau piliona o tagata o i le lalolagi le poto. I se tulaga faavae lava, o le poto, o le masani lea i mea moni ua maua mai e ala i le poto masani, o mea e mātauina, pe suesue i ai. Ua faatupulaia le poto i le lalolagi. Ua agaigai i luma matātā e pei o felauaiga, le tausiga o le soifua mālōlōina, ma fesootaiga. Ae pe o le poto faalelalolagi ea o loo sili ona manaomia e tagata? E leai lava! O taua, o omiga, o faamaʻi, ma le oti, ua faaauau pea ona pagatia ai tagata. O le atamai o le lalolagi ua masani ona faamaonia le matuā lē maufaatuatuaina, e lē tumau.

6. E tusa ai o le toto, e faapefea ona faatusatusa le poto e uiga i le Atua ma le atamai faalelalolagi?

⁶ Seʻi fai ma faataʻitaʻiga: I ni senituri e lua ua mavae atu, sa fai ma masani le faasau i fafo o le toto e avea ma togafitiga o maʻi. O George Washington, le uluai peresitene o le Iunaite Setete, sa faaauau ona faaalu lona toto i ona toe itula na soifua ai. I se tasi o taimi na ia faapea mai ai: “Tuu maia o aʻu ou te oti filemu; ua ou lē toe mafaia ona ola.” Na saʻo o ia, auā o le aso lava lena na maliu ai—Tesema 14, 1799. I aso nei, nai lo le faasau i fafo o le toto, ua faamamafaina le tuiina o le toto i totonu o le tino o le tagata. O na faiga uma e lua ua tumu i faafitauli e fesagai ai ma le oti. Peitai ane, i nei taimi uma, ua faapea mai ai le Afioga a le Atua: “Ia faamamao . . . ma le toto.” (Galuega 15:29) O le poto e uiga i le Atua e saʻo pea, e maufaatuatuaina, ma e fetaui pea i taimi uma.

7. E faapefea ona faatusatusa le poto saʻo faale-Tusi Paia i le atamai faalelalolagi e tusa ai o le tausia aʻe o se tama itiiti?

⁷ Seʻi manatunatu i se isi faaaoaoga o le lē maufaatuatuaina o le atamai faalelalolagi. Mo le tele o tausaga, sa lagolagoina ai e fomaʻi o le mafaufau le tausia aʻe o se tama itiiti i se faiga faatuufau, ae mulimuli ane na taʻutino mai e se tasi o ē na lagolagoina lena faiga e faapea, o se mea sese lenei tulaga. Na taʻua i se isi taimi e le German Philological Association e faapea, o faiga faatuufau ua “iai sana vaega tele i faafitauli ua tatou fesagaia nei ma o tatou tagata talavou.” O le atamai faalelalolagi e mafai ona lē tumau i se manatu e tasi e pei o loo felueaʻi solo e matagi, ae o le poto saʻo o le Tusi Paia e lē maluelue. Ua aumaia e le Tusi Paia fautuaga paleni i le toleniina o se tama itiiti. Ua faapea mai le Faataoto 29:17: “Ia e aoai i lou atalii, ona e maua ai lea se filemu; e tupu ai le fiafia i lou loto.” O na aoaiga e tatau ona avatuina i le alofa, auā na tusi mai Paulo: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii [o Ieova].”—Efeso 6:4.

“Le Poto e Uiga i le Atua”

8, 9. E faapefea ona e faamatalaina le mea o loo taʻua i le Faataoto 2:1-6 e uiga i le poto lea e manaomia moni e tagata?

⁸ E ui lava o Paulo o se tagata na lelei ona aʻoaʻoina, ae na faapea mai o ia: “Afai ua ia te outou se tasi o manatu e poto ia i lenei lalolagi, ia avea ia ma vale, ina ia poto ai o ia. Auā o le poto  o lenei lalolagi o le valea lea i luma o le Atua.” (1 Korinito 3:18, 19) E na o le Atua e mafai ona ia aumaia le poto lea e manaomia moni e tagata. E faatatau i lena poto, ua faapea mai le Faataoto 2:1-6 (NW): “Loʻu atalii e, afai o le a e talia aʻu upu, ma e teu i lou loto aʻu poloaiga, ina ia uaʻi atu ai ou taliga i le atamai, ina ia faasaga atu ai lou loto i le faautauta; afai lava e te valaau atu i le malamalama, ma e leotele atu i le faautauta, afai e te sailiili ia te ia e pei ona sailiili i le ario, afai e te suesue i ai e pei ona suesue i le oloa lilo, ona e malamalama ai lea i le mataʻu ia Ieova, ma e maua ai le poto e uiga i le Atua. Auā o Ieova lava ia na te foai maia le atamai; e mai lona fofoga le poto ma le faautauta.”

⁹ O i latou ua uunaia e loto lelei, latou te uaʻi atu i le atamai e ala i le faaaogā saʻo o le poto ua foaiina mai e le Atua. E faanaunau atu o latou loto i le faautauta, i lo latou iloiloina ma le faaeteete o mea moni o loo latou aʻoaʻoina. O lona uiga, latou te saili atu i le malamalama, po o le tomai ina ia iloa ai pe faapefea ona fesootai vala eseese o se mataupu. O ē e saʻo o latou loto e gaoioi e pei o loo latou ʻeli mo le ario ma saili mo se oloa lilo. Ae o le ā le oloa sili ua maua e i latou o loo iai loto talisapaia? O “le poto lea e uiga i le Atua.” O le ā lena poto? Pe a faafaigofie, o le poto lea o loo i le Afioga a le Atua, le Tusi Paia.

10. O le ā e tatau ona tatou faia ina ia olioli ai i le mālōlōina lelei faaleagaga?

¹⁰ O le poto e uiga i le Atua e aogā, e mautū, ma e maua ai le ola. Na te uunaia atili le mālōlōina faaleagaga. Na aioi atu Paulo ia Timoteo: “Ia pipii atu pea i le faatulagaga o upu e ola ai, na e faalogologo mai ai ia te au i le faatuatua ma le alofa ia Keriso Iesu.” (2 Timoteo 1:13, NW) E iai i se gagana se faatulagaga lelei o ona upu. I se tulaga tutusa, ua iai i le “gagana mamā” o le upu moni o le Tusi Paia le “faatulagaga o upu e ola ai,” ua faavae aʻe faapitoa i le matua o le Tusi Paia, o le faamaonia lea o le tonu o le pule silisili ese a Ieova e ala i le Malo. (Sefanaia 3:9) E manaomia ona tatou tausia pea lenei faatulagaga o upu lelei i o tatou mafaufau ma loto. Pe afai tatou te fia alofia faafitauli o le loto, ae ia mālōlōina pea faaleagaga, e ao ona tatou faatatauina le Tusi Paia i le olaga i aso taitasi, ma ia faaaogaina atoatoa sauniuniga faaleagaga ua faia e le Atua e ala mai i “le auauna faamaoni ma le mafaufau.” (Mataio 24:45-47; Tito 2:2) Seʻi o tatou manatua pea, ina ia maua le mālōlōina lelei faaleagaga, tatou te manaomia le poto e uiga i le Atua.

11. O ā nisi o mafuaaga e manaomia ai e tagata le poto e uiga i le Atua?

¹¹ Seʻi manatunatu i isi mafuaaga e manaomia ai e le faitau piliona o tagata i le lalolagi le poto e uiga i le Atua. Pe o iloa ea e i latou uma le auala na amata ai ona iai le lalolagi ma tagata? E leai, latou te lē iloa. Pe o iloa uma e tagata, le Atua moni ma lona Alo? Pe o iloa ea e tagata uma luʻi ia na lāgā e Satani e faatatau i le pule silisili ese a le Atua ma le faamaoni o le tagata? E leai foi. Pe o iloa ea e tagata lautele le pogai ua tatou ola matutua ai ma feoti? E tatau foi ona tatou toe faapea atu, e leai. Pe o iloa ea e tagata uma o loo ʻaināina le lalolagi e faapea, ua pule nei le Malo o le Atua ma o loo tatou ola nei i aso e gata ai? Pe o latou nofouta ea i agaga leaga? Pe o iai ea i tagata uma se poto maufaatuatuaina i se auala e maua ai se olaga faaleaiga fiafia? Ma pe o iloa ea e le anoanoai o tagata, o le olaga fiafia i le Parataiso, o le fuafuaga lena a Lē na Foafoaina i tatou mo tagata usiusitai? E leai foi le tali i nei fesili. Ua manino mai la, e manaomia e tagata le poto e uiga i le Atua.

12. E mafai faapefea ona tatou tapuai atu i le Atua “i le agaga ma le upu moni”?

¹² E manaomia foi e tagata le poto e uiga i le Atua, ona o le mea na taʻua e Iesu i lana tatalo i le po mulimuli o lona soifuaga i le lalolagi. Atonu sa matuā ootia ona aposetolo ina ua latou faalogo atu ia te ia o faapea mai: “O le uiga lenei o le ola e faavavau, ia latou mauaina pea le poto e uiga ia te oe, le Atua moni e toatasi, ma lē ua e auina mai, o Iesu Keriso lea.” (Ioane 17:3, NW) O le faatatauina o lena poto ua na o le pau lea o le auala e tapuai atu ai i le Atua i le ala na te taliaina. Na fetalai Iesu: “O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni [upu moni].” (Ioane 4:24) Tatou te tapuai atu i le Atua “i le agaga”  pe a uunaia i tatou e o tatou loto ua tumu i le faatuatua ma le alofa. E faapefea ona tatou tapuai atu ia te ia ‘ma le upu moni’? E ala i le suesueina o lana Afioga ma tapuai atu ia te ia e tusa ai ma lana upu moni ua faaalia mai—“le poto e uiga i le Atua.”

13. O le ā le mea na tupu o loo taʻua i le Galuega 16:25-34, ma o le ā e mafai ona tatou aʻoaʻoina mai ai?

¹³ I tausaga taitasi, e faitau afe tagata ua amata ona tapuai atu ia Ieova. Ae pe tatau ea ona faia suesuega faale-Tusi Paia ma tagata fiafia mo se taimi umi lava, pe e mafai ona fesoasoani atu i ē naunau moni ina ia vave ona oo atu i le papatisoga? Seʻi manatunatu la i le mea na tupu i se pule o le falepuipui ma lona auaiga lea o loo taʻua i le Galuega 16:25-34. Sa faafalepuipuiina Paulo ma Sila, ae i le vaeluaga o le po, na matalatala ai faitotoa o le falepuipui ona o se mafuie tele. Ina ua manatu le pule o le falepuipui atonu ua sosola uma pagota ma o le a mamafa ai sona faasalaga, ona ia tau pule ai lea i lona ola, ae taʻu atu loa e Paulo ia te ia, o loo atoa uma pea i latou iina. Ona amata ai loa lea e Paulo ma Sila ona “la tautala atu . . . i le afioga a le Alii [o Ieova] ia te ia, ma i latou uma ua i lona fale.” O lena pule ma lona aiga o ni tagata o Nuu Ese o ē sa leai so latou malamalama i le Tusi Paia. Peitai, i lena po e tasi, na avea ai i latou ma tagata talitonu. E sili atu i lena, “ona papatisoina loa lea o ia ma lona aiga uma.” O ni tulaga na e lē masani aʻi, ae na aʻoaʻoina ai tagata fou i upu moni faavae, ona aʻoaʻoina ai lea o isi mea mai sauniga a le faapotopotoga. E tatau foi ona mafai se mea faapea i aso nei.

Ua Telē le Seleselega!

14. Aisea ua iai ai se manaoga ina ia faia le tele o ni suesuega uigā faale-Tusi Paia i se taimi puupuu?

¹⁴ O le a lelei pe a mafai e Molimau a Ieova ona latou faia le tele o ni suesuega uigā faale-Tusi Paia i se taimi puupuu. O loo iai se manaoga moni i lenei itu. Mo se faataʻitaʻiga, i atunuu i Europa i Sasaʻe, e ao ai i tagata ona tusia o latou igoa i se lisi faatalitali mo ni a latou suesuega faale-Tusi Paia. O le tulaga foi lena i isi atunuu. I se tasi aai i le Dominican Republic, sa avatu ai le tele o ni talosaga i ni Molimau se toalima, ma ua lē mafai ona latou faia suesuega uma. O le ā na latou faia? Na latou uunaia ē fiafia ina ia auai i sauniga i le Maota o le Malo ma ia tusia o latou igoa i le lisi faatalitali mo suesuega faale-Tusi Paia. O le tulaga lava foi lena o loo tupu i le tele o isi atunuu i le lalolagi aoao.

15, 16. O le ā ua saunia ina ia vave ai le faasalalauina atu o le poto e uiga i le Atua, ma o ā nisi o mea moni e faatatau i lea sauniuniga?

¹⁵ Ua tele oganuu—o ni fanua tetele mo le seleselega—ua tatalaina mai i tagata o le Atua. E ui lava ina aauina atu e Ieova, o ia o “le Alii e ana le saito e seleseleina,” le tele o isi augalulue, ae o loo tele pea galuega e ao ona faia. (Mataio 9:37, 38) O lea la, ina ia vave le faasalalauina atu o le poto e uiga i le Atua, ua saunia ai e le ‘auauna faamaoni’ se mea o loo ia faamatalaina faapuupuu maia faamatalaga patino ina ia mafai ai e tagata aʻoga o le Tusi Paia ona agaigai i luma faaleagaga pe a maeʻa suesuega taitasi. O se lomiga fou e mafai ona talanoaina i suesuega faale-Tusi Paia i aiga i se taimi vave lava—atonu pe i le na o ni nai masina. Ma e faigofie foi ona feaveai i a tatou atotalaʻi, i a tatou atoasoa, pe fafao foi i taga o o tatou ofu! O le faitau selau o afe o ē na potopoto atu i Tauaofiaga Itumalo “O Ē Vivii ma le Olioli” a Molimau a Ieova, sa fiafia ina ua latou mauaina lenei tusi fou e 192 ona itulau ua faaulutalaina Le Poto e Taʻitaʻia ai i le Ola e Faavavau.

¹⁶ Na sauniunia e tusitala mai atunuu eseese mataupu ia na mulimuli ane faamaeʻaina ma le faaeteete ma faia ai loa le tusi o Le Poto. O lea la faiga, e tatau ona fiafia i ai tagata mai atunuu uma. Ae po o le a umi ea se taimi e faatali ai le tatalaina mai o lenei lomiga fou i gagana a tagata o le lalolagi atoa? E leai, auā e sili atu ona vave le faaliliuina o se tusi e 192 ona itulau, nai lo tusi lapopoa. Ia Oketopa 1995, na faamaonia ai e le Komiti o Tusitusiga a le Vaega Pule le faaliliuina o lenei tusi mai le faa-Peretania i le silia ma le 130 gagana.

17. O ā vala e tatau ona faafaigofie ai le faaaogaina o le tusi o Le Poto?

¹⁷ O ni manatu patino i mataupu taitasi o le tusi o Le Poto e tatau ona mafai ai e tagata  aʻoga ona faia vave so latou agaigai i luma faaleagaga. Ua aumaia e le tusi upu moni o le Tusi Paia i se auala e faalaeiau ai. E lē o mātele atu i le talanoaina o aʻoaʻoga sese. O le manino o le gagana ma le lelei o sootaga o mataupu e tatau ona faigofie ai le faaaogaina o le tusi mo le faia o suesuega faale-Tusi Paia ma fesoasoani ai i tagata ina ia latou malamalama i le poto e uiga i le Atua. E lē gata i mau o loo sii mai o latou upu, ae o loo iai foi mau o le Tusi Paia ua na ona faasino atu i le mataupu ma fuaiupu, lea e mafai e le tagata aʻoga ona suʻe i ai a o faia ana tapenapenaga mo le talanoaga. E mafai ona faitau nei mau a o faia le suesuega pe a lava le taimi, e ui lava e lē o se faiga atamai le aumai o nisi manatu faaopoopo e lē o taʻua i le mataupu o le tusi, o ni manatu e mafai ona toe faanenefu ai manatu autū. Nai lo lea, e ao ona taumafai i latou o loo faatautaia suesuega faale-Tusi Paia e faamalamalama ma faaoo atu i le tagata aʻoga le manatu o loo faamaonia mai e le tusi i mataupu taitasi. O le uiga o lenei mea, e ao i le faiaʻoga ona suesue maeʻaeʻa lana tusi, ina ia matuā manino ai i lona mafaufau manatu autū.

18. O ā ni fautuaga ua faia e faatatau i le faaaogaina o le tusi o Le Poto?

¹⁸ E mafai faapefea e le tusi o Le Poto e Taʻitaʻia ai i le Ola e Faavavau ona faavaveina le galuega o le faia o soo? E mafai ona suesueina lenei tusi e 192 ona itulau mo se taimi puupuu talafeagai, ma o i latou “ua saunia mo le ola faavavau” e tatau ona mafai ona lava ni mea latou te aʻoaʻoina mai le suesueina o le tusi ina ia faia ai sa latou tuuina atu ia Ieova ma papatisoina ai. (Galuega 13:48) O lea, seʻi o tatou faaaogā lelei le tusi o Le Poto i le faiva. Pe afai ua tele se vaega ua suesueina e se tagata aʻoga o le Tusi Paia i se isi tusi, atonu la e lelei pe a faauma pea le tusi lena. Ae afai e lei taitai, e fautuaina le see ane loa o suesuega faale-Tusi Paia i le tusi o Le Poto. Pe a maeʻa ona suesueina lenei tusi fou, e lē o toe fautuaina le toe faia o se suesuega ma le tagata aʻoga lava lea i se isi tusi lona lua. O i latou ua talia lelei le upu moni e mafai ona faateleina atili lo latou malamalama e ala i le auai i sauniga a Molimau a Ieova ma le faitauina e i latou lava o le Tusi Paia ma isi lomiga eseese faa-Kerisiano.—2 Ioane 1.

19. A o lei faia suesuega faale-Tusi Paia i le tusi o Le Poto, aisea o le a fesoasoani ai le toe autalu o itulau e 11 e oo i le 63 o le tamai tusi o Aʻoaʻoga Faavae o le Tusi Paia?

¹⁹ Na tusia le tusi o Le Poto ma le fuafuaga o le fesoasoani atu i se tagata ina ia taliina fesili uma na e toe autalu e le au toeaina ma tagata talaʻi e lei papatiso, o ē ua faanaunau e fia papatiso ina ia avea o ni Molimau a Ieova. O lea, a o lei see atu au suesuega faale-Tusi Paia i lenei lomiga fou, e fautuaina lou faaalu o ni nai itula e toe autalu ai fesili o loo i itulau 11 e oo i le 63 o le tamai tusi o Aʻoaʻoga Faavae o le Tusi Paia. * O le a fesoasoani lenei ia te oe e faatāua atili ai tali o na fesili i le taimi e suesueina ai le tusi o Le Poto.

20. O le ā o e fuafua e fai i le tusi Le Poto e Taʻitaʻia ai i le Ola e Faavavau?

²⁰ E tatau i tagata i vaipanoa uma ona latou faalogo i le tala lelei. Ioe, e manaomia e tagata le poto e uiga i le Atua, ma ua iai ia Ieova ana Molimau e faailoaina atu lea tala lelei. O lenei la ua iai la tatou tusi fou ua saunia mai e lo tatou Tamā alofa faalelagi e ala mai i le auauna faamaoni ma le mafaufau. Pe o le a e faaaogaina ea e aʻoaʻo atu ai le upu moni ma aumaia ai le viiga i le suafa paia o Ieova? O le a mautinoa le faamanuiaina o oe e Ieova a o faia au taumafaiga uma ina ia faaoo atu i ni tagata se toatele le poto lea e taʻitaʻia ai i le ola e faavavau.

[Faaopoopoga i lalo]

O le a Faapefea ona E Tali Mai?

□ E faapefea ona e faamatalaina le loto po o le fatu faafaatusa?

□ O le ā le poto e uiga i le Atua?

□ Aisea ua manaomia ai e tagata le poto e uiga i le Atua?

□ O le ā le tusi fou ua maua nei, ma ua faapefea ona e fuafua e faaaogā?

[Fesili mo le Suʻesuʻega]

[Ata i le itulau 10]

E tele mafuaaga ua manaomia ai e le faitau piliona o tagata o i le lalolagi le poto e uiga i le Atua