Olioli i se Lalolagi Lē Fiafia

“I LONA tulaga silisili ona leaga, ua avea ai lenei senituri ma senituri a Satani,” na amata mai ai faapena le tala a se tagata tusitala i le New York Times o Ianuari 26, 1995. “Ua leai lava se isi vaitaimi ua matuā faaalia ai e tagata se fiailoa ma le naunau e fasiotia le faitau miliona o isi tagata ona o le faailoga lanu, o lotu, po o ituaiga o vasega o tagata.”

O le faamanatuina o le lona lima sefulu tausaga o le faasaolotoina o tagata lē nofosala na faafalepuipuiina i nofoaga e fasiotia ai a Nasi, na faaosofia ai le au tusitala i a latou faamatalaga e pei ona muai taʻua. Ae peitai, o fasiotiga sauā lava faapena, o loo faia pea i vaega o Aferika ma Europa i Sasaʻe.

O fasiotigā tagata ua faamaopoopoina, le  matuā faatamaia atoa o vaega o tagata, ma fasiotigā tagata i le va o ituaiga—po o le ā lava le taʻu e taʻu ai—o loo iu i le tele o faanoanoaga. Ae peitai, i totonugalemu o na faatamaiaga lē mafesoasoania, o loo iai tagata o loo matuā olioli. Mo se faaaoaoga, seʻi o tatou tagai ia Siamani i vaitausaga e amata i le 1930.

Ia Aperila o le 1935, na faasaina ai Molimau a Ieova mai galuega uma mo tagata lautele i totonu o le atunuu e Hitila ma lana vaega faa-Nasi. Na tapueina foi Molimau, faafalepuipuiina, ma auina atu i nofoaga o faasalaga ona o lo latou solitu aʻiaʻi faa-Kerisiano. (Ioane 17:16) I le taufaaiuiuga o Aokuso o le 1936, na anoanoai Molimau a Ieova na tapueina. O le faitau afe o i latou, na auina atu i nofoaga o faasalaga ia na tumau ai le toatele o i latou e oo i le 1945 pe afai na oo atu i ai o soifua pea. E ui i lea, na faapefea ona tali atu Molimau i faiga faamanu na faia ia i latou i ia nofoaga? Atonu o se mea e ofo ai, ona sa mafai ona faatumauina lo latou olioli e ui lava i lo latou siomaga lē fiafia.

“Se Papa i Totonu o le Palapala Vaivai”

Na faatalanoaina e se tusitala Peretania o talafaasolopito o Christine King, se fafine Katoliko na iai i ia nofoaga. Na fai mai Dr. King: “Sa ia faaaogaina se faaupuga e lē taitai galo ia te au. Na ia talanoa mai i auiliiliga e tele e faatatau i le matautia o lea olaga, ma tulaga matagā tele na ia ola ai. Ma na fai mai ā ia sa ia iloaina Molimau, ma o na Molimau sa o se papa i totonu o le palapala vaivai. O i latou o nisi sa mausalī i totonu o nā palapala vaivai e faaleagaina ai. Na ia taʻua e faapea sa na o i latou lava tagata na lei tuufeanu atu i leoleo na ui ane i o latou autafa. Sa na o i latou lava tagata na onosaia na tulaga uma e lē ma le ʻinoʻino, ae i le alofa ma le faamoemoe ma lagona e faapea sa iai se fuafuaga i le olaga.”

O le ā na mafai ai ona avea Molimau a Ieova ma ‘papa i totonu o le palapala vaivai’? O le faatuatua lē maluelue ia Ieova le Atua ma lona Alo o Iesu Keriso. O le mea lea, sa lei taulau ai taumafaiga a Hitila e faavaivaia lo latou alofa faa-Kerisiano ma le olioli.

Ia seʻi faafofoga a o toe faamatala mai e nisi se toalua na sao mai le nofoaga lea, le lima sefulu o tausaga o lo la faafetaiaia ma le manuia o lea tofotofoina o le faatuatua. Ua fai mai le tasi: “Ou te tautala ma le olioli i loʻu iloaina sa ia te au se faaeaga tutasi o le faamaoniaina o loʻu alofa ma loʻu agaga faafetai tele ia Ieova i lalo o tulaga sa sili ona sauā. Sa lei faamalosia aʻu e se isi e faia lenei mea! Ae, o i latou na taumafai e faamalosia i matou, o o matou fili o ē na taumafai i taufaamataʻuga ina ia sili ona matou usiusitai atu ia Hitila nai lo le Atua—ae na lei taulau a latou taumafaiga! Ua lē gata la ina ou fiafia i le taimi lea, ae ona o se loto fuatia ifo lelei, sa ou fiafia ai e ui lava ina sa tuu aʻu i totonu o le falepuipui.”—Maria Hombach, e 94 tausaga le matua.

Ua taʻua e le isi Molimau e faapea: “Ou te toe mafaufau atu ma le loto faafetai tele ma le olioli i aso a o oʻu iai i le falepuipui. O tausaga na iai i toese ma nofoaga o falepuipui i le pulega a Hitila sa faigata tele ma tumu i tofotofoga. Ae sa ou lei manao e misi ia mea, auā na aʻoaʻoina mai ai aʻu ina ia faatuatua atoatoa atu ia Ieova.”—Johannes Neubacher, e 91 tausaga le matua.

“Ia faatuatua atoatoa atu ia Ieova”—sa avea ma mafuaaga lilo o le olioli lea na iai i Molimau a Ieova. O lea, ua latou olioli ai, e ui lava ina siomia i latou e se lalolagi lē fiafia. Na faamaonia mai lo latou olioli i le Tauaofiaga Itumalo “O Ē Vivii ma le Olioli” lea na faia i nai masina ua tuanai atu. Seʻi o tatou toe autaluina puupuu nei faatasitasiga olioli.

[Ata i le itulau 4]

Maria Hombach