Se Manumalo Fou Faaletulafono

IA Aperila o le 1995, na maua ai se manumalo mataina i se faamasinoga. Na amata nei mea uma ia Ianuari 28, 1992, ina ua taofia Luz Nereida Acevedo Quiles e 24 tausaga, i le Falemai o El Buen Pastor, i Puerto Rico mo se taotoga na ia faatalitali i ai. Ina ua taofia, sa ia taʻu atu e lē gata i upu ae i tusitusiga e faapea, ona o ia o se tasi o Molimau a Ieova, na te lē talia ai se tuigā toto. (Galuega 15:28, 29) O le aufaigaluega a le falemai na iai, e aofia ai ma le fomai na togafitia o ia, sa latou iloa lelei ona manaoga.

I le lua aso talu ona mavae lona taotoga, na tele se toto o Luz na alu ese ma oo ai ina matuā maulalo le toto. Sa talitonu le fomai na iai o Dr. José Rodríguez Rodríguez e faapea, e na o le pau le auala e fesoasoani ai ia te ia, o le faia lea o se tuigā toto. O lea, e aunoa ma le iloaina pe na malie foi iai Luz, na sailia ai e le fomai se poloaiga mai le faamasinoga e tui ai le toto ia Luz.

E ui lava sa iloa atoatoa e Luz ma mafai ona tautala mo ia lava, ae sa tausisi atu pea Dr. Rodríguez Rodríguez e faapea, ona o le faanatinati o lenei tulaga, ua leai ai se taimi e sailia ai se maliega a so o se tasi. O le loia itumalo o Eduardo Pérez Soto, na ia sainia le pepa, ma o le faamasino itumalo, o le afioga ia Ángel Luis Rodríguez Ramos, na tuuina atu le poloaiga faafaamasinoga mo le tuiina o le toto.

I lea, ia Ianuari 31, 1992, na aveina ai Luz i le potu tipitipi, lea na tui ai ia te ia le toto. A o tuiina le toto, sa ia faalogoina le toē o le aufaigaluega a le falemai. Na otegia o ia e isi ma fai atu, o le mea lea e fai, e fai mo lona lava lelei. Sa ia tauivi i le mea na gata mai ai lona malosi—ae na lē aogā mea uma. E oo ane i le faaiuga o le aso, ua fa paina toto ua tui ia Luz.

O le tulaga o Luz, e lē o se mea muamua po o se mea mulimuli foi lea ua aafia ai Molimau a Ieova i ni tuigā toto i Puerto Rico. A o lei tupu le mea lea ia Luz, pe ā ma le 15 pe sili atu foi isi poloaiga faafaamasinoga na tuuina atu mo tuigā toto e faasagatau ai i manaoga o tagata matutua o Molimau a Ieova, ma e sili atu isi poloaiga na tuuina atu talu mai ai na taimi. E faanoanoa ona i se tasi tulaga, na tui faamalosi ai se toto i se tagata maʻi ona o se poloaiga faafaamasinoga a o lē iloa e ia se mea.

Ae peitai, e lei iu ai i le potu tipitipi le tauiviga a Luz. Ia Oketopa, 1993, na faia ai se tagi e faasaga i le Taupulega a le malo o Puerto Rico. Na fofogaina le faamasinoga i luma o le Faamasinoga Maualuga, ma ia Aperila 18, 1995, na faia ai se faaiuga e faatatau ia Luz. Na taʻua e le faamasinoga e faapea, o le poloaiga ina ia tuiina faamalosi se toto i le tino o se tagata, sa “lē tusa ai ma faavae faaletulafono, ma ua faoa ai le avanoa e faatinoina ai lana aiā tatau e faia ai ma le saoloto lona talitonuga faalelotu, lana filifiliga totino ma lana lava filifiliga e tusa ai ma lona lava tino, e aunoa ma se taualumaga faaletulafono.”

Na mataina lenei faaiuga, auā o se uluai taimi lea ua faia ai e le faamasinoga i Puerto Rico se faaiuga lelei i Molimau a Ieova e tusa ai ma le mataupu i le tuiina o le toto. Na aumaia i le faaiuga a le faamasinoga ni faamatalaga uiga ese. Na faia se fonotaga a le au fai nusipepa, sa iai ma sui o nusipepa autū, leitiō, ma sui o le au fai televise.

O le po lava lena na faasalalauina ai se polokalame i le leitiō na faatalanoaina ai se tasi o loia a Luz. Na valaaulia le au faalogologo ina ia telefoni atu ma fai atu ni fesili. E toatele fomai ma loia na telefoni atu e faaalia o latou manatu fiafia e uiga i le faamasinoga. Na faapea atu se tasi tagata na telefoni atu: “E lē mafai e le faasaienisi ona faamautinoa mai e faapea, o le faia o se tuigā toto o le a faasaoina ai ola, ma o se mea e matuā sese le iai o se manatu faapena.” Na ia taʻua foi e faapea: “Ua le o toe umi se taimi, ona faamauina lea o le tuigā toto i le talafaasolopito e faapea o se faiga tau vailaau lea e aupito sili ona valea ma sese i ona po nei.”

Na telefoni atu mulimuli ane i le ofisa o le lālā o le Sosaiete o le Olo Matamata se polofesa faaaloalogia i mea tau tulafono ma faaalia lona matuā fiafia tele i lenei mea ma faaupu ai e faapea “o se manumalo logologoā.” Na ia faaopoopo mai e faapea o le faaiuga a le faamasinoga, ua manumalo ai aiā tatau a sui taitoatasi, e lē na o Molimau a Ieova, a o tagatānuu uma lava o Puerto Rico.