Ia Faatuatua ia Ieova ma Lana Afioga
Ia Faatuatua ia Ieova ma Lana Afioga
“E faatuatua ia te oe o e ua iloa lou suafa.”—SALAMO 9:10.
1. Aisea e mafai ai pea ona tatou faatuatua ia Ieova ma lana Afioga i ona po nei?
I LENEI lalolagi o ona po nei, o le valaaulia ina ia faatuatua ia Ieova ma lana Afioga, le Tusi Paia, e ono foliga mai e lē aogā ma e lē moni. Peitai, o le atamai o le Atua ua faamaonia le moni ma le aogā mo se taimi umi. O Lē na Foafoaina le tamaloa ma le fafine o ia o Lē na Amataina le faaipoipoga ma le aiga, ma e sili atu ona ia silafia lelei o tatou manaoga nai lo se isi lava. E pei lava ona lē suia manaoga autū o le tagata, e faapena foi ona tumau pea auala faavae mo le faamalieina o na manaoga. O fautuaga atamai a le Tusi Paia, e ui sa tusia i le tele o senituri ua tuanai, ae o loo saunia mai ai pea taʻiala e sili ona lelei mo le manuia i le ola aʻe ma le foiaina o faafitauli. O le utagiaina, e iu ai i le tele o le fiafiaga—e oo lava i totonu o le lalolagi lavelave faasaienitisi lea o loo tatou ola ai!
2. (a) O ā fua lelei ua fuaina mai e le usiusitai i poloaiga a le Atua, i olaga o tagata o Ieova? (e) O ā ma isi mea ua folafola mai e Ieova ia i latou o ē usiusitai ia te ia ma lana Afioga?
2 O le faatuatua ia Ieova ma le faatatauina o mataupu silisili o le Tusi Paia e aumaia ai manuia aogā i aso taitasi. O le faamaoniga o lenei mea o loo iloa manino i olaga o le faitau miliona o Molimau a Ieova i le lalolagi aoao, o ē ua iai lo latou talitonuga maumauai ma le lototele e faatatauina ai fautuaga a le Tusi Paia. I lo latou manatu, o le faatuatua i Lē na Foafoaina Mea ma lana Afioga ua faamaonia le matuā fetaui lelei. (Salamo 9:9, 10) O le usiusitai i poloaiga a le Atua ua avea ai i latou ma tagata e sili atu ona lelei pe a oo i le tulaga o le tumamā, le faamaoni, le maelega, le faaaloalo mo le ola ma meatotino a isi, ma le fuafua lelei i meaʻai ma meainu. Ua taʻitaʻia atu ai i le alofa tatau ma aʻoaʻoga tatau i totonu o le lio o le aiga—le talimalo, le onosai, le alofa mutimutivale, ma le loto faamagalo—faapea foi i le anoanoai o isi mea. I se tulaga tele, ua mafai ai ona latou alofia fua leaga o le ita, le lotoa, le fasioti tagata, le matauʻa, le mataʻu, le paie, le faamaualuga, le pepelo, le taufaaleaga, le lē pulea, ma le amioleaga. (Salamo 32:10) Peitai e sili atu nisi mea ua faia e le Atua nai lo le folafola mai o se iuga lelei mo i latou e tausia pea ana tulafono. Na fetalai Iesu o i latou o ē mulimuli atu i le auala faa-Kerisiano o le a latou maua e “taisautuaselau i lenei olaga, . . . tinā, ma fanau, ma fanua, atoa foi ma sauaga, a o le ola atali e maua ai le ola faavavau.”—Mareko 10:29, 30.
Ia Alofia le Faatuatua atu i le Atamai Faalelalolagi
3. I le faaauau ona faatuatua ia Ieova ma lana Afioga, o ā faafitauli ua fesagai ai ma Kerisiano i nisi o taimi?
3 O le faafitauli o tagata lē lelei atoatoa o lo latou taumafai lea e faamāmā pe faagalogalo mea o loo faafinagaloina e le Atua. E faigofie lava le amata ona latou manatu faapea e sili atu mea ua latou iloa, pe faapea o le atamai mai tagata popoto maoaʻe o lenei lalolagi e sili mamao atu nai lo le atamai o le Atua, ma e sili atu ona fetaui mai i aso nei. E mafai foi e auauna a le Atua ona faatupuina aʻe lenei uiga, i le ola e pei o loo latou iai i le lotolotoi o lenei lalolagi. I lea, i le faalauteleina atu o le valaaulia alofa ina ia faalogo atu i lana fautuaga, ua faaaofia mai ai foi e lo tatou Tamā faalelagi se lapataiga talafeagai: “Loʻu atalii e, aua neʻi galo ia te oe laʻu tulafono; a ia tausia aʻu poloaiga i lou loto. Auā e faaopoopoina ai ia te oe o aso e tele, ma tausaga e te ola ai, atoa ma le manuia. Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto; ia e mataʻu ia Ieova, ia ʻalo ese i le leaga.”—Faataoto 3:1, 2, 5-7.
4. O le ā le tele o le faatosina ua salalau atu ai “le poto o lenei lalolagi,” ma aisea o se “valea lea i luma o le Atua”?
4 E tele le atamai o lenei lalolagi o loo mauaina ma e tele puna e maua mai ai. E tele faalapotopotoga e aʻoaʻoina ai, ma ‘e lē gata mai le tele o tusi ua faia.’ (Failauga 12:12) O lea, o le faiga faakomepiuta maoaʻe faaonaponei, ua folafolaina mai le saunia ai o faamatalaga e lē faatapulaaina e toetoe lava i so o se mataupu. Peitai o le iai o lenei poto uma lava e lē faapea o le a matuā atili ai ona atamai le lalolagi ma foia ai ona faafitauli. Nai lo lea, o loo faasolo pea ina sili ona leaga le tulaga o le lalolagi i aso taitasi. E letioa la taʻu mai e le Tusi Paia ia i tatou e faapea o “le poto o lenei lalolagi o le valea lea i luma o le Atua.”—1 Korinito 3:19, 20.
5. O ā lapataiga ua aumaia e le Tusi Paia e faatatau i “le poto o lenei lalolagi”?
5 I le gasologa o lenei vaega faaiu o aso e gata ai, e mautinoa o le a aumaia ai e le taufaasese sili, o Satani le Tiapolo, le anoanoai o pepelo i se taumafaiga ina ia faaleaogaina le moni o le Tusi Paia. O tagata faitio o le Tusi Paia ua latou aumaia se aofaiga tele o tusi o loo iai manatu suesuevale ia ua luʻia ai le saʻo aʻiaʻi ma le maufaatuatuaina o le Tusi Paia. Na lapatai atu Paulo i lona uso Kerisiano: “Timoteo e, ia e tausi i le mea na tuuina atu ia te oe. Ia ʻaloʻalo ese i upu leaga ma le le aoga, ma finauga i mea ua igoa pepelo ai o le iloa; o isi o e na taofi ai, ua sese ai i latou i le faatuatua.” (1 Timoteo 6:20, 21) Ua lapatai atili mai le Tusi Paia: “Ia outou, neʻi faapologaina outou e se tasi i le poto le aoga e faasese ai, e tusa ma le uputuu a tagata, e tusa ma aitu o le lagi ma le lalolagi, a e le tusa ma Keriso.”—Kolose 2:8.
Ia Tau e Tetee atu i le Manatu o le Masalosalo
6. Aisea ua talafeagai ai le mataalia e teena ai masalosaloga mai le oo ina mauaa i le loto?
6 O se isi faufauga faatogafiti a le Tiapolo o le totōina lea o masalosaloga i le mafaufau. E mataala pea o ia e mātau ni vaivaiga i le faatuatua ona faaaogā lea. So o se tasi e oo i ai ni masalosaloga e tatau ona ia manatua, o lē o loo māfua ai na masalosaloga o ia lea na fai atu ia Eva: “E moni ea, na fetalai mai le Atua, lua te le aai i laau uma o le faatoaga?” Na totōina loa e le Taufaasese le masalosaloga i le mafaufau o le fafine, o le isi laasaga o le taʻu atu lea ia te ia o se pepelo, lea na talitonu i ai. (Kenese 3:1, 4, 5) Ina ia alofia le faaleagaina o lo tatou faatuatua e le masalosaloga e pei ona tupu ia Eva, e manaomia ai ona tatou mataalia. Pe a iai ni nai tau masalosaloga ua amata ona faasolosolo mālie aʻe i lou loto e uiga ia Ieova, lana Afioga, po o lana faalapotopotoga, ia uia laasaga vave e tapē ai a o lei oo tele atu i se mea e mafai ona faaleagaina ai lou faatuatua.—Faatusatusa i le 1 Korinito 10:12.
7. O ā mea e mafai ona faia e liai ese ai masalosaloga?
7 O le ā e mafai ona faia? O le tali foi, o le faatuatua ia Ieova ma lana Afioga. “Afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaiina.” (Iakopo 1:5, 6; 2 Peteru 3:17, 18) O le tatalo naunautai atu la ia Ieova o le laasaga muamua lea. (Salamo 62:8) Ona aua lea le faatalatū e talosaga atu mo se fesoasoani mai ovasia alolofa i le faapotopotoga. (Galuega 20:28; Iakopo 5:14, 15; Iuta 22) O le a latou fesoasoani ia te oe e vaili le mafuaaga o ou masalosaloga, lea atonu e māfua ona o le faamaualuga po o nisi mafaufauga sese.
8. E masani faapefea ona amata mafaufauga faaaposetate, ma o le ā le vaifofo?
8 Po ona o le faitau ea po o le faalogologo atu i manatu faaaposetate po o filosofia faalelalolagi ua faaulufale atu ai ni masalosaloga leaga? Ma le atamai, ua fautua mai le Tusi Paia: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vaevaetonuina le upu moni. A ia e taumamao ma upu leaga ma le le aoga; auā e tupu atili ai le amio faalematau, o a latou upu foi e aati pei o se papala.” (2 Timoteo 2:15-17, LT) Seʻi mātau, o le toatele o ē ua lavevea i faiga faaaposetasi na amata mai i mafaufauga sese, i le muamua ona faitio e uiga i o latou faalogona i le auala sa feutagai ai ma i latou i totonu o le faalapotopotoga a Ieova. (Iuta 16) Ona mulimuli mai ai lea ma le sailiili masei i aʻoaʻoga. E pei lava ona gaoioi vave se fomaʻi tipitipi e tipi ese se papala, ia faapena foi ona e gaoioi vave e liai ese mai le mafaufau so o se manatu e faitio ai, le lē faamalieina i le auala o loo faia ai mea i le faapotopotoga Kerisiano. (Kolose 3:13, 14) Ia ave ese so o se mea o loo faatupuina ai pea na masalosaloga.—Mareko 9:43.
9. O le a faapefea i se faasologa lelei faatiokarate ona fesoasoani ia i tatou ina ia tausia pea le mālōlōina i le faatuatua?
9 Ia pipii vavalalata atu ia Ieova ma lana faalapotopotoga. Ia faataʻitaʻi atu ma le faamaoni ia Peteru, o lē na faapea atu ma le mautinoa: “Le Alii e, a matou o ea ia te ai? O ia te oe upu o le ola faavavau.” (Ioane 6:52, 60, 66-68) Ia iai se faasologa lelei o le suesueina o le Afioga a Ieova ina ia faamalosia ai pea lou faatuatua, ia pei o se talipupuni tele, e mafai ona “tinei o u fanafana mu uma lava a lē o loo leaga.” (Efeso 6:16) Ia faia ma le mataalia pea se vaega i le faiva faa-Kerisiano, e ala i le tufa atu ma le alofa le feau o le Malo i isi. I aso taitasi, ia manatunatu loloto ma le talisapaia le auala o loo faamanuiaina ai oe e Ieova. Ia e loto faafetai ua e maua le poto o le upu moni. O le faia o nei mea uma i se faasologa lelei faa-Kerisiano o le a fesoasoani ia te oe ina ia e fiafia ai, ia e onosai, ma ia e tumau ai i le lē aafia i masalosaloga.—Salamo 40:4; Filipi 3:15, 16; Eperu 6:10-12.
Usitaia le Taʻitaʻiga a Ieova i le Faaipoipoga
10. Aisea ua sili ai ona tāua le saili atu ia Ieova mo le taʻitaʻiga i le faaipoipoga faa-Kerisiano?
10 I le faatulagaina mo le tamaloa ma le fafine ina ia nonofo faatasi o se ulugalii faaipoipo, na fuafua ai e Ieova e lē gata ina ia faatumulia le lalolagi i se tulaga talafeagai ae ia faateleina foi lo la fiafiaga. Ae peitai, o le agasala ma le lē lelei atoatoa ua aumaia ai faafitauli matuia i le faiā faalefaaipoipoga. E lē o sao mai ai Kerisiano i nei mea, talu ai o i latou foi e lē lelei atoatoa ma e fetaiai ma omiga mai le olaga i ona po nei. E ui i lea, o le tele ua latou faatuatua ai ia Ieova ma lana Afioga, ua mafai ai e Kerisiano ona taulau manuia lelei i le faaipoipoga ma i le tausia aʻe o a latou fanau. E leai se avanoa i le faaipoipoga faa-Kerisiano mo ni faiga ma ni amioga faalelalolagi. Ua timai mai le Afioga a le Atua ia i tatou: “Ia faamamaluina le faaipoipoga e tagata uma, o le moega foi o le ulugalii ia leai sona leaga; auā e faamasinoina e le Atua o e faitaaga ma e mulilulua.”—Eperu 13:4.
11. I le foiaina o faafitauli tau i le faaipoipoga, o le ā e tatau ona iloa lelei e paaga uma e toalua?
11 O le faaipoipoga e faataunuuina e tusa ai ma le fautuaga a le Tusi Paia e iai sona siomaga o le alofa, le faamaoni, ma le saogalemu. E taufai malamalama uma le tane ma le avā ma la faaaloalogia le mataupu silisili o le tulaga ulu. Pe a tutupu aʻe faigata, e masani ona māfua i le faatamala e faatatauina fautuaga a le Tusi Paia. I le foiaina o se faafitauli o loo aliaʻe pea, e matuā tāua ai ona taulai atu ma le faamaoni paaga uma po o le ā moni le faafitauli, ona galulue lea e foia pogai o le faafitauli nai lo aafiaga. Pe afai o ni talanoaga sa faia talu ai nei sa itiiti sina maliega po o le leai foi o se maliega na maua ai, e mafai la e le ulugalii ona talosaga atu mo se fesoasoani faamaoni mai se ovasia alofa.
12. (a) O ā faafitauli masani i le faaipoipoga ua saunia ai e le Tusi Paia fautuaga? (e) Aisea ua manaomia ai e paaga uma ona faia mea i le auala a Ieova?
12 Po o le faafitauli ea e aofia ai fesootaiga, le faaaloalo mo faalogona o le isi, le faaaloalo mo le tulaga ulu, po o le auala ua faia ai faaiuga? Pe fesootai atu ea i le tausiaina o le fanau, po o le faapaleniina o manaoga faaleituaiga? Po o le tupe faasoasoa ea a le aiga, o tafaoga ma faafiafiaga, o aumea, pe tatau ona faigaluega le avā, po o fea o le a lua nonofo ai? Po o le ā lava le faafitauli, ae ua aumaia e le Tusi Paia fautuaga aogā, a lē o le tuusaʻo mai e ala i tulafono, po o le faaātaāta mai e ala i mataupu silisili. (Mataio 19:4, 5, 9; 1 Korinito 7:1-40; Efeso 5:21-23, 28-33; 6:1-4; Kolose 3:18-21; Tito 2:4, 5; 1 Peteru 3:1-7) Pe afai e alofia e paaga uma le tagisā mo ni manaoga manatu faapito ae faaalia atoatoa le alofa i le la faaipoipoga, ona iu lea i le fiafiaga sili. E tatau ona iai se faanaunauga sili i paaga faaipoipo uma e toalua e faia ni suiga manaomia, ina ia faia mea i le auala a Ieova. “O le ua faautauta i se mea, e maua e ia le mea lelei; o lē faatuatua foi ia Ieova, amuia o ia.”—Faataoto 16:20.
Talavou e, ia Usitai i le Afioga a le Atua
13. Aisea ua lē faigofie ai mo talavou Kerisiano ona tutupu aʻe ma se faatuatua malosi ia Ieova ma lana Afioga?
13 E lē faigofie mo talavou Kerisiano ona tutupu malolosi aʻe i le faatuatua a o loo siosiomia i latou e se lalolagi amioleaga. O se tasi o mafuaaga ona o “le lalolagi uma o loo nofo toilalo i loo leaga,” o Satani le Tiapolo. (1 Ioane 5:19) O loo osofaia talavou e lenei fili feai o lē e mafai ona ia faafoliga lelei maia se mea leaga. O uiga fiamatamuamua, o vilivilitaiga manatu faapito, o le faananau i amioga e lē tatau ma le sauā, ma le tuinanauga e lē masani ai mo fiafiaga o le olaga—o nei mea uma e ʻauga tasi i se ituaiga o mafaufauga o loo aliaʻe pea lea ua faamatala e le Tusi Paia e faapea o “le agaga lea o loo matuā galue nei i e ua faalogogata.” (Efeso 2:1-3) Ua faagaeeina ma le faatogafiti e Satani lenei “agaga” i tusi aʻoga, i le tele o musika o loo maua, i taaloga, ma i isi vala o faafiafiaga. E manaomia e mātua ona mataalia e tetee na aafiaga e ala i le fesoasoani atu i a latou fanau ina ia tutupu aʻe i le faatuatua ia Ieova ma lana Afioga.
14. E mafai faapefea e talavou ona “sola ese i tuʻinanau o taulelea”?
14 Na tuuina atu e Paulo fautuaga faatamā i lana aumea talavou o Timoteo e faapea: “Ia e sola ese i tuʻinanau o taulelea, ia e tausisi i le amiotonu, ma le faatuatua, ma le alofa, atoa ma le filemu, faatasi ma i latou o e valaau i le Alii ai le loto mamā.” (2 Timoteo 2:22) E ui e lē leaga uma “tuʻinanau o taulelea,” ae tatau i talavou ona “sola ese” mai ai i lo latou lē faatagaina lea o nei mea e faatumu ai o latou taimi, ma itiiti ai pe leai foi, ni taimi mo galuega amio Atua. O le faatutuʻaina o le tino, o taaloga, o musika, o faafiafiaga, o mausa o le olaga, ma le femalagaai, e ui atonu e lē sese, ae mafai ona avea o se mailei pe afai o le a avea ma mea tāua i le olaga. Ia matuā sola ese mai talanoaga e leai ni aogā, mai le tafaovale solo, mai le naunau sese i faiga faaleituaiga, mai le tau lava o le nofonofo ma faaivaivā solo, ma le faitio faapea e lē o malamalama ou mātua ia te oe.
15. O ā mea e mafai ona tutupu i le siomaga totino o le aiga, lea e mafai ona oo atu ai se talavou e ola i se olaga uigalua?
15 E oo lava i le siomaga totino i le aiga, e mafai foi ona tutupu aʻe ai lamatiaga mo talavou. Pe afai o loo matamata i polokalame o amioga lē mamā po o faiga sauā o loo aumaia i le televise ma le vitiō, e mafai ona goto ifo ai le faanaunauga o le faia o mea leaga. (Iakopo 1:14, 15) Ua fautua mai le Tusi Paia: “Outou e ua alolofa atu ia Ieova, ia outou ʻinoʻino i mea leaga.” (Salamo 97:10; 115:11) E silafia mai e Ieova pe afai o loo taumafai se tasi e ola i se olaga uigalua. (Faataoto 15:3) Talavou Kerisiano e, seʻi tilotilo solo ane i lou potu. Po o e faapipiiina ea i lou potu ata o tagata amio lē mamā o loo taʻutaʻua i le lalolagi o taaloga po o musika, pe o e faapipiiina ni mea e faamanatu mai ai ni mea lelei? (Salamo 101:3) I le pito o loo tautau ai ou lavalava, po o iai ea ni ou lavalava onomea, pe o nisi ea o ou ofu e atagia atu ai tifiga uigaese o lavalava o lenei lalolagi? I ni auala poto e mafai ai e le Tiapolo ona maileia oe pe afai e te lolo atu i le faaosoosoga ina ia tofo i le leaga. Ua fautua mai ma le atamai le Tusi Paia: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia pei o se leona tagi, ua saili se tasi e ʻaina e ia.”—1 Peteru 5:8.
16. E mafai faapefea e fautuaga a le Tusi Paia ona fesoasoani i se talavou ina ia ona faafiafiaina tagata uma o iloaina o ia?
16 Ua fai mai le Tusi Paia ia e mataala i au aumea. (1 Korinito 15:33) E tatau ona e faauo ia i latou o ē matataʻu ia Ieova. Aua e te lolo atu i faaosoosoga mai aumea. (Salamo 56:11; Faataoto 29:25) Ia e usiusitai i ou mātua o loo matataʻu i le Atua. (Faataoto 6:20-22; Efeso 6:1-3) Saili atu i toeaina mo taʻiala ma faalaeiauga. (Isaia 32:1, 2) Ia taulai atu lou mafaufau ma lau vaai i mea tāua ma sini faaleagaga. Ia saili ni avanoa e faia ai ni agaigai i luma faaleagaga ma faia ai se sao i mea e fai a le faapotopotoga. Ia aʻoaʻo e faia ni au lava galuega. Ia e tuputupu malosi aʻe ma malaulau i le faatuatua, ona e faamaonia ai lea o oe moni lava o se tasi e taulau manuia—se tasi ua tatau ma onomea i ai le ola i le lalolagi fou a Ieova! O le a mitamita le finagalo o lo tatou Tamā faalelagi ia te oe, o le a fiafia ou mātua i le lalolagi ona o oe, ma o le a faalaeiauina ou uso ma tuafāfine Kerisiano ona o oe. O le mea lena e sili ona faitaulia!—Faataoto 4:1, 2, 7, 8.
17. O ā aogā e maua e i latou o ē faatuatua ia Ieova ma lana Afioga?
17 I le fasi fuaitau faafatusolo lea, na faagaeeina ai le faisalamo e tusi e faapea: “E le taofia e ia [Ieova] se mea lelei i e ua sao lo latou savavali. Ieova o ʻau e, amuia le tagata ua faatuatua ia te oe.” (Salamo 84:11, 12) Ioe, o le fiafiaga ma le taulau manuia, ae lē o le faanoanoa ma le lē taulau, o mea na o le a oo mai ia i latou o ē faatuatua ia Ieova ma lana Afioga, le Tusi Paia.—2 Timoteo 3:14, 16, 17.
O le a Faapefea ona E Tali?
□ Aisea e lē tatau ai i Kerisiano ona latou faatuatua atu i “le poto o lenei lalolagi”?
□ O ā mea e tatau ona faia pe afai ua oo i se tasi ni masalosaloga?
□ E faapefea i le faia o mea i le auala a Ieova, ona aumaia ai le taulau manuia ma le fiafiaga i le faaipoipoga?
□ E faapefea ona fesoasoani le Tusi Paia i talavou ina ia “sola ese i tuʻinanau o taulelea”?
[Fesili mo le Suʻesuʻega]
[Ata i le itulau 23]
E saili atu Kerisiano ia Ieova ma lana Afioga, a o latou teteeina “le poto o le lalolagi” o se mea valea
[Ata i le itulau 25]
O aiga e faatuatua ia Ieova ma lana Afioga latou te maua le taulau manuia ma le fiafiaga