Po ua Faaolaina Oe?

E SEFULU tausaga le matua o Ioane ina ua taofi o ia e se tamaloa i se nofoaga e tafafao ai ma fesili atu: “Sole, ua e talia Iesu Keriso e avea ma ou Alii ma ou Faaola?” Sa pei e tau salaese i le faalogo a Ioane lena fesili, talu ai o lea lava ua ia talitonu ia Iesu. O lea na ia tali atu ai, “Ioe o le mea moni lava lena.” Na alaga leotele le tamaloa: “Viia le Alii! Ua iai foi se isi agaga ua faaolaina mo Keriso!”

Pe faapena le faigofie o le faaolataga? Pe na “faaolaina” Ioane mai le taimi lava na ia taʻua ai na upu, e ui i ni mea na ia faia i lona olaga mulimuli ane? O le toatele o tagata faamaoni o le a tali mai ioe. O nisi o pepa faalelotu ua fai mai e tusi i lalo le aso na e “faaolaina ai” ina ia e manatuaina ai.

Na tusia e se taʻitaʻi lotu e faapea i “le taimi lava e ia te oe ai sina faatuatua ia Keriso . . . ua faamautuina ai foi iina lou taunuuga.” Na ia taʻua e faapea ua fai mai le Tusi Paia e faatasi ona faia se “gaoioiga o le faatuatua, ae lē i le faaauauina o le faatuatua,” e faalagolago i ai le faaolataga. Na tusia e se tasi tusitala o lotu e faapea: “O lenei mea o se galuega maeʻa. Ua uma ona maua ai lou faaolataga . . . O lau ‘tauiviga ua iu.’ O au ‘agasala ua aveesea.’” Ae oo lava i tagata e matuā maumaututu i lenei taofi faapea e moni, ua latou iloaina ai se faaletonu i lea itu. Ua manino lava o le toatele o tagata ua faapea atu i ai o latou ua “faaolaina,” e lē o ola i le auala o fai mai ai le Tusi Paia e tatau ona latou iai. O se faamalamalamaga taatele lava e faapea atonu latou te lei “taliaina” moni Keriso.

O lea la, o le ā moni le uiga o le “taliaina” o Iesu? Po ua na o se gaoioiga ea o le faatuatua e faatasi ona faia, po o se ala e ao ona faaauau pea o le olaga? Pe e tatau ona lava le malosi o o tatou talitonuga e uunaia ai i tatou e faia gaoioiga? Pe e mafai moni ona tatou taliaina aogā o le taulaga a Iesu e aunoa ma le tiute tauave o le mulimuli atu ia te ia?

O le toatele o tagata e mananao i faamanuiaga ae lē o le avega tauave o le mulimuli ma usiusitai atu ia Iesu. O le mea moni lava, o le upu “usitai” e masani ona latou lē fiafia i ai. Ae na fetalai Iesu: “Sau, ma mulimuli mai ia te au.” (Luka 18:18-23) Ma na taʻua e le Tusi Paia: “O ē ua lē anaana i le tala lelei a lo tatou Alii o Iesu . . . o le a faasalaina i latou i le fanoga e faavavau.”—2 Tesalonia 1:8, 9, NW; Mataio 10:38; 16:24.

Ua taʻua mai i le Tusi Paia le tele o mea ua lāgā ai fesili tāua e uiga i mea ua aʻoaʻoina e uiga i le faaolataga. Afai e te manao e faamautinoaina mea ua fai mai moni ai le Tusi Paia i lenei mataupu, o le a e naunau faapitoa la i itulau o loo mulimuli mai. Ia tatala lau Tusi Paia, ma faitau mau o loo siiina mai ai ina ia iloa le mea na aʻoaʻoina e Iesu ma ona aposetolo e uiga i lenei mataupu tāua.