Amanaiaina Aiā Tatau a Tagata Mamaʻi

‘E lē mafai ona ou faia lenei taotoga e aunoa ma le toto. Afai e te manao e fai le taotoga e tatau lava ona e usitai mai i le auala ou te faia ai le togafitiga. A leai, ona e alu lea e suʻe se isi fomaʻi.’

O NA upu a le fomaʻi sa lei maluelue ai le faatuatua o Cheng Sae Joo, o se tasi o Molimau a Ieova e aumau i Taialani. Na faamaonia le aafia o ia i se ituaiga o tuma na tuputupu aʻe i lona faiʻai (meningioma), na manaomia faanatinati ai e Cheng se taotoga. Ae sa ia maumauai foi e usiusitai i le faatonuga a le Tusi Paia: “Ia faamamao . . . ma le toto.”—Galuega 15:28, 29.

Na asiasi atu Cheng i isi falemaʻi e lua, ma le faanaunauga ia togafitia o ia i lona lava atunuu pe a mafai ai. Sa faanoanoa o ia, ona na teena foi e na fomaʻi le faia o se taotoga, e aunoa ma le toto. Mulimuli ane, na fesoasoani atu le Auaunaga o Faamatalaga Faafalemaʻi i Taialani ia Cheng i le faafesootaia o le Faalapotopotoga e Suesueina Neura (Neurological Instiute) a le Kolisi Faafomaʻi o Fafine i Tokyo. I lena falemaʻi ua silia ma le 200 maʻi na togafitia ai e ala i le faaaogaina o aave o le uila po o se naifiuila e aveesea ai tuma i o latou faiʻai, o se tasi lea o togafiti fou tau faiga faauila ua alualu i luma.

Sa faia loa fuafuaga mo Cheng e nofo faatasi ai ma Molimau Iapani e latalata i le falemaʻi. Na faafeiloaia o ia e se vaega o Molimau i le malae vaalele, e aofia ai Molimau a Ieova e toalua o ē e tautatala i le gagana Taialani ma se tasi o sui o le Auaunaga o Faamatalaga Faafalemaʻi. Ina ua mavae le vaiaso na faia ai suesuega, na taofia loa Cheng i le falemaʻi ma sa faia togafitiga e ala i le faaaogaina o se aave o le uila po o se naifiuila. E na o le tasi le itula na faia ai ia gaoioiga. O le aso na sosoo ai na teʻa ai mai le falemaʻi, ma toe foi atu ai loa Cheng i Taialani i le isi aso na sosoo ai.

Na taʻua e Cheng: “Ou te lei mafaufauina lava lenei fesoasoani tele ua saunia e ala mai i lenei fuafuaga. Na matuā faagaeetia lava aʻu i le alofa na faaalia faapea foi ma le galulue faatasi o i latou uma na aafia ai.”

I le faasalalauina o lenei mataupu, na faaupu ai e le nusipepa a Iapani o le Mainichi Shimbun e faapea: “Seia oo mai i le taimi nei ua tumatilatila mafuaaga faalotu mo le teena o tuigā toto. Ae peitai, o tuigā toto e iai ona āuga leaga e mulimuli mai e pei o le AIDS, e mafai ona maua ai i vairusi pipisi e pei o le faamaʻi o le ate (vaega 3) ma isi faamaʻi e mafua ona o le teena e le tino o nisi meaʻai po o mea e lē masani ai. Ona o lenei mafuaaga ua teena ai e isi maʻi tuigā toto e tusa lava po o ā o latou talitonuga faalelotu.

Na taʻua atili e le nusipepa: “E toatele maʻi latou te teena tuigā toto a ua faamalosia le sailia o nisi falemaʻi, ae o loo iai se manaoga mo le suia o faiga faalefaalapotopotoga faafalemaʻi ina ia amanaiaina ai le filifiliga a le tagata maʻi. O le faia o se maliega ma le malamalamaga (a se tagata maʻi e mauaina ai le tala atoa o mea e aafia ai ma ioeina ai togafitiga) e manaomia, ma o tulaga tau tuigā toto e lē tatau ona faaesea ai. E ao foi ona iloaina e faapea o lenei mataupu ua lē faatapulaaina i se lotu e tasi.”

E toatele foi nisi e pei o Cheng Sae Joo e mananao e togafitia e aunoa ma le toto ma ua auina atu i isi falemaʻi. E ui i lea, e latou te talisapaia taumafaiga a fomaʻi o ē e lotomalilie e amanaia aiā tatau a a latou tagata mamaʻi.

Ua faavaeina i lālā o le Sosaiete o le Olo Matamata e Molimau a Ieova se komiti o le Auaunaga o Faamatalaga Faafalemaʻi e sailia fomaʻi o ē faaaloalo i o latou talitonuga. I le lalolagi aoao, ua atiina aʻe ai e lenei komiti (HIS) ni faiā ma falemaʻi, fomaʻi, o ē galulue mo le soifua mālōlōina, loia ma faamasino.