O Ai Teofilo o Anetioka?

“UA E taʻua aʻu o se Kerisiano, e peiseai o se igoa e faasalaina ai, ae o aʻu, ou te faailoa manino atu o aʻu o se Kerisiano, ma ou te tauaveina lea igoa e pele i le Atua, e faamoemoe ia aogā laʻu auaunaga i le Atua.”

Ua faatomua faapena e Teofilo lana tusitusiga e tolu vaega ua taʻua, Theophilus to Autolycus. O le amataga lea o lana tetee faasaga i le faaaposetasi o le lona lua o senituri. Ua faailoa ma le lototele e Teofilo ia lava o se soo o Keriso. E tele lava ina maumauai o ia i ana meafai ina ia avea ai o sē “pele i le Atua,” e ogatusa ma le uiga o lona igoa i le gagana Eleni. Ae o ai ea Teofilo? O anafea na ia soifua mai ai? Ma o le ā le mea na ia faataunuuina?

Lona Talaaga

E laitiiti se mea ua iloa i le talaaga o Teofilo. Na tausia aʻe o ia e ona mātua e lē o ni Kerisiano. Na mulimuli ane liliu Teofilo i le Faa-Kerisiano ina ua mavae sana suesuega ma le tinoū i le Tusi Paia. Na avea o ia ma epikopo o le faapotopotoga i Anetioka i Suria, lea ua iloa i aso nei o Antakya, i Take.

I le ogatusa ma le faatonuga a Iesu, na talaʻi ai Kerisiano o le uluai senituri i tagata Anetioka. Na faamauina e Luka lo latou taulau i le faapea mai: “Sa ia te i latou le aao o le Alii [Ieova]; ua faatuatua foi le vao tagata e toatele, ma liliu mai i le Alii.” (Galuega 11:20, 21) I le taʻitaʻiga a le Atua, na iloa ai e tagata uma ia soo o Iesu Keriso, o Kerisiano. O lea taʻu na muamua faaaogā i Anetioka i Suria. (Galuega 11:26) I le uluai senituri T.A., na malaga ai Paulo i Anetioka i Suria, ma na avea ai ma nofoaga na ia faamautū i ai. O Panapa ma Paulo, faatasi ma Ioane Mareko, na amata mai Anetioka la latou uluai malaga taamilo faamisionare.

Na ono ma tatau ona matuā faalaeiauina uluai Kerisiano i Anetioka i asiasiga a le au aposetolo na ō atu i lo latou aai. O la latou tali atu ma le naunau i le upu moni o le Afioga a le Atua, e aunoa ma se masalomia na māfua lea i asiasiga e faamalosia ai le faatuatua, a sui o le vaega pule o le uluai senituri. (Galuega 11:22, 23) E maeu le matuā faalaeiauina o i latou i le vaai atu i le toatele o tagata Anetioka ua  tuuina atu o latou ola ia Ieova le Atua! Peitai, e sili atu ma le 100 tausaga mulimuli ane na faatoʻā soifua ai Teofilo i Anetioka.

Na taʻua e Eusebius o le tusitala o talafaasolopito e faapea o Teofilo sa avea ma epikopo lona ono o Anetioka, e amata mai le taimi o le au aposetolo o Keriso. Na tusitusia e Teofilo se aofaiga o aʻoaʻoga faatalanoaga ma faamatalaga faatautee faasaga i aʻoaʻoga ese. Na aofia ai o ia i le toasefululua po o le sili atu foi o Kerisiano na faia ni tusitusiga e puipuia ai lo latou faatuatua, i ona aso.

Se Vaaiga i Ana Tusitusiga

E tusa ai i le uluai talanoaga, o loo tusi atu ai Teofilo ia Autolycus faapaupau i upu tomua nei: “O se talanoaga e sologa mālie ma faaaogaina faaupuga faaviivii, e aumaia ai le fiafia ma le viiga faalialiavale i tagata malaia ua faaleagaina mafaufau.” Ua faamatala atili mai e Teofilo: “O le tagata e alofa i le upu moni e lē fia uaʻi atu i lauga e na ona manaia mai le faiga, ae a iloilo le aano tonu o le lauga . . . Ua e tetee mai aʻu i faaupuga lē aogā, gugutu mai i ou atua laau ma maa, e faamaumau i mea ma e tatogi solo, e vane ma e lē gaoioi, ia e lē mafai ona vaai pe faalogo, auā o tupua, ma o galuega a lima o tagata.”—Faatusatusa i le Salamo 115:4-8.

Ua faaalialia e Teofilo le matuā sese o ifogā tupua. I le auala e fai ai ana tusitusiga, e ui ina solo lelei lava le faiga, ae taumafai malosi e faaaogā faaupuga talafeagai ma malolosi ia taʻu atu ai lava le tulaga moni o le Atua moni. Ua ia taʻu saʻo mai e faapea: “O le tino mai o le Atua e lē mafai ona faamatalaina, ma e lē mafai lava ona vaaia e mata o tagata. Auā o le mamalu o loo iai o Ia e lē mafaatusatusalia ai, e lē matāea lona silisili ese, e lē mafuafuatia lona maualuga, e lē faatusatusaina i se isi lona malosi, e leai se tasi e maua le atamai o loo ia te ia, e lē mafaatusaina lona lelei, e lē mafaamatalaina lona agalelei.”

I le faaopoopo atu i lenei faamatalaina o le Atua, ua faaauau mai Teofilo e faapea: “Ae peitai o ia o le Alii, auā e pule o Ia i le vateatea aoao; o le Tamā, auā e muamua o ia i mea uma; o Lē Fuafuaina Mea ma o Lē Gaosia Mea, auā o Ia o lē foafoa ma lē gaosia le vateatea; o Lē Silisili ona Maualuga, ona o Lona tulaga maualuga i mea uma; ma o Lē Ona le Malosi Uma Lava, auā o Ia Lava e pule ma aofaia mea uma.”

I le sosoo ai, i le taulai atu i mea patino ua faataulauina e le Atua, ua faaauau ai e Teofilo i se auala o le toe taʻu ma toe taʻua pea e pei o sana tauloto, lona faapea mai: “Auā o le lagi o Lana galuega lea, o le lalolagi o Lana foafoaga, o le sami o le galuega a Ona aao; o le tagata o Lona fausaga ma Lona faatusa; o le la, masina, ma fetu o vala ia o Lana foafoaga, ua faia mo faailoga, ma tau ma aso ma tausaga, ina ia auauna ma galue i le tagata; ma o mea uma ua faia nei e le Atua mai i mea sa lei iai, ua faia ina ia mafai ai e ala i Ana galuega ona faailoa ma malamalama ai i Lona tulaga silisili.”

O se isi taumafaiga a Teofilo e tetee atu ai i atua sese o ona aso, ua mātauina i upu o loo mulimuli mai ia Autolycus e faapea: “O igoa o i latou ua e fai mai o loo e tapuai i ai, o igoa o tagata ua feoti. . . . Ma o ā ituaiga tagata na iai i latou? Pe sa lei avea ea Satana ma tagata ʻai tagata, na ia faaumatiaina ma ʻaiina lava lana ia fanau? Ma afai e te faaigoaina lona atalii o Iupita, . . . na faapefea ona faasusu o ia e se ʻoti . . . Ma isi ana amioga,—o lona mataifale, mulilua, ma fiafia e faamalie ona tuinanauga leaga.”

I le faalauteleina atili o lana finauga, ua faamalosia ai e Teofilo lona tu malosi e tetee i ifogā tupua faapaupau. Ua ia tusi e faapea: “Pe e tatau ona ou taʻua atili le anoanoai o manu vaefa o loo tapuaia e tagata Aikupito, o manu fetolofi, ma povi, ma manu feai o le vao, ma manu felelei, ma iʻa . . . O tagata Eleni ma isi atunuu, e tapuai i maa ma laau, ma isi ituaiga o mea ua fai ma atua.” “Ae peitai o le Atua, lea e soifua ma o le Atua moni, o ia lena o loo oʻu tapuai i ai,” ua faailoa mai ai e  Teofilo.—Faatusatusa i le 2 Samuelu 22:47; Galuega 14:15; Roma 1:22, 23.

Faamaoniga Tāua

O fautuaga ma timaʻiga a Teofilo i lana tusi e tolu vaega na fai e faamaonia ai le sese o Autolycus, e tele ona vala ma na matuā auiliili lelei. O isi tusitusiga a Teofilo sa taulai atu faasaga ia Hermogenes ma Marcion. Na ia tusia foi ni tusi o faatonuga ma faamalamalamaga, ua faaopoopo atu i ai manatu i Tusi a Evagelia. Ae peitai, e na o tusi e tolu ia Autolycus, e tuufaatasi i se tusi e tasi, ua faasaoina.

O le tusi muamua ia Autolycus o se tusi e puipuia ai le lotu Kerisiano. O le tusi lona lua ia Autolycus o loo finau atu ai faasaga i lotu faapaupau taatele, o valovaloga, o le au faifilosofia, ma le au fatupese ma fatusolo. O tusi faapaupau, o loo faatusatusa ma le Tusi Paia i le tusi lona tolu a Teofilo.

I le amataga o le tusi lona tolu a Teofilo, e foliga mai sa ia Autolycus pea le manatu e faapea o le Afioga o le upu moni, o se tala faafagogo. Ua faitioina e Teofilo ia Autolycus i le faapea atu: “Ua e olioli ai lava i mea valea. Ana e lē faapena semanu e lē faagaeetia oe i le valea o tagata e faaaafia atu ai oe i upu lē aogā, ma e talitonu ai i tala fatufua taatele.”

O le ā lena “tala fatufua taatele”? Ua faaali mai e Teofilo lona pogai. O ē faitatala taufaaleaga “ma upu e lē mai le Atua ua tuuaʻia i matou, [matou ia] o ē tapuai i le Atua, ma ua taʻua o Kerisiano, ua matuā faapea mai o a matou avā uma lava ua fai mo so o se tasi o i matou; ma ua matou mataifale foi i o matou lava tuafāfine, ma o le mea ua silisili ona matagā ma le matautia i na mea uma, o le faapea o matou e ʻai tagata.” Na galue malosi Teofilo ina ia teteeina lea vaaiga faapaupau matuā lē saʻo a ē na faapea mai o i latou o Kerisiano i le lona lua o senituri. Na ia faaaogaina le malamalama o le upu moni o loo i le Afioga faagaeeina a le Atua.—Mataio 5:11, 12.

O le faamaoniga o le masani lelei o Teofilo ma le Afioga a le Atua, o lona faaaogaina soo lea ma aumaia faasinoga i mau o le Tusi Paia Eperu ma Eleni. O ia o se tasi o uluai tagata fai manatu o Tusi a Evagelia. O le tele o faasinoga a Teofilo i Tusitusiga Paia ua aumaia ai se malamalamaga faaoaina i manatu na taatele i lona taimi. Na ia faaaogā lona poto masani i tusitusiga faagaeeina e faaalialia ai lo latou tulaga sili i lo filosofia faapaupau.

O le faatulagaga o mataupu a Teofilo, o lana faiga faafaiaʻoga ma lana auala o le taʻu soo atu atonu e lē naunau fiafia i ai nisi. I le taimi nei, e lē mafai ona matou faapea atu po o le ā le tele na faaaafia ai le saʻo o ona manatu e le faaaposetasi lea na valoia. (2 Tesalonia 2:3-12) Ae ui i lea, i le taimi o lona maliu, pe tusa o le 182 T.A., na foliga mai sa lei faavaivai Teofilo i le avea ma lē sa puipuia pea le faatuatua, o ana tusitusiga ia o loo naunau i ai Kerisiano moni o o tatou taimi.

[Ata i le itulau 30]

Na faasaʻo ma le lototele e Teofilo ia finauga a Autolycus

[Ē Ana le Ata i le itulau 28]

Ata i le itulau e 28 ma le 30 na toe faia e le Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s