Tatou te Manaomia Uo Moni

O SIENI ma Susana o loo mafana tele a la talanoaga. E ʻataʻata le tasi i le isi, genogeno mata—o a la mea uma e fai e faailoa ai le naunau ma le fiafia o le tasi i le mea e fai mai ai le isi. E ui i le eseese o o la talaaga, ae foliga mai e tele mea e la te fiafia faatasi i ai ma e amanaia tele ma le faaaloalo e le tasi le isi.

I se isi nofoaga, o loo galulue faatasi ai Eliki ma Teni i se galuega, o se tasi o galuega mai galuega e masani ona la galulue ai i le tele o tausaga. E lē vevesi lava lo la va, ma e masani ona toē. A faapea e sui le talanoaga i ni mataupu tāua, ona matuā faamaoni lava lea o le felafolafoaiina o o la manatu. E faaaloalo le tasi i le isi. E pei o Sieni ma Susana, o Eliki foi ma Teni, o ni uo moni lava.

O nei faamatalaga e ono mafanafana ai lou loto, e te mafaufau ai i au lava uo. I le isi itu, atonu e māfua ai foi ona e naunau ia faia sea ituaiga o faigauo. E mafai foi ona e maua uo faapena!

Le Mafuaaga Tatou te Manaomia ai Uo Moni

O faigauo lelei e tāua tele i lo tatou solosolo lelei faalemafaufau ma le faaletino. Peitai, a tatou lagona le tuua toatasi i le faaesea o i tatou, e lē faapea ai ua iai se mea o sese ia i tatou. Ua faapea mai nisi tagata suesue o le lagona tuua toatasi, o se manaoga o le fia maua o se mea, o se faailoaga faalenatura lea e iloa ai tatou te manaomia ni aumea. Ae, e pei ona faaitiitia pe aveesea e meaʻai le fiaʻai, o le ituaiga saʻo foi o faigauo, e mafai ona faaitiitia ai le lagona tuua toatasi po o le matuā mou ese atu ai o lea lagona. E lē gata i lea, o le iai o ni uo lelei e latou te faatāuaina i tatou, e lē o se mea e faapea e lē mafai ona maua.

Na foafoaina tagata ma se manaoga ia iai sē e ʻaumea atu i ai. (Kenese 2:18) Ua fai mai le Tusi Paia o se uo moni, po o se aumea, “e fanau . . . mo le aso vale.” (Faataoto 17:17) O lea la, o uo moni lava e tatau ona mafai ona fesili atu le tasi i le isi mo se fesoasoani pe a manaomia. Ae peitai, o se faigauo, e sili atu lona uiga nai lo le tau ina iai o se tasi e sulu atu i ai po o se tasi e toalua i le galuega po o le taaalo foi. O ni uo lelei, e atiina aʻe e le tasi ni uiga sili ona lelei i le isi. Ua fai mai le Faataoto 27:17, (NW): “E maamaai le uamea i le uamea, e faapea foi ona faamaʻai e le isi tagata lana uo.” E pei ona mafai ona faaaogaina se fasi uamea e faamaʻai ai se lau o se mea e faia mai le uamea lava lea, e ono taulau manuia foi se uo i le faamaʻaiina o le poto ma le tulaga faaleagaga o le isi. Afai e faavaivaia i tatou i le lē taulau o ni mea na fuafuaina, o le vaaiga alofa a se uo ma faalaeiauga faale-Tusi Paia e matuā mafai ona toe faafoisia ai le malosi.

I le Tusi Paia, e ō lua ai faigauo ma le alofa, masaniga, talanoaga faalilolilo, ma le faifaimea faatasi. O faigauo, e ono aofia ai tuaoi, o uo i galuega, ma isi faapena. O nisi latou te faaaofia foi nisi o tauaiga i a latou uo e sili ona vavalalata ia i latou. Ae peitai, mo le toatele i aso nei, o uo moni ua faigata tele ona maua ma faatumauina pea. Aisea ua faapea ai? Pe e mafai ona e olioli i ni faigauo e moni ma e tumau?