Ua Lagolagoina e La Latou Uo Aupito Sili

E TASI lava le faauooga e lagolagoina faapitoa Molimau a Ieova. O la latou faiā tautele lea ma la latou Uo aupito sili, o Ieova le Atua. (Faatusatusa i le Iakopo 2:23.) E na te lagolagoina i latou i taimi o tofotofoga sili o le faatuatua.

O le talaaga o Molimau a Ieova i lalo o pulega tautalatasi, ua viiviia e le toatele o tagata na latou mātauina. O le tasi o i latou na, o Jiří Krupička, o se tagata poto i le faafilosofia ma le natura o le faasaienisi, o lē na faimalaga mai Sekosolovakia i le 1968 ina ua mavae le tele o tausaga na iai i nofoaga o falepuipui a Komunisi. I lana tusi, Renesance rozumu (Renaissance of Intellect), ua ia faamatala mai ai e uiga i mafatiaga ma le tutumau o Molimau o ē na faafalepuipuiina ona o lo latou solitu.

I pulega faa-Komunisi, e toatele Molimau a Ieova na faasalaina i falepuipui ona o lo latou faatuatua. E ui ina faafalepuipuiina, ae sa latou teena le auai i le eliina o le elemeni matautia o le uranium mo le faaaogaina i le taua. (Isaia 2:4) Ua faamatalaina e Krupička se vaaiga na ia mātauina i se tasi o nei nofoaga e eli ai maina, i le 1952. Na ia vaaia ni tagata se toalua o tutū e pei o ni faatagata ua aisā i se tau e matuā mālūlū lava. O loo faapulouina o la ulu e oo i fatafata i paelo uamea.

Ua tusia e Krupička e faapea: “Na tutū ai lava i laʻua i fafo iina ma lavalava masaesae o pagota, na amata mai lava i le taeao po. Na mafai faapefea ona la onosaia le tutū ai lava mo se taimi umi ma o la vae ua malō i le aisa? Ona o le malosi o le faatuatua. O paelo, ua tuai ma elea. O se tagata sauā na ia faapulouina o la ulu i nei paelo uamea ma uunai faamalosi ifo e oo i o la tauʻau, o lea na masaesae ai o la ofu i pito maamaai o uamea i augutu pumoomoo o le paelo, ma lavelavea ai le tino o le tasi o tamaloa, ma na tafe mai ai le toto i lima o lona ofutino.

“Na taofi e le leoleo la matou laina umi i o la luma, ma na faia ai e le taʻitaʻi leoleo se tautalaga puupuu ia i matou. Na ia faapea mai, o le musu e galue, o le fouvale lea, ma o le a faasalaina e talafeagai ai. E leai ni faalogona ootia valea e uiga i le taua, ma lē fasiotia ai se tagata, o le a fesoasoani i nei tagata tetee, i nei fili o le malo.”

Na tago le taʻitaʻi leoleo i se uamea ma taia ai se tasi o paelo. Na paʻū i lalo le tagata lea sa iai i totonu, a o ufitia pea lona ulu i le paelo. O le mea na sosoo ai, o loo matuā manatua lelei lava i le mafaufau o Krupička.

Ua ia taʻua e faapea: “Na faalogoina ai ni pesega o sau mai totonu o paelo. O ni leo mālū, o se tatalo o loo fai musumusu atu i le Atua, o lē e mafai ona faafofoga i so o se mea mai so o se vaipanoa—e oo lava i ni pesega sa taumafai ona usuina atu i totonu o paelo tuai ua elea sa iai le uranium. E sili atu ona leotele lea i lana faafofoga nai lo o le faalogoina o ni pesega e sau mai totonu o se falesa telē.”

Ia Setema 1, 1993, na aloaia ai faaletulafono le galuega a Molimau a Ieova i le malo o Sekosolovakia. Ua olioli nei Molimau a Ieova i Sekosolovakia i le saʻolotoga e faaauauina ai la latou galuega faa-Kerisiano o le aʻoaʻo atu. Ioe, ua matuā fiafia i latou e taʻuina atu i isi e uiga ia Ieova, la latou Uo aupito sili.

[Ata i le itulau 7]

Le au usufono i le Malo o Sekosolovakia