Le Mafuaaga e Maua ai e le Tapuaiga Moni le Faamanuia a le Atua

“Aleluia! Ua i le Alii lo tatou Atua le faaolataga, ma le viiga ma le faaneeneega, ma le mana; auā e faamaoni, e tonu foi ana faamasinoga.”—FAAALIGA 19:1, 2.

1. O le a faapefea ona oo le iuga ia Papelonia le Aai Tele?

UA PAʻŪ “Papelonia le aai tele” e tusa ai ma le silasila a le Atua ma o loo faatali i le taimi e aveesea atoatoa ai. Ua faaalia i valoaga a le Tusi Paia o lenei fafine talitane faalotu a le lalolagi atoa e lē o toe umi ae taunuu lona faasalaga e sau mai lana aumea faapolotiki sa la faitaaga faatasi; o lona iuga e faafuasei ma vave. O le faaaliga a Iesu ia Ioane na aofia ai upu faavaloaga nei: “Ua siitia foi e le tasi agelu malosi o le maa e pei o se maaolo tele, ma lafo i le sami, ua faapea atu, ‘E faapea ona lafotuina o Papelonia le aai tele, e le toe iloa lava.’”—Faaaliga 18:2, 21.

2. O le a faapefea ona gaoioi auauna a Ieova agaʻi i le faaumatiaga o Papelonia?

² O le a iai se vaega o le lalolagi a Satani o le a faanoanoa ona o le faaumatiaga o Papelonia le Aai Tele, ae o le a lē faapena auauna a le Atua, i le lagi ma le lalolagi. O le latou alalaga fiafia i le Atua o le a faapea atu: “Aleluia! Ua i le Alii lo tatou Atua le faaolataga, ma le viiga ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna.”—Faaaliga 18:9, 10; 19:1, 2.

O ā Fua e Ao Ona Fuaina Mai e le Tapuaiga Moni?

3. O ā fesili e manaomia ni tali?

³ Ona o lea o le a faamamāina le lalolagi mai lotu sese, o le ā le ituaiga tapuaiga o le a totoe? E faapefea ona tatou iloa i aso nei po o lē fea tapuaiga o le a sao mai i le faaumatiaga o le emepaea o lotu sese i le lalolagi a Satani? O ā fua amiotonu e ao ona fuaina mai e lenei vaega? Pe tusa ma le sefulu faailoga e mafai ona mātaulia ai le tapuaiga moni a Ieova.—Malaki 3:18; Mataio 13:43.

4. O le ā le manaoga muamua mo le tapuaiga moni, ma na faapefea ona faataatia e Iesu le faataʻitaʻiga lelei i lenei tulaga?

⁴ O le mea muamua ma o le mea sili foi lea, e ao i Kerisiano moni ona matuā lagolagoina le pule silisili ese lea na maliu ai Iesu—le pule silisili ese a lona Tamā. Sa lei tuuina atu e Iesu lona soifua e maliu mo so o se mafuaaga faapolotiki, pe mo se ituaiga o ni tagata, pe mo se vaega, po o se isi lava mafuaaga. Na ia faatulaga le Malo o lona Tamā e muamua nai lo faiga faapolotiki uma a Iutaia ma so o se sailiga mo le manuia e ala mai i faiga tetee. Na ia tali atu i le ofo a Satani mo le pulea o le lalolagi i upu nei: “Ina alu ese ia oe Satani; auā ua tusia, E te ifo atu i le Alii lou Atua, ua na o ia lava e te auauna i ai.” Na ia silafia mai i Tusitusiga Eperu e faapea o Ieova o le Pule Silisili Ese moni lea o le lalolagi uma. O lē fea vaega faalotu o loo latou lagolagoina e aunoa ma se masalosalo le pulega a Ieova nai lo le faiga o mea faapolotiki a lenei lalolagi?—Mataio 4:10; Salamo 83:18.

5. (a) E ao faapefea ona manatu tagata tapuai moni i le suafa o le Atua? (e) O le ā ua faaalia ai e faaaloalo Molimau a Ieova i lena suafa?

⁵ O le manaoga lona lua e ao i le tapuaiga  moni ona faapaiaina ma faamamaluina le suafa o le Atua. Na faaali mai e Lē Ona le Malosi Uma Lava lona suafa, o Ieova (ua taʻua o Yahweh i nisi faaliliuga o le Tusi Paia), i ona tagata Isaraelu, ma e faitau afe taimi o loo faaaogaina ai i Tusitusiga Eperu. E faapena foi le taimi muamua atu, sa iloa e Atamu, Eva, ma isi le suafa e ui lava e lē o taimi uma sa latou faaaloalo i ai. (Kenese 4:1; 9:26; 22:14; Esoto 6:2) E ui lava e masani ona tuu ese e le au faaliliu a Kerisinetoma ma Siū le suafa tauatua mai i a latou Tusi Paia, ae ua faaaloalo Molimau a Ieova ma faatulaga lena suafa i le mea e tatau ona iai i totonu o le New World Translation of the Holy Scriptures. Latou te faamamalu i lena suafa, e pei lava ona faia e uluai Kerisiano. Na faamatala e Iakopo: “Ua talaina mai e Simona, i le uluai silasila o le Atua i nuu ese, e maua ai se nuu mo lona suafa. Ua ʻau faatasi foi ma lenei mea upu a le au perofeta, . . . ‘ina ia saili atu i le Alii [Ieova] tagata ua totoe, ma nuu uma lava o e ua faaigoaina i loʻu igoa ua fetalai mai ai le Alii [Ieova], o le  na te faia nei mea uma.’”—Galuega 15:14-17; Amosa 9:11, 12.

6. (a) O le ā le manaoga lona tolu mo le tapuaiga moni? (e) Na faapefea ona faatāuaina mai le pulega o le Malo e Iesu ma Tanielu? (Luka 17:20, 21)

⁶ O le manaoga lona tolu mo le tapuaiga moni e ao ona ia faasilisilia le Malo o le Atua ua na o lea le vaifofo mautinoa mo faafitauli tau i pulega a tagata. Sa manino ona aʻoaʻo e Iesu ona soo e tatalo mo lena Malo ia oo mai, ina ia pulea le lalolagi e le pulega a le Atua. Sa faagaeeina Tanielu e vavalo e faatatau i aso e gata ai: “O ona po o ia tupu e faatuina ai e le Atua o le lagi o le malo e le faaumatia e faavavau; . . . na te tuʻimomomoina ma faaumatia ia malo uma lava [faapolotiki o le lalolagi], a o ia e tumau lava e faavavau.” O ai ē o loo faaalia mai i a latou gaoioiga i lenei 20 senituri, lo latou lagolagosua atoatoa atu i lea Malo—pe o lotu ea a Papelonia le Aai Tele, po o Molimau a Ieova?—Tanielu 2:44; Mataio 6:10; 24:14.

7. E ao faapefea ona manatu tagata tapuai moni i le Tusi Paia?

⁷ O lona fa o mea e manaomia mo le faamaoniga a le Atua, e ao i auauna moni a le Atua ona matuā lagolagoina le Tusi Paia o le Afioga faagaeeina a le Atua. E lē tatau la ona avea i latou o nisi e matuā faitioina le Tusi Paia, ma taumafai e taʻufaatauvaaina faapea ua na o se tusi mai tagata faapea ma lē taulau uma e ono tuuaʻia ai. E talitonu Molimau a Ieova i le Tusi Paia o le Afioga faagaeeina a le Atua, e pei foi ona tusi atu Paulo ia Timoteo: “O Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e  faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” * O lea la, e faaaogā e Molimau a Ieova le Tusi Paia e fai ma o latou taʻiala, le tusi e faatonu ai a latou mea e fai i le olaga, ma o le puna o lo latou faamoemoe i le lumanai.—2 Timoteo 3:16, 17.

Mātauliaina le Tapuaiga i le Alofa, ae Lē o le Feitagai

8. O le ā le mea lona lima e manaomia mo le tapuaiga moni?

⁸ Na faapefea ona faaeseese e Iesu ona soo? O lana tali ua aumaia ai i tatou i le faailoga tāua lona lima mo le tapuaiga moni. Na fetalai Iesu: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) Na faapefea ona faaalia e Iesu le alofa? E ala i le ofoina atu o lona soifua e fai ma taulaga togiola. (Mataio 20:28; Ioane 3:16) Aisea ua avea ai le alofa naunau o se uiga manaomia mo Kerisiano moni? Na faamatala mai e Ioane: “Le au pele e, ia tatou fealofani; auā mai le Atua le alofa; O se le alofa ua le iloa e ia le Atua; auā o le Atua, o le alofa lava ia.”—1 Ioane 4:7, 8.

9. O ai o loo latou faaalia le alofa moni ma e faapefea?

⁹ O ai i o tatou aso o loo faaalia lea ituaiga alofa, e ui lava i le fesagai ma le feitagai i le va o ituaiga, o atunuu, ma vaega o tagata? O ai ua oo i tofotofoga tetele, e oo lava i le oti, ina ia tausisia pea lo latou alofa? Pe mafai ea ona tatou fai atu o i latou na o patele ma taupousa Katoliko, i latou o loo manino mai le iai o sa latou vaega i le fasiotigā tagata faamoʻamoʻa lea na tupu i Rwanda i le 1994? Pe o i latou ea o le lotu Orthodox i Serbia, po o Katoliko Roma i Croatia i latou na auai i le “tafiesea o se vaega” ma isi gaoioiga lē faa-Kerisiano sa faia i le taua i Balkans? Ia po o taʻitaʻi Katoliko po o Porotesano i latou o loo uunaia le faailogalanu ma le feitagai i Aialani i Mātū i le faitau sefulu tausaga ua teʻa? Ma le mautinoa lava e lē mafai ona tuuaʻia Molimau a Ieova e faapea o loo fai sa latou vaega i so o se vaega o na feeseeseaiga. O loo mafatia i latou i falepuipui ma nofoaga o faasalaga, e oo lava i le oti, nai lo le faalataina o lo latou alofa faa-Kerisiano.—Ioane 15:17.

10. Aisea e tumau ai Kerisiano moni i le solitu?

¹⁰ O lona ono o mea e manaomia mo le tapuaiga e talia e le Atua o le solitu lea mai faiga faapolotiki a lenei lalolagi. Aisea e ao ai i Kerisiano ona tumau i le solitu mai faiga faapolotiki? Ua aumaia e Paulo, Iakopo, ma Ioane ni mafuaaga mautu mo lena tulaga. Na tusi mai le aposetolo o Paulo e faapea o Satani o “le atua o lenei faiga o mea,” o lē o loo faatauasoina manatu o ē le talitonu i so o se mea na te mafai ona faaaogā, e aofia ai faiga faapolotiki fevaevaeai. Na taʻua e le soo o Iakopo e faapea “o le fefaauoai ma le lalolagi o le ita lea i le Atua,” ae na fai mai le aposetolo o Ioane “a o le lalolagi uma o loo nofo toilalo i loo leaga.” O le Kerisiano moni la, e lē mafai ona faagutugutulua i lona tuuina atu i le Atua e ala i le auai i faiga faapolotiki ma le pule a le lalolagi iuvale a Satani.—2 Korinito 4:4; Iakopo 4:4; 1 Ioane 5:19.

11. (a) E ao faapefea ona manatu Kerisiano i taua? (e) O ā ni faavae faale-Tusi Paia mo lena tulaga? (2 Korinito 10:3-5)

¹¹ I le manatu atu i manaoga e lua ia na seʻi faatoʻā uma ona talanoaina, ua faigofie ai la ona iloa le manaoga lona fitu, o lona uiga, e lē tatau i ē tapuai o ni Kerisiano moni ona iai sa latou vaega i taua. Ona o le tapuaiga moni o se auuso i le lalolagi atoa e faavae i le alofa, e leai la se mea e mafai ona ia vaevaeina pe faaleagaina lena “aufaatasiga atoa . . . o uso i le lalolagi.” Sa aʻoaʻo atu e Iesu le alofa, ae lē o le feitagai; le filemu, ae lē o taua. (1 Peteru 5:9; Mataio 26:51, 52) O ia lava lea o ‘lē o loo leaga,’ o Satani, na faapogaia Kaino e fasioti  Apelu o loo faaauau pea ona ia faatupu le feitagai i tagata ma faagaee feeseeseaiga ma le faamasaa toto i faiga faapolotiki, lotu ma fevaevaeaiga i va o ituaiga tagata. ‘Ua lē o toe aʻoaʻo Kerisiano moni i taua,’ e tusa lava po o le ā le mea e oo ai ia i latou. I se uiga faafaatusa, ua uma ona latou ‘tuʻi i a latou pelu e fai ma uamea o suotosina o a latou tao foi e fai ma polo e teu ai vine.’ Ua latou fuaina mai fua filemu o le agaga o le Atua.—1 Ioane 3:10-12; Isaia 2:2-4; Kalatia 5:22, 23.

E Faamanuia le Atua i Amio ma Aʻoaʻoga e Mamā

12. (a) O le ā le manaoga lona valu, ae o ā fevaevaeaiga faalotu e te ono aumai? (e) Na faapefea ona faamatilatila mai e Paulo lenei manaoga lona valu?

¹² O le autasi faa-Kerisiano o le manaoga lona valu lea o le tapuaiga moni i lenei itu. Peitai, ua lē mafai ona fesoasoani mai lotu fevaevaeai a Kerisinetoma. O le tele o lotu o loo manatu i ai o lotu autū ua vaevaeina i vaega e tele, ua iu ai i le fenuminumiai. Seʻi fai ma faataʻitaʻiga, le lotu Papatiso i le Iunaite Setete lea ua vaevaeina i le lotu Papatiso a le Iunaite Setete i le itu i Mātū, (lotu Papatiso a tagata Amerika i le Iunaite Setete), ma le lotu Papatiso a tagata Amerika i le itu i Saute (Fonotaga a le Lotu Papatiso i Saute) e faapena foi ma le tele o isi vaega o le lotu Papatiso ua faatulai mai ona o fevaevaeaina faalotu. (World Christian Encyclopedia, itulau 714) O le tele o fevaevaeaiga e mafua mai i le eseesega o aʻoaʻoga po o le puleaina o le lotu (mo se faataʻitaʻiga, o le lotu Perepereane, o le Episcopalian, ma le Congregational). O le fevaevaeai o Kerisinetoma e tutusa lelei ma lotu ia e lē iai i Kerisinetoma—a lē o le lotu Puta, o le Isalama, ia po o le Hinitū. O le ā na fautuaina ai e le aposetolo o Paulo ia uluai Kerisiano? “Le au uso e, ou te aioi atu ia te outou i le suafa o lo tatou Alii o Iesu Keriso, ina ia tasi la outou upu uma lava, ina neʻi i ai ni maseiga ia te outou; a ia maopoopo lava i le loto e tasi ma le manatu e tasi.”—1 Korinito 1:10; 2 Korinito 13:11.

13, 14. (a) O le ā lona uiga o le ‘ia paia’? (e) E faapefea ona tausia mamā le tapuaiga moni?

¹³ O le ā le lona iva o manaoga mo le tapuaiga e faamaonia e le Atua? O loo faamamafa mai le mataupu silisili faale-Tusi Paia i le Levitiko 11:45: “Ia paia outou, auā e paia lava aʻu.” Na toe taʻua e le aposetolo o Peteru lenei manaoga ina ua ia tusi mai e faapea: “A e pei ona paia o ia na valaauina outou, ia faapea foi outou ona paia i a outou amio uma.”—1 Peteru 1:15.

¹⁴ O le ā o aofia ai i lenei manaoga ina ia paia? E ao i tagata tapuai a Ieova ona mamā tau amio ma le faaleagaga. (2 Peteru 3:14) E leai se avanoa mo ē lē salamō, ma ē faia ma le loto i ai le agasala, i latou e faaalia i a latou amio le leai o se talisapaia mo le taulaga togiola a Keriso. (Eperu 6:4-6) E finagalo Ieova ia tausia le mamā ma le paia o le faapotopotoga Kerisiano. E faapefea ona mafai lenei mea? O se tasi o vaega o le faiga faafaamasinoga lea e faateʻaina ai i latou e ono pisipisia ai le faapotopotoga.—1 Korinito 5:9-13.

15, 16. O ā suiga ua faia e le toatele o Kerisiano i o latou olaga?

¹⁵ A o lei iloaina le upu moni faa-Kerisiano, e toatele sa ola lē taupulea, fai mea e fiafia i ai, manatu ifo le tagata ia mo lona lava lelei. Peitai o le upu moni e uiga i le Keriso ua suia ai i latou, ma ua latou maua le faamagaloga mo a latou agasala. Na faamatalaina ma le malosi e Paulo lenei mea ina ua ia tusi mai e faapea:  “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou.”—1 Korinito 6:9-11.

¹⁶ E manino mai le taliaina e Ieova o i latou ua salamō mai a latou amio lē faale-Tusi Paia, liliu mai, ma avea ma soo moni o Keriso ma ana aʻoaʻoga. Ua latou alolofa moni i o latou tuaoi e pei o i latou lava ma faaalia mai i le tele o auala, e pei o le maumauai i le faiva lea e avatu ai le feau o le ola ia i latou uma o le a faalogo i ai.—2 Timoteo 4:5.

“E Tuu Saʻoloto Foi Outou e le Upu Moni”

17. O le ā le manaoga lona sefulu mo le tapuaiga moni? Aumai ni faataʻitaʻiga.

¹⁷ E iai le manaoga lona sefulu e finagalo i ai Ieova mai ia i latou e tapuai ia te ia i le agaga ma le upu moni—aʻoaʻoga mamā. (Ioane 4:23, 24) Na fetalai atu Iesu i ona soo: “E iloa foi e outou le mea moni, e tuu saʻoloto foi outou e le upu moni.” (Ioane 8:32) Ua tuusaʻoloto i tatou e le upu moni o le Tusi Paia mai i aʻoaʻoga e lē faamamaluina ai le Atua, e pei o le lē mafai ona oti o le solu, le afi i hele, ma pulekatolio. (Failauga 9:5, 6, 10; Esekielu 18:4, 20) Ua faasaʻoloto ai i tatou mai le mealilo faa-Papelonia a Kerisinetoma o le “Tasitolu Paia.” (Teuteronome 4:35; 6:4; 1 Korinito 15:27, 28) O le usiusitai i le upu moni o le Tusi Paia ua iu ai i le avea ma tagata alolofa, manatu mamafa, agalelei, ma alofa mutimutivale. O le Faa-Kerisiano moni e lē tatau ona iai le agaga fia taui ma sui, po o nisi e faia ni iloiloga sauā e faasalaina ai tagata tetee i le lotu, e pei o Tomás de Torquemada, po o sē na te faapogaia faiga taua ma le loto ita e pei o faifeau i le ofisa o le pope lea sa latou uunaia le faia o Taua Paia. Peitai ane, ua aumaia e Papelonia le Aai Tele nei ituaiga fua i le faagasologa mai o talafaasolopito, mai lava i tuā pe tusa o le taimi o Nimarota e oo mai i aso nei.—Kenese 10:8, 9.

Le Suafa e Tutasi

18. (a) O ai ua ausiaina ia manaoga e sefulu mo le tapuaiga moni ma e faapefea? (e) O le ā e ao ona tatou faia taitoatasi ina ia maua ai faamanuiaga o loo tuu mai mo i tatou i le lumanai?

¹⁸ O ai i aso nei o latou faataunuuina moni lava nei mea e sefulu e manaomia mai i le tapuaiga moni? O ai o loo lauiloa ma mātauina e isi i lo latou talaaga faamaoni ma lo latou fifilemu? I le lalolagi atoa ua mātauina Molimau a Ieova i lo latou “le ni o le lalolagi.” (Ioane 15:19; 17:14, 16; 18:36) Ua faamamaluina tagata o Ieova e tauave lona suafa ma avea ma ana Molimau, e pei lava foi ona sa avea Iesu Keriso ma molimau faamaoni i lona Tamā. O loo tatou tauaveina le suafa paia lava lena, ma manatu mamafa i o tatou tiute tauave ina ia ola aʻe e tusa ma mea o fai ma sui o lena igoa. Ma, i le avea ma ana Molimau, maeu se lumanai faamamaluina o loo tuu mai mo i tatou i le lumanai! O lona uiga, o le avea lea ma vaega o le aiga o tagata autasi, usiusitai, e tapuai atu i le Pule Silisili Ese Aoao i le parataiso ua toe faafoisia mai i le lalolagi. Ina ia maua na faamanuiaga, seʻi tatou faaauau ona mātauliaina manino i tatou faatasi ma le tapuaiga moni ma ia tatou fiafia e tauave le suafa Molimau a Ieova “auā e faamaoni, e tonu foi ana faamasinoga”!—Faaaliga 19:2; Isaia 43:10-12; Esekielu 3:11.

[Faaopoopoga i lalo]

E Faapefea Ona E Taliina?

□ E faapefea ona manatu auauna a Ieova i le faaumatiaga o Papelonia le Aai Tele?

□ O ā manaoga autū mo le tapuaiga moni?

□ E faapefea ona tuusaʻoloto oe e le upu moni?

□ O le ā se faaeaga faapitoa ua ia i tatou o Molimau a Ieova?

[Fesili mo le Suʻesuʻega]

[Ata i le itulau 17]

O loo talaʻia ma aʻoaʻo atu e Molimau a Ieova le tala lelei o le Malo o le Atua

[Ata i le itulau 18]

E tumau pea le solitu o Kerisiano moni i faiga faapolotiki ma taua a le lalolagi

[Ē Ana le Ata]

Airplane: Courtesy of the Ministry of Defense, London