Ia Avatu Mea a Kaisara ia Kaisara
Ia Avatu Mea a Kaisara ia Kaisara
“Ia avatu i tagata uma lava a latou mea.”—ROMA 13:7.
1, 2. (a) E tusa ai ma fetalaiga a Iesu, e tatau faapefea i Kerisiano ona faapaleni lelei a latou matafaioi i le Atua ma Kaisara? (e) O le ā le mea muamua e sili ona manatu mamafa i ai Molimau a Ieova?
E TUSA ai ma fetalaiga a Iesu, e iai mea o loo tatou nofo aitalafu ai i le Atua ma mea o loo tatou nofo aitalafu ai ia Kaisara, po o le Faiga Malo a le atunuu. Na fetalai Iesu: “Ina avatu ia o mea a Kaisara ia Kaisara; ia avatu foi mea a le Atua i le Atua.” I nai nei upu sa ia faafenumiaia ai mafaufau o ona fili, ona ia toe taāofai ai lea ma le saʻo le vaaiga paleni lelei e ao ona ia i tatou i la tatou faiā ma le Atua ma i a tatou feutagaiga ma le Faiga Malo. E letioa ona “ofo ai lea ia te ia” o lana ʻau faalogologo!—Mareko 12:17.
2 Ioe, o le mea muamua e sili ona manatu mamafa i ai auauna a Ieova o lo latou totogi atu lea o mea a le Atua i le Atua. (Salamo 116:12-14) Peitai ane, o le faia faapea, latou te lē faagaloina ai, na fetalai Iesu e iai ni mea patino e tatau ona latou tuuina atu ia Kaisara. Ua uunaia i latou e o latou loto fuatia ifo ua aʻoaʻoina i le Tusi Paia, ina ia latou manatunatu faatasi ma le tatalo i le tele e mafai ona latou avatu ai mea ua manaomia mai e Kaisara. (Roma 13:7) I ona po nei, e toatele faamasino ua latou ioeina, e iai tapulaa o le pule faalemalo ma o tagata ma faiga malo i so o se nofoaga lava, ua aofia uma i le tulafono tau le uiga moni o le soifuaga.
3, 4. O ā ni faamatalaga mataina ua faia e faatatau i tulafono tau le uiga moni o le soifuaga, o tulafono ua faaalia, ma tulafono e faia e tagata?
3 Sa faasino atu manatu o le aposetolo o Paulo i lenei tulafono tau le uiga moni o le soifuaga ina ua ia tusi e faatatau i tagata o le lalolagi e faapea: “O mea a le Atua e mafai ona iloa ua faaalia mai ia te i latou; auā ua faaalia mai e le Atua ia te i latou; auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana faavavau lava lea ma lona Atua; o lea foi ua le mautali ai i latou.” Pe afai o le a latou tali lelei atu i ai, o le a oo foi ina uunaia e le tulafono tau le uiga moni o le soifuaga loto fuatia ifo o nei tagata lē talitonu. O lea na faapea atili atu ai Paulo: “Pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu.”—Roma 1:19, 20; 2:14, 15.
4 I le senituri lona 18, na tusia ai e le faamasino lauiloa Egelani o William Blackstone se faamatalaga e faapea: “O lenei tulafono o le olaga masani [le tulafono tau le uiga moni o le soifuaga], ua tutusa lelei ma [e tausaga faatasi ma] tagata ma ua fofogaina mai e le Atua lava ia, ua matuā silisili atu ona uunaia ai tiute tauave nai lo isi lava tulafono. E ao ona tausisi i ai le lalolagi atoa, i atunuu uma, ma i taimi uma: e leai se aogā o tulafono e faia e tagata, pe afai e feteenai ma lenei tulafono.” Na faaauau ona talanoa Blackstone e uiga i “le tulafono ua faaalia,” e pei ona maua i le Tusi Paia, ma ia faapea mai ai: “Mai nei faavae e lua, ua faalagolago atu ai tulafono uma e faia e tagata, i le tulafono tau le uiga moni o le soifuaga ma le tulafono ua faaalia; o lona uiga e faapea atu, e lē tatau i ni tulafono e faia e tagata ona [faatagaina] latou e faatautee i nei tulafono.” Ua ogatusa lenei ma le mea na taʻua e Iesu e faatatau i le Atua ma Kaisara, e pei ona faamauina i le Mareko 12:17. E manino mai, e iai vaipanoa e faatapulaa ai e le Atua mea e mafai ona tāpā e Kaisara mai se Kerisiano. O se vaipanoa tonu lava faapena na sese ai le au Saneterini, ina ua latou faatonuina le au aposetolo ia taofia le talaʻi atu e uiga ia Iesu. O lea, na tali atu ai ma le tonu le au aposetolo: “E tusa ona sili o lo matou anaana i le Atua i lo matou anaana i tagata.”—Galuega 5:28, 29.
“Mea a le Atua”
5, 6. (a) Pe a manatu atu i le fanau mai o le Malo i le 1914, o le ā e tatau ona teu mau i mafaufau o Kerisiano? (e) E faapefea ona faamaonia atu e se Kerisiano e faapea o ia o se faifeau?
5 Ae maise lava talu mai le 1914, ina ua amata ona pule Ieova le Atua, o Lē Ona le Malosi Uma Lava, e avea ma tupu e ala mai i le Malo faa-Mesia o Keriso, ua tatau ai ona faamautinoa e Kerisiano latou te lē avatua mea a le Atua ia Kaisara. (Faaaliga 11:15, 17) Sa lei faapea lava muamua e pei ona iai nei, le poloaia o Kerisiano e le tulafono a le Atua ina ia “le ni o le lalolagi.” (Ioane 17:16) Ona o ni ē ua tuuina atu i le Atua, o Lē na Foai maia lo latou ola, e ao ai ona latou faataʻitaʻia manino atu le lē toe pule o i latou ia i latou lava. (Salamo 100:2, 3) E pei ona tusia e Paulo, “o tagata lava o [Ieova] i tatou.” (Roma 14:8) E lē gata i lea, i le papatisoga o se Kerisiano, ua faauuina ai o ia e avea ma faifeau a le Atua, ina ia mafai ai ona ia fai atu upu e pei o la Paulo: “O le Atua . . . ua na saunia lelei i matou ia agavaa e fai ma faifeau.”—2 Korinito 3:5, 6, NW.
6 Na tusi mai foi le aposetolo o Paulo: “Ou te vivii i loʻu faiva.” (Roma 11:13) E mautinoa le tatau ona tatou faia faapena. Pe tatou te auai i le faiva faataimi atoa pe faavaitaimi, ia tatou manatua pea o Ieova lava ia na tofiaina i tatou i la tatou faiva. (2 Korinito 2:17) Talu ai atonu o le a fesiligia e nisi lo tatou tulaga, e ao ai i Kerisiano uma tuuina atu ma papatisoina, ona nofosauni e faamanino ma faamautinoa atu le faamaoniga e faapea o ia moni o se faifeau o le tala lelei. (1 Peteru 3:15) E ao foi ona faamaonia atu lana faiva i lana amio. I le avea o se faifeau a le Atua, e tatau ai i se Kerisiano ona lagolagoina ma faatinoina uiga mamā talafeagai, ia tausisia le autasi faaleaiga, ia faamaoni, ma faaalia le faaaloalo mo tulafono ma poloaiga. (Roma 12:17, 18; 1 Tesalonia 5:15) O le faiā a se Kerisiano ma le Atua ma lana faiva ua tofia i ai e le Atua, o mea na e sili ona tāua i lona olaga. E lē mafai ona ia lafoaia nei mea pe afai ua faatonuina mai e Kaisara. E manino lelei, o mea na e tatau ona faitauina faatasi i “mea a le Atua.”
“Mea a Kaisara”
7. O le ā le talaaga o Molimau a Ieova e tusa ai o le totogia o lafoga?
7 Ua iloa e Molimau a Ieova lo latou nofo aitalafu i le “usiusitai . . . i faipule silisili,” o pule ia o malo. (Roma 13:1) O lea, pe a faia e Kaisara, po o le Faiga Malo, ni poloaiga talafeagai, e uunaia i latou e o latou loto fuatia ifo ina ia faataunuuina nei poloaiga. Mo se faaaoaoga, ua faitaulia faatasi Kerisiano moni i tagata e sili ona lelei i le lalolagi i le totogia o lafoga. I Siamani, na faia ai e le nusipepa o le Münchner Merkur se faamatalaga e faatatau i Molimau a Ieova e faapea: “O i latou o ni tagata e sili ona faamaoni ma sili ona tausi taimi i le totogia o a latou lafoga i le Federal Republic.” I Italia, na taʻua e le nusipepa o le La Stampa e faapea: “O i latou [Molimau a Ieova] o tagatānuu e sili ona faamaoni e manaonao i ai so o se tasi: latou te lē alofia le totogia o lafoga pe sailiili e sosola ese mai ni tulafono e lē fiafia i ai mo lo latou lava lelei.” E faia e auauna a Ieova lenei mea ‘ona o o latou loto fuatia ifo.’—Roma 13:5, 6.
8. Pe faatapulaa mai ea i le na o lafoga tau tupe mea o loo tatou nofo aitalafu ai ia Kaisara?
8 Pe faatapulaa mai ea “mea a Kaisara” i le na o le totogiina o lafoga? E leai. Na lisi mai e Paulo isi mea, e pei o le mataʻu ma le faaaloalo. I lana tusi o le Critical and Exegetical Hand-Book to the Gospel of Matthew, na tusia ai e se tagata aʻoga poto mai Siamani o Heinrich Meyer e faapea: “O [mea a Kaisara] . . . e lē tatau ona tatou manatu i ai faapea ua na o lafoga a le malo, ae o mea uma lava o loo iai le aiā a Kaisara e tusa ai o lana pule talafeagai faaletulafono.” Na taʻua e le tusitala o talafaasolopito o E. W. Barnes, i lana tusi The Rise of Christianity, e faapea, o le a totogia e se Kerisiano lafoga pe afai o loo ia nofo aitalafu ai ma “faapena foi ona ia taliaina isi uma tiutefai mai le Faiga Malo, ia e lē o tāpā ai o ia ina ia tuuina atu ia Kaisara mea e ao ona tuuina atu i le Atua.”
9, 10. O le ā le mea atonu e faatalatū se Kerisiano e fai e tusa ai o le totogi atu o mea a Kaisara, ae o ā mea moni e tatau ona mafaufau i ai?
9 O ā mea atonu e tāpā mai e le Faiga Malo e aunoa ma le sopotapulaa atu ai i mea ua tonu ona tuuina atu i le Atua? Ua manatu nisi e faapea e mafai ona latou tuuina atu ma le tonu tupe ia Kaisara i le tulaga o lafoga, ona gata ai lea iina. E mautinoa lava latou te lagona le lē fetaui o le tuuina atu ia Kaisara o so o se mea atonu e alu ai le taimi lea sa tatau ona faaaogā mo gaoioiga faatiokarate. E ui i lea, e moni e tatau ona tatou ‘alolofa atu ia Ieova lo tatou Atua ma o tatou loto atoa, solu atoa, mafaufau atoa, ma le malosi atoa,’ ae o loo faatalitalia foi e Ieova i tatou ina ia faaaogā o tatou taimi i isi mea e ese mai le auaunaga paia. (Mareko 12:30; Filipi 3:3) Mo se faaaoaoga, ua fautuaina se Kerisiano ua faaipoipo ina ia faaalu le taimi e faafiafiaina ai lana paaga faaipoipo. O nei gaoioiga e lē o sese, ae ua taʻua e le aposetolo o Paulo e faapea, o na mea o “mea a le lalolagi” e lē o ni “mea a le Alii.”—1 Korinito 7:32-34; faatusatusa i le 1 Timoteo 5:8.
10 E lē gata i lea, na faatonuina e Keriso ona soo ina ia ‘totogi atu’ lafoga, ma e mautinoa o lenei mea e aofia ai le faaaogaina o le taimi lea ua tuuina atu ia Ieova—auā o le auala lea ua tuuina atu i ai o tatou olaga atoa. Pe afai o le faatatauga o le lafoga a se atunuu e 33 pasene o le tupe maua a se tagata faigaluega (e maualuga atu i nisi atunuu), o lona uiga la o tausaga taitasi e totogi atu ai e le tagata faigaluega i le vaega tau tupe a le malo se aofaiga e tutusa ma le aofai o le tupe e mafai ona ia maua i le fa masina. I se isi faaupuga, i le faaiuga o le taimi atoa sa faigaluega ai o ia, o le a faaalu ai e lea tagata faigaluega le aofaiga e tatau ona ia maua i le tusa ma le 15 tausaga, i le totogia o tupe o lafoga ua tāpā mai e “Kaisara.” Seʻi manatu foi i le mataupu o aʻoaʻoga. I le tele o atunuu ua faatonuina ai e le tulafono mātua ina ia avatu a latou fanau i le aʻoga mo ni tausaga faatulagaina. O le aofai o tausaga mo aʻoaʻoga e eseese lava i atunuu taitasi. I le tele o atunuu, e manaomia ai se taimi tele mo le auai atu i aʻoaʻoga. E moni, o na aʻoaʻoga e masani ona aogā, peitai o Kaisara na te filifilia po o le ā le tele o se vaega o le olaga o se tamaitiiti e tatau ona faaaluina i lenei auala, ma ua usitaia e mātua Kerisiano le filifiliga a Kaisara.
Faamalosia le Auai i le Vaegaʻau
11, 12. (a) O le ā le mea o loo tāpā e Kaisara i le tele o atunuu? (e) Sa faapeī manatu o uluai Kerisiano i le auai atu i le vaegaʻau?
11 O se tasi o mea ua tāpā e Kaisara i nisi atunuu o le faamalosia lea o le auai atu i le vaegaʻau. I le 20 senituri, ua faavaeina ai lenei faatulagaga e le tele o malo i taimi o taua ae i nisi atunuu e faia foi i taimi o loo sologa lelei ai. Sa faaigoa lenei tiutefai i Falani mo le tele o tausaga o le lafoga o le toto (blood tax), o lona uiga sa tatau i tama talavou uma ona nonofo sauni e faataulaga o latou ola mo le Faiga Malo. Po o se mea ea lenei e mafai e i latou ua tuuina atu ia Ieova ona avatua mai se loto fuatia ifo lelei? Sa faapeī manatu o Kerisiano o le uluai senituri i lenei mataupu?
12 A o taumafai uluai Kerisiano ina ia avea ma tagatānuu lelei, sa puipuia i latou e lo latou faatuatua mai le fasiotia o le isi tagata po o le faataulagaina o o latou lava ola mo le Faiga Malo. Ua taʻua i le Encyclopedia of Religion e faapea: “O le ʻaufaitaulaulu anamua o le lotu, e aofia ai Tetuliano ma Origen, na la ioe e faapea, sa taofia Kerisiano mai le fasiotia o le ola o se tagata, o se mataupu silisili na puipuia ai i latou mai le auai atu i le fitafita a Roma.” Ua tusia e le polofesa o C. J. Cadoux i lana tusi o le Early Church and the World, e faapea: “E tusa pe oo atu lava i le taimi o le nofoaiga a Marcus Aurelius [161-180 T.A.], sa leai se Kerisiano na avea o se fitafita ina ua uma ona papatisoina.”
13. Aisea ua lē o toe faapena ai manatu o le toatele o tagata lotu o Kerisinetoma e pei ona sa iai i uluai Kerisiano e faatatau i le auai atu i le vaegaʻau?
13 Aisea ua lē faapena ai manatu o tagata lotu o Kerisinetoma i nei mea i aso nei? Talu ai se suiga mataina na tupu i le lona fa o senituri. Ua faamatala mai e le lomiga faa-Katoliko o le History of the Christian Councils e faapea: “E toatele Kerisiano . . . o ē sa nonofo i pulega a emeperoa faapaupau, sa iai o latou talitonuga faalotu e tusa ai o le auai atu i le vaegaʻau, ma na latou teena ma le maumauai le avea ma fitafita, po o le ō ese e aunoa ma se faatagaga mai le vaegaʻau. O le Sinoti [a Falani, na faia i le 314 T.A.], e talanoaina ai suiga sa faatulai mai e Konesetatino, na aumaia ai se tiutefai e faapea e tatau i Kerisiano ona faia ni a latou vaega i taua, . . . auā o loo iai le filemu o le Lotu (in pace i le faa-Latina) ma le Faiga Malo i lalo o se emeperoa o lē e lē toe sauāina ai Kerisiano ae taliaina.” O le iuga o lenei lafoaia o aʻoaʻoga a Iesu, mai lena taimi seia oo mai i aso nei, ua faamalosia ai e taʻitaʻi lotu o Kerisinetoma a latou tagata lotu ina ia auai i vaegaʻau a malo, e ui lava ina taumafai nisi e tetee atu e tusa ai ma o latou loto fuatia ifo lelei.
14, 15. (a) O ā faavae ua maua ai e Kerisiano i nisi atunuu se faatagaga ina ia lē auai atu i le vaegaʻau? (e) Ae pe a leai se faatagaga, o ā mataupu silisili faale-Tusi Paia o le a fesoasoani i se Kerisiano ina ia faia ai se filifiliga saʻo i le mataupu o le auai atu i galuega tau vaegaʻau?
14 Po o faatalitalia ea Kerisiano o aso nei ina ia mulimuli atu i le vaega toatele e tusa ai ma lenei mataupu? E leai. Pe afai o loo nofo se Kerisiano i se atunuu o loo faataga ai ona lē auai atu faifeau o lotu i le vaegaʻau, e mafai la ona ia faaaogā lenei sauniuniga, auā o le mea moni o ia o se faifeau. (2 Timoteo 4:5) E iai nisi atunuu, e aofia ai le Iunaite Setete ma Ausetalia, ua latou tuuina atu lena faatagaga e oo lava i taimi o taua. Ma i le taimi o le sologa lelei, i le tele o atunuu o loo faamalosia ai pea le auai atu i le vaegaʻau, ua tuuina atu ai i Molimau a Ieova le faatagaga ina ia lē auai, ona o i latou o ni faifeau o le lotu. O lea ua mafai ai ona latou fesoasoani atu pea i tagata e ala i a latou auaunaga i le lautele.
15 Ae faapefea pe afai o loo nofo se Kerisiano i se atunuu e lē o avatuina ai se faatagaga i faifeau o lotu? E tatau la ona faia lana ia lava filifiliga i le usitaia o lona loto fuatia ifo ua aʻoaʻoina i le Tusi Paia. (Kalatia 6:5) E ui o loo ia amanaia le aiā tatau a Kaisara, peitai o le a ia iloiloina ma le faaeteete mea o loo ia nofo aitalafu ai ia Ieova. (Salamo 36:9; 116:12-14; Galuega 17:28) O le a manatua e le Kerisiano e faapea, o le faailoga o se Kerisiano moni o le alofa lea i ona uso talitonu uma, e oo foi ia i latou o ē o loo nonofo i isi atunuu po o i latou o isi ituaiga. (Ioane 13:34, 35; 1 Peteru 2:17) E lē gata i lea, o le a ia lē faagaloina mataupu silisili faale-Tusi Paia na o loo maua i mau e pei o le Isaia 2:2-4; Mataio 26:52; Roma 12:18; 14:19; 2 Korinito 10:4; ma le Eperu 12:14.
Auaunaga Faalemalo i le Lautele
16. I nisi atunuu, o ā ni auaunaga e lē o aafia i le vaegaʻau ua tāpā mai e Kaisara ia i latou o ē lē taliaina le auai atu i le vaegaʻau?
16 Ae peitai, e iai atunuu e lē o faatagaina e le Faiga Malo le lē auai o faifeau o le lotu, ae ua latou ioeina le iai o nisi tagata e ono tetee i le auai i le vaegaʻau. O le tele o nei atunuu ua latou faia sauniuniga mo na tagata ina ia lē faamalosia ai e auai i le vaegaʻau. I nisi atunuu, o auaunaga faalemalo i le lautele e manaomia, e pei o galuega aogā i le atunuu, ua manatu i ai o se auaunaga faalemalo e lē o aafia i le vaegaʻau. Pe mafai la e se Kerisiano tuuina atu ona faia na auaunaga? O lenei foi itu, o le a tatau ai i se Kerisiano ua tuuina atu ma papatisoina ona faia i ai lana lava filifiliga e faavae aʻe i lona loto fuatia ifo ua aʻoaʻoina e le Tusi Paia.
17. Pe iai se mea na tupu i aso anamua o le Tusi Paia e talitutusa ma auaunaga faalemalo i le lautele e lē aafia ai le vaegaʻau?
17 E foliga mai sa iai foi auaunaga na faamalosia le faia i aso anamua o le Tusi Paia. Ua taʻua mai i se tasi tusi o talafaasolopito e faapea: “E faaopoopo atu i lafoga ma isi tupe totogi na manaomia ona totogia mai e tagata na ʻaināina Iutaia, sa iai foi se galuega e faia e aunoa ma ni totogi [o galuega e faia nai lo le totogia o lafoga ua tāpā mai e faipule silisili]. O se faatulagaga ua leva lenei a atunuu i Sasaʻe Tutotonu, lea sa tausisia pea e faipule faalemalo i Eleni ma Roma. . . . I le Feagaiga Fou, ua taʻua ai foi ni faaaoaoga o galuega e faia e aunoa ma ni totogi i Iutaia, e faaalia ai le taatele sa iai na mea. O le tū masani lenei na māfua ai ona tauanau atu fitafita ia Simona le Kurene ina ia ona tauaveina le koluse [laau faaoosala] o Iesu (Mataio 5:41; 27:32; Mareko 15:21; Luka 23:26).”
18. O ā ituaiga o auaunaga faalemalo i le lautele, e lē aafia ai le vaegaʻau, ma e lē faalelotu foi, ua masani ona lagolagosua atu i ai Molimau a Ieova?
18 I se uiga faapena, ua tāpā ai i aso nei tagatānuu i nisi atunuu e le Faiga Malo po o pulega i nuu ina ia auai atu i nisi o auaunaga eseese faalemalo i le lautele. I nisi taimi e faasino atu ai lenei mea i se galuega patino, e pei o le ʻeliina o ni vaipaipa po o le faia o auala; o nisi taimi o ni galuega e faifai pea, e pei o le auai i vaiaso taitasi i le teuteuina mamā o auala, o aʻoga, po o falemaʻi. Pe afai o na auaunaga faalemalo i le lautele e mo le lelei o tagata lautele ma e lē o fesootai atu i lotu sese, pe leai foi se itu o feteenai ai ma loto fuatia ifo o Molimau a Ieova, e masani lava la ona latou usiusitai atu. (1 Peteru 2:13-15) O lenei tulaga ua masani lava ona iu ai i se molimau e sili ona lelei ma i nisi taimi ua faafilemuina ai i latou o ē o loo tuuaʻia pepelo Molimau e faapea o ni tagata e tetee i faiga malo.—Faatusatusa i le Mataio 10:18.
19. E tatau faapefea ona faafetaiaia e se Kerisiano le mataupu pe afai e faatonuina o ia e Kaisara ina ia faia se auaunaga faalemalo a le atunuu e lē o aafia i le vaegaʻau, mo se vaitaimi?
19 Ae faapefea pe a faatonuina e le Faiga Malo se Kerisiano ina ia faia mo se vaitaimi se auaunaga faalemalo i le lautele, ma o se vaega o auaunaga a le atunuu ua faatulagaina e se pulega e lē o aafia i le vaegaʻau? O iinei foi, e ao ai i Kerisiano ona faia la latou lava filifiliga e faavae aʻe i se loto fuatia ifo ua aʻoaʻoina lelei. “Tatou te laulaututū uma lava i luma o le nofoa faamasino o [“le Atua,” NW].” (Roma 14:10) O Kerisiano ua fesagai ma se faatonuga a Kaisara e tatau ona suesueina faatasi ma le tatalo le mataupu ma mafaufau loloto i ai. * Atonu e atamai foi ona talanoaina le mataupu ma nisi Kerisiano taʻumatuaina i le faapotopotoga. Pe a maeʻa lena, ona faia lava lea o le filifiliga totino a le tagata ia.—Faataoto 2:1-5; Filipi 4:5.
20. O ā fesili ma mataupu silisili faale-Tusi Paia e fesoasoani i se Kerisiano ina ia fetuunai ai lona mafaufau i le mataupu o le faia o ni auaunaga faalemalo a le atunuu i le lautele, e lē o aafia i le vaegaʻau?
20 A o faia lena sailiiliga, o le a iloiloina e Kerisiano nisi o mataupu silisili o le Tusi Paia. Na taʻua e Paulo e faapea, e ao ona tatou “usiusitai i alii sili ma faipule, . . . ia nofo sauniuni foi . . . i galuega lelei uma lava, . . . ia faapalepale, ma ia faaali atu le agamalu uma i tagata uma lava.” (Tito 3:1, 2) Ae i le taimi lava e tasi, e lelei mo Kerisiano ona iloiloina le galuega faalemalo i le lautele ua faatulai mai. Afai o le a latou taliaina, pe o le a mafai ai ea ona tausisia lo latou solitu faa-Kerisiano? (Mika 4:3, 5; Ioane 17:16) Pe o le a aafia ai ea i latou i nisi o lotu sese? (Faaaliga 18:4, 20, 21) Pe o le faatinoina ea o le galuega o le a taofia pe faatapulaa ai ma le lē tatau i latou mai le faataunuuina o o latou tiute tauave faa-Kerisiano? (Mataio 24:14; Eperu 10:24, 25) I se isi itu, pe o le a mafai ai ea ona latou agaigai ai pea i luma faaleagaga, atonu e oo lava i le auai atu i le faiva faataimi atoa a o faatinoina le auaunaga o manaomia?—Eperu 6:11, 12.
21. Po o le ā lava lana filifiliga, ae tatau faapefea i le faapotopotoga ona latou manatu atu i se uso o lē o loo faatinoina le mataupu o auaunaga faalemalo i le lautele e lē o aafia i le vaegaʻau?
21 Ae faapefea pe afai o tali faamaoni a se Kerisiano i nei fesili o le a ia faia ai se faaiuga e faapea o auaunaga faalemalo a le atunuu i le lautele o ni “galuega lelei” e mafai ona ia faatinoina i le usiusitai atu i faipule silisili? O lana lava lea filifiliga i luma o Ieova. E tatau i toeaina tofia ma isi ona latou matuā faaaloalogia le loto fuatia ifo o le uso ma amanaia pea o ia o se Kerisiano o loo tulaga lelei. Peitai ane, afai e manatu se Kerisiano ua lē mafai ona ia faatinoina lenei auaunaga faalemalo i le lautele, e tatau foi ona taliaina lona tulaga. E tumau foi ona iai o ia i se tulaga lelei ma e tatau ona lagolagosua alofa atu ia te ia.—1 Korinito 10:29; 2 Korinito 1:24; 1 Peteru 3:16.
22. O le ā o le a tatou faia pea e tusa lava po o ā tulaga tatou te fesagai?
22 I le avea o ni Kerisiano, o le a tatou lē mumusu ai e tuuina atu “le faaaloalo i e ua tatau i ai le faaaloalo.” (Roma 13:7) O le a tatou faaaloalo i faamaopoopoga lelei ma saili ina ia avea i tatou o ni tagatānuu fifilemu, ma tausisi i tulafono. (Salamo 34:14) E mafai foi ona tatou tatalo “mo tupu ma i latou uma ua i ai le pule” pe afai e tāloina nei tagata ina ia o latou faia ni faaiuga e aafia ai o tatou ola faa-Kerisiano ma la tatou galuega. Pe a tatou totogi atu mea a Kaisara ia Kaisara, o le iuga, tatou te faamoemoe ai “ina ia tatou nonofo ma le le atuatuvale ma le filemu, i le amio Atua uma lava ma le amio matagofie.” (1 Timoteo 2:1, 2) Ae o le sili o na mea uma, o le tatou talaʻiina atu pea lea o le tala lelei o le Malo ua na o lea le faamoemoe o tagata, ma avatu ai mai se loto fuatia ifo lelei mea a le Atua i le Atua.
[Faaopoopoga i lalo]
^ pala. 19 Tagai i le Watchtower o Me 15, 1964, itulau 308, palakalafa 21.
Pe Mafai Ona E Faamatala Mai?
□ O le ā le mea muamua e sili ona manatu mamafa i ai se Kerisiano, a o faapaleniina lelei ana faiā ia Kaisara ma Ieova?
□ O ā mea o loo tatou nofo aitalafu ai ia Ieova, ae lē mafai ona tatou tuuina atu ia Kaisara?
□ O ā nisi o mea ua talafeagai ona tatou toe avatuina ia Kaisara?
□ O ā mau e fesoasoani ia i tatou ina ia faia ai se filifiliga saʻo i le mataupu o le faamalosia ina ia auai i le vaegaʻau?
□ O ā nisi mea e ao ona tatou manatua pea pe a faatonuina i tatou e faia se auaunaga faalemalo a le atunuu i le lautele e lē o aafia i le vaegaʻau?
□ O le ā e tatau ona tatou faia pea e faatatau ia Ieova ma Kaisara?
[Fesili mo le Suʻesuʻega]
[Ata i le itulau 16, 17]
Na taʻu atu e le au aposetolo i le au Saniterini: “E tusa ona sili o lo matou anaana i le Atua i lo matou anaana i tagata”