Tauaofiaga Itumalo o le 1996 “O Avefeau o le Filemu Mai le Atua”

I ASO anamua e tolu ni faatasiga fiafia tetele sa faamanatu ai e tagata o Ieova i le tausaga. Ua faapena foi i aso nei ona faapotopoto faatolu i le tausaga tagata ua faaigoaina i le suafa o Ieova mo ni faatasiga fiafia. Ua latou olioli e faapotopoto i le aso e tasi mo le aso o le fono faapitoa, o le fonotaga matagaluega mo aso e lua, ma le tauaofiaga itumalo mo aso e tolu pe fa foi. I lenei tausaga, o le matua o le tauaofiaga itumalo e faapea “O Avefeau o le Filemu Mai le Atua.”

Maeu le fetaui o lena matua! O lo tatou Atua, o Ieova, o le “Atua o le filemu,” ioe “o le Atua na te aumaia le filemu.” O lo tatou Taʻitaʻi, o Iesu Keriso, o le “Perenise o le Filemu,” ma o le feau o loo aumaia e auauna a Ieova o se feau o le filemu mai le Atua. (Filipi 4:9, NW; Roma 15:33, NW; Isaia 9:6, NW; Nauma 1:15) Ua faatulagaina se polokalame matagofie mo lenei tauaofiaga o le a fesoasoani i tagata uma ina ia matuā talisapaia atoatoa le tāua o le filemu mai le Atua.

I le tausaga lenei i le Iunaite Setete lava ia, e 198 tauaofiaga o le a faia ai. E lē taumatea o le a iai se tauaofiaga e faia latalata i le nofoaga o loo e alaala ai. Aisea e te lē fesili ane ai i Molimau a Ieova o tou tuaoi po o afea tonu ma po o fea foi o le a faia ai, ona fai loa lea o ni fuafuaga ina ia e auai? O i latou uma e fiafia i le filemu moni ma le tumau o le a faafeiloaia ma le māfana.