Fesili Mai le Au Faitau

E iai taimi tatou te faalogo ai i uso o tautatala pe tatalo mo le Malo o le Atua ina ia oo mai i le lalolagi. Pe o se faaupuga saʻo ea lea?

O le mea moni lava, e lē o se auala faale-Tusi Paia lea e faaupuina ai le oo mai o le Malo. O le Malo o le Atua e faalelagi. O lea, na mafai ai e le aposetolo o Paulo ona tusi atu e faapea: “E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi. Ia ia te ia le viiga e faavavau faavavau lava. Amene.”—2 Timoteo 4:18; Mataio 13:44; 1 Korinito 15:50.

Na faavaeina le Malo i le lagi i le 1914, ma o le a lē tāitai lava ona suia mai le lagi agaʻi i le lalolagi Parataiso ua toe faafoisia, po o se isi mea. O Iesu Keriso o le Tupu o le Malo. I le avea o ia ma Tupu, ua pule ai o ia i agelu. O lea la, o lona tulaga talafeagai i le pulega o le itu taumatau lea o le Atua i le lagi. O Kerisiano faauuina e fai ma tupu ma faitaulaga faatasi ma ia i le lagi.—Efeso 1:19-21; Faaaliga 5:9, 10; 20:6.

Pe o le uiga ea o lenei mea, ua lē tatau ona tatou toe taʻu atu i le Atua olega lea ua maua i se vaega o le Tatalo a le Alii e faapea: “Ia oo mai lou malo. Ia faia lou finagalo, i le lalolagi, e pei ona faia i le lagi”? (Mataio 6:10) I le tuufaafeagai ai, ua tatau lena tatalo ma o loo tumau pea ona uigā tele.

Ua toeitiiti ona gaoioi lea o le Malo o le Atua i se auala faapitoa agaʻi mai i lenei lalolagi, ma o le mea lea o loo tatou mafaufau i ai pe a tatou tatalo ma faaaogā faaupuga e talitutusa i upu o loo iai i le Tatalo a le Alii. O se faataitaiga, i le Tanielu 2:44 ua valoia mai ai e faapea o le a “oo mai” le Malo e faaumatia malo uma ma o le a ia pulea lenei lalolagi. O loo tautala le Faaaliga 21:2 e uiga i le Ierusalema Fou o loo alu ifo mai le lagi. Ua faia aʻe le Ierusalema Fou i le 144,000 o Kerisiano faauuina o ē o le a avea ma avā faaipoipo a Keriso. O i latou foi o suli faatasi ma Iesu i le Malo. O lea la, o loo faamatala e le Faaaliga 21:2 lo latou liuliualo mai i le lalolagi, faatasi ai ma faamanuiaga sili e maua ai e tagata faamaoni.—Faaaliga 21:3, 4.

A o lei oo mai nei mea ma le faataunuuina o isi valoaga matagofie, o le a talafeagai ona faaauau pea ona tatalo ia Ieova le Atua ia ogatasi ma fetalaiga a Iesu e faapea, “Ia oo mai lou malo.” Ae ao ona teu i o tatou mafaufau o le Malo o le a lē oo mai i lenei Lalolagi paneta i se uiga faaletino. O le pulega o le Malo e iai pea i le lagi, ae lē o luga o le lalolagi.

[Ē Ana le Ata i le itulau 31]

Earth: Based on NASA photo