Po o Afaina Oe Ona o Faiga Faaituau?

O Ā TULAGA e masani ona oo i ai ona o faiga sauā i va o ituaiga o tagata, faailoga lanu, faailoga tagata, ma le faatamaʻiaina atoa o se ituaiga o tagata? O iuga uma na o faanaunauga ua taatele i tagata—le faaituau!

O le ā le faaituau? Ua faamatalaina e se tasi lomifefiloi e faapea “o se manatu ua faia e aunoa ma le faaaluina o se taimi e mafaufau ai pe faia ai foi ma le faaeteete se faaiuga talafeagai.” Ona o ni tagata e lē lelei atoatoa, tatou te lolo atu ai i le faia o faiga faaituau i nisi taimi. Atonu e mafai ona e manatunatu i ni faataitaiga ina ua e faia se faamasinoga e aunoa ma le mauaina o ni mea moni uma e faamaonia ai. Ua faia e le Tusi Paia se faaeseesega o na manatu faaituau ma le auala e faamasinoina ai e Ieova le Atua. Ua faapea mai: “Auā e le vaai Ieova pei o le vaai o tagata, auā e vaai tagata i le tino, a e vaai Ieova i le loto.”—1 Samuelu 16:7.

E Mafai Ona Tiga le Faaituau

E lē taumatea, o tagata uma lava na faamasinoseseina e se tasi i se taimi. (Faatusatusa i le Failauga 7:21, 22.) O le tulaga masani, ua afaina ai i tatou uma lava ona o faiga faaituau. Ae peitai, afai e vave ona faateʻa ese manatu faaituau, o le a faapena foi ona itiiti po o le leai foi o se tiga e tupu mai ai. O le teuloto o mafaufauga faapena, e ono iu ina afaina ai. O na mafaufauga e mafai ona faaseseina ai i tatou e talitonu i se mea sese. Mo se faaaoaoga, ona o mafaufauga faaituau, ua talitonu moni ai nisi tagata e faapea, e mafai ona matapeapea se tagata, paiē, faavalevalea, po o le mimita foi ona o lona auai atu i se vaega faalotu, se vaega o ituaiga o tagata, po o se nuu.

 I le tele o tulaga, o na faamasinoga sese, ua fofoa mai ai faiga lē tonu, upu masoā, pe oo lava i le faia o faiga sauā i isi. E faitau miliona tagata ua faatamaʻia i faiga matuā sauā, le faatamaʻia e le tasi ituaiga o le isi ituaiga o tagata, ma isi lava ituaiga o faiga faaituau matuā leaga.

I le lalolagi aoao, ua taumafai ai malo e taofia faiga faaituau e ala i le faia o se āiāiga faaletulafono e puipuia ai aiā tatau i le saʻolotoga, saogalemu, ma le tulaga tutusa o tagata mai le faaleagaina. Afai e te faitauina le faavae po o le vaega autū o tulafono a lou atunuu, e lē taumatea, o le a e maua ai se fasi fuaitau po o se lafo ua fuafuaina e puipuia ai aiā tatau a tagatanuu uma, e tusa lava po o le ā lo latou lanu, ituaiga, po o le lotu. Ae ui lava i lea, ua matuā salalau atu le faaituau ma le faailoga tagata i le lalolagi aoao.

Po o afaina ai oe ona o faiga faaituau? Pe ua faavasegaina ea oe faapea e te matapeapea, paiē, valea, po o le mimita ona o lou lanu, o ou tausaga, lou ituaiga tagata, lou atunuu, po o ou talitonuga faalotu? Pe ua e lē mauaina ea se aʻoaʻoga lelei, se galuega, se fale, ma ni manuia lautele ona o le faaituau? Afai o faapena, e mafai la faapefea ona e faafetaiaia?

[Ata i le itulau 3]

O le teuloto o mafaufauga faaituau, ua fofoa mai ai le feitagai i le va o lanu

[Ē Ana le Ata]

Nina Berman/Sipa Press