Fesili Mai le Au Faitau

Pe e mafai ona tatou faapea atu o auauna a le Atua i aso nei o ē e iai le faamoemoe mo le lalolagi o loo ia i latou le tele o le agaga o le Atua e pei foi ona iai i Kerisiano ua faauuina i le agaga?

E lē o se fesili fou lenei fesili. O le mataupu foi lava lenei na lāgā i le “Fesili Mai le Au Faitau” i Le Olomatamata faa-Peretania o Aperila 15, 1952. E toatele ua avea nei ma Molimau talu mai lena taimi, o lea e mafai ai ona tatou talanoaina le fesili ma i le faia faapea tatou te toe autaluina ai le faamatalaga na taʻua i le mataupu muamua.

I se tulaga faavae, o le tali o le ioe, o uso ma tuafāfine faamaoni o le vasega o isi mamoe ma ē faauuina, e mafai ona tutusa lelei i latou i le mauaina mai o le agaga paia o le Atua.—Ioane 10:16.

O le mea moni e lē faapea ai, e tutusa le auala e galue mai ai le agaga i tagata uma taitoatasi. Seʻi toe mafaufau i tuā i auauna faamaoni a o lei oo i taimi o le Faa-Kerisiano, o ē na mautinoa lo latou mauaina o le agaga o le Atua. I le mauaina o le mana mai le agaga, na mafai ai e nisi o i latou ona fasimateina nisi o meaola taufeai, faamālōlō i ē mamaʻi, e oo foi lava i le toe faatutūina aʻe o ē na oti. Ma na latou manaomia le agaga ina ia tusia ai tusi faagaeeina o le Tusi Paia. (Faamasino 13:24, 25; 14:5, 6; 1 Tupu 17:17-24; 2 Tupu 4:17-37; 5:1-14) Na faapea mai Le Olomatamata: “E ui lava o i latou nei sa lē iai i le vaega faauuina, ae na faatutumuina i latou i le agaga paia.”

Seʻi manatu i ai mai i se isi itu, manatu i tane ma fafine o le uluai senituri o ē na faauuina i le agaga paia, avea ai ma atalii faaleagaga o le Atua faatasi ai ma le faamoemoe faalelagi. Na faauuina uma i latou, ae lē faapea ai na afua mai i lena taimi ona tutusa le auala na galue mai ai le agaga ia i latou uma lava. Ua manino lelei mai le 1 Korinito mataupu e 12. Ua talanoaina ai iina e le aposetolo o Paulo meaalofa o le agaga. Tatou te faitau ai i le fuaiupu e 8, 9, ma le 11 e faapea: “Auā ua foaiina mai i le tasi le upu o le poto e le Agaga; e i le tasi le upu o le malamalama, e tusa ma le Agaga e tasi; e i le tasi le faatuatua e le Agaga e tasi; e i le tasi o mea alofa e faamalolo aʻi maʻi e le Agaga e tasi. . . . E matuā galue foi na mea uma e lea lava Agaga e tasi, o loo o tufatufa i tagata ia taitasi ma lana mea, pei ona finagalo i ai o ia.”

O le mea tāua la, e lē o ē faauuina uma sa iai i tuā i lena vaitaimi sa latou maua meaalofa e faia ai vavega e ala i le agaga. I le 1 Korinito mataupu e 14, na taʻua ai e Paulo se sauniga i le faapotopotoga na maua ai e le isi le meaalofa e tautala ai i gagana eseese, ae sa leai se tasi na faatasi atu ai na maua le meaalofa e faamatala atu ai. E ui i lea, i se mea na tupu muamua atu, na faauuina i latou uma taitoatasi i le agaga. Pe talafeagai ea ona faapea atu o le uso sa ia maua meaalofa o le tautala i gagana eseese sa sili atu se vaega o le agaga sa ia te ia nai lo isi na aofia faatasi ai? E leai. E lei faapea sa faaletonu tulaga o isi o ē na faauuina, e pei e foliga na lē malamalama o ia i le Tusi Paia faapena foi ma le lē mafai e ia lea ona feagai ai ma tofotofoga. Sa faapitoa le auala na galue ai le agaga i le uso o lē sa mafai ona tautala i gagana eseese. Ae sa tatau ia te ia ma i latou na ona tumau vavalalata atu ia Ieova ma ia ‘faatumuina pea i le agaga,’ e pei ona sa tusia e Paulo.—Efeso 5:18.

E tusa ai ma le vaega totoe i aso nei, ua mautinoa lava lo latou mauaina o le agaga o le Atua. Na iai se taimi na faapitoa ai le auala na galue mai ai le agaga ia i latou—i le taimi lea na faauuina ai i latou e avea ma ataliifai faaleagaga. E afua mai i lena taimi na ‘faatumuina pea i latou i le agaga,’ mauaina o lana fesoasoani a o latou saili e malamalama atili i le Tusi Paia, faia le taʻimuaga i le galuega talaʻi, po o le feagai ai ma tofotofoga—totino po o le faalapotopotoga foi.

E ui i lea, o sui o “isi mamoe” e lē oo ia i latou le faauuina, ae latou te mauaina le agaga paia i isi vala. Na mātaulia e Le Olomatamata faa-Peretania o Aperila 15, 1952, e faapea:

“O ‘isi mamoe’ i aso nei latou te faia le galuega talaʻi lava lea e faia foi e le vaega totoe, i lalo o tulaga faigata e tasi, ma latou te faaalia le faatuatua ma le faamaoni e tasi. Latou te aai i le laoai faaleagaga e tasi, i meaʻai e tasi, ma tutusa foi upu moni o loo latou mauaina. I le iai i le vasega mo le lalolagi, faatasi ai ma le faamoemoe ma le naunau i mea e faatatau atu i le lalolagi, atonu e tele ina naunau atu ai i latou i mau e fesootai atu i tulaga o le a iai i le lalolagi fou; ae o le vaega totoe faauuina, o loo iai le faamoemoe faalelagi ma le matuā naunau totino atu i mea i la le agaga, e ono maelega ai i le suesueina o na mea o i le Afioga a le Atua. . . . Peitai e tumau pea le mea moni e tutusa upu moni ma le malamalamaga e mafai ona maua e vaega uma e lua, ma e faalagolago i le maelega e suesue ai le tagata lava ia ona fua lea i ai o le malamalamaga latou te mauaina i mea faalelagi ma le faalelalolagi. O le agaga o le Alii e tutusa le tele o loo faaavanoa mai ai i vaega uma e lua, ma o loo tutusa foi le poto ma le malamalama o loo ofoina mai i nei vaega uma e lua, faatasi ai ma avanoa tutusa e mafai ona aveina ai i loto.”