O Loo Sii aʻe Apaau e Pei o Aeto

O LE Ā le lagona e oo i se tagata ina ua mavae le lima tausaga na onosai ai i totonu o nofoaga o faasalaga a Nasi? Lotovaivai? Ita? Fia tauimasui?

Atonu e foliga mai o se mea ese, na tusia e se tagata na oo i ai e faapea: “Na faatamaoaigaina loʻu olaga i se tulaga e sili atu nai lo le mea na ou faamoemoe o le a oo i ai.” Aisea na ia lagona ai faapea? Sa ia faamatala mai: “Na ou maua le lafitaga i lalo o apaau o Lē Silisili Ona Maualuga, ma sa ou tofo i le faataunuuga o upu a le perofeta o Isaia, ina ua ia faapea mai: ‘A o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te savavali, a e le tigaina.’”—Isaia 40:31.

O lenei tamaloa Kerisiano, o lē na sasaina faamoʻamoʻa lona tino e faiga sili ona matautia, sa iai se agaga na siitia ai faafaatusa o ia, o se agaga sa lē mafai e faiga sili ona sauā a Nasi ona faatoilaloina. I le pei o Tavita, na ia maua le lafitaga i le paolo o “apaau” o le Atua. (Salamo 57:1) Sa faaaogā e lenei Kerisiano se faatusatusaga na faaaogā e le perofeta o Isaia, i le faatusatusa o lona malosi faaleagaga i le malosi o se aeto o loo sii aʻe i luga lana lelei i se maualuga e sili i le vanimonimo.

E te lagona ea le matuā mafatia ona o faafitauli? E lē taumate, o loo e manao foi ia maua se lafitaga i lalo o apaau o Lē Silisili Ona Maualuga, ina ia “sii ae apaau e pei o aeto.” Ina ia malamalama pe mafai faapefea lenei mea, e aogā tele le iloa o se mea e uiga i le aeto, lea e masani ona faaaogā faafaatusa i le Tusi Paia.

I Lalo o le Faatusa o le Aeto

I manulele uma lava na mātauina e tagata anamua, atonu o le aeto o le tasi lea o manulele na sili ona viiviia ona o le malosi ma le maoaʻe o lona lele maualuga. O le tele o vaegaʻau anamua, e aofia ai vaegaʻau a Papelonia, Peresia, ma Roma, sa savavali i lalo o le faatusa o le aeto. O le vaegaʻau a Kuresa le Sili, sa o se tasi o nei vaegaʻau. Na valoia e le Tusi Paia, o lenei tupu o Peresia, o le a pei o se manulele taufeai, e sau mai sasaʻe e faaumatia le emepaea o Papelonia. (Isaia 45:1; 46:11) Ina ua mavae le lua selau tausaga talu ona faamauina o lenei valoaga, na faatifa to ifo ai ʻau a Kuresa o loo iai faatusa o aeto i a latou tagāvai o taua i luga o le aai o Papelonia e pei o se aeto o loo punaoso atu i lana meaʻai.

E lei leva atu foi, o toa e pei o Charlemagne ma Napoleone, ma atunuu e pei o le Iunaite Setete ma Siamani, ua latou filifilia foi le aeto e fai ma a latou tagāvai. Na poloaiina tagata Isaraelu ina ia aua neʻi faamamaluina faatusa o aeto po o se isi lava meaola. (Esoto 20:4, 5) Peitai, ua faasino atu e tusitala o le Tusi Paia i uiga o le aeto ina ia faataitaia ai la latou feau. I lea, o le aeto, le manulele ua taʻua soo i le Tusi Paia, ua faaaogaina e fai ma faatusa o mea e pei o le atamai, le puipuiga tauatua, ma le faimea vave.

 Le Mata o le Aeto

O le maʻati o le vaai a le aeto, e masani ona fai i ai faataoto. E ui lava o le mamafa o le aeto enaena (golden eagle) e seāseā ona sili atu i le sefulu pauna [5 kilokalama] lona mamafa, ae o ona mata e lapopoa atu i mata o le tagata, ma o lana vaai mamao e sili atu ona maʻati. I le faamatalaina atu e Ieova lava ia ia Iopu le tomai o le aeto e saili ai ana meaʻai, na ia fetalai ai: “Ua vaai mamao atu ai ona mata.” (Iopu 39:27, 29) Ua lipotia mai e Alice Parmelee, i lana tusi, All the Birds of the Bible e faapea, “o le taimi lava e iloa atu ai e se aeto se iʻa mate o opeopea i se vaituloto e tolu maila [lima kilomita] le mamao, ona lele faatusaʻo ifo lea i le nofoaga tonu lava lena. Sa lē gata ina mafai e le aeto ona iloa atu se mea laitiiti mai se nofoaga e matuā sili ona mamao nai lo le tagata, ae e tepa taulai atu pea lana vaai i le iʻa, a o lele faatifa ifo i lalo mai le tolu maila.”

Ona o le maʻati o lana vaai, ua avea ai le aeto ma faatusa fetaui o le atamai, o se tasi o uiga sili o Ieova. (Faatusatusa le Esekielu 1:10; Faaaliga 4:7.) Aisea e faia ai faapea? E aofia i le atamai le muai iloa o iuga o so o se gaoioiga tatou te ono faia. (Faataoto 22:3) Ona e iai i le aeto le tomai e vaai ai i se mea e sili atu ona mamao, e mafai ai la ona ia iloa mamao atu se tulaga lamatia ma faaeteete ai, e pei lava o le tagata faamaoni i le faataoto a Iesu, o lē na iloa mamao le ono oo mai o se afā ma fau ai lona fale i luga o le papa. (Mataio 7:24, 25) E fetaui lelei foi, auā i le gagana Sepania, o le faamatalaina o se tasi e pei o se aeto, o lona uiga e ia te ia le tofamamao po o le faautaga.

Afai e te maua se avanoa e te vaai latalata ai i se aeto, ia mātau le auala na te faaaogaina ai ona mata. E lē faataupupula atu ia te oe mo se taimi puupuu; nai lo lea, e foliga mai e vaavaai totoʻa atu ma mātauina auiliili ou foliga. E faapena foi i le tagata atamai ona iloilo ma le faaeteete se mataupu a o lei faia se faaiuga nai lo le faalagolago i lona lava loto po o ona faalogona. (Faataoto 28:26) A o avea le maʻati o le vaai a le aeto ma faatusa matuā talafeagai o le uiga tauatua o le atamai, ua faaaogaina foi e tusitala o le Tusi Paia lona lele matuā maualuga i se uiga faafaatusa.

“Le Ala o le Aeto i le Lagi”

“O le ala o le aeto i le lagi” e ofoofogia, e lē gata i lona saoasaoa ma le auala e foliga mai o loo ia lele ai ma le lē faavāivai, ae lē tau mulimuli atu foi i se faasinoala tusitusia ma e lē tuua foi sona auala. (Faataoto 30:19) O le faimea vave o le aeto ua faasino i ai le tusi o Auega 4:19, o loo faamatalaina ai iina fitafita Papelonia e faapea: “Sa sili  ona tele vavave o e na tuliloa mai ia te i matou i aeto o le lagi; sa latou saga tuliloa mai ia te i matou i atu mauga.” E tusa ai ma nisi o lipoti e faapea, pe a iloa atu e se aeto o taamilomilo i luga aʻe se meaʻai, e faapipio i luga ona apaau ma lele faatifa to ifo, i le taimi lea e mafai ai ona ia maua le saoasaoa e tusa ma le 80 maila [130 kilomita] i le itula. E lē o se mea e ofo ai, i le faaaogaina e le Tusi Paia o le aeto e faatusatusa ai le saoasaoa, ae maise lava i le fesootai atu ma malosi faavaegaʻau.—2 Samuelu 1:23; Ieremia 4:13; 49:22.

I le isi itu, ua faasino atu e Isaia i le lele ma le lē faavāivai o se aeto. “A o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.” (Isaia 40:31) O le ā le mealilo i le lele faapepepepe a se aeto? O le lele aʻe i luga e manaomia ai se taumafaiga itiiti, ona e faaaogā e le aeto le ea vevela. E lē mafai ona iloa atu ea vevela, ae e tomai tele le aeto i le sailia o ia mea. O le taimi lava e iloa atu ai se ea vevela, ona faaloloa loa lea e le aeto ona apaau ma lona siusiu ma lele faataamilo ai i totonu o le ea vevela, lea na te siitia aʻe le aeto i se mea e sili ona matuā maualuga. A lava loa le maualuga e maua, ona faaseesee mālie atu lea i le isi vaega o le ea vevela lea e toe faia ai foi lena lava taualumaga. I lena auala, e mafai ai e le aeto ona faapepepepe mo ni itula e faaaogā ai sina malosi itiiti.

I Isaraelu, ae maise lava i le Vanu Laugatasi lea e taatia mai i Esiokape i matafaga o le Sami Ulaula e oo atu i le itu i mātū o Tanu, e masani ona vaaia ai aeto. E patino lava ona faateleina i le taimi o le tau e totogo ai ma le tau e āfu ai mea pe a latou faimalaga solo. I nisi tausaga e toetoe lava oo atu i le 100,000 aeto e faitauina. Pe a oo ina mafanafana le ea i le susulu mai o le la i le taeao, e mafai ona vaaia ai le faitau selau o aeto (raptors) o felelei i luga aʻe o mato i tuaoi o le Vanu Laugatasi.

O le lele ma le lē faavāivai o le aeto, o se faataitaiga sili lea ona lelei i le auala ua mafai ai e le malosi mai ia Ieova ona siitia aʻe i tatou i le itu faaleagaga ma tau i faalogona ina ia mafai ai ona tatou faaauau pea i le galuega. E pei lava ona lē mafai e se aeto ona lele aʻe i luga i lena maualuga e faaaogā ai lona lava malosi, e lē mafai ona tatou gafatia pe a tatou faalagolago i o tatou lava tomai. Na faamatala mai e le aposetolo o Paulo e faapea: “Ou te mafaia mea uma lava ona o ia ua faamalosi mai ia te au.” (Filipi 4:13) I le pei o se aeto e saili pea mo ni ea vevela e lē mafai ona iloa atu, e tatou te ‘ole atu ai pea’ mo le mana galue lē vaaia o Ieova e ala i a tatou tatalo faatauanau.—Luka 11:9, 13.

O aeto e femalagaai, e masani ona latou maua ea vevela a o vaavaai solo mo isi manu mo a latou meaʻai. Na lipotia mai e se tagata suesue i mea tau i le natura o D. R. Mackintosh e faapea, i se tasi taimi, e 250 aeto ma oreva na vaaia o felelei faataamilomilo aʻe i luga i le ea vevela lava e tasi. E faapena foi Kerisiano i aso nei ona mafai ona faalagolago i le mana o Ieova e ala i le faataitai i faaaoaoga faamaoni a isi auauna amioatua.—Faatusatusa i le 1 Korinito 11:1.

I le Paolo o Apaau o se Aeto

O se tasi o taimi aupito sili ona lamatia i le olaga o se aeto, o le taimi lea pe a faataitai ona  lele. E tele ni aeto ua mamate i lea taumafaiga. Sa oo foi le nuu faatoʻā faataitai o Isaraelu i se tulaga lamatia ina ua ō ese mai Aikupito. I lea, na matuā fetaui lelei ai afioga a Ieova i tagata Isaraelu e faapea: “Na outou vaai atu i mea na ou faia i Aikupito, na ou avae ia te outou i luga o apaau o aeto, na ou au mai foi ia te outou ia te au nei.” (Esoto 19:4) Ua iai lipoti o aeto o loo tauaveina a latou tama i o latou tua mo sina taimi ina ia lē paʻū i lana uluai taumafaiga e lele. Na faapea mai le faaopoopoga a G. R. Driver i le Palestine Exploration Quarterly e uiga i ia lipoti: “O le ata faafaatusa a le [Tusi Paia], ua lē na o se mafaufauga na fatu fua, ae ua faavae i mea moni.”

I nisi foi itu, o aeto, o mātua ia o loo avea ma faaaoaoga lelei. E lē gata latou te saunia le tausiga i le saunia e lē aunoa o meaʻai, ae vaevae foi ma le faaeteete e le aeto fafine le aano o le manu na aumai e le aeto poʻa i le ofaga, ina ia mafai ai e le tamai aeto ona folo. Talu ai e masani ona fausia o latou ofaga i luga aʻe o mato po o totonu o laau maualuluga, e lamatia ai manu laiti i le tau. (Iopu 39:27, 28) O le mu tinitini o le la, ua masani ai nuu o le Tusi Paia, e ono faapogaia ai le mate o se tamai manu pe afai sa lē tausia lelei e ona mātua. I nisi taimi, e faaloloa ai e le aeto matua ona apaau mo ni itula, ina ia faapaolo ai lana fanau laiti.

I lea, ua matuā talafeagai ai ona faaaogā e le Tusi Paia apaau o le aeto o se faatusa o le puipuiga tauatua. Ua faamatalaina e le Teuteronome 32:9-12 le auala na puipuia ai e Ieova ia tagata Isaraelu i la latou savaliga i le vaomatua: “Auā o le tofi o Ieova o lona nuu lea; o Iakopo o lona tofi lea ua fuafuaina. Na ia maua o ia i le vao, o le mea e le āina, e uio ai manu feai, ma ua gaogao; na ia siosio ia te ia, ma aʻoaʻo atu [tausi] ia te ia, na ia leoleo ia te ia e pei o lona tamatamaimata. E pei o le aeto ona faaoso i ana tama, e faapepepepe i luga o ana tama, e fola ona apaau, e saposapo ia te i latou, e ave ia te i latou i luga i ona apaau; sa faapea Ieova e toatasi ona taʻitaʻi ia te ia.” O le a faapena foi ona tuuina mai e Ieova ia i tatou lea lava puipuiga alofa, pe a tatou faatuatua ia te ia.

Le Auala e Sao Ai

I nisi taimi pe a tatou fesagai ma faafitauli, e oo ai ia i tatou se lagona ua manao e fia sola ese mai o tatou mafatiaga uma. O le lagona tonu lava lena na ia Tavita. (Faatusatusa i le Salamo 55:6, 7.) Ae e ui ina folafola mai e Ieova e fesoasoani ia i tatou a o tatou fesagai ma tofotofoga ma mafatiaga i lenei faiga o mea, na te lē o ofoina mai se faasaoina atoatoa. Ua ia i tatou le faamautinoaga a le Tusi Paia e faapea: “Ua le maua outou e se faaosoosoga e ese i lo tagata; a ua faamaoni le Atua, o le na te le tuuina atu outou i le faaosoosoga e sili i se mea ua outou lavatia, a e sauni foi faatasi ma le faaosoosoga se mea e sao ai, ina ia outou lavā oono.”—1 Korinito 10:13.

‘O le ala e sao ai’ po o “se ala e sola ese ai” (King James Version) e aofia ai le aʻoaʻo ina ia faatuatua ia Ieova. O le mea lena na iloa e Max Liebster, o lē e ona upu o loo sii mai i le amataga o lenei mataupu. I le tausaga na iai o ia i le nofoaga o faasalaga, sa ia iloa lena mea ma faatuatua ia Ieova. Sa iloa e Max, e faamalosia i tatou e Ieova e ala i lana Afioga, lona agaga, ma lana faalapotopotoga. E oo lava i falepuipui, sa saili ai e Molimau uso talitonu ma ofo atu ia i latou se fesoasoani faaleagaga, fetufaai i manatu faale-Tusi Paia ma so o se lomiga faale-Tusi Paia sa mafai ona latou maua. Ma e pei lava ona molimau mai pea lava pea tagata faamaoni na faasaoina, na faamalosia i latou e Ieova. Ua faamatala mai e Max: “Sa ou ole atu pea ia Ieova e fesoasoani mai ia te au, ma sa faamalosia aʻu e lona agaga.”

Po o le ā lava se tofotofoga tatou te fesagai, e faapena foi ona tatou faalagolago atu i le agaga paia o le Atua, tau lava ina ia tatou ole atu pea i ai. (Mataio 7:7-11) I le faamalosia i lenei “matuā tele o le mana,” o le a siitia aʻe ai i tatou nai lo o le lofituina i o tatou faafitauli. O le a tatou savavali pea i ala o Ieova, ma o le a tatou lē faavāivai. O le a tatou sii aʻe e pei o apaau o aeto.—2 Korinito 4:7; Isaia 40:31.

[Faamatalaga faaopoopo i le itulau 10]

E lē faataupupula atu ia te oe mo se taimi puupuu

[Ē Ana le Ata i le itulau 9]

Foto: Cortesía de GREFA

[Ē Ana le Ata i le itulau 10]

Foto: Cortesía de Zoo de Madrid