O le ā le Uiga o le Alofa i le Atua?

E TUSA ma le ono afe tausaga ua mavae, na fanau ai le uluai pepe faaletagata. Ina ua maeʻa lona fanau mai, na faapea mai lona tinā o Eva: “Ua ou maua le tagata mai ia Ieova.” (Kenese 4:1) Ua faaalia mai e lana faamatalaga, e ui lava ina ua uma ona faasalaina i le oti mo le la fouvalega, ae sa iloa pea Eva ma lana tane o Atamu, le tulaga o le avea o Ieova ma Atua. Mulimuli ane, na la fanauina ai se atalii lona lua. Na faaigoaina tama ia Kaino ma Apelu.

A o tutupu aʻe nei atalii, e mautinoa na la aʻoaʻoina le tele o mea e faatatau i le alofa o Ieova e ala i le iloiloina o lana foafoaga. Na la olioli i lanu matagofie o mea ma le eseese o le anoanoai o manu ma laau. Sa lē gata ina avatu e le Atua ia i laua le ola ae na ia avatu foi ia i laua le tomai e maua ai le fiafiaga i le ola.

Na la iloa ane ai o o la mātua na foafoaina i se tulaga lelei atoatoa ma o le uluai fuafuaga a Ieova ia ola e faavavau tagata. E foliga mai sa faamatala e Atamu ma Eva ia i laua le matagofie o le faatoaga o Etena, ma atonu sa tatau foi ona la faamatala le mafuaaga na tuliesea ai i laua mai lea aiga matagofie faaparataiso. Atonu foi na iloa lelei e Kaino ma Apelu le valoaga a le Atua o loo faamauina i le Kenese 3:15. I lena valoaga ua faaleoina ai e Ieova lana fuafuaga ina ia faasaʻoina mea i le taimi atofaina mo le manuia o i latou o ē alolofa ia te ia ma faamaonia le faamaoni atu ia te ia.

O le aʻoaʻoina e faatatau ia Ieova ma ona uiga na ono faaosofia ai Kaino ma Apelu se faanaunauga mo le finagalo malie o le Atua. O lea na la faalatalata atu ai ia Ieova i le ofoina atu o taulaga ia te ia. Ua faapea mai le tala a le Tusi Paia: “Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. A o Apelu, ua ia avatu foi uluai tama a lona lafu, o e pepeti ai lava.”—Kenese 4:3, 4.

O lo la faanaunauga mo fia faamalie o le finagalo o le Atua na faatulaga aʻe ai se faavae mo se faiā ma ia. Na iu Kaino i le fouvale i le Atua, ae sa faaauau pea ona uunaia Apelu e le alofa moni i le Atua. Na semanū e lē mafai e Apelu ona atiina aʻe se faiā faapea ma le Atua pe ana lē ia te ia muamua le poto e faatatau i uiga totino o Ieova ma ana fuafuaga.

E mafai foi ona e iloaina Ieova. O se faataitaiga, e mafai ona e aʻoaʻoina mai le Tusi Paia e faapea o le Atua o se peresona moni lava, e lē na o se malosiaga e leai se ola e fealuai solo i le foafoaina o mea i se avanoa e tupu faafuasei e aunoa ma le fuafuaina lelei. (Faatusatusa i le Ioane 7:28; Eperu 9:24; Faaaliga 4:11.) Ua aʻoaʻo mai foi le Tusi Paia e faapea o Ieova “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.”—Esoto 34:6.

“O le Faalogo e Sili Lea i le Taulaga”

E pei ona faataitaia mai i le tala ia Kaino ma Apelu, o le mauaina o le poto e uiga i le Atua ma se faanaunauga mo se faiā vavalalata ma ia e lē lava lea. E moni, na faalatalata atu le auuso e toalua i le Atua ma a la taulaga. Ae peitai, “ua silasila mai Ieova ia Apelu atoa ma lana taulaga; a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata.”—Kenese 4:3-5.

Aisea na teena ai e Ieova le taulaga a Kaino? Pe sa iai ea se mea na sese i le ituaiga o taulaga o lana tauofoga? Pe na lē malie ea le finagalo o Ieova ona sa ofoina atu e Kaino “fua o le fanua” nai lo se taulaga e faia i manu? Atonu e lē o lena. I taimi mulimuli ane, na talia ma le fiafia e le Atua taulaga i mea e ʻai ma isi fua o  le fanua mai le toatele o tagata na tapuai atu ia te ia. (Levitiko 2:1-16) E foliga mai la, sa iai se isi mea lē lelei i le loto o Kaino. Sa mafai ona silafia mai e Ieova le loto o Kaino ma lapataia ai o ia e faapea: “Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? a e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia.”—Kenese 4:6, 7.

O le alofa moni i le Atua e sili atu nai lo le na ona ofoina atu o taulaga. O le mafuaaga lena na faalaeiauina ai e Ieova ia Kaino ina ia “amio lelei.” Na finagalo le Atua i le usiusitai. O lea usiusitai atu i le Atua sa tatau ona fesoasoani ai ia Kaino ina ia faia se faavae lelei mo se faiā alofa māfana ma Lē na Foafoaina Mea. Ua faamamafa mai e le Tusi Paia le tautele o le usiusitai i upu nei: “E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le gaʻo o mamoe poa.”—1 Samuelu 15:22.

O lenei manatu sa matuā faamausalīina mulimuli ane i upu o le 1 Ioane 5:3 e faapea: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.” E leai se isi auala e sili atu e faaalia ai lo tatou alofa mo Ieova nai lo le gauai atu o i tatou lava i lana pule. O le uiga o lenei mea o le usiusitai lea i le tulafono tau amio a le Tusi Paia. (1 Korinito 6:9, 10) O lona uiga o le fiafia lea i le mea e lelei ma ʻinoʻino i le mea e leaga.—Salamo 97:10; 101:3; Faataoto 8:13.

O se tasi o faailoaga tāua o lo tatou alofa mo le Atua o lo tatou alofa lea i o tatou tuaoi. Ua taʻu mai e le Tusi Paia ia i tatou e faapea: “Pe afai e faapea mai se tasi, ‘Ou te alofa i le Atua,’ a e ʻinoʻino i lona uso, o le pepelo lava ia; auā o le le alofa i lona uso ua ia vaai atu i ai, e le mafai ona alofa o ia i le Atua ua ia le vaai atu i ai.”—1 Ioane 4:20.

E Mafai se Sootaga Vavalalata Māfana ma le Atua

Atonu e faapea mai nisi, ‘Ou te tapuai ia Ieova. Ou te usitai i ana tulafono. Ou te faia lelei oʻu uso a tagata. Ou te faia uma lava na mea. Ae, ou te lē lagonaina lava se faalogona vavalalata i le Atua. Ou te lē lagonaina se faalogona malosi o le alofa mo ia, ma ou te lagona ai le nofosala i lena tulaga.’ Ua manatu nisi ua lē onomea ona latou ausiaina se faiā vavalalata māfana faapena ma Ieova.

Ina ua mavae le toetoe 37 tausaga o le auaunaga tuutoina atu ia Ieova, na tusi ai se tasi tane Kerisiano e faapea: “O le tele o taimi i loʻu olaga ou te lagona ai loʻu faalefiafia i laʻu auaunaga ia Ieova, atonu ona o lea sa ou lei auauna ma le loto atoa. Ae na ou iloa o le auauna ia Ieova o le mea saʻo lea e tatau ona fai, ma sa ou lē faatagaina lava aʻu e taofia mai ai. E ui i lea, o taimi uma lava ou te faitau ai i se tala a se tasi o faapea mai o lona ‘loto na faatumulia i le alofa mo Ieova,’ ona ou tau mānatu lea, ‘O le ā ea le mea lea e sese ia te au, auā ou te lei lagona lava faapea?’” E mafai faapefea ona tatou maua se sootaga vavalalata māfana ma le Atua?

Pe a e alofa moni i se tasi, e masani lava ona e mafaufau i lena tagata. E ia te oe le faanaunauga malosi ia vavalalata atu ia te ia ona e te manatu mo ia. O le tele lava e te vaai ai ia te ia, talanoa ia te ia, ma mafaufau e uiga ia te ia, o le tele foi lea o le tupu aʻe o lou alofa mo ia. O le mataupu silisili foi lea e faatatau i lou atiina aʻe o le alofa mo le Atua.

I le Salamo 77:12, ua faapea mai le tusitala faagaeeina: “Ou te manatunatu foi i au galuega uma, ou te mafaufau i mea na e faia.” E matuā tāua le manatunatu loloto ina ia atiina aʻe ai le alofa mo le Atua. E matuā moni lava lenei mea auā o le mea moni e lē vaaia o ia. Ae o le tele o lou mafaufau ia te ia, o le tele foi lea o le moni o ia ia te oe. E pau lea o le auala e mafai ai ona e atiina aʻe se faiā mai le loto ma le alofa loloto faatasi ma ia—ona ua moni o ia ia te oe.

O lou manaoga ia manatunatu pea e lē aunoa i ala o Ieova ma ana feutagaiga o le a faalagolago lea i le tele e te faalogo atu ai ia te ia. E te faalogo atu e ala i le faitau e lē aunoa ma  suesueina o lana Afioga, le Tusi Paia. Ua tautala le faisalamo i se tagata fiafia o lē e “naunau o ia i le tulafono a Ieova; e mafaufau foi o ia i lana tulafono i le ao atoa ma le po.”—Salamo 1:1, 2.

O se tasi o vala tāua lava o le tatalo. O le mafuaaga lena ua timaʻi mai ai pea lava pea le Tusi Paia ia i tatou ina ia tatalo—“i aso uma lava i talotaloga ma faatoga uma,” ‘ia faaalu le taimi e tatalo ai,’ ‘ia finafinau i le tatalo,’ ma ‘ia tatalo e lē aunoa.’ (Efeso 6:18; 1 Korinito 7:5; Roma 12:12; 1 Tesalonia 5:17) O a tatou tatalo e lē aunoa ia Ieova o le a pele ai i tatou ia te ia, ma o le faamautinoaga e faapea o loo ia faafofoga mai o le a tosina vavalalata atu ai i tatou ia te ia. Na faamautinoaina lenei mea e le faisalamo, ina ua ia taʻua e faapea: “Ou te alofa, auā ua faafofoga mai Ieova i loʻu leo ma aʻu aioi. Auā na liliu mai ona fofoga ia te au, o lea ou te valaau ai ia te ia i loʻu olaga.”—Salamo 116:1, 2.

Faataitai i le Atua o le Alofa

E agalelei mai Ieova ia i tatou. Ona o ia o Lē na Foafoaina le vateatea, e mautinoa lava le tele o mea e manatu i ai o ia ma tausia. Ae peitai, ua taʻu mai ia i tatou e le Tusi Paia e ui ina silisili ese lona mamalu, ae manatu mai pea lava o ia i ana foafoaga faaletagata. E alofa o ia ia i tatou. (1 Peteru 5:6, 7) Ua faamautinoa mai e le faisalamo lenei mea i ana upu: “Ieova e, lo matou Alii, e silisili lava lou suafa i le lalolagi uma lava; o oe lava ua e faasilisili lou viiga i le lagi. A ou vaai atu i lou lagi, o le galuega a ou tamatamai lima, o le masina atoa ma fetu na e faia; se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?”—Salamo 8:1, 3, 4.

Ua faapefea ona manatu mai Ieova i le tagata? Ua tali mai le Tusi Paia: “O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia. O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala.”—1 Ioane 4:9, 10.

Ua faapefea ona avea lenei taulaga togiola ma faamaoniga silisili o le alofa o le Atua? Seʻi o tatou iloiloina le mea na tupu i le faatoaga o Etena. Na fesagai Atamu ma Eva ma le filifiliga pe gauai atu i le tulafono a Ieova ma le faamoemoe o le ola i se olaga lelei atoatoa e faavavau po o le fouvale ia Ieova ma iu ai i le oti. Na la filifili e fouvale. (Kenese 3:1-6) I le faia faapea, na la aumaia ai le taʻusalaina i tagata uma lava i le oti. (Roma 5:12) Na la aveesea ma le faamaualuga mai ia i tatou le avanoa tatou te filifili ai mo i tatou lava. E leai ma se tasi o i tatou ua faia se manatu i le mataupu.

Ae peitai, ua manatu mai lava ma le alofa Ieova i le tagata, ma amanaia le tulaga lē lelei o loo iai le tagata. E ala i le maliu faataulagaina o Lona Alo, o Iesu Keriso, ua saunia ai e Ieova le faavae faaletulafono mo i tatou taitoatasi ina ia filifili ai e le tagata mo ia lava le ola po o le oti, le usiusitai po o le fouvale. (Ioane 3:16) E pei lava o lea ua tuu mai e Ieova se avanoa e faamasinoina ai i tatou i le filifiliga tatou te faia—o se avanoa e faapea o lea ua toe ō atu i Etena, ma faia ai la tatou lava filifiliga. O le faailoaga silisili lea o le alofa e lei faapea muamua lava ona faia.

Seʻi vaai faalemafaufau i le tiga na onosaia e Ieova a o ia silasila ifo i lona alo ulumatua o loo faalumaina, faataugāina, ma faasatauroina e pei o se tagata solitulafono. Ma na onosai le Atua i lena mea ona o i tatou. O lo tatou iloaina o le muai alofa mai o Ieova ia i tatou e tatau ai ona uunaia i tatou e alolofa atu ia te ia ma faaosofia ai i tatou e saili atu ia te ia. (Iakopo 1:17; 1 Ioane 4:19) Ua valaaulia i tatou e le Tusi Paia ina ia “sailiili ia . . . ia Ieova ma lona malosi; sailiili i ona fofoga, aua le aunoa. Ia . . . manatua ana mea mamana na ia faia, o ona vavega, atoa ma faamasinoga a lona fofoga.”—Salamo 105:4, 5.

E lē o se mea e faapea e lē mafai moni ona iai le mauaina o se fesootaiga vavalalata ma se faiā alofa māfana ma le Atua, ia avea ma ana  uo. E matuā mafai moni ona ausiaina. E moni, e lē mafai ona tatou faatutusaina lo tatou alofa mo le Atua ma a tatou faiā faaletagata. O le alofa tatou te lagonaina mo a tatou paaga, mātua, uso ma tuafāfine, fanau, po o uo, e ese mai le alofa tatou te maua mo le Atua. (Mataio 10:37; 19:29) O le alofa ia Ieova e aofia ai lo tatou tuutoina atu, la tatou tapuaiga, ma se tuuina atu e lē faatapulaaina ia te ia. (Teuteronome 4:24) E leai lava se isi faiā e mafai ona iai ia faailoaga. E ui i lea, e mafai ona tatou atiina aʻe faalogona malolosi ma loloto mo le Atua i se auala faaaloalo, ma le mataʻu.—Salamo 89:7.

E ui lava ina lē lelei atoatoa, e pei o Kaino ma Apelu, ae ua ia te oe se avanoa e te alofa ai i Lē na Foafoaina oe. Na faia e Kaino lana filifiliga, auai atu ia Satani, ma avea ai ma tagata fasioti tagata muamua. (1 Ioane 3:12) I le faaeseesega, o le a manatuaina Apelu e Ieova o se tagata o le faatuatua ma le amiotonu ma o le a tauia i le ola i le Parataiso o loo fotuai mai.—Eperu 11:4.

O loo ia te oe foi le avanoa e filifili ai. Faatasi ma le fesoasoani a le agaga o le Atua ma lana Afioga, e mafai moni ai ona e alofa i le Atua “ma lou loto atoa, ma lou agaga atoa, ma lou malosi atoa.” (Teuteronome 6:5) O le a faapena foi ona faaauau ona alofa mai Ieova ia te oe, auā o ia “na te tauia mai o e matuā saili ia te ia.”—Eperu 11:6.

[Ata i le itulau 7]

Sa talia e le Atua le taulaga a Apelu