‘Ia Paia Outou Auā e Paia Aʻu’

“Ia paia outou; auā o aʻu o Ieova lo outou Atua e paia lava aʻu.”—LEVITIKO 19:2.

1. O ai nisi o tagata ua manatu i ai le lalolagi e paia?

O LE tele o lotu autū a le lalolagi ua iai ē latou te manatu i ai e paia. O le Tinā o Teresa o lē e taʻutaʻua i Initia ua masani ona manatu i ai e paia talu ai lona tuutoina atu i le tausia o ē matitiva. Ua taʻua le pope o le “Tamā Paia.” O José María Escrivá, o lē na muai faavaeina le faalapotopotoga a fesoasoani ma patele a le Katoliko, e taʻua o le Opus Dei, ua manatu i ai nisi tagata Katoliko o se “faataitaiga o le paia.” Ua iai i le faatuatuaga faa-Hinitū o latou tagata paia po o swamis. O Gandhi sa faamamalu i ai o se tagata paia. I le faatuatuaga Puta ua iai ona monike paia, ma le faa-Isalama ua iai ana perofeta paia. Ae o le ā moni lava le uiga o le faapaia?

2, 3. (a) O le ā le uiga o le upu “paia” ma le “faapaiaina”? (e) O ā nisi o fesili e manaomia ona taliina?

² O le upu “paia” ua faamatalaina faapea “1. . . . ua fesootai ma se malosi e tauatua; e tapu. 2. E fesootai, pe ua tatau i ai le tapuaiga po o le faaaloalogia . . . 3. O loo ola e tusa ai ma se faatulagaga faaleagaga e maumauai pe matuā maualuluga  ona aiaiga . . . 4. Ua faapitoa pe faataatia ese mo se fuafuaga faalelotu.” I le auala o loo faaaogā ai i le Tusi Paia, o le faapaiaina e uiga i le “tulaga faalelotu e mamā pe lē ponā; e tapu.” E tusa ai o le tusi mo faamatalaga faaopoopo o le Tusi Paia, le Insight on the Scriptures, ua taʻua ai o “le uluai [upu] faa-Eperu o le qoʹdhesh ua faaoo mai ai le manatu o le vavae ese mai, le matuā tuutoina atu, po o le faapaiaina i le Atua, . . . o se tulaga o le matuā tuutoina atu i le auaunaga i le Atua.” *

³ Sa poloaiina le nuu o Isaraelu ina ia paia. Na faapea atu le Tulafono a le Atua: “O aʻu o Ieova lo outou Atua; ia faapaiaina outou e outou, ma ia paia outou; auā e paia lava aʻu.” O ai le Puna o le paia? Sa mafai faapefea ona paia tagata Isaraelu lē lelei atoatoa? Ma o ā ni lesona e mafai ona tatou faaaogā mo i tatou i aso nei i le poloaiga a Ieova ia paia?—Levitiko 11:44.

Le Auala e Fesootai Atu ai Isaraelu i le Puna o le Paia

4. Na faapefea ona faataitaia mai le paia o Ieova e Isaraelu?

⁴ O mea uma e fesootai atu i le tapuaiga a Isaraelu ia Ieova le Atua, sa tatau ona tausia ia paia ma ia faapea lava ona faia. Aisea na faia ai faapea? Ona o Ieova lava ia o le amataga ma le puna o le paia. O le tala a Mose i le sauniunia o le fale fetafai paia ma ofu ma teuga na taaofai i upu nei: “E te faia foi le mea pupula i le auro lelei, ma e togitogi ai, pei o le togitogi i le faamaufaailoga, o lenei upu, E paia ia Ieova.” O le mea pupula i le auro lelei na faamau i le pulou o le ositaulaga sili, ma faailoa mai ai e lenei tulaga pupula le vavaeesea o le ositaulaga mo se auaunaga e faapitoa le paia. A o latou vaavaai atu i lenei faailoga ua tusia o feilafi mai i ave o le la, na faamanatu ai e lē aunoa ia Isaraelu le paia o Ieova.—Esoto 28:36; 29:6; 39:30.

5. E mafai faapefea ona manatu faapea sa paia tagata lē lelei atoatoa o Isaraelu?

⁵ Ae e faapefea ona avea tagata Isaraelu ma tagata e paia? E pau le auala e ala lea i la latou faiā vavalalata ma Ieova ma la latou tapuaiga mamā ia te ia. Na latou manaomia le poto saʻo o ‘Le Silisili Ona Paia’ ina ia tapuai atu ai ma le paia ia te ia, e lē gata i le mamā faaletino ae faapena foi ma le mamā faaleagaga. (Faataoto 2:1-6; 9:10) O lea sa tatau i tagata Isaraelu ona tapuai i le Atua ma le agaga mamā ma le loto e sao ona lelei. So o se tapuaiga lava e faatagafai o le a avea o se mea e matuā inosia ia Ieova.—Faataoto 21:27.

Le Mafuaaga na Teena ai e Ieova Isaraelu

6. Na faapefea ona feagai ia tagata Iutaia i le vaitaimi o Malaki ma le laoai a Ieova?

⁶ Na faailoa mai ma le manino lenei ʻinoʻino ina ua avatu e aunoa ma le loto atoa e tagata Isaraelu taulaga faatauvaa ma leaga i le malumalu. Na folafola mai e Ieova lona teena o a latou taulaga faatauvaa e ala mai i lana perofeta o Malaki i le faapea atu: “E leai lava soʻu fiafia ia te outou, Ua fetalai mai ai Ieova o ʻau; ou te le talia foi se taulaga ai o outou lima. A o outou, ua outou faaleagaina ai, ina ua outou fai ane, Ua leaga le laoai a Ieova; mōna fua, o ana mea e ʻai lea, o le mea faatauvaa lava. Ua outou fai ane foi, Aue, o le mea tiga naua! ma outou ʻinoʻino i ai ua fetalai mai ai Ieova o ʻau; ua outou aumaia foi le mea ua faoa, ma le mea pipili, ma le mea e maʻi; ua outou au mai ai ma taulaga? Ou te talia ea lea mea ai o outou lima? ua fetalai mai ai Ieova.”—Malaki 1:10, 12, 13.

7. O ā amioga lē paia na faia e tagata Iutaia i le senituri lona lima T.L.M.?

⁷ Na faaaogā e Ieova ia Malaki na te folafolaina atu faiga sese a tagata Iutaia atonu i le vaitaimi o le senituri lona lima T.L.M. Na  faia e ositaulaga se faaaoaoga leaga, ma na lē paia a latou amio. O tagata na mulimuli atu i lena taitaiga na lē usiusitai atu i mataupu silisili mai le Atua, na oo atu lava i le tatalaina o faaipoipoga ma a latou avā, atonu ina ia toe faia ai nisi avā talavou faapaupau. Na tusi atu faapea Malaki: “Auā o Ieova, o ia ua fai ma molimau ia te oe ma lau avā sa e fai a o ē taulealea, o le ua e faaʻoleʻole i ai; * a o ia sa lua mafuta, o le avā foi o ia o lau feagaiga. . . . O lenei, ia faaeteete outou i o outou loto, ina neʻi faaʻoleʻole se tasi i lana avā na fai a o taulealea. Auā ou te ʻinoʻino i le alei, ua fetalai mai ai Ieova le Atua o Isaraelu.”—Malaki 2:14-16.

8. Ua faapefea ona aafia nisi o le faapotopotoga Kerisiano i le manatu faaonaponei i le tatalaina o faaipoipoga?

⁸ I le tele o atunuu i ona po nei, ua faigofie tele ona tatala faaipoipoga, o le fua faatatau o faaipoipoga talai ua matuā alualu i luma lona faateleina. E oo lava foi i le faapotopotoga Kerisiano ua aafia ai. Nai lo le saili atu i le fesoasoani a toeaina ina ia foia ai ni toatuga ma taumafai ina ia galueaina le faaipoipoga ina ia taulau manuia, o nisi ua faanatinati ona faateʻaina a latou paaga. Ua masani ona tauaveina ai e fanau ni faalogona ua matuā mafatia.—Mataio 19:8, 9.

9, 10. E ao faapefea ona tatou manatu atu i la tatou tapuaiga ia Ieova?

⁹ E pei ona taʻua i luga, i le vaai atu i le matautia o le faaleagaina o le tulaga faaleagaga i le vaitaimi o Malaki, na matuā faaalialia atu ai e Ieova lona tausalaina o le tapuaiga na ona faafoliga a Iuta, ae faaalia lona talia na o le tapuaiga moni. Pe ua lē tatau ai ea la ona tatou toe manatunatu i le tāua o la tatou tapuaiga ia Ieova le Atua, le Alii Silisili Ese o le lagi ma le lalolagi, o le Puna o le paia moni? Pe o tatou ofoina moni atu lava i le Atua le auaunaga paia? Po o tatou faatumauina ea lo tatou tulaga mamā faaleagaga?

¹⁰ E lē o le uiga o lenei mea e faapea e manaomia ona tatou lelei atoatoa, auā e lē mafai, po o le faatusatusa atu foi o i tatou i isi. Ae o lona uiga e tatau i Kerisiano taitoatasi ona tuuina atu i le Atua le tapuaiga i le mea silisili e mafai ona ia faia e tusa ai ma le tulaga o le tagata lava ia. O loo faasino lenei mea i le lelei o la tatou tapuaiga. O la tatou auaunaga sa e tatau ona faia i le auala aupito silisili ona lelei—le auaunaga paia. E mafai faapefea ona faataulauina lenei mea?—Luka 16:10; Kalatia 6:3, 4.

O Loto Mamā e Taitaiina Atu ai i le Tapuaiga Mamā

11, 12. O fea e puna mai ai amioga e lē paia?

¹¹ Na manino ona aʻoaʻo mai e Iesu e faapea o mea o i le loto o le a faaalia mai i mea e tautala ai se tagata ma ia faia. Na fetalai atu Iesu i Faresaio faafiaamiotonu, peitai e lē paia e faapea: “Fanau a gata feai e, outou o loo leaga, e mafaia faapefea ona outou upu lelei? Auā o le tele o mea i le loto e tautala mai ai le gutu.” Mulimuli ane na ia faaalia ai o amio leaga e puna mai i manatu leaga o i totonu o le loto, po o le tagata lilo o i totonu. Na ia fetalai: “A o mea e sau mai le gutu, ua alu ae ia mai le loto, o mea ia e leaga ai le tagata. Auā e alu ae mai le loto o le manatu leaga, o le fasioti tagata, o le mulilua, o le faitaaga, o le gaoi, o le molimau pepelo, ma le upu faaleaga. O mea ia e leaga ai le tagata.”—Mataio 12:34; 15:18-20.

¹² Ua fesoasoani lenei ia i tatou ina ia malamalama ai o amioga e lē paia e lē faapea e teʻi lava ua tupu pe e aunoa ma se uluai mafuaaga. O āuga o manatu leaga ua natia i le loto—o tuinanauga lilo ma atonu foi o ni moomooga faavalea ua teu i le mafaufau. O le mafuaaga lena sa mafai ai ona fetalai mai Iesu e faapea: “Ua outou faalogo, na fai mai i e anamua, Aua e te mulilua. A ou te fai atu  aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.” O se isi faaupuga, o le faitaaga ma le mulilua ua leva ona totō i le loto a o lei faatinoina. Ma pe a tulai mai tulaga e faatino ai, o manatu e lē paia ua avea loa ma amioga e lē paia. O le faitaaga, mulilua, faasotoma, gaoi, upuleaga, ma le faaaposetasi ua avea ma nisi iuga faaalia o manatu e lē paia.—Mataio 5:27, 28; Kalatia 5:19-21.

13. O ā nisi o faataitaiga i le faapefea e ni mafaufauga lē paia ona taitaiina atu ai i amioga e lē paia?

¹³ O le tulaga ua taʻua i luga e mafai ona faataitai i ni auala eseese. I nisi atunuu, ua matuā faatuputupulaia ai le iai o fale mo taaloga pelē tupe, ua faapea ona faateleina ai avanoa e pelē tupe ai. O nisi atonu ua manatu e foliga mai e lelei e foia ai lona faafitauli tau tupe o iai. O mafaufauga faaʻoleʻole atonu e tosina ai se uso e teena pe fetuutuunai ai ona taiala faale-Tusi Paia. * I se isi itu, o le mauagofie o faasalalauga o amioga matagā, pe ala mai i televise, vitiō, komepiuta, po o tusi, e mafai ona taitaiina atu ai se Kerisiano i ni amioga e lē paia. Pe afai e faatamala i lona ofutau faaleagaga, e toe maumanatu ane, ua paʻū atu i le faia o le amioleaga. Ae i le tele o mea e tutupu, o le paʻū atu i le agasala e amata mai i le mafaufau. Ioe, i tulaga faapenei, ua taunuu ai upu nei a Iakopo: “A ua taitasi ma faaosoosoina, pe a tosina ma maileia i lona lava tuʻinanau. Pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.”—Iakopo 1:14, 15; Efeso 6:11-18.

14. Ua mafai faapefea e le toatele ona toe faaleleia mai i a latou amioga sa lē paia?

¹⁴ O le mea e lelei ai, o le toatele o Kerisiano o ē agasala ona o vaivaiga, ua faaalia le salamō moni ma ua mafai e toeaina ona toe faaleleia le tulaga faaleagaga o i latou na. E oo foi i le toatele ua faateʻaina ona o le leai o se salamō, ua oo ina toe atamamai i latou, ma ua toe talia i le faapotopotoga. Ua iu ina latou iloa le faigofie ona mālō Satani ia i latou ina ua latou faataga manatu e lē paia e mauaa i le loto.—Kalatia 6:1; 2 Timoteo 2:24-26; 1 Peteru 5:8, 9.

Le Luʻi—Ia Faafetaiaia o Tatou Vaivaiga

15. (a) Aisea e ao ai ona tatou faafetaiaia o tatou vaivaiga? (e) O le ā e mafai ona fesoasoani ia i tatou ina ia iloatino o tatou vaivaiga?

¹⁵ E tatau ona faia sa tatou taumafaiga ina ia iloa ai faanaunauga o o tatou loto. Po o tatou naunau ea e faafetaiaia ma iloatino o tatou vaivaiga, ma galulue ina ia manumalo mai ai? Po o tatou naunau e fesili atu i se uo faamaoni i auala e faaleleia ai i tatou, ma faalogo atu i le fautuaga? Ina ia tumau i le paia, e ao ona tatou manumalo mai i o tatou vaivaiga. Aisea? Talu ai e iloa e Satani o tatou vaivaiga. O le a ia faaaogaina ana togafiti faaʻoleʻole ina ia uunaia ai i tatou e fai le agasala ma amioga e lē paia. E ala i ana togafiti, e taumafai o ia e faateʻa ese i tatou mai i le alofa o le Atua ina ia faapea ai ona lē toe faapaiaina i tatou ma aogā mo le tapuaiga ia Ieova.—Ieremia 17:9; Efeso 6:11; Iakopo 1:19.

16. O le ā le feteenaiga sa iai ia Paulo?

¹⁶ Sa iai foi tofotofoga ma faaosoosoga a le aposetolo o Paulo, e pei ona ia taʻutino mai i lana tusi i tagata Roma e faapea: “Auā ua ou iloa e leai se mea lelei ua nofo i totonu ia te au, o loʻu tino lea; auā ua ia te au le loto atu, a ou te lei iloa ona fai o le mea lelei; auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. . . . Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino.”—Roma 7:18-23.

17. Na faapefea ona manumalo Paulo i lana tauiviga i ona vaivaiga?

 ¹⁷ O le manatu tāua i le tulaga o Paulo o lona taʻutino mai lea o ona vaivaiga. E ui i na vaivaiga, ae na mafai ona faapea mai o ia: “Auā ou te fiafia i le tulafono a le Atua i le tagata [faaleagaga] i totonu.” Na naunau Paulo i le mea lelei ae ʻinoʻino i le mea leaga. Ae na tauivi o ia, o le tauiviga foi lea o loo faia e i tatou uma lava—faasaga ia Satani, le lalolagi, ma le tino agasala. E faapefea la ona tatou mālō i le taua ina ia tumau i le paia, vavae ese mai lenei lalolagi ma ona manatu?—2 Korinito 4:4; Efeso 6:12.

E Mafai Faapefea Ona Faatumauina lo Tatou Paia?

18. E mafai faapefea ona faatumauina lo tatou paia?

¹⁸ E lē mafai ona mauaina le tulaga paia i le uia o se ala faigofie po o le faamalieina muamua o oe lava. O na ituaiga o tagata e masani i le fai faamolemolega i ana mea e fai ma taumafai e eu atu le leaga i se isi mea. Atonu e manaomia ona aʻoaʻoina i tatou e taulimaina iuga e tulai mai ona o a tatou amio ae aua le pei o isi e tautuuai atu le anoano o mala ua oo ia i latou ona o le talaaga o le aiga na ola aʻe ai pe faapea ua faasolo mai i le toto. O le aa o le mataupu e faalagolago i le loto o le tagata lava ia. Pe e naunau o ia i le amiotonu? faanaunau i le paia? po o manao i le faamanuiaga a le Atua? Na faamanino mai e le faisalamo le manaomia o le paia ina ua ia faapea mai: “Ina ʻalo ese ia i mea leaga, a ia fai mea lelei; ina sailiili atu ia i le filemu, ma tausisi i ai.” Na tusi mai le aposetolo o Paulo e faapea: “Aua neʻi faatagā alofa; ia ʻinoʻino i le leaga, ia pipii i le lelei.”—Salamo 34:14; 97:10; Roma 12:9.

19, 20. (a) E mafai faapefea ona fafagaina o tatou mafaufau? (e) O le ā e mafai ona aofia ai i le suesue lelei totino?

¹⁹ E mafai ona tatou “pipii i le lelei” pe afai tatou te tagai i mataupu e pei ona silasila i ai Ieova ma pe afai foi o ia i tatou le finagalo o Keriso. (1 Korinito 2:16) E faapefea ona faataulauina lenei mea? E ala i le suesue ma mafaufau loloto i le Afioga a le Atua. Maeu le aumaia soo o lenei fautuaga! Ae pe o tatou manatu mamafa ea i ai? Mo se faataitaiga, pe e te matuā suesueina moni ea lenei mekasini, suʻe mau o le Tusi Paia o iai, a o lei sau i le sauniga? O le uiga o le suesue, e lē faapea e na ona vasevase o ni nai fuaiupu i palakalafa taitasi. E mafai ona tilofaia ma le faanatinati le mataupu mo le suesuega ma vasevase pe ā ma le 15 minute. Pe o le uiga ea la ua tatou suesueina le mataupu? O le mea moni, atonu e faaaluina ai se tasi po o le lua itula e suesue ai ma faagoto ifo i le loto aogā faaleagaga o loo iai i mataupu taitasi.

²⁰ Atonu e manaomia ona pulea i tatou lava ma alu ese mai ma le televise mo na o ni nai itula i vaiaso taitasi ma matuā uaʻi atu i lo tatou faapaiaina totino. O a tatou suesuega faifai pea e atiina aʻe ai i tatou faaleagaga, e toe fuataiina ai le mafaufau ina ia faia faaiuga saʻo—faaiuga e faapea ona oo atu ai “i le amio lelei ma le amio Atua.”—2 Peteru 3:11; Efeso 4:23; 5:15, 16.

21. O le ā le fesili o loo totoe pea e lei taliina?

²¹ O le fesili ua tulai mai nei, O ā nisi vala atili o le galuega ma amio e mafai ai e i tatou o ni Kerisiano ona paia, e pei ona paia Ieova? O le mataupu o loo sosoo mai o loo aumaia ai ni meaʻai e aogā ona manatunatu i ai.

[Faaopoopoga i lalo]

Pe E te Manatua?

□ Na faapefea ona faailoaina mai le Puna o le paia i Isaraelu?

□ O ā auala na lē paia ai le tapuaiga a tagata Isaraelu i le vaitaimi o Malaki?

□ O fea e amata mai ai amioga e lē paia?

□ Ina ia paia, o le ā e ao ona tatou iloaina?

□ E mafai faapefea ona faatumauina lo tatou paia?

[Fesili mo le Suʻesuʻega]