Se Faamoemoe e Sili Atu Ona Lelei mo le Solu

E LEI faatalitalia e fitafita Roma lenei mea na tupu. A o latou osofaia le ʻolo i le mauga o Masada, o le ʻolo mulimuli lea o tagata Iutaia fouvale, na latou sauniuni ai mo fetauaiga ma o latou fili, mo le alaga a autau, mo le feei mai o fafine ma tamaiti. Peitai ua na o lo latou faalogo atu i le gapāpā mai o le afi. A o latou sueina le aai o loo sasao ai le afi, na iloa ai e tagata Roma le mea moni e faapea: o o latou fili—ua tusa ma le 960 tagata—ua maliliu! I se faasologa maeʻaeʻa, na fasiotia ai e le autau a Iutaia o latou lava aiga, ona fasioti ai lea e le tasi o le isi. O le tagata mulimuli na pule lava ia i lona ola. * O le ā na taitaia ai i latou i lenei fasiotiga faamoamoa matautia ma pule ai i o latou ola?

E tusa ai ma le tusitala o talafaasolopito o Josephus, o lē na soifua i lena taimi, o se tasi o mafuaaga tāua o le talitonuga lea e uiga i le solu e lē mafai ona oti. O Eleazar Ben Jair, o le taʻitaʻi o le ʻau Selote i Masada, sa muai taumafai e tauanau ona tagata tau i le faapea atu o le pule i o latou ola e sili atu ona lelei lea nai lo le fasiotia po o le ave faapagotaina e tagata Roma. I le vaai atu i lo latou faatalatu, na ia tautala atu ai ma le faamalosi e uiga i le solu. Na ia taʻu atu ia i latou e faapea o le tino ua na o se pa pupuni, o se falepuipui mo le solu. “Ae afai, e tuufaasaʻoloto le solu mai le mamafa o le tino o loo tataoina i le eleele ma afifi ai,” na ia faaauau mai e faapea, “ona toe foi atu lea o le solu i lona lava nofoaga, o le mea moni e na te mauaina se malosi ua faamanuiaina ma e lē tapulaa, ma e ola pea e aunoa ma le iloa atu e mata o tagata e pei o le Atua lava Ia.”

O le ā le tali atu i lenei tautalaga? Na lipotia mai e Josephus e faapea ina ua fai sina umi o le tautalaga a Eleazar i lenei manatu, “ona faamuta ai lea e lana ʻau faalogologo uma o lana lauga auā ua tutumu i faalogona aasa, ua latou nanati atu loa e fasiotia o latou aiga ma i latou foi.” Ua faaopoopo mai Josephus e faapea: “I le pei lava ua pulea i latou e se malosi sili, ua latou faanatinati ai ona gaoioi, na mananao tagata uma ia vave atu lo latou faataunuuina o lenei gaoioiga nai lo se isi tagata,  . . . talu ai sa lofia i latou e se faanaunauga lē pulea ia fasiotia a latou avā, a latou fanau, ma i latou lava.”

O lenei faaaoaoga matautia ua faataitaia mai ai le auala e mafai ai ona suia e le aʻoaʻoga o le solu e lē mafai ona oti ia mafaufauga saʻo o tagata soifua e uiga i le oti. Ua aʻoaʻoina ē e talitonu i ai, ina ia lē manatu faapea o le oti o se fili e sili ona leaga i le tagata, ae ia vaai i ai ua na o lea se auala e faasaʻoloto mai ai le solu ina ia olioli i se isi olaga e sili atu. Ae aisea na talitonu ai faapea le ʻau Selote Iutaia? O le toatele ua manatu i a latou tusitusiga paia, le Tusitusiga Eperu, e faapea ua aʻoaʻoina le tagata i le iai o se agaga ola ia te ia, o se solu ua sola ese mai e ola pea pe a mavae le oti. Pe o se manatu moni ea lea?

Le Solu i Tusitusiga Eperu

O le tali puupuu lava, o le leai. E amata mai lava i le uluai tusi o le Tusi Paia, o le Kenese, ua taʻu mai ai ia i tatou e faapea o le solu, e lē o se mea o ia te oe, ae o oe. Ua tatou faitau i le foafoaga o Atamu, le uluai tagata ola: “Ona avea ai lea o le tagata ma [“solu,” NW] ola.” (Kenese 2:7) O le upu Eperu o loo faaaogaina iinei mo le solu, o le neʹphesh, ua silia ma le 700 taimi o aliali mai i Tusitusiga Eperu, e leai lava se taimi o aumaia ai se manatu faapea e ese mai, e lē faitino, o se vaega faaleagaga o le tagata. I le tuufaafeagai, o le solu e faitino, o se mea moni lava, e faaletino.

Tagai i mau o loo mulimuli mai i lau lava Tusi Paia, auā o le upu Eperu o le neʹphesh o loo maua i mau taitasi. Ua faaalia manino i na mau e faapea o le solu e mafai ona fesagai ma lamatiaga, tulaga matautia, e oo lava ina ave faamalosia. (Teuteronome 24:7; Faamasino 9:17; 1 Samuelu 19:11); e mafai ona paʻi atu i mea (Iopu 6:7); e mafai ona lokaina i uamea (Salamo 105:18); e fiaai, e faatigaina e ala i le anapogi, ma le matapogia ona o le fiaai ma le fiainu; ma e mafatia i se faamaʻi e oti ai po o le oo lava ina leai se malosi ona o le iuga o se faavauvau. (Teuteronome 12:20; Salamo 35:13; 69:10; 106:15; 107:9; 119:28) I se isi faaupuga, ona o lou solu o oe, o oe lava lea, e so o se mea lava la e oo ia te oe e oo foi lea i le solu. *

Pe o lona uiga ea la, e mafai moni lava ona oti le solu? Ioe. I le tuufaafeagai ai ma le lē mafai ona oti, ua taʻua e Tusitusiga Eperu e faapea o le solu faaletagata e mafai ona “vavaeeseina,” pe faasalaina mo le faia o mea sese, e lavea ma oti ai, e fasiotia, faaumatia, ma saeia. (Esoto 31:14; Teuteronome 19:6; 22:26; Salamo 7:2) “O le [“solu,” NW] e agasala e oti ia,” o le tala lea a le Esekielu 18:4. E manino lava la, o le oti o le iuga masani lea o solu faaletagata, talu ai o tatou uma lava e agasala. (Salamo 51:5) Na taʻu atu i le uluai tagata o Atamu e faapea, o le faasalaga mo le agasala o le oti—ae lē o le liliuina i le nofoaga o agaga ma ola ai pea. (Kenese 2:17) Ma ina ua agasala o ia, na faailoaina atu loa le faasalaga e faapea: “Auā o le efuefu oe, e te toe foi atu lava i le efuefu.” (Kenese 3:19) Ina ua maliliu Atamu ma Eva, na avea ai loa i laʻua e pei ona taʻua soo i le Tusi Paia e faapea ‘o solu ua oti’ po o ‘solu oti.’—Numera 5:2; 6:6, NW.

E lē o se mea e faateʻia ai i le Encyclopedia Americana lea ua taʻua ai e uiga i le solu i Tusitusiga Eperu: “O le manatu o le Feagaiga Tuai i le tagata o se peresona atoa, ae lē o le tuufaatasia o le solu ma le tino.” Ua faaopoopo mai e faapea: “O le nefesh . . . e lei manatu i ai e ese mai le tino.”

O lea la, o le ā na talitonu i ai tagata Iutaia faatuatua e uiga i le oti? I se gagana faigofie, na latou talitonu e faapea o le oti o le tuufaafeagai lea o le ola. Ua taʻu mai e le Salamo 146:4 le mea e tupu pe a tuua e le agaga, po o le malosi ola, le tagata soifua: “E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.” * Ua tutusa ma upu  na tusia e le tupu o Solomona e faapea o ē ua oti “latou te le iloa se mea.”—Failauga 9:5.

Aisea la, ua toatele ai tagata Iutaia o le uluai senituri, e pei o tagata Selote i Masada, sa matuā talitonu faapea e lē mafai ona oti le solu?

Le Taaʻiga Faa-Eleni

Na maua e tagata Iutaia lenei manatu e lē mai le Tusi Paia, ae e mai tagata Eleni. I le va o le senituri lona fitu ma le senituri lona lima T.L.M., e aliali mai na sosolo mai ai lea manatu mai lotu taufaasese uigaese a Eleni ma oo ai ina avea ma filosofia faa-Eleni. O le manatu faapea a mavae le oti ona mauaina ai lea e solu leaga se taui leaga, ua loa ona fiafia i ai, ma sa avea ma talitonuga faavae ma faapea ai ona salalau atu. Na faaauau pea ona fefinauai le ʻau fai filosofia e uiga i le tulaga saʻo o le solu. Na taʻua e Homer e faapea o le solu e vave lava ona lele ese mai i le taimi e oti ai, ma e faalogoina ai sina leo ‘ūʻū po o sina tagitagi pe gasēsē foi. Na faapea mai Epicurus o le solu e fai lona tino ma o se tino e matuā laitiiti lava. *

Ae atonu o le tagata na sili ona finau e uiga i le solu e lē mafai ona oti, na soifua i le senituri lona fa T.L.M., o le fai filosofia Eleni lea o Plato. O lona faamatalaina o le maliu o lona faiaʻoga, o Socrates, na faaalia ai se talitonuga e talitutusa ma tagata Selote i Masada i senituri mulimuli ane. E pei ona taʻua e se tagata poto o Oscar Cullmann e faapea, “Ua faaalia e Plato ia i tatou le auala na maliu ai Socrates i le filemu ma le toʻa atoatoa. E ese le manaia o le maliu o Socrates. E lē o vaaia ai se mea e mataʻu pe fefe ai. E lē mafai ona mataʻu Socrates i le oti, auā o le mea moni ua tuusaʻoloto mai ai i tatou mai le tino. . . . O le oti, o se uo sili lea a le solu. O lana aʻoaʻoga lea; ma maliu ai i se tulaga ofoofogia e ogatasi ma lana aʻoaʻoga.”

Ua manino i le gasologa o le vaitaimi o Makapi e faapea, i le senituri lona lua a o lumanai Keriso, na amata ai ona taliaina e tagata Iutaia lenei aʻoaʻoga mai tagata Eleni. I le uluai senituri T.A., ua taʻu mai ai e Josephus ia i tatou e faapea o le ʻau Faresaio ma Essenes—o vaega faalotu Iutaia malolosi ia—na lagolagoina lenei aʻoaʻoga. O nisi sololagi atonu na tuufaatasia i lena vaitaimi e faaatagia mai ai lea lava talitonuga e tasi.

Ae ā Iesu Keriso? Pe na aʻoaʻoina ea e ia ma ona soo lenei manatu mai le lotu Eleni?

Le Vaaiga a Uluai Kerisiano i le Solu

E lei manatu Kerisiano i le uluai senituri i le solu e pei ona manatu i ai tagata Eleni. Manatunatu mo se faataitaiga, i le maliu o le uo a Iesu o Lasalo. Afai na lele ese le solu e lē mafai ona oti o Lasalo, ua saʻoloto ma fiafia i le taimi na maliu ai, pe sa lē onomea ea la ona suia le faitauina o le Ioane mataupu e 11? Sa tatau lava ona taʻu atu e Iesu i ona soo pe ana fai sa ola ma malosi Lasalo i le lagi; ae i le tuufaafeagai ai, na ia ioe i le faamatalaga i Tusitusiga Eperu ma na ia taʻu atu ia i latou o Lasalo, sa moe ua na lē iloa se mea. (Fuaiupu e 11) E mautinoa sa ono olioli Iesu pe ana fai na olioli lana uo i se olaga fou matagofie; nai lo lena, ua tatou iloa na tagi o ia i luma o tagata ona o lea oti. (Fuaiupu 35) E mautinoa, ana fai na iai le solu o Lasalo i le lagi, e faamalieina ai ma olioli ai pea, semanū e lē tāitai ona faia e Iesu se gaoioiga lē alofa faapea e toe faaola mai o ia mo ni nai tausaga e “falepuipuiina” i se tino tagata lē lelei atoatoa faatasi ma tagata ua aafia i maʻi ma le oti.

Pe na toe foi mai ea Lasalo mai le oti ma se tala fiafia i le ofoofogia o lona saʻolotoga na iai i aso e fa, i le faaliliuina i se foafoaga agaga? E leai, na te lei faia faapena. O ē talitonu i le solu e lē mafai ona oti o le a tali mai e faapea e lē mafai e upu ona faamatalaina le ofoofogia o lenei tulaga. Ae o lena finauga ua lē taulau ona talitonu i ai; pe lē mafai ea ona taʻu atu e Lasalo i ē pele ia te ia lena faamatalaga—e faapea na oo ia te ia ni tulaga e ofoofogia lona faamatalaina? Nai lo lea, na gūgū Lasalo e uiga i ni mea na tutupu ia te ia a o maliu. Seʻi  mafaufau i ai—o le gūgū e uiga i le mataupu o loo naunau i ai le toetoe lava o tagata uma nai lo so o se isi lava mataupu: e faapeī le oti! E tasi lava le auala e mafai ona faamatalaina ai lena tulaga. O le leai lea o se mea e taʻuina atu. O ē ua maliliu o loo momoe, ua lē iloa se mea.

O lea la, pe o taʻua ea e le Tusi Paia le oti o se uo a le solu, ua na o se malaga mai le tasi ituaiga o olaga i le isi? E leai! I Kerisiano moni e pei o le aposetolo o Paulo, o le oti e lē o se uo; o le “toe fili.” (1 Korinito 15:26) E manatu Kerisiano i le oti, e lē faalenatura, ae o se tulaga e faigata ona taliaina, e lē o se mea e tatau ona tupu, ona o se iuga tuusaʻo lea o le agasala ma le tetee i le Atua. (Roma 5:12; 6:23) E lē o se vaega o le uluai fuafuaga a le Atua mo tagata.

Ae ui i lea, o Kerisiano moni ua iai lo latou faamoemoe pe a oti le solu. O le toe faatūina aʻe o Lasalo, o se tasi lea o tala mai le tele o tala faale-Tusi Paia ua faaalia manino mai ai ia i tatou le mea moni, o le faamoemoe faale-Tusi Paia mo solu ua maliliu—o le toetu. E lua ituaiga o toetu ua aʻoaʻoina e le Tusi Paia. Mo le toatele o tagata o ē o loo momoe i tuugamau, pe amiotonu pe amioletonu, ua iai le faamoemoe o le toetu i le ola e faavavau i le Parataiso i luga o le lalolagi. (Luka 23:43; Ioane 5:28, 29; Galuega 24:15) O se vaega toaitiiti na fetalai i ai Iesu o se “lafu mamoe itiiti,” ua iai se toetu e ola pea o ni peresona agaga i le lagi. O i latou ia, o ē e aofia ai aposetolo o Keriso, o le a pule faatasi ma Keriso Iesu i luga o tagata ma toe faafoisia i latou i le lelei atoatoa.—Luka 12:32; 1 Korinito 15:53, 54; Faaaliga 20:6.

Aisea la, ua tatou vaaia ai ekalesia a Kerisinetoma o aʻoaʻo, e lē o le toetu, ae o le solu o le tagata e lē mafai ona oti? Manatunatu i le tali sa aumaia e le faifeau o Werner Jaeger i le Harvard Theological Review i tuā i le 1959: “O le mea e sili ona tāua i talafaasolopito o le aʻoaʻoga faa-Kerisiano e faapea o le tamā o aʻoaʻoga faafaifeau faa-Kerisiano o Origen, o se fai filosofia foi e talitonu i aʻoaʻoga a Plato sa i le aʻoga o Alexandria. Sa ia faaopoopo atu i le aʻoaʻoga faa-Kerisiano ia aʻoaʻoga ua  faatulagaina e faatatau i le solu, ia na ia maua mai ia Plato.” O lea la, ua faia e lotu le mea tonu lava lea sa faia e Iutaia i senituri ua mavae! Na latou fulitua i aʻoaʻoga a le Tusi Paia ona o le fiafia i filosofia faa-Eleni.

Le Mafuaaga Moni o le Aʻoaʻoga

Atonu e fesili nisi, ina ia sapasapaia le aʻoaʻoga o le solu e lē mafai ona oti, Aisea la ua aʻoaʻoina ai le aʻoaʻoga lava lea i auala eseese, e le tele o lotu a le lalolagi? Ua ofoina mai e le Tusi Paia se tali talafeagai i le pogai ua matuā malosi ai lea aʻoaʻoga i nuu mapolotu o lenei lalolagi.

Ua taʻu mai e le Tusi Paia ia i tatou e faapea, “o le lalolagi uma o loo nofo toilalo i loo leaga” ma ua taʻu patino mai o Satani o “le alii o lenei lalolagi.” (1 Ioane 5:19; Ioane 12:31) O le mea moni, e lē o mamā mai lotu o le lalolagi mai taaʻiga a Satani. I le tuufaafeagai ai, ua latou saosaolaumea i le tele o faafitauli ma feteenaiga o le lalolagi i aso nei. Ma i le mataupu e uiga i le solu, ua latou faaatagia mai ai ma le manino le manatu o Satani. E faapefea?

Manatua le uluai pepelo na taʻuina atu. Na taʻu atu e le Atua ia Atamu ma Eva e faapea o le a oti pe afai e agasala ia te ia. Ae na faamautinoa atu e Satani ia Eva e faapea: “Lua te le oti lava.” (Kenese 3:4) O le mea moni, na oti lava Atamu ma Eva; na la toe foi atu i le efuefu e pei ona fetalai ai le Atua. O Satani, “le tamā o le pepelo,” e lē tāitai ona fulitua i lana pepelo. (Ioane 8:44) I le lē mafaitaulia o lotu ua faapea ona ō ese mai aʻoaʻoga a le Tusi Paia po o le matuā lē amanaia foi, o le manatu lava lea e tasi o loo faalauaiteleina pea: ‘Lua te lē oti lava. Atonu e oti lua tino, ae o lua solu o le a ola pea, e faavavau—e pei o le Atua!’ O le mea ia mātauina, na taʻu atu foi e Satani ia Eva e faapea o le a faapei o ia o “le Atua”!—Kenese 3:5.

Maeu la le sili atu ona lelei o le mauaina o se faamoemoe e faavae i le upu moni, ae lē o pepelo po o filosofia a tagata. Maeu le sili atu ona lelei o le mautinoa e faapea o ē pele ia i tatou ua maliliu o loo i le tuugamau ma ua lē o iloa ni mea nai lo le popole po o gafea o iai se solu e lē o mafai ona oti! O lea moe i le oti e lē tatau ona faafefeina ai pe faalotovaivaiina ai i tatou. I se isi itu, e mafai ona tatou manatu i le oti o loo iai i se nofoaga malu e mālōlō ai. Aisea e malu ai? Talu ai ua faamautinoa mai e le Tusi Paia ia i tatou e faapea o ē oti ua alofagia e Ieova, o loo ola i latou i se uiga faapitoa. (Luka 20:38) I lona finagalo o loo ola i latou. O se manatu e matuā faamafanafanaina ai auā o lona finagalo e lē gata mai. E naunau o ia ina ia toe aumaia le faitau miliona o ē pele ua maliliu ma tuuina atu ia i latou le avanoa e ola ai e faavavau i se lalolagi parataiso.—Faatusatusa i le Iopu 14:14, 15.

O le aso matagofie o le toetu o le a oo mai, auā e tatau ona faataunuuina folafolaga uma a Ieova. (Isaia 55:10, 11) Seʻi tau lava ina mafaufau i lenei valoaga pe a faataunuuina: “Ae toe ola ē ua oti, o le a toe tutū mai o latou tino. O i latou e momoe i le lalolagi o le a ala mai ma alalaga i le olioli; auā o lou sau e pei o le sau o le emo o le malamalama; ma o le a toe aumaia e le lalolagi i latou o ē ua maliliu.” (Isaia 26:19, The New English Bible) O lea la o ē maliliu o loo momoe i tuugamau ua malutia i latou e pei o se pepe i totonu o le manava o le tinā. Ua toeitiiti ona toe “fananau” mai lea o i latou i le ola i luga o se lalolagi parataiso!

O le ā se isi faamoemoe e sili atu nai lo lena?

[Faaopoopoga i lalo]

[Ata i le itulau 7]

Na talitonu le ʻau Selote Iutaia i Masada e faapea o le oti e tuusaʻoloto ai o latou solu