Auauna i le Atua Maufaatuatuaina

E pei ona faamatalaina e Kimon Progakis

O se po matuā mālūlū lava i le 1955. Na amata ai ona ma popole ma laʻu avā o Giannoula, ona e lei toe foi mai la ma tama tama o Siaosi e 18 tausaga le matua mai le fale e faigaluega ai o le kiosk. Ua ma teteʻi i le tuʻituʻi mai o se leoleo i le faitotoa o lo matou fale. Na ia faapea mai: “Na taia la oulua tama i se taavale a o tietie mai i lana uila agaʻi mai i lo outou aiga, ma ua maliu o ia.” Ona ia punou mai lea ma musumusu mai: “O le a latou fai atu ia te oulua e faapea, o se faalavelave faafuasei, ae talitonu mai, na fasiotia o ia.” Na taupulepule patele o le nuu ma nisi o taʻitaʻi o le vaegaʻau lagolago e fasiotia o ia.

I NA tausaga, ina ua toe faaleleia le tulaga o Eleni mai taimi o faigata ma mafatiaga, o se tulaga lamatia le avea o se tasi ma Molimau a Ieova. Sa ou iloa tino ai e uiga i le malosi o le pule a le Lotu Orthodox i Eleni ma faalapotopotoga a vaegaʻau fesoasoani auā, e sili atu i le 15 tausaga o avea aʻu o se tasi o o latou sui maelega. Seʻi oʻu faamatala atu e uiga i mea na tutupu i le sili atu i le 40 tausaga ua mavae a o lei oo lenei mala i lo matou aiga.

Ola Aʻe i Eleni

Na ou fanau i le 1902 i se aiga mauoloa, i se nuu laitiiti i le taulaga o Chalcis, i Eleni. Sa malosi tele loʻu tamā i faiga faapolotiki i le atunuu, ma o lo matou aiga sa avea o ni tagata tuutoina i le Lotu Orthodox i Eleni. Sa ou matuā naunau e faitau i tusi e uiga i faiga faapolotiki ma faalelotu, o le taimi lena e toatele lava tagata o lo matou nuu sa lē iloa faitau ma tusitusi.

O le taatele o le mativa ma le lē faamasinotonu i le amataga o lona 20 o senituri, na faatupuina ai ia te au se faanaunauga mo se lalolagi e iai ni tulaga e sili atu ona lelei. Sa ou manatu, e tatau ona mafaia e le lotu ona faaleleia le tulaga faanoanoa o tagata o loʻu atunuu. Ona o loʻu naunau i le lotu, na faatū ai aʻu e tagata maualuluga o loʻu nuu ina ia avea ma patele o le Lotu Orthodox i Eleni i lo matou nuu. Ae peitai, e ui lava sa ou asiasi atu i le tele o monaseri ma faia ni talanoaga uumi ma epikopo ma pule o monaseri, ae ou te lagona e lei lava saunia aʻu pe loto malie e talia sea tiute tauave.

I le Taulotoaiga o le Taua a Tagata o le Atunuu

I tausaga mulimuli ane, ia Aperila 1941, na pulea ai e vaega a Nasi ia Eleni. O lenei pulega na amataina ai se vaitaimi sili ona leaga o fefasiotiaiga, oge, le lē tagolima, ma le lē mafaitaulia o mafatiaga o tagata. Na faatūina ni  vaega na tetee malosi, ma sa ou auai i se tasi o vaega o fitafita lalafi solo ia na tau ma ʻau faatuputupu leaga a Nasi. O le iuga, na tele taimi na susunu ai loʻu fale, na ou manuʻa ai i se fana, ma faatamaia ai fua o laʻu faatoaga. I le amataga o le 1943, e leai se isi filifiliga na matou faia ma loʻu aiga, ae na matou sosola i mauga vanuvanu. Na matou nonofo ai iina seia oo ina faaiuina le pule a ʻau a Siamani ia Oketopa 1944.

Ina ua tuumuli ese Siamani, na mapuna aʻe ai fetauaiga i faiga faapolotiki ma i le va o tagata i totonu lava o le atunuu. O le vaega tetee a fitafita lalafi solo lea sa ou auai, na avea ma autau sili ona malosi i le taua a tagata lautele. E ui sa lelei ia te au manatu o Komunisi e uiga i le faamasinoga tonu, tulaga tutusa, ma auaufaatasiga, ae na ou matuā manino lelei ai i le mea moni. Talu ai loʻu tulaga maualuga i le vaega, sa ou vaai tino ai lava i le agaʻi ina faaleagaina e le pule ia tagata. E ui lava ina foliga mai e mananaia manatu ma mafaufauga, ae o le manatu faapito ma le lē lelei atoatoa ua faaleagaina ai faanaunauga sili ona lelei o le faapolotiki.

O le mea na faateʻia faapitoa ai lava aʻu ona o itu eseese o le fetauaiga a tagata o le atunuu, na faaaogā ai e taʻitaʻi lotu o le Orthodox ia auupega e fasioti ai isi tagata o la latou lava lotu! Sa ou faapea ifo ia te au lava, ‘E mafai faapefea e nei taʻitaʻi lotu ona fai mai o i latou o sui o Iesu Keriso o lē na lapatai mai: “O i latou uma o e tago i le pelu, e oti i latou i le pelu”?—Mataio 26:52.

I le 1946, a o faagasolo le taua a tagata o le atunuu, na ou lafi ai e latalata i le taulaga o Lamia, i Eleni tutotonu. Sa matuā masaesae oʻu lavalava, o lea na ou manatu ai ou te alu i se fale suʻisuʻi i le aai e suʻi ai ni oʻu ofu fou. Ou te taunuu atu, o faia ai se finauga aasa iina, ma e lei pine ae fai atu loa laʻu tala, e lē uiga i faiga faapolotiki, ae e uiga i laʻu lotu e pele ia te au lea na ou iai muamua. I le mātauina o oʻu manatu faaalia, na manatu ai le ʻau maimoa e lelei pe a ou talanoa atu i se ‘polofesa o mataupu faale-Tusi Paia.’ Na latou ō atu loa ma aumai o ia.

Mauaina se Faamoemoe Maufaatuatuaina

I le talanoaga na faia, na fesili mai le “polofesa” ia te au po o le ā le faavae o oʻu talitonuga. Na ou tali atu, o ‘Tamā Paia ma le Sinoti a le Ekalesia Aoao.’ Nai lo o le tetee mai ia te au, sa ia suʻeina lana tamai Tusi Paia i le Mataio 23:9, 10, (NW) ma talosaga mai ia te au e faitau i upu a Iesu: “Aua foi neʻi tou taʻua se tasi i le lalolagi o lo outou Tamā; auā e toatasi lo outou Tamā, o i le lagi ia. Aua foi neʻi taʻua outou o taʻitaʻi; auā e toatasi lo outou Taʻitaʻi, o le Keriso lea.”

Sa avea lea ma mea na pupula ai oʻu mata! Sa ou lagona ai e faapea, o le upu moni lea o loo tautala ai le tamaloa lenei. Ina ua ia faailoa mai o ia o se tasi o Molimau a Ieova, na ou talosaga i ai mo ni lomiga e faitau. Na ia aumai ia te au le tusi Light, o se faamatalaga i le tusi o le Tusi  Paia o Faaaliga, ma na ou aveina i loʻu lafitaga. O manufeai ia o loo faasino i ai le tusi o Faaaliga, ua leva ona avea o se mealilo ia te au, ae o lea ua ou aʻoaʻoina nei e faapea, o nei manu feai ua fai ma sui o faalapotopotoga faapolotiki ia o loo iai i lo tatou 20 senituri. Sa amata ona ou manatua e faapea, e iai uiga aogā o le Tusi Paia mo o tatou taimi, ma e tatau ona ou suesue i ai ma faatatau i ai loʻu olaga e tusa ma upu moni o loo iai.

Puʻea ma Faafalepuipuiina

E lei pine mulimuli ane, na osofai mai ai fitafita i le nofoaga lea ou te lafi ai ma puʻe aʻu. Na lafoina aʻu i se potu pogisa. Talu ai sa ou fesolasolatai mo se taimi umi, sa ou faatalitalia lava e faasalaina aʻu i le oti. Iina i loʻu potu, na asiasi mai ai ia te au le Molimau muamua lava lea na ma talanoa. Sa ia faalaeiauina au ina ia ou faalagolago atoatoa ia Ieova, ma na ou faia faapena. Na faasalaina aʻu e faaaunuua mo le ono masina i le motu o Aegean i Ikaria.

Ina ua ou taunuu atu, na ou faailoa atu loa aʻu, e lē o se Komunisi, ae o se Molimau a Ieova. O isi o ē na aʻoaʻoina upu moni o le Tusi Paia, sa faaaunuua foi iina, o lea na ou sailia ai loa i latou ma matou suesue faatasi ai e lē aunoa i le Tusi Paia. Na latou fesoasoani ia te au e faateleina atili loʻu poto i le Tusi Paia ma maua ai se malamalamaga e sili atu e uiga i lo tatou Atua maufaatuatuaina, o Ieova.

I le 1947, ina ua uma ona tuli loʻu faasalaga, sa samania mai aʻu i le ofisa o le loia o loo tu mo le malo. Na ia faailoa mai ia te au e faapea, ua matuā fiafia lava o ia i laʻu amio ma faapea mai e mafai ona ou faaaogā lona igoa e fai ma faamaoniga, pe afai e toe faaaunuua aʻu. Ina ua ou taunuu i Atenai, o le taimi foi lena na siitia atu ai loʻu aiga iina, sa amata loa ona ou auaufaatasi ma le faapotopotoga o Molimau a Ieova ma e lei pine lava ae ou papatiso e faatinoina ai loʻu tuuina atu ia Ieova.

Molia i le Faaliulotuina o Isi Tagata

Mo le faitau sefulu o tausaga, na faasalaina ai e Eleni Molimau a Ieova i lalo o le tulafono na pasia i le 1938 ma le 1939 e faasaina ai le taumafai e faaliulotuina tagata. I lea, mai le 1938 e oo i le 1992, e 19,147 Molimau na puʻeina faapagota i Eleni, ma na tuuina atu ai e le faamasinoga ni faasalaga pe a tuufaatasi na oo atu i le 753 tausaga, ma e 593 faasalaga na tuliina. O aʻu lava ia, e sili atu i le 40 taimi na puʻe faapagota ai aʻu ona o le talaʻiina o le tala lelei o le Malo o le Atua, ma e 27 le aofai o masina na ou tuliina i falepuipui eseese.

I se tasi taimi, na puʻe faapagota ai aʻu ona o se tusi na ou tusia i se taʻitaʻi o le Lotu i Eleni, i Chalcis. I le 1955, na uunaia ai faapotopotoga o Molimau a Ieova ina ia aauina atu i tagata lotu uma lava le tamai tusi, Christendom or Christianity—Which One Is “the Light of the World”? (Kerisinetoma po o le Faa-Kerisiano—O Lē Fea ua Avea ma “Malamalama o le Lalolagi”?) O le tasi o taʻitaʻi lotu maualuga lea na ou tusi atu i ai, na ia molia aʻu i le taumafai e faaliulotuina o ia. I le taimi o le faamasinoga, na tuuina atu ai se faamatalaga matuā maumaututū e le loia a Molimau ma le isi loia, i le faamalamalamaina o le matafaioi a Kerisiano moni ina ia talaʻi le tala lelei e uiga i le Malo o le Atua.—Mataio 24:14.

Na fesili atu le faamasino sili o le faamasinoga i le tagata maualuga o le lotu: “Sa e faitauina le tusi ma le tamai tusi?”

Sa ia tali mai ma le leo malosi: “E leai, sa ou saesaeina tusi ma faatamaia i le taimi lava na ou tatalaina ai le teutusi!”

Na fesili atu le faamasino sili: “Ae e faapefea la ona e fai mai ua faaliulotuina oe e lenei tamaloa?”

Ona sosoo ai lea ma le taʻua e la tatou loia o ni faaaoaoga e uiga i le anoanoai o tusi e foai faameaalofa e tagata popoto ma isi i faletusi mo tagata lautele, i lona fesili atu: “E mafai la ona e faapea mai sa taumafai na tagata e faaliliu isi tagata?”

E manino lava, o lena gaoioiga sa lei faaalia ai se faaliulotuina. Sa ou faafetai ia Ieova ina ua ou faalogo atu i le faaiuga e faapea: “E lē sala.”

 Le Oti o Loʻu Atalii

Sa faaauau pea foi ona faasoesa atu i loʻu atalii o Siaosi, ae maise lava i uunaiga a taʻitaʻi o le lotu Orthodox. E tele foi ni taimi na puʻeina ai faapagota o ia ona o lona maelega faatalavou i le folafolaina atu o le tala lelei o le Malo o le Atua. Na iu ai lava ina filifili tagata tetee e fasiotia o ia, ma, i le taimi lava lena, na aauina mai ai se lapataiga e taufaafefe ai ia i matou uma ina ia taofia la matou talaʻiga.

O le leoleo lea na sau i lo matou fale e taʻu mai le oti o Siaosi, na faapea mai, sa taupulepule patele o le Lotu Orthodox i Eleni ma taʻitaʻi o le vaegaʻau fesoasoani e fasioti la ma tama. Sa taatele lava “faalavelave faafuasei” faapena i na taimi matautia. E ui lava i le faanoanoa ona o lona oti, ae o la ma filifiliga e maelega pea i le galuega talaʻi ma faalagolago atoatoa ia Ieova, sa faamalosia atili ai.

Fesoasoani i Isi ia Faalagolago ia Ieova

I le taulotoaiga o tausaga o le 1960, na ō atu ai laʻu avā ma la ma fanau e tafafao mo masina o le taumafanafana i le nuu i le talafatai, o Skala Oropos, e tusa ma le 30 maila [50 kilomita] le mamao mai Atenai. I le taimi lena, e leai ni Molimau na nonofo ai iina, o lea na matou faia ai se molimau lē fuafuaina i tuaoi. Na tali fiafia mai nisi o faifaatoaga. Talu ai e tuai ona mānava tagata mai a latou galuega i o latou fanua i le ao, sa matou faia ai suesuega faale-Tusi Paia ma i latou i le leva o le afiafi, ma e toatele nisi o i latou na avea ma Molimau.

I le vaai atu i le auala na faamanuiaina ai e Ieova a matou taumafaiga, na matou faimalaga atu ai pea iina i vaiaso taitasi mo le 15 tausaga, e faia suesuega faale-Tusi Paia ma tagata fiafia. E toeitiiti lava o le toʻa 30 o tagata na matou suesue iina, na agaigai i luma ma oo ina papatisoina. Muamua lava, na faavae ai se vaega o suesuega, ma na tofia aʻu ou te faia sauniga. Mulimuli ane na avea ai le vaega ma faapotopotoga, ma i aso nei e sili atu i le selau Molimau mai lena vaipanoa ua faia aʻe ai le Faapotopotoga i Malakasa. Ua matou olioli ona o le toʻafā o tagata na matou fesoasoani atu i ai, ua avea nei o ni faifeau faataimi atoa.

O se Tofi ua Matuā Faamanuiaina

E lei umi lava se taimi talu ona tuuina atu loʻu ola ia Ieova, na amata ai ona agaigai i luma faaleagaga laʻu avā ma na papatisoina ai o ia. I na taimi faigata o sauāga, sa tumau pea le malosi o lona faatuatua ma na ia tumausalī pea ma le lē maluelue i lona faamaoni. E lei iai lava se taimi na faitio ai e uiga i le tele o faigata na iu i ai ona o le tuuina soo o aʻu i le falepuipui.

I le faagasologa o tausaga, na ma faia faatasi ai le tele o ni suesuega faale-Tusi Paia, ma sa ia fesoasoani atu ma le maelega i le toatele e ala i ana faafeiloaiga faigofie ma le aasa. I le taimi lenei, o loo iai sana alā mekasini e aofia ai le toatele o tagata, o ē na te molioo atu i ai e lē aunoa Le Olomatamata ma le Ala Mai!

Ona o le tele o le lagolagosua mai laʻu paaga pele, o la ma fanau e toatolu o loo ola ma o latou aiga, e aofia ai a latou fanau e toʻaono ma fanau a a latou fanau e toʻafā, o loo maelega uma i le auaunaga ia Ieova. E ui e latou te lei fesagai ma sauāga ma teteega ogoogo ia na ma faafesagaia ma laʻu avā, ae ua latou faalagolago atoatoa atu ia Ieova, ma o loo latou savavali pea i ona ala. Maeu se olioli o le a iai ia i matou pe a matou aufaatasi ma la ma tama pele o Siaosi pe a toe foi mai o ia i le toe tu!

Ua Maumauai e Faalagolago ia Ieova

I nei tausaga uma lava, ua ou vaaia ai le galue o le agaga o Ieova i ona tagata. O lana faalapotopotoga e taitaia e le agaga, ua fesoasoani ia te au e iloa ai e lē mafai ona tatou faalagolago i taumafaiga a tagata. O a latou folafolaga mo se lumanai e sili atu ona lelei e lē aogā, e leai se iuga lelei ua na o se matuā pepelo lava.—Salamo 146:3, 4.

E ui lava i oʻu tausaga matua ma faafitauli matuiā o le soifua maloloina, ae o loo taulai atu pea laʻu vaai i le moni o le faamoemoe o le Malo. Ou te faanoanoa lava ona o tausaga na ou faaaluina e tuutoina atu ai i lotu sese, ma taumafai e aumaia tulaga e sili atu ona lelei e ala i faiga faapolotiki. Pe afai ou te toe talavou, e mautinoa lava, ou te toe filifili e auauna ia Ieova, le Atua maufaatuatuaina.

(Na maliu talu ai nei Kimon Progakis. E faamoemoe o ia e ola i le lalolagi.)

[Ata i le itulau 26]

O se ata lata mai nei o Kimon ma lana avā o Giannoula