Le Tulafono a Keriso

“Ua ou nofo i le tulafono ia Keriso.”—1 KORINITO 9:21.

1, 2. (a) Sa ono mafai faapefea ona taofia le tele o measese a tagata? (e) O le ā na lē taulau ona aʻoaʻoina e Kerisinetoma mai talafaasolopito o le faa-Iutaia?

“O TAGATA ma malo latou te lē aʻoaʻoina lava se mea mai talafaasolopito, pe gaoioi e tusa ma mataupu silisili ua maua mai ai.” O le faamatalaga lena a se faifilosofia Siamani i le senituri lona 19. E mautinoa, o talafaasolopito o le tagata ua faamatalaina o se “faagasologa o faiga iuvale,” o se soloaiga o measese ma faalavelave e matuā faamataʻuina ai, o le tele o na mea sa ono mafai ona taofia le oo mai pe ana seʻi naunau tagata e aʻoaʻoina mai measese ua mavae.

² O lenei lē manao e aʻoaʻoina mai measese ua mavae ua aliali mai i lenei talanoaina o le tulafono a le Atua. Na suia e Ieova le Atua le Tulafono faa-Mose i se tulafono e sili atu ona lelei—le tulafono a Keriso. Ae peitai, o taʻitaʻi o Kerisinetoma, o ē faapea mai o loo latou aʻoaʻo ma ola e tusa ai ma lenei tulafono, ua lē taulau ona latou aʻoaʻoina mai measese matuia a le ʻau Faresaio. O lea ua mimiloseseina ai ma faaleaogaina e Kerisinetoma le tulafono a Keriso e pei lava ona faia e le faa-Iutaia i le Tulafono a Mose. E mafai faapefea ona tupu o lena mea? Muamua, seʻi o tatou talanoaina le tulafono a Keriso—o le ā lea tulafono, o ai i latou e tausia ma e faapefea, ma o le ā le auala ua eseese ai mai le Tulafono faa-Mose. Ona tatou iloiloina ai lea pe ua faapefea ona faaaogaseseina e Kerisinetoma. Tau ina ia tatou aʻoaʻoina ni mea mai talafaasolopito ma maua ai ni aogā!

Le Feagaiga Fou

3. O le ā le folafolaga na faia e Ieova e faatatau i se feagaiga fou?

³ O ai se tasi e mafai ona faaleleia se Tulafono e lelei atoatoa seʻi vaganā ai lava Ieova le Atua? Sa lelei atoatoa le feagaiga o le Tulafono faa-Mose. (Salamo 19:7) E ui i lea, na folafola mai Ieova e faapea: “Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta. E le pei o le feagaiga na ou osia ma o latou tamā.” O Tulafono e Sefulu—o tulafono autū o le Tulafono faa-Mose—sa tusia i papa maa. Ae mo le feagaiga fou, na fetalai Ieova: “Ou te tuuina laʻu tulafono i totonu ia te i latou, ma ou tusi ai i o latou loto.”—Ieremia 31:31-34.

4. (a) O le ā le Isaraelu o loo aofia i totonu o le feagaiga fou? (e) O ai isi e ese mai ia Isaraelu faaleagaga o loo i lalo foi o le tulafono a Keriso?

⁴ O ai o le a faaaofia ai i lenei feagaiga fou? E mautinoa lava e lē o le “aiga o Isaraelu” faaletino, o ē na teena le Puluvaga o lenei feagaiga. (Eperu 9:15) E leai, o lenei “Isaraelu” fou o le a avea o le “Isaraelu o le Atua,” o se nuu o tagata Isaraelu faaleagaga. (Kalatia 6:16; Roma 2:28, 29) O lenei vaega toalaiti o Kerisiano ua faauuina i le agaga o le a mulimuli ane aufaatasi atu i ai “le motu o tagata e toatele” mai atunuu uma o ē o loo saili atu foi e tapuai ia Ieova. (Faaaliga 7:9, 10; Sakaria 8:23) E ui e lē o avea i latou o se vaega i totonu o le feagaiga fou, ae ua noanoatia foi i latou nei i le tulafono. (Faatusatusa i le Levitiko 24:22; Numera 15:15.) I le avea o se ‘lafu mamoe e tasi,’ i le vaaiga a le “leoleo mamoe e toatasi,” o le a avea ai i latou uma o ē o loo “nofo i le tulafono ia Keriso,” e pei ona tusia e le aposetolo o Paulo. (Ioane 10:16; 1 Korinito 9:21) Na taʻua e Paulo lenei feagaiga fou o se “feagaiga e sili ona lelei.” Aisea? Ona o le mea lenei, ua faavae aʻe i folafolaga ua faataunuuina nai lo ata o mea atalī.—Eperu 8:6; 9:11-14.

5. O le ā le fuafuaga o le feagaiga fou, ma aisea o le a taulau manuia ai?

⁵ O le ā le fuafuaga o lenei feagaiga? Ina ia maua mai ai se malo o tupu ma ositaulaga e manuia ai tagata uma. (Esoto 19:6; 1 Peteru 2:9; Faaaliga 5:10) Sa lē tāitai mafai e le feagaiga o le Tulafono faa-Mose ona aumaia ai lenei malo e tusa ma le fuafuaga atoa na valoia ai e Ieova, auā na fouvale le nuu atoa o Isaraelu ma latou lē maua ai lo latou avanoa. (Faatusatusa i le  Roma 11:17-21.) E ui i lea, ua mautinoa e taulau manuia le feagaiga fou, auā e matuā ese lava lana tulafono. E ese i ā itu?

Le Tulafono o le Saʻolotoga

6, 7. Ua faapefea ona ofoina mai e le tulafono a Keriso se saʻolotoga e sili atu nai lo lea na ofoina mai e le Tulafono faa-Mose?

⁶ O le tulafono a Keriso ua tele ina fesootai atu i le saʻolotoga. (Ioane 8:31, 32) Ua faasino atu i ai o ‘le tulafono mo tagata saʻoloto,’ ma le “tulafono o le saʻolotoga ua atoatoa ona lelei.” (Iakopo 1:25; 2:12) O le mea moni, o saʻolotoga uma o loo iai i tagata e faatapulaa. Ae peitai, o lenei tulafono ua ofoina mai ai se saʻolotoga e sili atu nai lo Tulafono faa-Mose, lea na muamua atu. E faapefea?

⁷ O se faataitaiga o lenei mea, e leai se tasi e fanau mai o loo i le tulafono a Keriso. O vala e pei o le ituaiga e tupuga mai ai ma le nuu na fanau ai e lē tāua. O ē ua avea ma Kerisiano moni e saʻoloto e filifili mai o latou loto ina ia talia le amo o le usiusitai atu i lenei tulafono. I le faia faapea, ua latou iloa ai o se amo e agalelei, o se avega e māmā. (Mataio 11:28-30) Afai e te manatua, na fuafuaina foi le Tulafono faa-Mose ina ia iloa ai e le tagata o ia e agasala ma e matuā moomia se taulaga togiola e togisalaina ai o ia. (Kalatia 3:19) Ua aʻoaʻo mai le tulafono a Keriso e faapea ua afio mai le Mesia, na ia totogia le tau o le togiola i lona ola, ma tatalaina ai le ala mo i tatou ina ia tuusaʻoloto mai le leaga o le faapologaina i le agasala ma le oti! (Roma 5:20, 21) Ina ia maua mai ni aogā, e manaomia ona ‘faaalia le faatuatua’ i lena taulaga.—Ioane 3:16.

8. O le ā e aofia ai i le tulafono a Keriso, ae aisea e lē aofia ai i le ola e tusa ai ma lea tulafono, le tauloto i le mafaufau o le faitau selau o poloaiga faaletulafono?

⁸ O le ‘faaalia o le faatuatua,’ e aofia ai le ola e tusa ma le tulafono a Keriso. E aofia ai i lena mea le usiusitai i poloaiga uma a Keriso. Po o le uiga ea o lenei mea o le tauloto i le mafaufau le faitau selau o tulafono ma poloaiga? E leai. Na tusia e Mose, o le puluvaga o le feagaiga tuai le Tulafono faa-Mose, ae o Iesu, le Puluvaga o le feagaiga fou, sa ia lei tusia lava i lalo se tulafono e tasi. Nai lo le faia faapea, sa soifua o ia e tusa ma lena tulafono. E ala i le auala lelei atoatoa na soifua ai, na ia faataatia mai ai se ata mo tagata uma e mulimuli ai. (1 Peteru 2:21) Atonu o le mafuaaga lena na taʻua ai le tapuaiga a uluai Kerisiano “O le Ala.” (Galuega 9:2; 19:9, 23; 22:4; 24:22) Na avea le tulafono a Keriso ia i latou o se mea ua faataitaia atu i le auala na soifua ai Keriso. O le faaaʻoaʻo ia Iesu, o le usiusitai atu lea i lenei tulafono. O lo latou alofa loloto ia te ia sa uiga i le tusia moni o lenei tulafono i o latou loto, e pei ona sa valoiaina. (Ieremia 31:33; 1 Peteru 4:8) Ma o le tagata e usiusitai ona o le alofa e lē tāitai ona lagona se faapologaina—o se tasi lenei o mafuaaga atonu ua taʻua ai le tulafono a Keriso ‘o le tulafono a tagata o le saʻolotoga.’

9. O le ā le autū moni o le tulafono a Keriso, ma i le ā le auala ua aofia ai i lenei tulafono se poloaiga fou?

⁹ Afai sa tāua le alofa i le Tulafono faa-Mose, o le autū moni lea o le tulafono a Keriso. O lea o le tulafono a Keriso e aofia ai se poloaiga fou—e tatau i Kerisiano ona maua le alofa faataulaga o le tasi i le isi. E tatau ona latou alolofa atu e pei ona sa faia e Iesu; na ia lotomalie e foai atu lona ola mo ana uo. (Ioane 13:34, 35; 15:13) E ono mafai foi la ona faapea atu o le tulafono a Keriso o se faaaliga e sili atu ona mamalu o le faatiokarate nai lo lea na iai i le Tulafono a Mose. E pei ona faailoa muamua atu e lenei lomiga: “O le faatiokarate e pulea e le Atua; o le Atua o le alofa lava ia; o lea o le faatiokarate e pulea e le alofa.”

Iesu ma le ʻAu Faresaio

10. Na faapefea ona feteenai aʻoaʻoga a Iesu ma aʻoaʻoga a le ʻau Faresaio?

¹⁰ O lea la, e lē o se mea e faateʻia ai faapea, sa oo ina feteenai Iesu ma taʻitaʻi lotu Iutaia i ona vaitaimi. O se “tulafono o le saʻolotoga ua atoatoa ona lelei” sa lē tāitai tau ane i ai manatu o tusiupu ma le ʻau Faresaio e faapea e iai se mea faapena. Na latou taumafai e pulea tagata e ala i tulafono na fai lava e i latou. Na oo ina avea a latou aʻoaʻoga ma avega mamafa, e faasalaina ai, ma lē mautonu. I sona eseesega tele, na matuā avea aʻoaʻoga a Iesu ma mea e atiina aʻe ai ma e aogā! Sa mafai ona faatatauina ana aʻoaʻoga ma na tuusaʻo atu lava i manaoga ma popolega o tagata. Sa malamalamagofie lana aʻoaʻo atu ma sa iai faatasi ma ni ona lagona naunau moni, e ala  i le faaaogā o tala faatusa mai mea ua masani ai le olaga i aso taitasi ma faaaogā le Afioga a le Atua e fai ma faavae. O lea, sa “matuā taufaiofo ai . . . le motu o tagata i lana aʻoaʻoga.” (Mataio 7:28) Ioe, sa pāʻia e aʻoaʻoga a Iesu o latou loto!

11. Sa faapefea ona faaalia e Iesu e tatau ona faatatauina le Tulafono faa-Mose i se tulaga magafagafa ma le alofa mutimutivale?

¹¹ Nai lo le faaopoopo atu o le mau tulafono i le Tulafono faa-Mose, ae na faailoa atu e Iesu le auala sa tatau i tagata Iutaia ona faatatauina ai lena Tulafono mai lava i lona amataga—i se tulaga magafagafa ma le alofa mutimutivale. Mo se faataitaiga, seʻi manatua le mea lea na tupu lea na ia faalatalata atu ai i se fafine na aafia i le puna toto. E tusa ai ma le Tulafono faa-Mose, so o se tagata e papaʻi atu i ai lenei fafine o le a lē mamā, e mautinoa la sa lē tatau ona miomio faatasi o ia ma le motu o tagata! (Levitiko 15:25-27) Ae na matuā fia mālōlō o ia o lea na faavāvā atu ai i le motu o tagata ma paʻi atu i le ofu talaloa o Iesu. Na taofi faafuasei ai le puna toto. Pe na ia otegia ea le fafine ona o lona solia o le Tulafono? E leai; ae sa ia malamalama i le tulaga mafatia o le fafine ma faaaogā ai loa i ai le aano sili o le Tulafono—o le alofa. I ona lagona alofa, na fetalai atu ai o ia i le fafine: “Loʻu afafine e, o lou faatuatua ua e malolo ai; ina alu ia oe ma le manuia, ma ia e malolo i lou maʻi tiga.”—Mareko 5:25-34.

Pe ua Tele Nauʻā le Saʻolotoga mo Filifiliga Ona o le Tulafono a Keriso?

12. (a) Aisea e lē tatau ai ona tatou manatu faapea ona o Keriso ua tele naʻuā ai le saʻolotoga mo filifiliga? (e) O le ā e faaalia ai o le tele o tulafono e faavaeina o le tele foi lena o togafiti e faavaeina?

¹² Pe tatau la ona tatou faia se faaiuga e faapea, talu ai o le tulafono a Keriso o le “tulafono o le saolotoga,” ua tele nauʻā ai la le saʻolotoga mo filifiliga, ae o le ʻau Faresaio, ma le anoano o a latou tulafono tuugutu, e aogā lea e matuā pulea ai amio a tagata? E leai. O faiga tau tulafono i aso nei ua faataitaia mai ai faapea, e masani lava o le iai o le tele o tulafono, o le tele foi lena o togafiti e faia i ai e tagata. * I le vaitaimi o Iesu, o le tele o tulafono  faaopoopo a le ʻau Faresaio na faamalosia ai le sailia o ni togafiti e alofia ai le tausia o ia tulafono, le faia ma le oono galuega e aunoa ma se naunau alofa, ma le tupu aʻe ai o se uiga faafiamata amiotonu atu i fafo ae o totonu ua tumu i faiga faapiopio.—Mataio 23:23, 24.

13. Aisea ua iu ai le tulafono a Keriso i le tulaga o amio e sili atu ona maualuga nai lo so o se faamaumauga tusitusia o tulafono?

¹³ O le tulafono a Keriso e matuā ese lava, e lē faatupuina ai ni uiga faitogafiti. O le mea moni, o le usitaia o se tulafono e faavae i le alofa mo Ieova ma usitaia e ala i le faaaʻoaʻo i le alofa faataulagaina totino o Keriso mo isi, ua iu ai i se tulaga o amio e sili atu ona maualuga nai lo le tausisia o se tulafono faavae ua faamauina. E lē sailia e le alofa ni togafiti; e taofia ai i tatou mai le faia o mea e faaleagaina ai atonu e lē o faasaina patino mai e se tusi tulafono. (Tagai i le Mataio 5:27, 28.) O lea, o le a uunaia ai i tatou e le tulafono a Keriso e faia mea mo isi—ia faaalia le lima mafola, le talimalo, ma le alofa—i auala e lē mafai e ni tulafono aloaia ona faapogaia i tatou e fai.—Galuega 20:35; 2 Korinito 9:7; Eperu 13:16.

14. O ā āuga o le ola e ala i le tulafono a Keriso na oo ai i le faapotopotoga Kerisiano i le uluai senituri?

¹⁴ I le tele sa ola ai tagata o le uluai faapotopotoga Kerisiano e ala i le tulafono a Keriso, sa faapena ona latou olioli ai i se siomaga e māfana ma alofa, sa seāseā maua ai uiga faamasinosino, sauā, ma le faatagafai lea na matuā taatele i sunako i lena vaitaimi. O tagata o nei faapotopotoga faatoʻā faavae sa tatau lava ona latou lagona e faapea sa nonofo i latou ‘i le tulafono o tagata o le saʻolotoga.’

15. O ā nisi o uluai taumafaiga na fai e Satani e faaleaga ai le faapotopotoga Kerisiano?

¹⁵ E ui i lea, na naunau Satani e faaleaga le faapotopotoga Kerisiano e ala mai i nisi o ona lava tagata, e pei foi ona sa ia faaleagaina le nuu o Isaraelu. Na lapatai mai le aposetolo o Paulo i tagata e pei ni luko o ē o le a “tautala mai i mea faapiopio” ma faasauā i le lafu mamoe a le Atua. (Galuega 20:29, 30) Sa tatau ona faafetaiaia e ia le ʻau Iutaia, o ē na saili e fesuiai le saʻolotoga fai faatatau o le tulafono a Keriso, mo le faapologaina i le Tulafono faa-Mose, lea sa faataunuu ia Keriso. (Mataio 5:17; Galuega 15:1; Roma 10:4) Ina ua maliu le aposetolo mulimuli, sa lē toe iai loa ni mea e taofiofia ai na faiga faaaposetasi. O lea na matuā taatele ai faiga faapiopio.—2 Tesalonia 2:6, 7.

Ua Faaleaga e Kerisinetoma le Tulafono a Keriso

16, 17. (a) O ā ituaiga o faiga faapiopio na tutupu aʻe i totonu o Kerisinetoma? (e) Na faapefea ona uunaia atili e tulafono a le Lotu Katoliko le vaaiga ua mimilo sese e faatatau i faiga tau feusuaiga?

¹⁶ E pei o le faa-Iutaia, o faiga faapiopio sa tele ni ona vaega na tutupu aʻe ai i totonu o Kerisinetoma. Sa maileia foi o ia i aʻoaʻoga sese ma amioga lē taupulea. Ma o ana taumafaiga ina ia puipuia lana lafu mamoe mai aafiaga i fafo, sa masani ona faaleagaina ai so o se vaega o le tapuaiga moni sa totoe ia te ia. E anoanoai tulafono pulepuletutū ma le lē faale-Tusi Paia na tulai mai.

¹⁷ Ua avea le Ekalesia Katoliko ma lotu ua sili atu ona tele ana tulafono faalelotu. O nei tulafono sa faia faapitoa e faafenuminumiai ai mataupu e faatatau i faiga tau feusuaiga. Na taʻua e le tusi o le Sexuality and Catholicism, na talia e le lotu le filosofia faa-Eleni a Stoic, lea na masalosalo i ituaiga uma o fiafiaga. Na oo ina aʻoaʻo mai e le lotu e faapea o fiafiaga uma mai faiga tau feusuaiga, e aofia ai feusuaiga tatau o loo faia i faiā faalefaaipoipoga, o se agasala. (Tagai i le eseesega i le Faataoto 5:18, 19.) Na faapea mai o feusuaiga sa patino atu lava lea i le fanautama, ae lē mo fiafiaga. O lea na faasaina ai e le tulafono a le lotu le faaaogaina o so o se ituaiga o faiga e puipuia ai le fanautama ma manatu i ai o se agasala matuia pe a faia faapea, o nisi taimi e tele ni tausaga e faasala ai e se tasi lona tino ina ia faaalia ai le salamō. E faaopoopo atu i ai, na faasā ona faaipoipo patele, o se tulafono ua faamalosia lona tausisia ma ua faapea ona faatupulaia ai le tele o feusuaiga e faasaina, e aofia ai ma le faaleagaina o tamaiti i ia ituaiga faiga.—1 Timoteo 4:1-3.

18. O le ā na iu i ai i le faatuputeleina o tulafono a le lotu?

 ¹⁸ Ina ua faatuputeleina tulafono a le lotu, na oo ai ina tuufaatasia i ni tusi. Na amata e nei tusi ona lē faatāuaina ai le Tusi Paia ma faataatia ese ua lē toe faaaogaina. (Faatusatusa i le Mataio 15:3, 9.) I le pei o le faa-Iutaia, na lē talitonuina ai e le faa-Katoliko tusitusiga o mataupu faalelalolagi ma tele ina vaai i ai o se faamataʻu. E lei umi ae ua oo ina matuā ese mamao lenei vaaiga mai le manatu paleni lelei a le Tusi Paia i le mataupu. (Failauga 12:12; Kolose 2:8) Na fai mai Ierome, o se tasi o tusitala o le senituri lona fa T.A., e faapea: “Oi le Alii e, pe afai ou te toe mauaina ni tusi faalelalolagi pe ou te faitau i ai, ua ou teena oe.” Na oo ane le taimi, na faia e le lotu se iloiloga o tusi mo ni mea faaletonu o iai—e oo lava foi i tusi e faatatau i mataupu faalelalolagi. O lea, i le senituri lona sefulufitu na faitioina ai le vāai fetu o Galileo talu ai sa ia tusia e faapea o le lalolagi o loo faataamilo i le la. Na maumauai le lotu i le avea o ia o lē faia le faaiuga mulimuli i mea uma—e oo lava i fesili i mea tau vāai fetu—i le taunuuga mulimuli e iu ai ina lē maufaatuatuaina le Tusi Paia.

19. Na faapefea ona uunaia atili i monaseri ni faiga o pulega pulepuletutū?

¹⁹ Ua matuā olaola tulafono a le lotu i monaseri, i nofoaga na faaesea ai e monike i latou lava mai lenei lalolagi ina ia ola i se olaga e faataulagaina manaoga uma. O le tele o monaseri a le Katoliko e usiusitai atu i “Le Tulafono a Sagato Penitito.” Sa iai i le abbot, (o se upu e sau mai le upu Arama mo le “tamā”), le pule atoa. (Faatusatusa i le Mataio 23:9.) Pe afai e maua e se monike se meaalofa mai ona mātua, ona filifili lea o le abbot pe tatau ona tuu atu i le monike lea le meaalofa pe tuu atu mo isi. E ese ai mai le faasaina o upu lē lelei, o se tasi o tulafono na faasā ai talanoaga uma e masani ai ma tala tausua, i le faapea mai: “E leai se soo e tatau ona talanoa i ni mea faapena.”

20. O le ā e faaalia ai ua faamaonia foi le faamalosia atili e le faa-Porotesano o faiga o pulega pulepuletutū e lē faale-Tusi Paia?

²⁰ O le faa-Porotesano lea na taumafai e toe fuatai le mau faiga lē faale-Tusi Paia a le Katoliko, e lei umi ae tutusa lelei foi le popoto i le faia o tulafono e fia pulepuletutū ai ae leai ma se faavae aʻe i le tulafono a Keriso. E fai ma faaaoaoga, o lē na fai ma taʻimua i le toe fuataiina o John Calvin na oo ina taʻua o ia “o le faitulafono o le Ekalesia toe faafouina.” Na ia pulea le lotu Porotesano i Geneva i le anoanoai o tulafono maumaututū na faamalosia e ala mai i “Toeaina” o a latou “tiute,” e pei ona taʻua ai e Calvin, “ina ia vaavaaia ola o tagata uma.” (Ia faaeseese ma le 2 Korinito 1:24.) Na pulea e le lotu faletalimalo ma faatonu mai po o ā mataupu e talanoa i ai e faatagaina. Sa iai ni faasalaga matuia pe a solia na tulafono e pei o le usuina o pese ma siva e lē faaalia ai se faaaloalo. *

Aʻoaʻoina Mai Measese a Kerisinetoma

21. O ā āuga aoao ua oo i ai ona o faanaunauga o Kerisinetoma e ‘see ese mai mea ua tusia’?

²¹ Pe na aogā uma nei tulafono e puipuia ai Kerisinetoma mai faiga faapiopio? E matuā tuufaafeagai lava ma le mea ua iai! I aso nei, ua vaevaeina Kerisinetoma i le faitau selau o lotu, e eseese lava faiga a na lotu, o isi e matuā mamapo lava ae o isi e matuā tuufau mea uma. O ia lotu uma ua iai ni itu ua ‘see ese mai ai i mea ua tusia,’ i le faatagaina o manatu faaletagata  e pulea ai le lafu mamoe ma faauilavea ai i le tulafono a le Atua.—1 Korinito 4:6.

22. Aisea e lē faapea ai o le a faaiuina le tulafono a Keriso ona o le tulaga lafoaia o Kerisinetoma?

²² E ui i lea, o gaoioiga a Kerisinetoma faasaga i le tulafono a Keriso e lei oo i ai ni iuga malaia. O le a lē tāitai faatagaina e Ieova le Atua na tagata latou te tafiesea atoatoa le tulafono tauatua. O tulafono faa-Kerisiano o loo tausisia pea i aso nei e Kerisiano moni, ma ua ia i latou le faaeaga tele o le ola e talafeagai ai ma le tulafono. Ae ina ua maeʻa ona iloiloina mea ua faia e le faa-Iutaia ma Kerisinetoma i le tulafono tauatua, atonu o le a tatou manatu ifo, ‘E faapefea ona tatou ola e tusa i le tulafono a Keriso a o mafai ona alofia le mailei o le faaleagaina o le Afioga a le Atua i mafaufauga ma tulafono faaletagata lea ua faaleaogaina ai le agaga moni o le tulafono tauatua? O le ā le vaaiga paleni e tatau ona iai ia i tatou i aso nei e faatatau i le tulafono a Keriso?’ O le a aumaia e le mataupu o sosoo mai tali i nei fesili.

[Faaopoopoga i lalo]

E Faapefea Ona E Taliina?

□ O le ā le autū moni o le tulafono a Keriso?

□ Na faapefea ona ese le auala na aʻoaʻo atu ai Iesu mai le auala na aʻoaʻo atu ai le ʻau Faresaio?

□ Na faapefea ona faaaogā e Satani se uiga fia pulepuletutū, ma le fia faitulafono e faaleaga ai Kerisinetoma?

□ O ā nisi o āuga lelei o le ola e tusa ma le tulafono a Keriso?

[Fesili mo le Suʻesuʻega]

[Ata i le itulau 16]

Sa faatatauina e Iesu le Tulafono faa-Mose i le tulaga magafagafa ma le alofa mutimutivale