“Ia Tausisi i le Ala o le Talimalo”

“Ia tufatufa atu ni a outou mea e tusa ai ma manaoga o le au paia. Ia tausisi i le ala o le talimalo.”—ROMA 12:13, NW.

1. O le ā se manaoga autū faaletagata, ma ua faapefea ona faaalia?

I ASO nei, o se matuā faafefe tagata le savali atu i se auala e leai ni tagata o iai i se nuu e te lē masani ai ma i le leva o le po. Ae e mafai foi ona faapena tonu lava le loto mafatia pe a iai i se tumutumuga o ni tagata ae leai ma se isi e te masani ai pe leai foi se isi e amanaiaina oe. O le mea moni, o se tasi o vaega tāua o le olaga masani o le tagata o le manaoga lea ina ia amanaia mai, ia moomia, ma ia alofagia. E leai se tasi e manao e fai o ia e pei o se tagata ese po o se tagata e lē masani ai.

2. Ua faapefea ona saunia e Ieova se fuafuaga i lo tatou manaoga mo se faauooga?

² E silafia lelei e Ieova le Atua, o Lē na Faia ma Foafoaina Mea uma, le manaoga o le tagata mo se faauooga. Ona o ia o Lē na Fuafuaina lana foafoaga o le tagata, na silafia ai e le Atua mai lava i le amataga le “le lelei ina toatasi o le tagata,” ma sa ia faia loa i ai se fuafuaga. (Kenese 2:18, 21, 22) Ua tumu faamaumauga a le Tusi Paia i faaaoaoga o gaoioiga o le agalelei sa faaalia i tagata e Ieova ma ana auauna. Ua mafai ai la ona tatou iloa le auala e “tausisi [atu ai] i le ala o le talimalo,” ina ia olioli ma fiafia ai isi ma ia faamalieina ai i tatou lava.—Roma 12:13.

Le Naunau Atu i Tagata Ese

3. Ia faamatala le uiga autū o le talimalo.

³ O le upu “talimalo” e pei ona faaaogā ai i le Tusi Paia ua faaliliu mai le upu Eleni phi·lo·xe·niʹa, lea e faia aʻe i upu autū e lua e faauiga i le “alofa” ma le “tagata ese.” O lea, e uiga moni lava le talimalo i le “alofa atu i tagata ese.” Ae peitai, ua lē na o se uiga lenei e tausisia ai se tuutuuga pe ala ona fai ona o le faaaloalo. E aofia ai faalogona o se tasi ma ona lagona māfana. O le veape phi·leʹo, e tusa ai o le tusi a James Strong, le Exhaustive Concordance of the Bible, e faauiga i le “ia avea o se uo e (naunau atu i ai [o se tagata po o se mea]), o lona uiga e iai lagona māfana mo le (faaalia o se matuā lalata atu totino, i le tulaga o uiga po o faalogona).” O le talimalo la, e tele atu nisi mea e aofia ai nai lo le alofa e faavae i mataupu silisili, lea atonu e faia ona o se tiute po o se matafaioi. O le talimalo e masani ona avea o se faailoaga o le moni o lagona naunau, o lagona māfana, ma lagona faauo.

4. Ia te ai e tatau ona faaalia atu i ai le talimalo?

⁴ O lē o loo faaalia atu i ai lenei lagona naunau ma lagona māfana, o se “tagata ese” (faa-Eleni, xeʹnos). Atonu o ai lenei tagata? Ua toe faamatala foi e le Concordance a Strong le upu xeʹnos e faapea o se ʻtagata mai se isi nofoaga (i se faauigaga faaletino o se tagata mai se isi atunuu, po o se mea e matuā fou lava pe a faauiga faafaatusa); pe a faatatauina o se malo po o se tagata ese (pe a toe liliu le uiga).’ O le talimalo la, e pei ona faaaʻoaʻo mai i le Tusi Paia, e mafai ona faaatagia atu ai le agalelei o loo faaalia i se tasi tatou te naunau i ai, pe mafai foi ona faasalafa atu i se tasi tatou te matuā lē masani ai. Na faamatala e Iesu faapea: “Afai tou te alolofa atu i e ua alolofa mai ia te outou, se a ea se taui tou te maua ai? E le faia ea e tagata ao lafoga o lea lava mea? Pe afai tou te faapito lo outou fealofani i o outou uso, se a se mea sili ua  outou faia? E le faapea ea ona faia e tagata faapaupau?” (Mataio 5:46, 47) O le talimalo moni e manumalo mai ai i fevaevaeaiga ma uiga lē fiafia na ua tutupu aʻe ona o le faailogatagata ma le fefe.

O Ieova, o Lē Talimalo e Atoatoa Ona Lelei

5, 6. (a) O le ā sa i le finagalo o Iesu ina ua ia fetalai, “O lo outou Tamā o i le lagi e atoatoa ona lelei o ia”? (e) Ua faapefea ona vaaia le aaomafola o Ieova?

⁵ Ina ua uma ona faasino mai uiga lē lelei o le alofa lea e fefaaaliai e tagata, e pei ona taʻua i luga, ona faaopoopo mai lea e Iesu lenei faamatalaga: “Ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” (Mataio 5:48) O le mea moni, e atoatoa ona lelei Ieova i vala uma. (Teuteronome 32:4) Ae peitai, sa faamatilatila mai e Iesu se vala patino o le lelei atoatoa o Ieova, e pei ona sa ia muai fetalai i ai: “O [le Atua] na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) E tusa ai o le faaalia o le agalelei, e lē tāitai ona faailogatagata Ieova.

⁶ Ona o Lē na Foafoaina Mea, ua avea ai Ieova o lē ana mea uma. Ua fetalai Ieova: “O ia te au manu uma i le vao matua, o manu e tataa i mauga e afe. Ua ou iloa manu felelei uma lava o i atu mauga; o manu tataa foi, o ia te au lava ia.” (Salamo 50:10, 11) Peitai, na te lē manumanu ma le manatu faapito i se mea. Ona o lona aaomafola, na te saunia ai mea mo ana foafoaga uma. Na faapea mai le faisalamo e uiga ia Ieova: “O loo e faamafola lou aao, ma faamaoona le manao o mea ola uma lava.”—Salamo 145:16.

7. O le ā e mafai ona tatou iloa mai le auala e tausia ai e Ieova tagata ese ma i latou e iai le manaomia?

⁷ E foai mai e Ieova mea e manaomia e tagata—e oo lava i tagata latou te lē iloa o ia, o ni tagata ese ia te ia. Na faamanatu atu e Paulo ma Panapa i ē sa tapuaia faatusa i le aai o Lusa e faapea sa “le tuu e [Ieova] o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.” (Galuega 14:17) E sili ona agalelei ma aaomafola Ieova ia i latou e iai le manaomia. (Teuteronome 10:17, 18) E tele mea e mafai ona tatou aʻoaʻoina mai ia Ieova i le faaalia o le agalelei ma le limafoai—ia talimalo—i isi.

8. Ua faaalia faapefea e Ieova lona aaomafola i le tausia o o tatou manaoga faaleagaga?

⁸ E lē gata i le saunia o le anoanoai o mea mo manaoga faaletino o ana foafoaga, ae ua tausia  foi e Ieova o latou manaoga i le itu faaleagaga. Ua gaoioi Ieova i se tulaga e sili ona agaalofa mo lo tatou lelei faaleagaga, e oo lava a o lei tāitai ona iloa e se isi o i tatou lo tatou iai i se tulaga e matuā leai se faamoemoe faaleagaga. Tatou te faitau i ai i le Roma 5:8, 10: “Ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. . . . ua lelei i tatou ma le Atua i le maliu o lona Alo, ina o fai i tatou mona fili.” O lena sauniuniga ua faafaigofie ai mo tagata agasala ona iai i se faiā fiafia faaleaiga ma lo tatou Tamā faalelagi. (Roma 8:20, 21) Sa faamautinoa foi e Ieova ua saunia mai taʻitaʻiga ma taʻiala talafeagai ina ia mafai ai ona tatou taulau i le olaga e ui lava i o tatou tulaga agasala ma le lē lelei atoatoa.—Salamo 119:105; 2 Timoteo 3:16.

9, 10. (a) Aisea e mafai ai ona tatou faapea atu o Ieova o ia o lē talimalo e atoatoa ona lelei? (e) E ao faapefea i ē tapuai moni ona faataitai atu ia Ieova i lenei itu?

⁹ Ona o lenei tulaga, e mafai ai ona tatou faapea atu o Ieova o ia moni lava o lē talimalo e atoatoa ona lelei i le tele o itu. E na te lē faagaloina ē matitiva, o ē faatauvaa, ma ē lē taualoa. Na te faaalia le naunau moni ma le manatu mamafa i tagata ese, e oo lava i ona fili, ma na te lē saili mo ni ona taui faaletino. I nei mea uma, pe ua lē avea ai ea o ia ma faaaoaoga silisili o lē talimalo e atoatoa ona lelei?

¹⁰ I le avea o le Atua o le alofa agalelei ma le aaomafola, ua finagalo ai Ieova ina ia faataitai atu ona tagata tapuai ia te ia. I le Tusi Paia atoa, ua tatou mātauina ai faaaoaoga o lenei uiga agalelei. Ua taʻua e le Encyclopaedia Judaica e faapea “i Isaraelu anamua, o le talimalo sa lē na o se mataupu e faaalia ai ni uiga lelei, ae o se faiga faavae tau amio tatau . . . O tū masani i taimi anamua o le Tusi Paia mo le faaafeina i se aiga o se tagata faimalaga ua lailoa ma le taliaina o se tagata ese i ni faatasitasiga a nisi, sa o se faiga e māfua mai ai uiga talimalo ma isi ona vala uma lea na tuputupu aʻe e avea o se uiga lelei e sili ona faaaloalogia i le aganuu faa-Iutaia.” I le sili atu nai lo na o se uiga ua faaesea ai se atunuu po o ni vaega o ni ituaiga o tagata, ua avea le talimalo o se uiga e tatau ona mātaulia ai tagata tapuai uma a Ieova.

O Sē Talimalo i Agelu

11. O le ā se faaaoaoga mataina e faaalia ai o le talimalo e aumaia ai ni faamanuiaga e lei faatalitalia? (Tagai foi i le Kenese 19:1-3; Faamasino 13:11-16.)

¹¹ O se tasi o tala e sili ona lauiloa a le Tusi Paia i le faaalia o le talimalo, o le tala lea ia Aperaamo ma Sara a o la tolauapi i lalo o laau tetele o Mamere, i autafa o Heperona. (Kenese 18:1-10; 23:19) E mautinoa o le tala lenei sa mafaufau i ai le aposetolo o Paulo ina ua ia avatu le timaʻiga: “Aua le galo le alofa i tagata ese; auā o lea ua talia ai e isi o agelu ma le le iloa.” (Eperu 13:2) O le suesueina o lenei tala o le a fesoasoani ia i tatou e iloa ai o le talimalo ua lē na o se mataupu o tū masani pe o se mea na aʻoaʻoina a o tuputupu aʻe. Nai lo lea, o se uiga faale-Atua e aumaia ai faamanuiaga ofoofogia.

12. Sa faapefea ona faaalia e Aperaamo lona alofa i tagata ese?

¹² Ua faaalia i le Kenese 18:1, 2 e faapea sa lē masani Aperaamo i tagata asiasi ma na te lei faatalitalia foi i latou, e pei ua na o ni tagata ese lava se toatolu na ui ane i ona tafāfale. E tusa ai ma faamatalaga a nisi tagata faimanatu, o le tū masani i tagata mai Sasaʻe, o se tagata e faimalaga atu i se nuu ese sa iai lana aiā na te faatalitalia ai le faaali ane o le talimalo ia te ia e tusa lava pe leai ma se isi na te iloa i lena nuu. Peitai sa lei faatali Aperaamo mo tagata ese ina ia faaali mai la latou aiā; na tausolomua o ia e faaali atu. Sa amata “momoʻe” atu o ia e faafetaiai i nei tagata ese a o lei tāitai ona oo mai ia te ia—sa faia nei gaoioiga uma [“a o matuā vevela lava le aso,” NW] ma ua 99 foi tausaga o le soifuaga o Aperaamo! Pe ua lē faaalia ai ea la iinei le mafuaaga na faaataata mai ai e Paulo le avea o Aperaamo o se faaaoaoga tatou te faataitai i ai? O le uiga lena o le talimalo, o le naunau moni atu po o le alofa i tagata ese, le manatu mamafa mo o latou manaoga. O se uiga lelei.

13. Aisea na “ifo toele” ai Aperaamo i tagata na asiasi ane?

 ¹³ Ua taʻu mai foi e le tala ia i tatou e faapea ina ua feiloai atu Aperaamo i tagata ese, ona “ifo toele lea o ia.” Aisea ua ifo atu ai i ni tagata e matuā lē masani ai? O le ifo atu, e pei ona faatinoina e Aperaamo, o se auala e faafeiloaia ai se malo faaaloalogia po o se tasi na te umia se tulaga maualuga, ae lē fenumiai ai ma se gaoioiga o le tapuai atu, lea e na o le Atua e fai atu i ai. (Faatusatusa i le Galuega 10:25, 26; Faaaliga 19:10.) O le ifo, e lē na o sina faaifo o le ulu ae o le matuā ifo “toele,” na tuuina atu ai ma le tatau e Aperaamo le mamalu i nei tagata ese o ni ē tāua. O ia o le ulu o se aiga toatele ma le tamaoaiga o augatamā anamua, peitai sa ia faaaloalo atu pea i nei tagata ese ua onomea i ai se mamalu tele nai lo o ia. Maeu le ese o lenei uiga mai le tū ua masani ai o le masalosalo i tagata ese, le uiga o le vaavaai laumata pe faapeī na tagata ese! Sa faataitaia moni lava e Aperaamo le uiga o le fuaitau: “Ia tausolomua ona ava o le tasi i le tasi.”—Roma 12:10.

14. O ā taumafaiga ma faataulaga na aofia ai i le faaalia e Aperaamo o le talimalo i tagata ese?

¹⁴ Ua faaalia i le isi vaega o totoe o le tala e faapea sa moni aʻiaʻi lagona faaalia o Aperaamo. Sa uigaese le matagofie o le taumafataga. E tusa lava po o se auaiga toatele e telē sa latou lafumanu, ae e lē o se mea masani i ni taumafataga se “tamai povi, e muʻamuʻa ma le lelei.” E tusa ai o tū masani sa taatele i lena vaipanoa, ua faapea mai ai le tusi a John Kitto o le Daily Bible Illustrations: “E lē tāitai ona faananau atu i ni mea mananaia seʻi vaganā i ni tausamiga tetele, po o le taunuu ane o se tagata ese; ma e na o le pau foi na o faatasiga e ʻai ai ni aano o manufasi, e oo lava i tagata e ana le tele o lafumamoe ma lafupovi.” Ona o le mafanafana o le tau sa lē mafai ai ona teu ni meaʻai ia e vave leaga, o lea, ina ia saunia se ʻaiga faapena, sa tatau ai ona faatoʻā faia uma lava sauniuniga i le taimi e manaomia ai ona faaaogā. E lētioa la i lenei tala puupuu, o loo faatolu ai ona aliali mai le upu “vave,” ma na momoʻe moni lava Aperaamo ina ia saunia mai le meaʻai!—Kenese 18:6-8.

15. O le ā le vaaiga tatau e ao ona iai i ni sauniuniga faaletino i le faaalia o le talimalo, e pei ona sa faataitaia mai e Aperaamo?

¹⁵ Ae peitai, o le fuafuaga, sa lei tau ina ia laulau mai se taumafataga tele e faaofo ai se tasi. E ui lava i na mau sauniuniga e tele na faia e Aperaamo ma Sara e sauniuni ai le ʻaiga, ae seʻi mātau faaupuga na muai faasino atu i ai e Aperaamo: “Seʻi aumaia sina vai e mulumulu ai o outou vae, ma outou malolo i lalo o le laau; ou te au mai foi sina mea e ʻai ia faamalosi ai o outou loto, ona outou o ai lea; auā o le mea lea ua outou o mai ai i la outou auauna.” (Kenese 18:4, 5) O “sina mea e ʻai” na avea o se faigaʻai tele o se tamai povi peti ma ni potoi areto o le falaoa lelei, o le suāsusu toʻa, ma le suāsusu—o se matuaʻi taumafataga lava. O le ā le lesona ua iloa mai ai? Afai e faaalia le talimalo, o le mea tāua lava, po o le mea e tatau ona faamamafa, e lē o le faapeī le uigaese ma le taugata o meaʻai ma meainu, pe o ā faafiafiaga tetele o le a saunia, ma isi lava mea. E lē faalagolago atu le talimalo i le pe gafatia e se tasi ona maua mai ni mea taugata. Nai lo lea, e faavae aʻe i le moni o le manatunatu mamafa mo le lelei o isi ma se faanaunauga e faia mea lelei mo isi i le tele e mafaia ai e se tasi. Ua faapea mai se faataoto a le Tusi Paia: “E sili ona lelei o le faaalumaga o laau ʻaina, a o i ai le alofa, i le povi ai le fale povi, a o i ai le ʻinoʻino,” ma o iina o loo iai le manatu autū i le talimalo moni.—Faataoto 15:17.

16. Na faaalia faapefea e Aperaamo lona talisapaia o mea faaleagaga e ala i mea sa ia faia i tagata na asiasi ane?

¹⁶ Ae peitai, e tatau ona tatou iloa, sa iai foi se uiga faaleagaga i le mea atoa na tupu. Atonu pe na manatunatu Aperaamo o nei tagata asiasi sa o ni avefeau mai ia Ieova. E faamaonia lenei mea i lona faafeiloaia o i latou i upu nei: “Le alii [Ieova] e, afai ua alofaina mai nei aʻu e oe, aua neʻi e maliu loa ia te au lau auauna.” * (Kenese 18:3; faatusatusa i le Esoto  33:20.) Sa lei muai iloa e Aperaamo pe sa iai se feau mai ia Ieova na aumaia e nei tagata mo ia, pe sa na ona latou ui ane lava i ona tafāfale. Ae ui i lea, sa ia talisapaia lava e faapea o loo galueaiina le fuafuaga a Ieova. Sa faatino e nei tagata se feau mai ia Ieova. Sa avea la o se fiafiaga mo ia pe afai na te faia se mea e lagolago atu ai i lea feau. Na ia iloa lelei le onomea ona avatu se tausiga e sili ona lelei mo auauna a Ieova, ma sa ia saunia ai le mea e sili ona lelei e tusa ai o tulaga na iai. O le faia faapea, e maua ai faamanuiaga faaleagaga, a lē mo ia pe e mo se isi tagata. Ae pei ona iu i ai, na matuā sili ona faamanuiaina Aperaamo ma Sara ona o lo la talimalo faamaoni.—Kenese 18:9-15; 21:1, 2.

O ni Tagata Talimalo

17. O le ā sa manaomia e Ieova mai le fanauga a Isaraelu e tusa ai o tagata ese ma ē matitiva sa mau ma i latou?

¹⁷ Sa lē tatau ona faagaloina le faaaoaoga mataina a Aperaamo e le nuu na tupuga mai ia te ia. I le Tulafono lea na tuuina atu e Ieova i le fanauga a Isaraelu na aofia ai sauniuniga mo le faaalia o le talimalo i tagata ese sa mau ma i latou. “O le tagata ese o loo āumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe; auā sa āumau outou i le nuu o Aikupito; o aʻu o Ieova lo outou Atua.” (Levitiko 19:34) Sa tatau i tagata ona faapitoa lo latou manatunatu atu i ē sa latou manaomia se lagolagosua faaletino ae aua neʻi faaleamanaiaina na tagata. Ina ua faamanuia atu Ieova ia i latou i le anoanoai o seleselega, ina ua latou olioli i a latou tausamiga, ina ua latou mālōlō mai a latou galuega mamafa i tausaga o le Sapati, ma i isi faatasiga, sa tatau i tagata ona manatua ē sa lē matuā tagolima—o fafine ua oti a latou tane, o tamaiti ua mātuaoti, ma tagata ese sa āumau ia i latou.—Teuteronome 16:9-14; 24:19-21; 26:12, 13.

18. E faapeī le tāua o le talimalo i le fesootai atu i le mauaina o le finagalo malie ma faamanuiaga a Ieova?

¹⁸ O le tāua o le agalelei atu, le limafoai, ma le talimalo i isi, ae maise i ē matitiva, e mafai ona iloa i le auala na feutagai ai Ieova ma le fanauga a Isaraelu ina ua latou faatalalē i le faaalia o nei uiga. Na faamanino mai e Ieova e faapea o le agalelei ma le limafoai i tagata ese ma ē matitiva, sa aofia i mea e manaomia ona faatino e ona tagata ina ia maua ai pea ana faamanuiaga. (Salamo 82:2, 3; Isaia 1:17; Ieremia 7:5-7; Esekielu 22:7; Sakaria 7:9-11) A o filigā le nuu i le faatinoina o nei mea ma isi mea manaomia, sa latou maua faamanuiaga ma olioli ai i le tele o mea faaletino ma mea faaleagaga. Ina ua matuā filia i latou i le sailia o o latou lava lelei manatu faapito ma galo ai le faaalia atu o nei uiga agalelei i ē matitiva, ona faamalaia ai lea e Ieova i latou, ma mulimuli ane oo i ai sala mamafa faamasinoga ia i latou.—Teuteronome 27:19; 28:15, 45.

19. O le ā e tatau ona tatou talanoaina atili?

¹⁹ Maeu la le tāua, ona tatou iloilo ifo i tatou lava, ma seʻi tilofaia pe o tatou ola e tusa ai o mea o loo faatalitalia mai e Ieova e tusa ai i lenei itu! Ua sili ona manaomia lena i aso nei pe a vaai atu i le agaga manatu faapito ma le fevaevaeai o loo iai i le lalolagi. E mafai faapefea ona tatou faaalia le talimalo faa-Kerisiano i totonu o se lalolagi fevaevaeai? O le mataupu lena o le a talanoaina i le mataupu o loo sosoo mai.

[Faaopoopoga i lalo]

E te Manatua?

□ O le ā le uiga o le upu faale-Tusi Paia lea ua faaliliuina i le “talimalo”?

□ I ā auala ua avea ai Ieova ma faaaoaoga e atoatoa ona lelei i le faaalia o le talimalo?

□ O le ā le telē na oo i ai le talimalo o Aperaamo?

□ Aisea e tatau ai i ē uma e tapuai moni ona “tausisi i le uiga o le talimalo”?

[Fesili mo le Suʻesuʻega]