Pe Mafai e Miti Ona Valoia le Lumanai?

MAI anamuā lava, o loo iai se naunautaiga tele i tagata e faatatau i miti. Na saunia e tagata Aikupito ni tusi se tele mo le faamatalaina o miti, sa iai foi tagata faamatala miti i Papelonia. Sa fai foi ma masani a tagata Eleni le ave o tagata mamaʻi e momoe i le malumalu o Asclepius, ina ia maua ai ni faatonuga e faatatau i o latou soifua maloloina e ala mai i a latou miti. I le lona lua o senituri T.A. na saunia ai e Artemidorus se tusi lea na ia tusia ai faamatalaga i faatusa o miti. E tele isi tusi faapena ua saunia talu mai lena taimi ae e faavae uma mai lava i lana tusi. E oo mai lava i aso nei, ua faia taumafaiga e faamatala ai miti, ae pe o latou aumaia moni ea se malamalamaga i mea o le lumanai?

Mo nei miti ina ia iai se uiga faapitoa mo le lumanai, e ao ona faaaafia mai e se malosi silisili. Tatou te maua i totonu o le Tusi Paia le tele o faataitaiga o le aumaia e le Atua o lena malosi. Na ia avatu ni miti faavaloaga i  ana auauna atoa foi ma nisi sa lē tapuai ia te ia. O le mea moni, ua faapea mai le Iopu 33:14-16: “Auā ua fetalai mai le Atua . . . i le miti, o le mea e vaaia i le po, ina o moe gagase tagata, ina o momoe i latou i luga o moega; ona faafaalogo ai lea e ia o taliga o tagata.”

Na faia e le Atua le mea lenei i le Farao o Aikupito i aso o Iosefa, o lē na soifua i le silia ma le 1,700 tausaga a o lumanai o tatou Aso Taatele. O loo maua le miti a Farao i le Kenese 41:1-7, ma le fuaiupu e 25 e oo i le 32, o loo faamatala ai e Iosefa le miti na valoia ai tausaga e fitu “e matuā tele ai le mau i le nuu uma o Aikupito,” e sosoo mai ai ma tausaga e fitu o le oge. Na taʻu atu e Iosefa ia Farao e faapea: “Ua faaali atu e le Atua [“moni,” NW] ia Farao o le mea o le a na faia.” (Kenese 41:28) Sa faavaloaga mai e le miti le mea moni lava na tupu.

E faapena foi le mea na oo i le tupu taʻutaʻua o Papelonia. Sa fai se miti a Nepukanesa na matuā atuatuvale ai, ae na lē mafai ona ia manatuaina. Ona ia tāloina lea o ona vaafaatau e faailoa atu ia te ia le miti ma lona uiga. Sa lē mafai ona latou faataunuuina lona manao.—Tanielu 2:1-11.

Ona o le Atua na avatua le miti i le tupu, na Ia faapogaia ai le perofeta o Tanielu e taʻu atu le miti ma lona faamatalaga. Fai mai le Tanielu 2:19: “Ona faaali mai ai lea i le faaaliga i le po ia Tanielu o le mea sa lilo.” Na taʻu atu e Tanielu o le Atua na faamatalaina le miti: “E le mafai i e popoto, ma vaafaatau, ma taulāitu, ma e o popoto i fetu, ona faaali atu i le tupu o le mea a le tupu ua lilo na ia fetalai atu ai. A o i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli.”—Tanielu 2:27, 28.

E iai taimi na tuuina mai ai e le Atua faatonuga i ona tagata e ala mai i miti, ae i isi taimi na te tuuina mai ai faamautinoga o le finagalo tauatua po o le fesoasoani ia i latou ina ia malamalama i le auala ua ia fesoasoani atu ai ia i latou. I le mea na tupu ia Iakopo, na faaali atu e le Atua lana faamaoniga e ala i se miti.—Kenese 48:3, 4.

Ina ua iloa e Iosefa, le tamā fai o Iesu, ua to Maria, na ia filifili ai e faateʻa ia te ia. Ona ia mauaina lea o ni faatonuga e ala mai i le miti e aua le faia faapea. Ua faapea mai le Mataio 1:20: “A o manatunatu o ia i na mea, faauta, ua faaali mai ia te ia le agelu a le Alii i le miti, ua faapea mai, ‘Iosefa e, le atalii o Tavita, aua e te fefe ina au mai ia te oe o Maria lau avā; auā o lana to mai le Agaga Paia lea.’” Mulimuli ane na ia maua se lapataiga e ala mai i se miti: “O le agelu a le Alii ua faaali mai ia Iosefa i le miti, ua faapea mai, ‘Tulai ia, ina ave le tama itiiti ma lona tinā, ma sosola i Aikupito.’”—Mataio 2:13.

O Miti e Lē Mai le Atua

Ona o le mea moni e faapea o le faamatalaina o miti e taatele lava ia i latou e lē o ni tagata o le Atua, ua faaalia ai o le tele o miti e lē mafai ona maufaatuatuaina e faamatala mai ai le lumanai. I aso o le perofeta a le Atua o Ieremia, na faapea mai ai perofeta pepelo: “Ua fai laʻu miti, ua fai laʻu miti.” (Ieremia 23:25) O o latou faanaunauga ia faaseseina tagata ina ia manatu faapea sa fetalai mai le Atua e ala mai ia i latou. E faatatau i nei ʻau faimiti, na faagaeeina ai Ieremia e faapea mai: “Auā o loo faapea ona fetalai mai o Ieova o ʻau, le Atua o Isaraelu, Aua neʻi faaseseina outou e o outou perofeta ua ia te outou, ma o outou taulāitu; aua foi neʻi faalogo i miti, ua faia talu outou; auā ua latou vavalo i le pepelo ia te outou i loʻu igoa . . . , o loo fetalai mai ai Ieova.”—Ieremia 29:8, 9.

Talu ai o nei perofeta pepelo o i latou o ni “taulaitu,” o a latou miti la e ono faaaafia mai e malosi o agaga leaga auā la latou fuafuaga ia faaseseina tagata. O le mea lava e tasi o loo faamatalaina i le Sakaria 10:2: “Auā ua tautala tupua i mea le aoga, ma e fai togafiti faataulāitu ua latou vaaia le pepelo, ma latou tala mai miti pepelo.”

 O le Tiapolo o le taufaasese sili lea o lē mo le faitau afe o tausaga ua ia faaaogā ai taʻitaʻi lotu e faapea mai ma le sese o loo fetalai mai le Atua ia i latou e ala mai i faaaliga ma miti, e pei lava ona faia e perofeta pepelo i aso o Ieremia ma Sakaria. E faatatau ia i latou na, na tusi ai le tusitala faagaeeina o le Tusi Paia o Iuta i Kerisiano o le uluaʻi senituri e faapea: “Auā ua o ane faaleiloga o isi tagata, ua leva foi ona muai tusia o i latou ia oo i lenei lava faasala, e faalematau i latou, ua liua e i latou le alofa tunoa o lo tatou Atua i le faamatāitu, ma ua latou faafiti i lo tatou Matai e toatasi ma lo tatou Alii, o Iesu Keriso.” Na fai mai Iuta e faatatau ia i latou na, i se isi faaupuga, o loo “moemiti.”—Iuta 4, 8.

Ia Iloilo a Latou Faamatalaga

E ono faapea mai se tagata na fetalai mai le Atua ia te ia i le miti ia po o le faapea foi o lana miti e faatatau i mea i le lumanai ua taunuu, peitai e lē lava na mafuaaga e talitonu ai ia te ia ma mulimuli tauaso ai i ai. Mātau faatonuga na tusia i le nuu o Isaraelu, o loo maua i le Teuteronome 13:1-3, 5: “Afai e tu mai ia te oe se perofeta, po o se faimiti, na te tuu atu foi ia te oe se faailoga po o se vavega, a taunuu foi lea faailoga po o lea vavega, na ia fai atu ai ia te oe, o loo faapea, Ina tatou mulimuli atu ia i atua ese, o e na outou le iloa, ma ia tatou auauna i ai; aua neʻi e faalogo i upu a lea perofeta, po o lena faimiti . . . A o lena perofeta, po o lena faimiti, e fasiotia o ia.” Na faataga e le Atua nei tagata e tautatala atu ma le faaʻoleʻole e tofotofo ai le faamaoni o ona tagata.

Nai lo le talitonu tauaso i faamatalaga a nei tagata faimiti fai vavega, o le gaoioiga atamai mo i tatou o le iloiloina lea o a latou faamatalaga ina ia alofia ai le faaseseina e le taufaasese sili lē vaaia, o lē o loo ia “faasese i le lalolagi uma.” (Faaaliga 12:9) Ae e faapefea ona iloiloina ma le saʻo i latou?

O le Afioga tusia a le Atua o lo tatou taʻiala tauatua lea ua aumaia i le upu moni. E faatatau i lenei taʻiala, na fetalai ai Iesu Keriso e faapea: “O lau afioga o le upu moni lea.” (Ioane 17:17) Ua fautuaina la i tatou i le 1 Ioane 4:1: “Le au pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi.” Pe a faatusatusaina ma le faaeteete ma le Tusi Paia, o a latou faamatalaga, o filosofia, ma gaoioiga e feteenai ma le Tusi Paia. O le Afioga a le Atua o le pule lea po o le ā le upu moni.

Pe o le tagata faimiti ea lea e faapea mai o loo ia te ia se poto faapitoa, o ona ia faaaogaina moni ni faiga faataulaitu po o nisi gaoioiga faaagaga? Afai o le tulaga lena, ua taʻusalaina o ia e le Afioga a le Atua. “Aua neʻi iloa ia te oe se tasi . . . o se fai togafiti faataulāitu, o se iite i ao o le lagi, po o se saili faailoga, po o se taulāitu, po o se ʻapele, po o se fesili atu i aitu, po o se ua i ai le aitu vavalo, po o se saili atu i e ua oti. Auā e inosia e Ieova o i latou uma o e faia na mea.”—Teuteronome 18:10-12.

Afai e faapea mai le faimiti o loo ia te ia se solu (agaga) e lē oti, e feteenai lena ma le faamatalaga manino a le Afioga a le Atua ua faapea mai: “O le tagata [“solu,” NW] e agasala e oti ia.” (Esekielu 18:4) Po o ia faamaualugaina ea ia lava ma taumafai e tataʻi atu nisi ia te ia? Ua fautua mai le Mataio 23:12 e faapea: “O sē faamaualuga o ia ia te ia, e faamaulaloina lea.” Ma ua lapataia e le Galuega 20:30 ia Kerisiano e faapea: “E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.”

Pe e lagolagoina ea e le faimiti ia gaoioiga sauā? E taʻusalaina o ia e le Iakopo 3:17, 18 lea ua faapea mai: “A o le poto mai lugā e muamua ona mamā, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faatagā fai. Ua luluina foi le fua o le amiotonu ma le filemu e i latou o e faatupuina le filemu.” Pe e  na te sailia le pule faapolotiki po o le aafia i le lalolagi? E matuā taʻusalaina o ia e le Afioga a le Atua i le faapea mai: “O sē fia uo ma le lalolagi, ua avea o ia ma ita i le Atua.” O lea ua faaalia mai e le Tusi Paia mea e pepelo.—Iakopo 4:4.

Afai e fai se miti a se tagata i le maliu o se tasi o le aiga po o se uo, atonu pe na māfua lea mea ona o lona manatu mamafa i lena tagata. O le oti la o le tagata i le po tonu na fai ai le miti e lē avea lena ma faamaoniga e faapea ai o le miti e faavaloaga. Auā a o iai miti faapea ua taunuu, ae faitau selau isi miti foi faapea e lē taunuu.

E ui lava sa faaaogā e le Atua miti i taimi ua mavae e faaalia ai mea faavaloaga ma tuuina mai ai faatonuga a o sauniunia lana Afioga tusia, peitai ua lē o toe manaomia ona ia faia faapea i aso nei. O loo iai i lena Afioga tusia ia faatonuga uma mai le Atua e manaomia e tagata i aso nei, atoa foi ma ona valoaga e faatatau i mea tutupu e sili atu i le afe tausaga i le lumanai. (2 Timoteo 3:16, 17) E mafai la ona tatou talitonu ma le mautinoa o a tatou miti e lē o ni faaaliga mai le Atua i mea tutupu i le lumanai ae o faagasologa o gaoioiga tāua a o tatou faiʻai ina ia faatumauina ai le lelei o o tatou mafaufau.

[Ata i le itulau 7]

E pei ona faaalia i le miti a Farao mea o le a oo i na taimi, ua faapena ona faasusulu mai e le Afioga a le Atua le malamalama i lo tatou lumanai