‘Tausia o le Auaiga o se Tasi’—Faafetaiaia le Luʻi i Atunuu Tauatiae

“A E AFAI e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.” O le faamatalaga lena a le aposetolo o Paulo. (1 Timoteo 5:8) A o atili faigata ona tausia aʻe se aiga i atunuu tamaoaiga, o le faia faapea i atunuu tauatiae ua avea ma luʻi ua sili atu ona faigata.

O se faataitaiga, i Aferika, o faigata tau tamaoaiga ua avea ma tulaga masani, e lē o se mea fou. E lē faigofie ona maua ni galuega, ae a maua foi, e ono manaomia e le tane ma le avā ona faigaluega uma ina ia maua mai ai na o mea lava e manaomia. E ono faimalaga atu ulu o aiga i se mea mamao e saili galuega ai, ae tuua na o latou taitoalua ma fanau mo ni masina—pe mo ni tausaga foi. E lē faigofie foi ona maua ni fale lelei e nonofo ai. O le tele o aiga Aferika e toatele; e tele lava la ina feomaʻi mea e nonofo ai, e leai se toafimalie. E masani ona iai tulaga lē talafeagai tau le soifua maloloina.

E faaopoopo atu i lena, o aganuu a tagata lava latou, ma tū ma aga mai anamuā, atoa ma manatu ua masani ai le toatele e ono feteenai i le agaga o le Afioga a le Atua, le Tusi Paia. Manatu mai i nisi o uiga faaalia agaʻi i faaipoipoga atoa ma tamaiti. O nisi o ulu o aiga e talitonu faapea e na o le pau lava le latou mea e fai o le totogi o le tau o le fale ma pili o aʻoga. O a latou avā —ma i nisi taimi e oo i tamaiti ua matutua—e tuu atu ia te i latou le galuega o le saili mai o mea masani e pei o lavalava ma meaʻai.

E faaopoopo atu i lena, o nisi tane e ia i latou le manatu e faapea “o aʻu tupe o tupe a aʻu, ae o au tupe [tupe a le avā] o aʻu tupe foi na.” E masani ona tutupu ai faalogona lē fiafia i avā o loo faigaluega. Na faitio mai se tasi fafine mai Tanzania: “E faaalu tupe e inu ai, ae lē mo matou po o le fanau foi. Matou te faia faatasi galuega, po o le sili atu foi mea e matou te faia, peitai na te ave uma tupe ma fai mai ia i matou o ana tupe—o tupe na ia sueina.”

E ui i lea, o Kerisiano, e faamuamua le Afioga a le Atua nai lo aganuu e masani ai po o manatu taatele. Ua aumaia e le Tusi Paia ni taʻiala e fesoasoani ai i le mataupu o le tausia aʻe o le aiga o se tasi. Mo se faataitaiga, ua faapea mai “auā e le tatau ona faaputu oa e le fanau mo mātua, a o mātua mo le fanau.” (2 Korinito 12:14) O lea la, o tane e matataʻu i le Atua o ē e mafai ona faigaluega e lē faapea a paiē ona tuu atu lea i a latou avā po o fanau ua matutua e saili maia lavalava ma meaʻai mo le aiga; o le mataupu silisili lena e fitoitonu lava i le ulu o le aiga.—1 Korinito 11:3.

E moni, atonu e lē lava le totogi o le tane e tausi ai manaoga uma o lona aiga. Peitai afai e maua mai e lana avā ni tupe ona e faigaluega, o le tane Kerisiano e lē tatau ona lē fiafia. Nai lo lena, na te feagai ma le faaaloalo ia te ia o sē la te “mafuta.” (Malaki 2:14) Ona o lea, o le a ia lē aveina ai tupe ia na galue mamafa ai le avā ma faamaimau e aunoa ma le amanaiaina o faalogona o le avā. O le mea la te fai, e ‘talanoa faatasi’ ma lana avā ma filifili pe faapefea ona faaaogā a la tupe i se auala e sili ona aogā ai i lo la aiga atoa. (Faataoto 13:10) Pe afai e mafai, e ao ona faataga atu e  le tane i lana avā se avanoa e faasoa ai e ia tupe, e pei ona sa olioli ai le “avā amio lelei” i taimi o le Tusi Paia. (Faataoto 31:10, 11, 16) O le mulimuli i fautuaga a le Tusi Paia e faatatau i nei mea e maua ai le fiafia ma le loto malie i le aiga.

Faafetaiaia Luʻi o le Leai o se Galuega

Seʻi manatu i le faafitauli o le leai o se galuega. Pe a oo ina tau leai ni galuega ma ua laiti foi totogi, e toatele ulu o aiga i Aferika latou te suʻe galuega atu e mamao ese mai le aiga—i mea e eli ai le koale, i falegaosimea, i mea e iai lafu manu, ma i faatoaga. Pe afai e oo se tane Kerisiano i lenei tulaga, e ono oo atu ai o ia i le matuā nofo ese mai i ana aumea tapuai ae avanoa ai i ni aufaatasiga sili ona leaga. (Faataoto 18:1; 1 Korinito 15:33) E ui atonu e taumafai malosi lona aiga e faafetaiaia le tulaga ua tulaʻi mai, ae ono pagatia i latou ona ua leai se tamā i le aiga e taʻimua i mea faaleagaga po o le avatu foi o le lagolagosua tau faalogona. I nisi taimi, o le umi ona toesea e ono oo ai i le mea lea sa manaomia ona taofia—le faigata tau tupe.

Ua faapea mai se tasi tinā: “Na alu laʻu tane e eli auro. Sa ia fuafua e foi mai pe a uma le masina pe a umi o le lua masina. Na iu ina alu mo le tausaga e tasi! Na tuua aʻu ma tamaiti e toaono e tausi. Sa tatau ona ou totogia le fale. Ona sa ou maʻi, sa tatau ona ou totogia pili o le falemaʻi. Sa matou manaomia ni lavalava, ma sa manaomia ona matou ʻaai i aso uma. Sa leai saʻu galuega. Sa faigata tele. O le vaega sili ona faigata o le tausia o le fanau faaleagaga—suesuega a le aiga, o sauniga, ma le galuega talaʻi. O le fesoasoani mai a Ieova na matou sao mai ai.”

E oo lava i nisi tinā ua latou lagona e ao ona latou tuua o latou aiga mo ni masina pe mo ni taimi uumi ina ia faigaluega. O nisi ua avea ma tagata faatauoloa femalagaai ma e seāseā oo mai i le aiga. Ua faamalosia ai foi fanau ua matutua ina ia fai le galuega a mātua o le faia o meaʻai, faia o feau i le aiga, e oo lava i le aʻoaʻoina o fanau laiti. Ua afaina ai le faia o se sao i galuega faaleagaga. Ioe, e mafai ona matuia omiga i le aiga!

O le mea moni, pe a oo ina faigata tulaga tau tamaoaiga, atonu e oo ina leai se isi mea e mafai ona fai e se matua e tausi ai lona aiga nai lo le saili atu i galuega e mamao ese ma le aiga. I taimi o le Tusi Paia sa tatau i atalii o Iakopo ona tuua lo latou aiga ina ia maua mai ni meaʻai mai Aikupito. (Kenese 42:1-5) O lea pe a tulai mai tulaga faapena i aso nei, e ao i ulu o aiga ona fuafua lelei po o ā lava aogā faaletino e maua mai i se galuega mamao e fua i le faaleagaina faaleagaga ma faalogona ona o le valavala mo se taimi umi. E toatele aiga e sili ia i latou lo latou onosaia o faigata tau tupe nai lo le valavala mo se taimi umi. Latou te manatua upu a Paulo o loo i le 1 Timoteo 6:8: “Afai ua maua e i tatou o mea e aai ai ma mea e oofu ai, ia gata ai o tatou manao.”—Faatusatusa i le Faataoto 15:17.

O le tele o taimi e iai isi mea e mafai ona fai e aunoa ma le malaga mamao ese atu. I le faataitaia o le uta mamao ma le taulamua e fai se mea, ua maua ai galuega a isi e ala i le faia o auaunaga aogā. * (Faatusatusa i le Faataoto 31:24.) Atonu foi o le mea e manaomia o le talia o galuega maulalo ia e vaai faatauvaa i ai isi. (Efeso 4:28) Sa ‘galue mamafa foi le aposetolo o Paulo i le ao ma le po’ ina ia alofia le fai o ia ma avega mamafa i isi i tulaga tau tupe. (2 Tesalonia 3:8) E mafai ona mulimuli tane Kerisiano i aso nei i lena faataitaiga.

O Faafitauli i le Faaaʻoʻogaina

O le isi faafitauli o le faaaʻoʻogaina. I nisi vaipanoa maotua, e masani ai mātua i le ave ese atu o a latou fanau e nonofo ma o latou aiga mo se taimi umi ina ia maua ai ni aʻoga talafeagai mo tamaiti. O le nonofo ese mai o latou mātua, e masani ai ona faafaigata i nei tamaiti  ona ō i sauniga po o le auai i le faiva i le fanua. O le lē maua o se aoaiga talafeagai, e faigofie ai ona maileia i latou i aumea leaga. Ma o le iuga, ua lafoaia ai e le toatele ala o le olaga faa-Kerisiano.

E lē fesiligia le iai o aogā o aʻoga a le lalolagi. Ae ua matuā faatāuaina e le Tusi Paia aʻoaʻoga faaleagaga, ma ua tuuina atu e le Atua i mātua le tiute tauave e avatu ai na faatonuga. (Teuteronome 11:18, 19; Faataoto 3:13, 14) O le auina ese atu la o le tamaitiiti mo se taimi umi, e ono lē faataunuuina ai taumafaiga a mātua e tausia aʻe o ia “i aoaiga ma apoapoaiga a le Alii.” —Efeso 6:4. *

Pe a foliga mai e lē lelei ni aʻoaʻoga e maua i le vaipanoa, atonu o le a leai se filifiliga e faia e mātua ae faia loa le mea sili la te mafai ina ia aʻoaʻo atu ai i le la fanau ni tomai talafeagai e manaomia. E maua foi le fesoasoani mai lo tatou “Aʻoaʻo Sili,” o Ieova. (Isaia 30:20, NW) E maua foi i faapotopotoga o Molimau a Ieova i le atunuu ia sauniuniga auā le aʻoaʻoina. E tele faapotopotoga e fai ai vasega e aʻoaʻo ai le tusitusi ma le faitau. E mafai foi ona avea le Aʻoga o le Faiva Faatiokarate ma fesoasoani e faaleleia ai le tomai o le tamaitiiti e faitau ma tautala ai ma le manino.

Se Vaaiga Paleni i le Fai Fanau

O le tausia aʻe o fanau e matuā faigata lava pe afai e toatele. E masani ona faapea mai mātua i Aferika latou te alolofa i fanau; o le pogai lea, latou te faia ai po o le a lava le tele latou te mananao ai! E ui e ono manatu i fanau e faaono maua mai ai le tamaoaiga, ae toatele mātua ua lē mafai ona latou tausia faalelei a latou fanau ona ua toatele.

E moni, ua faapea mai le Tusi Paia o le “fanau o le tofi lea mai ia Ieova.” (Salamo 127:3) Peitai, mātau mai, na tusia na upu i le taimi o sologa lelei mea i Isaraelu. Mulimuli ane, ona o oge tetele ma taua na avea ai le fai fanau ma avega mamafa. (Auega 2:11, 20; 4:10) I le vaai atu la i le tele o tulaga faigata o loo iai i atunuu tauatiae, o Kerisiano e maufaatuatuaina e ao ona matuā manatunatu mamafa pe toafia se fanau e mafai ona la fafagaina, faalavalava, tausia, ma toleniina faalelei. O le iloiloina lelei o tupe faaalu, ua filifili ai le toatele o ulugalii e sili le teea o aganuu masani o le faatoatele o se aiga ae faatapulaa le aofai o a la tamaiti. *—Faatusatusa i le Luka 14:28.

E manino lava, o nei “aso e gata ai e oo mai ai aso faigata.” (2 Timoteo 3:1-5) A o paʻū atu lenei faiga o mea i lona iuga e lē masuia, e mautinoa lava o le a faateteleina omiga i aiga i atunuu tauatiae. Peitai o le pipii mau atu i mataupu silisili o le Afioga a le Atua, e mafai ai ona taulau ulu o aiga i le tausia aʻe o manaoga faaletino ma faaleagaga o o latou aiga, auā ua folafola mai e Ieova le taʻutinoga lenei ia i latou e auauna faamaoni ia te ia: “Ou te le tuua lava oe, ou te le tuulafoai lava ia te oe.” (Eperu 13:5) Ioe, e oo lava i atunuu matitiva, e mafai lava e Kerisiano ona faafetaiaia ma le manuia le luʻi o le tausia o o latou aiga!

[Faaopoopoga i lalo]