Nofofua—Se Avanoa i le Auaunaga ma le Lē Fetosoaiina

“[O lona uiga] ia auauna lelei [pea] i le Alii ma le loto le fetosoaiina.”—1 KORINITO 7:35.

1. O ā ni tala lē manuia na logotala i ai Paulo e faatatau i Kerisiano i Korinito?

SA MANATU mamafa le aposetolo o Paulo i ona uso Kerisiano i Korinito, i Eleni. Pe tusa e lima tausaga muamua atu, na ia faavaeina ai le faapotopotoga i lena aai tamaoaiga sa lauiloa i ana amioga lē tatau. Nei la, i le tusa o le 55 T.A., a o iai i Efeso, i Asia Itiiti, na ia logotala ai i ni tala lē manuia mai Korinito i ni fevaevaeaiga i le faapotopotoga, ona o ē ua avea ma soo o tagata ma ua lē amanaiaina ai tulaga leaga o amioga lē tatau. E lē gata i lea, na maua e Paulo se tusi mai Kerisiano i Korinito e fesiligia ai se taʻiala e faatatau i faiā faaleituaiga, le lē faaipoipo, le faaipoipo, o teteaga, ma le toe faaipoipo.

2. Na faapefea i amioga leaga sa taatele i Korinito ona foliga mai na aafia ai Kerisiano i lea aai?

² O le taatele o amioga sili ona leaga i Korinito e foliga mai na aafia ai le faapotopotoga i ni vala se lua. Sa lē manatu mamafa nisi Kerisiano i le siosiomaga lē lelei tau amio ma ua faaauau ai pea le faia o amioga lē tatau. (1 Korinito 5:1; 6:15-17) E foliga mai o isi, ona o o latou lagona e faatatau i faafiafiaga i faiga faaleituaiga sa matuā taatele i so o se vaipanoa i le aai, na matuā oo atu i se tulaga ua latou fautuaina le lē tatau ona toe faia so o se feusuaiga, e oo lava foi i ulugalii ua faaipoipo.—1 Korinito 7:5.

3. O ā mataupu na muai taʻua e Paulo i lana uluai tusi i uso i Korinito?

³ I le tusi umi a Paulo lea na tusi atu ai i uso i Korinito, na ia muai taʻua le faafitauli o le lē autasi. (1 Korinito, mataupu 1-4) Sa ia timaʻi atu ia i latou ina ia alofia le mulimuli atu i manatu o tagata, auā e na ona taʻitaʻia atu ai i fevaevaeaiga e faaleagaina ai. Sa tatau ona autasi i latou o se “au faigaluega” a le Atua. Ona ia avatu lea ia i latou ni faatonuga patino e faatatau i le tausia o le mamā tau amio o le faapotopotoga. (1Ko Mataupu 5, 6) Ina ua uma lena, ona sagai atu loa lea o le aposetolo i la latou tusi.

Na Fautuaina le Lelei o le Nofofua

4. O le ā na faasino atu i ai Paulo ina ua ia faapea mai “e lelei ona le tago se tagata [tamaloa] i se fafine”?

⁴ Na ia amata mai: “A o mea na outou tusi mai ai, e lelei ona le tago se tagata [tamaloa] i se fafine.” (1 Korinito 7:1) O le faaupuga lea ‘ia lē tago i se fafine’ o lona uiga ia alofia le paʻi totino atu i se fafine mo ni faamaliega i faiga faaleituaiga. Talu ai ua uma ona taʻusalaina e Paulo le faitaaga, o lea la ua ia faasino atu nei i faiā faaleituaiga i totonu o le faatulagaga o le faaipoipoga. O lea la, ua fautuaina nei e Paulo le lelei o le tulaga nofofua. (1 Korinito 6:9, 16, 18; faatusatusa i le Kenese  20:6; Faataoto 6:29.) E lei leva mulimuli ane, ae tusi mai o ia: “O laʻu lenei upu i tagata nofo fua ma fafine ua oti a latou tane, e lelei ona latou nonofo pea pei o aʻu nei.” (1 Korinito 7:8) Sa lei faaipoipo Paulo, atonu pe ua maliu sana avā.—1 Korinito 9:5.

5, 6. (a) Aisea ua manino mai ai sa lei fautuaina atu e Paulo se ituaiga o olaga i monaseri lea e faasā ai le faaipoipo? (e) Aisea na fautuaina ai e Paulo le lelei o le nofofua?

⁵ E foliga mai sa tau iai sina iloa o Kerisiano i Korinito i nisi o filosofia a Eleni, lea sa iai nisi o a latou talitonuga na matuā faasilisilia ai le faafitia e se tasi o ona faanaunauga totino. Pe faamata o le mafuaaga lena na fesiligia ai e uso i Korinito Paulo pe “lelei” mo ni Kerisiano ona latou alofia feusuaiga uma lava? O le tali a Paulo sa lei atagia mai ai se filosofia a Eleni. (Kolose 2:8) I le eseesega ma faifeau a Katoliko, sa lē tāitai ona ia fautuaina atu le lelei o se olaga e faafitia ai faalogona totino ma faasā ai ona faaipoipo, i totonu o monaseri po o nofoaga o monike, e peiseai ua faapitoa ona paia tagata e nofofua ma mafai ai ona latou maua lo latou lava faaolataga e ala i le ituaiga o olaga o loo latou ola ai ma a latou tatalo.

⁶ Sa fautuaina e Paulo le lelei o le nofofua, “ona o le faigata i ona po nei.” (1 Korinito 7:26) Atonu sa ia faasino atu i taimi faigata ia sa fesagai ma Kerisiano, lea atonu na faateleina ona o faaipoipoga. (1 Korinito 7:28) Sa faapea atu lana fautuaga i Kerisiano e lei faaipoipo: “E lelei ona latou nonofo pea pei o aʻu nei.” Na ia faapea atu i tane ua feoti a latou avā: “Ua tatalaina ea oe i le avā? Aua e te saili i se avā.” Na ia tusi atu i se Kerisiano ua oti lana tane: “Afai e nofo fua pea ia, e sili lona manuia [fiafia], o laʻu taofi lea; o loʻu manatu foi ua ia te au le Agaga o le Atua.”—1 Korinito 7:8, 27, 40.

E Lē Faamalosia Ina ia Nofofua Pea

7, 8. O le ā e faaalia ai sa lē faamalosia e Paulo se Kerisiano ina ia nofofua pea?

⁷ E mautinoa lava sa taʻitaʻia Paulo e le agaga paia o Ieova ina ua ia avatua lenei fautuaga. O lana talanoaga atoa i le tulaga o le lē faaipoipo ma le faaipoipo o loo faaalia ai se uiga paleni ma le pulea lelei. E na te lē o faia faapea o se mataupu e iloa ai le faamaoni pe lē faamaoni foi. Ae nai lo lea, o se mataupu o le filifiliga saʻoloto, o loo fautuaina ai le tulaga nofofua mo i latou o ē mafai ona tausisia le mamā a o iai i lena tulaga.

⁸ E lei umi talu ona uma le faapea mai “e lelei ona le tago se [tamaloa] i se fafine,” ae toe faaopoopo mai Paulo: “A ona o le faitaaga, ia taitasi le tane ma lana lava avā, ia taitasi foi le fafine ma lana lava tane.” (1 Korinito 7:1, 2) Ina ua uma ona fautua mai i tagata e lei faaipoipo ma fafine ua oti a latou tane ina ia “nonofo pea pei o aʻu nei,” sa vave ona ia toe faaopoopo mai: “Peitai afai latou te le lavā oono, ia faaipoipo i latou, auā e sili le faaipoipo i lo le mu i le manao.” (1 Korinito 7:8, 9) Ona ia toe fautua atu foi lea i tane ua oti a latou avā: “Aua e te saili i se avā. A e ui lava ina e faaipoipo e te le agasala ai.” (1 Korinito 7:27, 28) O lana fautuaga paleni ua atagia atu ai le filifiliga saʻoloto.

9. E tusa ai o faamatalaga a Iesu ma Paulo, ua faapefea ona avea le faaipoipo ma le nofofua o ni meaalofa uma mai le Atua?

⁹ Na faaalia e Paulo e faapea, o le faaipoipo ma le nofofua o ni meaalofa uma mai le Atua. “A o loʻu loto ia faapei o aʻu nei tagata [tamaloloa] uma; a e peitai e taitoatasi ma lana lava mea alofa e maua mai le Atua, e taitasi ma lona uiga, o lea ma lea.” (1 Korinito 7:7) E mautinoa sa ia mafaufau i le mea na fetalai i ai Iesu. Ina ua uma ona faamaʻoti mai e faapea o le faaipoipoga o le fuafuaga mai le Atua, ona taʻua lea e Iesu e faapea, o le lotomalie e nofofua ona o le fia auauna mo manaoga o le Malo o se meaalofa faapitoa: “E le mafai ona talia lena upu e tagata uma, ua na o e ua foaiina atu i ai; auā o i ai eunuka o e faapea ina fanau mai; o i ai foi eunuka o e ua faaeunukaina e tagata; o i ai foi eunuka o e ua faaeunukaina i latou e i latou, ona o le malo o le lagi. Ai se na te mafaia ona talia, ina talia lea e ia.”—Mataio 19:4-6, 11, 12.

 Ia Faaavanoa Atu mo le Meaalofa o le Nofofua

10. E mafai faapefea e se tagata ona “faaavanoa atu” mo le meaalofa o le nofofua?

¹⁰ E ui sa taʻua uma e Iesu ma Paulo le nofofua o se “mea alofa,” ae leai se isi o i laua na faapea mai o se meaalofa faavavega ua na o nisi latou te mauaina. Na fetalai Iesu “e le mafai ona faaavanoa atu . . . e tagata uma” lena meaalofa, ma na ia timaʻi atu ia i latou o ē mafaia ona fai ina ia “faaavanoa atu,” auā o le mea lena na faia e Iesu ma Paulo. E moni, na tusi Paulo faapea: “E sili le faaipoipo i lo le mu i le manao,” peitai sa tautala o ia e faatatau ia i latou o ē na “le lavā oono.” (1 Korinito 7:9) I uluai tusitusiga a Paulo, sa ia faaalia ai faapea e mafai e Kerisiano ona alofia le mu i le manao. (Kalatia 5:16, 22-24) O le savavali i le agaga o lona uiga ia faataga le agaga o Ieova e taʻitaʻia o tatou laasaga uma. Pe mafai ea e Kerisiano talavou ona faia lenei mea? Ioe, pe afai latou te mulimulitui i le Afioga a Ieova. Na tusi mai le faisalamo: “E faapefea ea ona faamamāina e le taulealea [po o le tamaitai] o lona ala? Ona ua tausi i ai e tusa ma lau afioga.”—Salamo 119:9.

11. O le ā le uiga o le ‘savali i la le agaga’?

¹¹ E aofia ai i lenei mea le leoleomalu mai manatu tuufau ua faasalalau mai le tele o polokalame o televise, o tifaga, o tala i mekasini, i tusi, ma upu o pese. O na manatu ua faaautū uma i faanaunauga o le tino. O se Kerisiano talavou pe o se teine po o se tama, o lē manao e fia faaavanoa o ia mo le nofofua e tatau ona “le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga.” (Roma 8:4, 5) O mea i la le agaga o le amiotonu, o le amio mamā, e alofagia, e amio lelei. O Kerisiano, o ē talavou ma ē matutua, e lelei pe a latou “manatunatu i ia lava mea.”—Filipi 4:8, 9.

12. O le ā ua tele ina aofia ai i le faaavanoa atu mo le meaalofa o le nofofua?

¹² O le faaavanoa atu mo le meaalofa o le nofofua e tele ina avea o se mataupu o le faaautū atu o le loto o se tasi i lena sini ma tatalo ia Ieova mo le fesoasoani ina ia sailia ai. (Filipi 4:6, 7) Na tusi Paulo e faapea: “O lē ua mau lona loto, e lē manaomia ona faia, a ua ia te ia foi le pule i lona lava loto ma ua faia lenei filifiliga i lona lava loto, ia taofi i lona tulaga muli, o le a lelei lea mo ia. O lenei, o lē tuuina atu lona tulaga muli i le faaipoipoga ua lelei lana mea e fai, a o lē e lē tuuina atu lona tulaga muli i le faaipoipoga ua sili ona lelei mo ia.”—1 Korinito 7:37, 38, NW.

E Nofofua Ona o se Fuafuaga

13, 14. (a) O le ā le faatusatusaga na faia e le aposetolo o Paulo i le va o Kerisiano e lei faaipoipo ma Kerisiano ua faaipoipo? (e) Ua na o le ā e mafai e se Kerisiano nofofua ona fai e “sili ona lelei” ai o ia nai lo i latou ua faaipoipo?

¹³ E lē teʻi lava ua taʻuleleia le nofofua. O le ā la le uiga, e mafai ai ona “sili ona lelei”? O le mea moni lava e faalagolago atu i le auala e faaaogā ai e se tagata le saʻolotoga ua maua ai. Na tusi Paulo: “Ou te loto lava ina neʻi popole outou. Ua popole le nofo fua i mea a le Alii i se mea e fiafia mai i ai le Alii; a o le ua faaipoipo e popole ia i mea a le lalolagi i se mea e faafiafia ai le avā; e vaeluaina lona mafaufau. Ua popole le tamaitai e leʻi faaipoipo po o le teine i mea a le Alii ina ia paia o ia, o le tino atoa ma le agaga; a o le tamaitai faaipoipo e popole ia i mea a le lalolagi i se mea e faafiafia ai le tane. O laʻu lenei upu e fai atu ia te outou e aoga ai ia te outou; e le ina ia ou lafo se matāsele ia te outou, a e peitai ina ia matagofie ai; ina ia auauna lelei [pea] i le Alii ma le loto le fetosoaiina.”—1 Korinito 7:32-35.

¹⁴ O se Kerisiano nofofua na te faaaogā lona tulaga lē faaipoipo e sailia ai sini manatu faapito, e na te lē o faia se mea e “sili ona lelei” nai lo Kerisiano ua faaipoipo. O loo nofofua pea o ia, e lē “ona o le malo o le lagi,” ae mo ana lava mafuaaga. (Mataio 19:12) E tatau i le alii po o le tamaitai e lei faaipoipo ona “popole i mea a le Alii,” ia popole ina ia “maua le faamaoniga a le Alii,” ma ia “auauna lelei  [pea] i le Alii ma le loto le fetosoaiina.” O lona uiga ia tuutoina atu atoatoa e auauna ia Ieova ma Keriso Iesu. Ua na o le faia faapea ua “sili ona lelei” ai mea o loo faia e alii ma tamaitai Kerisiano e lei faaipoipo nai lo Kerisiano ua faaipoipo.

O Galuega e Fai ma le Lē Fetosoaiina

15. O le ā le vala autū o le feau o loo taʻu mai e Paulo i le 1 Korinito mataupu e 7?

¹⁵ O le feau atoa o loo taʻu mai e Paulo i lenei mataupu e faapenei: E ui e talafeagai le faaipoipo ma, i nisi o tulaga, ua lelei ona faia faapea e nisi, ae o le nofofua e lē mafaafitia le aogā mo se alii po o se tamaitai Kerisiano o loo manao ina ia auauna ia Ieova e aunoa ma le tele o ni mea e fetosoaiina ai. A o “vaeluaina” le tagata ua faaipoipo, ae o le Kerisiano e lei faaipoipo o loo saʻoloto e uaʻi atu ona manatu i “mea a le Alii.”

16, 17. E mafai faapefea e se Kerisiano nofofua ona sili le lelei o lona uaʻi atu i “mea a le Alii”?

¹⁶ O ā mea a le Alii lea e mafai e se Kerisiano e lei faaipoipo ona sili atu le saʻoloto e uaʻi atu i ai nai lo tagata ua faaipoipo? I se isi talanoaga, na fetalai ai Iesu e faatatau i “mea a le Atua”—o mea e lē mafai e se Kerisiano ona avatu ia Kaisara. (Mataio 22:21) O mea nei e matuā manaomia i le olaga o se Kerisiano, o le tapuaiga, ma le auaunaga.—Mataio 4:10; Roma 14:8; 2 Korinito 2:17; 3:5, 6; 4:1.

¹⁷ I le tulaga masani, e sili atu ona saʻoloto tagata nofofua e tuutoina atu le taimi i le auaunaga a Ieova, lea e mafai ona aogā mo lo latou itu faaleagaga ma faasolo atu ai i la latou faiva. E tele atu le taimi e mafai ona latou faaaluina i suesuega totino ma manatunatuga loloto. E masani ona mafai e Kerisiano nofofua ona faigofie le faaofi atu o a latou faitauga Tusi Paia i a latou faasologa nai lo i latou o ē ua faaipoipo. E mafai ona sili atu le lelei o a latou sauniuniga mo sauniga ma le auaunaga i le fanua. O nei mea uma e “aoga” mo i latou lava.—1 Korinito 7:35.

18. E mafai faapefea e le toatele o uso nofofua ona faaalia latou te mananao e auauna atu ia Ieova “ma le loto le fetosoaiina”?

¹⁸ E toatele uso nofofua o loo auauna o ni auauna o le faiva ua saʻoloto e faapea atu ia Ieova: “O aʻu lenei, ina auina atu aʻu.” (Isaia 6:8) E mafai ona latou talosaga e auai atu i le Aʻoga mo Toleniga i le Faiva, lea ua faatulaga mo auauna o le faiva ma toeaina nofofua o ē ua saʻoloto e auauna i so o se mea o loo sili ona tele ai le manaomia. E oo lava i uso o ē ua lē saʻoloto e tuua a latou faapotopotoga e mafai ona latou faaavanoa i latou lava e auauna mo o latou uso i le avea o ni auauna o le faiva po o ni toeaina.—Filipi 2:20-23.

19. Ua faamanuiaina faapefea le toatele o tuafāfine nofofua, ma o le ā se isi auala ua mafai ai ona avea i latou ma faamanuiaga i faapotopotoga?

¹⁹ O tuafāfine nofofua, e lē o iai se tane e tau fesili atu ma faalagolago i ai, atonu e sili atu ona sauni e ‘lafo atu ia Ieova o latou popolega.’ (Salamo 55:22; 1 Korinito 11:3) Ua faapitoa ona tāua lenei mea mo tuafāfine o ē ua ala ona nofofua ona o le alofa mo Ieova. Pe afai e iai se taimi latou te faaipoipo ai, o le a faaipoipo atu “tau lava i le ua i le Alii,” e na o lē ua tuuina atu ia Ieova. (1 Korinito 7:39) Ua faafetaia e toeaina le iai o ni tuafāfine e lei  faaipoipo i a latou faapotopotoga; o i latou nei e masani ona asiasi atu ma fesoasoani i ē mamaʻi ma ē ua matutua. E maua ai le fiafia e i latou uma.—Galuega 20:35.

20. Ua faapefea ona faaalia e le toatele o Kerisiano lo latou “auauna lelei [pea] i le Alii ma le loto le fetosoaiina”?

²⁰ E toatele Kerisiano talavou ua faatulaga a latou mataupufai ina ia mafai ai ona “auauna lelei [pea] i le Alii ma le loto le fetosoaiina.” (1 Korinito 7:35) O loo latou auauna atu ia Ieova o ni faifeau paeonia faataimi atoa, o ni misionare, pe i se tasi o lālā a le Sosaiete o le Olo Matamata. Ma e maeu se vaega fiafia ua iai i latou! Maeu se faafouina e maua mai i a latou aufaatasiga! Ioe, i le silafaga a Ieova ma Iesu, ua ‘pei i latou o sau o le vaveao.’—Salamo 110:3.

E Leai se Tautoga Ina ia Faavavau e Lē Faaipoipo

21. (a) Aisea e manino ai e lei faamalosia e Paulo le faia o se tautoga ina ia lē faaipoipo? (e) O le ā na ia faauiga i ai ina ua ia taʻua le “mavae [o] le malaulau o le talavou”?

²¹ O le manatu autū i le fautuaga a Paulo e faapea, o le a “lelei” mo Kerisiano ona faaavanoa o latou olaga mo le nofofua. (1 Korinito 7:1, 8, 26, 37) Ae peitai, e mautinoa na te lē tauanauina i latou e faia se tautoga ina ia faavavau e lē faaipoipo. Nai lo lea, na ia tusi: “Afai e manatu se tasi ua lē o talafeagai lana amio i lona tulaga muli, afai ua mavae le malaulau o le talavou, ma o le mea lenei ua tatau ona fai, ia faia e ia le mea ua ia loto i ai; e lē agasala o ia. Ia faaipoipo i latou.” (1 Korinito 7:36, NW) O le upu Eleni e tasi (hy·peʹra·kmos) ua faaliliuina i le “mavae le malaulau o le talavou” o lona uiga moni ua “sili atu i tua ma le tulaga e sili ona maualuga” ma e faasino atu i le sopoia o le tumutumuga o faanaunauga faaleituaiga. O i latou la ua tele tausaga na faaaluina i le tulaga nofofua ma ua mulimuli ane lagona le tatau ona latou faaipoipo, ua saʻoloto atoatoa e faaipoipo atu i se isi tagata faatuatua.—2 Korinito 6:14.

22. Aisea e aogā tele ai i so o se vala lava, le lē tatau i se Kerisiano ona faaipoipo a o laitiiti tele?

²² O tausaga ua faaaluina e se Kerisiano talavou e auauna ai ia Ieova ma le lē fetosoaiina ua pei o se oloa ua faaputuina ma le atamai. O na tausaga ua mafai ai e ia ona maua le atamai aogā, le poto masani, ma le malamalama. (Faataoto 1:3, 4) O se tagata ua nofofua pea ona o le Malo o le a sili atu ona lelei lona tulaga mulimuli ane, pe afai e filifili o ia, e faatino tiute tauave o le olaga faaipoipo ma atonu o le a faia se fanau.

23. O ā mea atonu o loo mafaufau i ai nisi o ē ua fuafua e faaipoipo, ae o le ā le fesili o le a talanoaina i mataupu o loo sosoo mai?

²³ O nisi Kerisiano o ē ua tele tausaga na faaalu e auauna ai faataimi atoa ia Ieova i le tulaga o le nofofua ua latou filifilia ma le faaeteete a latou paaga o le a fai ona o le manatu ina ia faaauau pea i nisi vala o le auaunaga faataimi atoa. Ua matuā sili ona faamālō atu i lena mea. O nisi ua oo lava ina manatu e faaipoipo ma le vaaiga ia lē avea a latou faaipoipoga e taofia ai a latou auaunaga i so o se itu lava. Ae pe tatau ea i se Kerisiano ua faaipoipo ona tutusa pea lona lagona saʻoloto e uaʻi atu i lana auaunaga ia Ieova e pei o lea sa iai a o ia nofofua? O le a talanoaina lenei fesili i mataupu o loo sosoo mai.

I se Autaluga

□ Aisea na lagona ai e le aposetolo o Paulo le manaomia ona tusi atu i le faapotopotoga i Korinito?

□ Aisea tatou te iloa ai sa lei fautuaina atu e Paulo se ituaiga o olaga i monaseri lea e faasā ai le faaipoipo?

□ E mafai faapefea e se tagata ona “faaavanoa atu” o ia mo le nofofua?

□ E mafai faapefea e tuafāfine nofofua ona maua ni aogā mai lo latou tulaga nofofua?

□ I ā auala e mafai ai e uso nofofua ona faaaogā lelei o latou saʻolotoga e auauna atu ai ia Ieova “ma le loto le fetosoaiina”?

[Fesili mo le Suʻesuʻega]