O se Tane ma o se Toeaina—Le Faapaleniina o Tiute Tauave

‘E tatau i le ovasia ona faiavā i le fafine e toatasi.’—1 TIMOTEO 3:2.

1, 2. Aisea ua lē faale-Tusi Paia ai le tatau ona lē faaipoipo ona o le tofiga faafaifeau?

I LE uluai senituri, sa manatu mamafa ai Kerisiano faamaoni i le faapaleniina o a latou tiute tauave eseese. Ina ua faapea mai le aposetolo o Paulo ua “sili ona lelei” le mea ua fai e se Kerisiano o loo nofofua pea, pe na ia faauiga ea faapea o lena tagata o le a sili atu ona talafeagai e auauna o se ovasia i le faapotopotoga Kerisiano? Pe o le mea moni ea na ia faatulaga o se mea manaomia le nofofua mo le tofiga o le toeaina? (1 Korinito 7:38) O se mea manaomia le lē faaipoipo mo faifeau a le Katoliko. Ae pe faale-Tusi Paia ea le tatau ona lē faaipoipo i le tofiga faafaifeau? E faataga e lotu Orthodox i atunuu i Sasaʻe a latou fesoasoani e faaipoipo, ae lē faatagaina a latou epikopo. Pe o ogatusa ea lena mea ma le Tusi Paia?

² O le toatele o aposetolo e toʻa 12 o Keriso, o ē ua faavae aʻe ai le faapotopotoga Kerisiano, o ni tane faaipoipo. (Mataio 8:14, 15; Efeso 2:20) Na tusi mai Paulo: “E le o la matou faitalia ea, pe matou te feoai ma le avā kerisiano, pei o aposetolo uma, ma uso o le Alii, ma Kefa [Peteru]?” (1 Korinito 9:5) E ioe le New Catholic Encyclopedia e faapea o “le tulafono o le lē faaipoipo o se tulafono e faapogai mai i le lotu” ma o “faifeau o le F[eagaiga] F[ou] sa lē saisaitia ina ia lē faaipoipo.” E tausisi atu Molimau a Ieova i le faaaoaoga faale-Tusi Paia nai lo o le tulafono a le lotu.—1 Timoteo 4:1-3.

E Fetaui le Tofiga Faatoeaina ma le Faaipoipoga

3. O ā mea moni faale-Tusi Paia e faaalia ai e mafai e ovasia Kerisiano ona avea o ni tane ua faaipoipo?

³ Nai lo o se manaoga faapea e tatau i tane ua tofia o ni ovasia ona lē faaipoipo, na tusi atu Paulo ia Tito: “O le mea lenei na ou tuu ai oe i Kereta, ina ia e faatonuina mea ua totoe, ma ia e tofia toeaina [faa-Eleni, pre·sbyʹte·ros] i lea aai ma lea aai, faapei ona ou fai atu ai ia te oe: o se tasi e le mataʻuleagaina, o le tane a le fafine e toatasi, o i ai ana fanau e faatuatua, e lei taʻua i latou ua ulavavale pe soli i tulafono. Auā e tatau lava i le epikopo [faa-Eleni, e·piʹsko·pos] ona le mataʻuleagaina o ia, auā o ia le auauna e tausi i mea a le Atua.”—Tito 1:5-7.

4. (a) E faapefea ona tatou iloa o le faaipoipoga e lē o se manaoga faapitoa mo ovasia Kerisiano? (e) O ā aogā ua iai i se uso nofofua o loo avea o se toeaina?

⁴ I le isi itu, o le faaipoipo e lē o se manaoga  faale-Tusi Paia mo le tofiga faatoeaina. Sa nofofua pea Iesu. (Efeso 1:22) O Paulo, o ia o se ovasia mataina i totonu o le faapotopotoga i le uluai senituri, sa lei faaipoipo i lena taimi. (1 Korinito 7:7-9) I aso nei, e toatele Kerisiano nofofua o loo auauna o ni toeaina. O lo latou tulaga nofofua atonu ua tele atu ai lo latou taimi mo le faatinoina o o latou tiute o ni ovasia.

ʻUa Vaeluaina le Mafaufau o le Tane Faaipoipo’

5. O ā mea moni faale-Tusi Paia e tatau ona iloa lelei e uso ua faaipoipo?

⁵ Pe a faaipoipo se tane Kerisiano, e tatau ona ia iloa lelei ua ia tauamoina nei ni tiute tauave fou o le a manaomia ai lona taimi ma lana uaʻi atu. Ua faapea mai le Tusi Paia: “Ua popole le nofo fua i mea a le Alii i se mea e fiafia mai i ai le Alii; a o le ua faaipoipo e popole ia i mea a le lalolagi i se mea e faafiafia ai le avā; e vaeluaina lona mafaufau.” (1 Korinito 7:32-34) I le ā le itu ua vaeluaina ai le mafaufau?

6, 7. (a) O le ā se isi auala ua ‘vaeluaina ai le mafaufau’ o se tane ua faaipoipo? (e) O le ā le fautuaga ua avatu e Paulo i Kerisiano ua faaipoipo? (i) E mafai faapefea e lenei mea ona aafia ai le faaiuga a se tane mo le taliaina o se galuega?

⁶ O se tasi o mea, ua lē o toe pule le tane faaipoipo i lona lava tino. Na manino ona taʻuina mai e Paulo lenei mea: “E le pule le avā i lona lava tino, na o le tane; e faapea foi le tane, e le pule ia i lona lava tino, na o le avā.” (1 Korinito 7:4) O nisi o ē ua fuafua e faaipoipo atonu e iai le lagona faapea o lenei timaʻiga faale-Tusi Paia e lē tāua naʻuā auā o le a lē matuā faamamafaina feusuaiga i a latou faaipoipoga. Ae peitai, talu ai o se manaoga faale-Tusi Paia le taumamao mai faiga faaleituaiga a o lei faaipoipo, e lē o matuā iloa ai la e Kerisiano manaoga loloto o a latou paaga o le a iai.

⁷ Ua faaalia e Paulo faapea e oo lava i ulugalii o loo ‘loto atu i mea a le agaga’ e tatau ona manatunatu le tasi i manaoga faaleituaiga o le isi. Sa ia fautuaina Kerisiano i Korinito: “Ia avatu e le tane i le avā le agalelei e tatau ai, ia faapea foi le avā i le tane. Aua neʻi faafiti le tasi i le tasi, seia iloga lava lua te loto gatasi ai i nai aso, ina ia oulua faasaga i le anapogi ma le tatalo; ma ia toe faatasi ane i le mea e tasi, ina neʻi faaosooso mai Satani ia te oulua, ona o lo oulua le lavā onosai.” (Roma 8:5; 1 Korinito 7:3, 5) E faanoanoa, ua iai ni tulaga na faia ai le mulilua talu ai sa lē usitaia lenei fautuaga. Ona o lenei mea, e tatau ai i se Kerisiano ua faaipoipo ona fefulisaʻi ma le faaeteete mataupu a o lei taliaina se galuega o le a valavala ai o ia ma lana avā mo se vaitaimi umi. Ua lē o toe ia te ia le saʻolotoga e fai ai ana gaoioiga lea sa iai a o ia nofofua.

8, 9. (a) O le ā na uiga i ai Paulo ina ua ia taʻua faapea o Kerisiano ua faaipoipo e “popole . . . i mea a le lalolagi”? (e) O ā mea e tatau ona popole i ai Kerisiano ua faaipoipo e fai?

⁸ I le ā le uiga e mafai ai ona faapea atu o tane Kerisiano ua faaipoipo, e aofia ai toeaina, o loo “popole . . . i mea a le lalolagi [koʹsmos]”? (1 Korinito 7:33) Ua manino mai lava sa lei tautala Paulo e faatatau i mea leaga o lenei lalolagi, lea e tatau i Kerisiano moni uma ona teena. (2 Peteru 1:4; 2:18-20; 1 Ioane 2:15-17) Ua faatonu mai le Afioga a le Atua ia i tatou ina ia “teteʻa ese ma le faalematau atoa ma tuʻinanau faalelalolagi [ko·smi·kosʹ], a ia tatou nonofo ma le faautauta ma le amiotonu atoa ma le amio Atua i lenei olaga.”—Tito 2:12.

⁹ O lea la, o se Kerisiano ua faaipoipo, “e popole ia i mea a le lalolagi” i le tulaga o loo popole tatau i mea masani, o se vaega o le olaga masani faaipoipo. E aofia ai se fale, o meaʻai, o lavalava, o tafaoga ma faafiafiaga—ae lē taulia ai le anoanoai o isi popolega pe afai ua iai se fanau. Ae oo lava foi i se ulugalii e lē o iai se la fanau, afai e fia taulau manuia le la faaipoipoga, e ao i le tane ma le avā ona popole ina ia “faafiafia” i lana paaga faaipoipo. Ua faapitoa ona tāua lenei mea i toeaina  Kerisiano a o latou tau faapaleniina o latou tiute tauave.

O ni Tane Lelei ma o ni Toeaina Lelei Foi

10. Ina ia agavaa se Kerisiano e avea o se toeaina, o le ā e ao ona mafai e isi Molimau ma tagata i fafo atu o le faapotopotoga ona mātauina e uiga ia te ia?

¹⁰ E ui e lē o se manaoga le faaipoipo mo le tofiga faatoeaina, ae afai ua faaipoipo se tane Kerisiano, a o lei fautuaina o ia mo le tofiga o se toeaina, e mautinoa le tatau ona ia faamaonia atu lona taumafai ina ia avea o se tane lelei, e alofa, a o ia faatinoina ma le talafeagai lona tulagaulu. (Efeso 5:23-25, 28-31) Na tusi atu Paulo: “Afai e naunau se tasi i le faiva o le epikopo, e manao o ia i le galuega lelei. O lenei, e tatau i le epikopo ia le mataʻuleagaina, o lē faiavā i le fafine e toatasi.” (1 Timoteo 3:1, 2) E tatau ona faamaonia mai o loo faia e se toeaina le mea sili na te mafai e avea ai o se tane lelei, e tusa lava pe o se Kerisiano lana avā pe leai. Auā o le mea moni, e oo lava i tagata i fafo atu o le faapotopotoga e ao ona mafai ona latou mātauina mai lona tausia lelei o lana avā ma isi ona tiute tauave. Na faaopoopo atu Paulo: “E tatau ona ia logoleleia o ia e i latou o i tuā, neʻi upuleagaina o ia ma paū i le mailei a le tiapolo.”—1 Timoteo 3:7.

11. O le ā ua fautuaina e le fuaitau “o lē faiavā i le fafine e toatasi,” o le ā la le lapataiga e tatau ona utagia e toeaina?

¹¹ O le mea moni, o le fuaitau “o lē faiavā i le fafine e toatasi” ua matuā faasaina ai le faia o se autaunonofo, ae fautuaina ai foi le faamaoni i le faaipoipoga. (Eperu 13:4) Ua manaomia faapitoa i toeaina ona matuā faaeteete a o fesoasoani atu i tuafāfine i le faapotopotoga. E tatau ona latou alofia le alu toatasi pe a asiasi atu i se tuafafine o loo ia manaomia ni fautuaga ma ni faamafanafanaga. O le a lelei pe a ō faatasi ma se isi toeaina, se auauna o le faiva, pe ō faatasi foi ma a latou avā pe afai ua na o se asiasiga faalaeiau.—1 Timoteo 5:1, 2.

12. O le ā le faamatalaga e tatau i avā a toeaina ona latou tauivi ina ia ausia?

¹² A o lisiina mai mea manaomia mo toeaina ma auauna o le faiva, na taʻua ai foi e le aposetolo o Paulo le fautuaga mo avā a i latou ua iloiloina mo na faaeaga. Na ia tusi atu: “O fafine foi, ia faapea lava ona faamatuāfafine i latou, e le ni faatuaupua, a ia faautauta; ia faamaoni i mea uma lava.” (1 Timoteo 3:11) E mafai ona tele mea e faia e se tane Kerisiano e fesoasoani atu ai i lana avā ina ia ona ausia lena faamatalaga.

O Tiute Faale-Tusi Paia Agaʻi i le Avā

13, 14. E tusa lava pe lē o se Molimau le avā a se toeaina, ae aisea e tatau ai ona la nonofo pea ma avea i ai o ia o se tane lelei?

¹³ O le mea moni, o lenei fautuaga na tuuina atu i avā a toeaina po o auauna o le faiva sa faia ma le faamoemoe o na avā o i latou foi  o ni Kerisiano tuuina atu. I le tulaga masani, o le mea lena e tatau ona iai auā ua faatalitalia Kerisiano ina ia faaipoipo atu “tau lava i le ua i le Alii.” (1 Korinito 7:39) Ae faapefea se uso ua uma ona faaipoipo i se avā lē talitonu, ae faatoʻā tuuina atu lona ola ia Ieova, pe ua toe faamaamulu ese lana avā mai le upu moni ae lē o se sese o le uso?

¹⁴ O lena mea ia, o le a lē taofia ai o ia mai le avea o se toeaina. Peitai, e lē avea foi o se mea e faamaonia ai se la teteaga ma lana avā ona ua lē tutusa o la talitonuga. Na fautua atu Paulo: “Ua noatia ea oe i le avā? Aua e te saili ina ia tatalaina.” (1 Korinito 7:27) Na ia taʻua atili: “Ai se tasi o le au uso ua i ai le avā le faatuatua, ua loto ina la nonofo ma ia, aua le molia o ia; Peitai afai e fia teʻa ese le ua le faatuatua, ia faapea ona faia. E le faapologaina le tane po o le avā kerisiano pe a faapeaina; a ua valaauina i tatou e le Atua i le filemu. E le ma iloa e oe le avā, pe faaolaina lau tane ia te oe; ma oe foi le tane pe faaolaina lau avā ia te oe.” (1 Korinito 7:12, 15, 16) E tusa lava pe lē o se Molimau lana avā, ae tatau pea i le toeaina ona avea o ia o se tane lelei.

15. O le ā le fautuaga ua avatu e le aposetolo o Peteru i tane Kerisiano, ma o ā āuga e mafai ona oo i ai pe afai e avea se toeaina o se tane e faatalalē?

¹⁵ Pe o se tagata talitonu lana avā pe leai, ae tatau lava i le toeaina Kerisiano ona amanaia e manaomia e lana avā lona uaʻi alofa atu i ai. Na tusi atu le aposetolo o Peteru: “Ia faapea outou tane, ia fai le āiga [a outou avā] ma le poto, ia faautauta i le tino vaivai o le fafine, ma ava ia te ia ona ua tofia faatasi i le ola e foaifuaina mai, ina neʻi faalavelaveina a outou tatalo.” (1 Peteru 3:7) O se tane ua ia faia ma le iloa lelei lona lē taulau i le tausia o manaoga o lana avā, ua ia tuua lana ia lava faiā ma Ieova i se tulaga lamatia; e mafai ona taofia mai lona faalatalata atu ia Ieova e pei ua taofia “i le ao, ina ia le sao atu ai le tatalo.” (Auega 3:44) E mafai ona taʻitaʻia atu lenei mea i lona lē agavaa ai e auauna o se ovasia Kerisiano.

16. O le ā le manatu autū ua faia e Paulo, ma o le ā le faalogona e tatau ona iai i toeaina e tusa o lenei manatu?

¹⁶ E pei ona taʻua, o le manatu autū o le mataupu a Paulo e faapea, pe a faaipoipo se tane, ona lē toe iai lea ia te ia o le saʻolotoga na ia maua a o nofofua, lea na mafai ai ona ia “auauna lelei [pea] i le Alii ma le loto le fetosoaiina.” (1 Korinito 7:35) Ua faaalia e lipoti faapea, e lē o taimi uma o paleni ai nisi toeaina ua faaipoipo i le faauigaina o upu faagaeeina a Paulo. Ona o lo latou faanaunau e faataunuu mea ua latou manatu e tatau ona faia e toeaina lelei, atonu latou te sopoloa ai mai nisi o o latou tiute o ni tane. O nisi ua faafaigata ia i latou ona teena se faaeaga mai le faapotopotoga, e ui lava o le taliaina o lea faaeaga o le a manino ai le solo i tua faaleagaga o a latou avā. Latou te olioli i faaeaga e maua i le faaipoipoina, ae pe o latou lotomalilie ea e faataunuu tiute tauave o loo maua mai ai?

17. O le ā ua tupu i nisi o avā, ma sa ono mafai faapefea ona alofia lenei faafitauli?

¹⁷ O le mea mautinoa, ua tatau le faamālō i le avea o se toeaina maelega. Ae, pe o paleni ea se Kerisiano pe afai, i lona faatinoina o ona tiute i le faapotopotoga, ua ia lē amanaia ai ona tiute tauave faale-Tusi Paia agaʻi i lana avā? A o naunau e lagolago atu i ē o i le faapotopotoga, o le a faapena foi ona manatu mamafa se toeaina paleni i le itu faaleagaga o lana avā. O avā a nisi toeaina ua vaivai faaleagaga, ae o nisi ua oo ina “faavaatuʻia” faaleagaga. (1 Timoteo 1:19) E ui o le matafaioi a le avā lona tauivi atu mo lona lava faaolataga, ae i nisi o tulaga sa ono mafai ona alofia le faafitauli faaleagaga pe ana faapea sa “fafaga ma tausi atu” le tane i lana avā, e “faapei o Keriso foi ona tausi i le ekalesia.” (Efeso 5:28, 29) O le mea moni, e ao i toeaina ona ‘tausi ia i latou lava ma i le lafu mamoe uma.’ (Galuega 20:28) Pe afai ua faaipoipo i latou, e aofia ai i lenei mea a latou avā.

 ʻO Puapuaga i le Tino’

18. O ā nisi o vala o le “puapuaga” lea e oo i Kerisiano ua faaipoipo, ma e mafai faapefea e lenei mea ona faalavelavea ai auaunaga a se toeaina?

¹⁸ Na tusi foi le aposetolo: “Afai foi e faaipoipo le teine e le agasala ai o ia; a e oo i e ua faapea le puapuaga i le tino; a ou te fia faasaoina outou mai ia mea.” (1 Korinito 7:28) Sa faanaunau Paulo ina ia faasaoina i latou e mafai ona mulimuli i lana faaaoaoga o le nofofua mai popolega lē maalofia e aumaia e le faaipoipoga. E oo lava i ulugalii e lē faia ni fanau, e mafai ona aofia i nei popolega, o faafitauli i le soifua maloloina po o faafitauli tau tupe faapea foi ma tiute tauave faale-Tusi Paia agaʻi i mātua ua matutua o le paaga a se tasi. (1 Timoteo 5:4, 8) I se faaaoaoga lelei, e ao ai i se toeaina ona talia nei tiute tauave, ma o lenei mea e iai se taimi e ono faalavelavea ai ana auaunaga o se ovasia Kerisiano. O se fiafiaga, ona o le toatele lava o toeaina o loo lelei ona latou faafetaiaia tiute tauave faaleaiga ma faalefaapotopotoga.

19. O le ā na uiga i ai Paulo ina ua ia faapea atu: “O e ua fai avā, ia peiseai ua le fai avā”?

¹⁹ Na faapea atili atu Paulo: “Ua itiiti ona aso ua totoe; o lenei, o e ua fai avā, ia peiseai ua le fai avā.” (1 Korinito 7:29) O le mea moni, e tusa ai o mea ua uma ona ia tusia i lenei mataupu i uso i Korinito, ua manino mai ai sa ia lei manatu faapea, e iai nisi mafuaaga e tatau ai i Kerisiano ua faaipoipo ona lafoaia a latou avā. (1 Korinito 7:2, 3, 33) Na ia faaalia le uiga o ona manatu ina ua ia tusi: “O e fetagofi i mea a le lalolagi nei, ia peiseai ua le fetagofi i ai; auā o le a mavae atu le tu o le lalolagi nei.” (1 Korinito 7:31) Ua sili atu i aso nei nai lo i aso o Paulo pe i aso o le aposetolo o Ioane, ona “mavae atu le tu o le lalolagi nei.” (1 Ioane 2:15-17) O lea la, o Kerisiano ua faaipoipo o ē ua latou lagona le manaomia ona fai ni faataulagaina a o mulimuli atu ia Keriso, e lē mafai ona latou uaʻi atoatoa atu tau lava i olioli ma manuia o le faatasiga o le faaipoipoga.—1 Korinito 7:5.

O Avā ua Latou Faia ni Faataulagaina Totino

20, 21. (a) O ā faataulagaina ua lotomalilie le tele o avā Kerisiano e faia? (e) O le ā e mafai e se avā ona faatalitalia ma le talafeagai mai lana tane, e tusa lava po o ia o se toeaina?

²⁰ E pei lava ona fai e toeaina ni faataulagaina mo le lelei o isi, ua faapena foi i le toatele o avā a toeaina ona tauivi ina ia faapaleni o latou tiute tauave i le faaipoipoga ma manaoga e sili ona tāua o le Malo. E faitau afe fafine Kerisiano o loo fiafia e lagolagosua ina ia mafai ai e a latou tane ona taulimaina o latou tiute o ni ovasia. E alofagia i latou e Ieova ona o lenei mea, ma na te faamanuia mai i le agaga lelei o loo latou faaalia. (Filemoni 25) E ui i lea, o le fautuaga paleni a Paulo ua faaalia ai, e mafai e avā a ovasia ona faatalitalia ma le talafeagai se vaega o le taimi ma le uaʻi mai o manatu o a latou tane ia i latou. O le tiute faale-Tusi Paia o toeaina ua faaipoipo le faaaluina o se taimi talafeagai i a latou avā ina ia faapaleni ai o latou tiute tauave o se tane ma o se ovasia foi.

²¹ Ae faapefea pe afai, ua lē gata ina avea o se tane, ae ua avea foi se toeaina Kerisiano o se tamā fai fanau? Ua faaopoopo atu lenei mea i ona tiute tauave ma amata ai foi se isi vaega mo lana vaavaaiga, e pei ona o le a tatou mātauina i le mataupu o loo sosoo mai.

I se Autaluga

□ O ā mea moni faale-Tusi Paia e faaalia ai e mafai ona avea se ovasia Kerisiano o se tane ua faaipoipo?

□ Pe afai e faaipoipo se toeaina nofofua, o le ā e tatau ona ia mataalia i ai?

□ O ā itu e ‘popole ai se Kerisiano ua faaipoipo i mea a le lalolagi’?

□ E faapefea ona faaalia e le toatele o avā a ovasia le agaga lelei o le faia o ni faataulagaina totino?

[Fesili mo le Suʻesuʻega]

[Ata i le itulau 17]

E ui lava ina tuatuagia i ona tofiga faatiokarate, ae tatau i se toeaina ona uaʻi alofa atu i lana avā