Pe sa E Ono Iloaina le Mesia?

NA FAAALUINA e Iesu Keriso le tolu ma le ʻafa tausaga i le talaʻia o le Afioga a le Atua i tagata Isaraelu. Peitai ina ua lamalama faaiu lana faiva i le lalolagi, na teena e le toatele o ē latou te tupulaga le avea o ia ma Mesia, po o “Lē Faauuina” na folafola mai e le Atua. Aisea?

Ua fesoasoani mai le Tusi Paia ia i tatou ina ia tatou iloa nisi o mafuaaga na lē talitonu ai Iutaia i le uluai senituri i le avea o Iesu ma Mesia. O nei mafuaaga e tolu ua taofia ai le toatele mai le talitonu i le tulaga  ua iai Iesu i aso nei i le avea ai ma Tupu Faa-Mesia.

“Ua Matou Fia Iloa se Faailoga”

O se tasi o mafuaaga na lē amanaiaina ai e Iutaia i le uluai senituri le Mesia ona o lo latou lē fia taliaina o faailoga faale-Tusi Paia ia e faasino atu i lona tulaga faa-Mesia. I se tasi mea na tupu, o i latou na faalogologo ia Iesu na faatauanau ane ina ia faia se faailoga e faamaonia ai o ia e mai le Atua. O se faataitaiga i le Mataio 12:38, ua lipotia mai ai e faapea o nisi o le ʻau tusiupu ma le ʻau Faresaio na latou faapea ane: “Le aʻoaʻo e, ua matou fia iloa se faailoga ia te oe.” Pe e lei muai faaalia ea e Iesu ia i latou ni faailoga? O le mea moni na ia faia faapena.

E oo ane i lena taimi ua uma ona faia e Iesu nisi o vavega. Na ia faaliliuina vai e fai ma uaina, na ia faamālōlō i le tama na toeitiiti lava oti, na ia faamaloloina le maʻi o le tinā o le avā a Peteru, na ia faamamā i le tagata na maʻi i le lepela, na ia faamālōlō le tagata supa ina ia savali, na ia toe faafoisia le malosi o se tagata na maʻi mo le 38 tausaga, na ia faamālōlō i le lima o le tagata na gase, na ia faamaloloina le toatele o tagata mai maʻi tiga na latou feagai, na ia faamālōlō i le auauna a le taʻitaʻiʻau, na ia toe faatūina mai le tama a le fafine ua oti lana tane, ma na ia faamaloloina se tagata na tauaso ma gūgū. O nei vavega na faia i Kana, Kapanaumi, Ierusalema, ma Naina. E lē gata i lea, o tala i nei vavega na salalau atu i Iuta uma ma nuu na siomia ai.—Ioane 2:1-12; 4:46-54; Mataio 8:14-17; 8:1-4; 9:1-8; Ioane 5:1-9; Mataio 12:9-14; Mareko 3:7-12; Luka 7:1-10; 7:11-17; Mataio 12:22.

E manino lava la, e lei faaitiitia faailoga e faamaonia ai le avea o Iesu ma Mesia. E ui lava na ia faia le tele o faailoga i luma o tagata, ae latou te lei faatuatua ai lava ia te ia. O i latou o ē na vaaia le faamaoniga faapea o Iesu na auina mai e le Atua ae latou te lei talitonu o ia o le Mesia, na tauaso faaleagaga. Na maaa o latou loto ma na lē fia talia le upu moni.—Ioane 12:37-41.

Ae faapefea o tatou aso? Ua faapea mai nisi, “E na o mea lava e vaaia e oʻu mata ou te talitonu i ai.” Ae pe o se gaoioiga saʻo ea lena e fai? Ua faaalia e le valoaga a le Tusi Paia e faapea o Iesu ua uma ona faapaleina o ia e avea ma Tupu faalelagi o le Malo Faa-Mesia. Ona o ia e lē vaaia, e manaomia ai la se faailoga ina ia fesoasoani ia i tatou e iloa tonu ai lana pulega, lea e faailoga ai le amataga o aso e gata ai o lenei faiga leaga o mea. Pe ua e iloaina ea le faailoga?—Mataio 24:3.

E tusa ai ma le Tusi Paia, o le amataga o le pulega a Keriso i le avea ai ma Tupu Faa-Mesia o le a faailogaina i faiga taua, mafuie, oge, ma le anoanoai o faamaʻi e lei iai muamua. I “aso e gata ai,” o le a iai i faiā faaletagata le uiga manatu faapito, matapeapea, ma le leai o se pulea lelei. (2 Timoteo 3:1-5; Mataio 24:6, 7; Luka 21:10, 11) E ese mai le faamaoniga o le faasologa o le taimi, e sili atu i le 20 vala eseese o aso e gata ai ua faailogaina ai le amataga o le pulega a le Mesia i le 1914.—Tagai i Le Olomatamata o Mati 1, 1993, itulau e 5.

“O Ē Mananao i Tupe”

O le matapeapea o le isi mafuaaga lea na māfua ai ona teena e tagata Iutaia Iesu e avea ma Mesia. O le naunau tele i le faatāuaina o oa ua faatalatū ai le toatele mai le mulimuli atu ia Iesu. O se faataitaiga, na lauiloa le ʻau Faresaio o ē e ‘mananao i tupe.’ (Luka 16:14) Manatunatu i le tala i se pule talavou e mauoa, o lē na faalatalata atu ia Iesu ma fesili atu i le auala e mauaina ai le ola e faavavau. Na tali atu Iesu e faapea: “Ia e tausi i poloaiga.” Na fesili atu le taulealea ma le manatu faapea e iai se mea manaomia e sili atu nai lo le tausia o ni tulafono patino: “Ua ou tausia na mea uma, se a se mea o toe ou te lei faia?” Ona fetalai atu lea o Iesu ia te ia e faapea: “Ia e alu ma e faatau atu au mea, i le e avatu ai i e matitiva; ona ia te oe lea o le faulaigaoloa i le lagi, i le e sau ma mulimuli mai ia te au.” Maeu se avanoa—e avea ai ma soo o le Mesia! Peitai na liliu ese le pule, ua faanoanoa. Aisea? Auā na sili atu ona tāua ia te ia oa i le lalolagi nai lo oa i le lagi.—Mataio 19:16-22.

 E lē o suia lava le tulaga o mea. I le avea ma soo faamaoni o le Tupu Faa-Mesia, o lona uiga ia faamuamua manaoga faaleagaga nai lo se isi lava mea, e aofia ai ma oa faalelalolagi. O se luʻi lenei mea mo so o se tasi lava e matapeapea. O se faataitaiga, o se ulugalii misionare i se tasi o atunuu i Sasaʻe, sa talanoa i se fafine e uiga i le Tusi Paia. Ona sa la iloa le fia iloa atili e le fafine o Ieova le Atua ma lona Alo, o Iesu Keriso, o lea na ofo atu ai e le ulugalii ia te ia Le Olomatamata ma le Ala Mai! O le ā na ia tali atu ai? Na ia fesili atu e faapea: “Pe o le a fesoasoani mai ea nei mekasini ia te au ina ia maua atili ni tupe?” Sa sili atu ona naunau le fafine i mea faitino nai lo mataupu faaleagaga.

Sa suesue le ulugalii lava lea ma se tasi o alii talavou o lē sa amata ona auai i sauniga i le Maota o le Malo. “E maimau lou taimi,” o le tala lea a ona mātua ia te ia. “E ao ona suʻe se isi au galuega i le afiafi ina ia maua ai nisi tupe se tele.” Pagā le faanoanoa pe a faalaeiauina e mātua a latou fanau ina ia tuu faamuamua mea faitino nai lo le aʻoaʻo muamua e uiga i le Tupu Faa-Mesia! Ua faapea mai le muagagana a Saina: “E tusa lava pe tele le tamaoaiga o se pule, ae lē mafai ai lava ona ia faatauina mai le sefulu afe tausaga e soifua ai.”

E toatele i latou ua latou iloaina e faapea o le aʻoaʻoina e uiga i le Mesia ma le mulimuli atu i le Tupu Faa-Mesia e lē maua ai se avanoa e faamuamua ai tupe. Ua faapea mai se Molimau a Ieova o lē sa iai sana pisinisi na mauaina ai tupe e tele: “E lelei le tele o tupe ae e lē manaomia. O le tupe e lē o le auala lea e maua ai e se tagata le fiafia.” Ua avea nei o ia ma sui o le aiga Peteli i le lālā o le Sosaiete o le Olo Matamata i Europa.

“Mataʻu i Tagata Iutaia”

O le mataʻu i tagata o se tasi lea o mafuaaga na lē talia ai e tagata Iutaia Iesu e avea ma Mesia. O le faailoa atu faalauaitele o le taliaina o lona tulaga faa-Mesia e lamatia ai o latou tulaga lelei. Mo nisi na matuā faigata tele ia i latou. Manatunatu ia Nikotemo, o se sui o le faamasinoga maualuga i Iutaia na taʻua o le Saniterini. Ona o le faagaeetia i faailoga ma aʻoaʻoga a Iesu, na ia taʻutino mai ai e faapea: “Rapi e, ua matou iloa o oe o le aʻoaʻo ua maliu mai mai le Atua; auā e le mafai e se tasi ona fai o ia faailoga e te faia, ana le ia te ia le Atua.” Peitai ane na asiasi atu Nikotemo ia Iesu i le po, atonu neʻi teʻi ua iloa mai o ia e isi tagata Iutaia.—Ioane 3:1, 2.

O le toatele o i latou o ē na faalogo a o fetalai Iesu, na sili ona tāua ia i latou le fiafia mai i ai o tagata nai lo le Atua. (Ioane 5:44) A o iai Iesu i Ierusalema mo le Tausamiga o Faleapitaga i le 32 T.A., sa “tele foi le femusuai o le motu o tagata ia te ia.” Na leai se tasi na talanoa leotele e uiga ia Iesu “ona o le mataʻu ia Iutaia.” (Ioane 7:10-13) E oo lava i mātua o le tagata tauaso lea na faamālōlō e Iesu, na la mumusu e faailoa atu le vavega na faia e le sui o le Atua. O i laua foi na “mataʻu i Iutaia.”—Ioane 9:13-23.

I aso nei, ua iai nisi ua iloaina faapea o Iesu ua pule nei o ia o se Tupu Faa-Mesia i le lagi, peitai ua latou fefefe e faailoa atu lenei mea i le lautele. E laualuga ia i latou le manatu ina neʻi leiloa lo latou tulaga lelei ma isi. O se faataitaiga i Siamani, sa faia ai e se Molimau a Ieova se talanoaga ma se tamaloa o lē na taʻutino mai e faapea: “O le mea o loo talaʻia e outou Molimau e uiga i le Tusi Paia e saʻo. Ae afai e avea aʻu ma se Molimau i le aso nei, e oo atu taeao ua iloa e tagata uma. O le ā le manatu o ē o i le galuega, tuaoi, ma le kalapu o loo  oʻu iai ma loʻu aiga? E lē mafai ona ou onosaia lena tulaga.”

O le ā ua faapogaia le mataʻu i tagata? O le faamaualuga, le fia lauiloa i aiga ma uo, le musu e upuia ma taʻufaatauvaaina, le popole ina neʻi ese mai le toatele. O na faalogona ua faamaonia le avea ma tofotofoga ae maise lava ia i latou o ē ua amata ona latou suesueina le Tusi Paia ma Molimau a Ieova. O se faataitaiga, o se tasi o tamaitai talavou sa matuā fiafia i lona iloa e uiga i le Parataiso lea o le a faavaeina e le Malo Faa-Mesia i le lalolagi i le pulega a Iesu Keriso. Peitai e fiafia tele i le siva disco, ma o le mataʻu i tagata na taofia ai o ia mai le talanoa atu i isi e uiga i lea faamoemoe. Mulimuli ane, sa ia te ia le lototele e talanoa saʻoloto atu ai e uiga i le Tusi Paia. Sa teena o ia e ana uo sisiva, ae sa faaalia e lana tane ma ona mātua le fiafia. Ua papatisoina nei lenei tamaitai ma lona tinā, ae o lana tane ma lona tamā ua amata ona suesue i le Tusi Paia. Maeu se taui mo le foiaina o le mataʻu i tagata.

Pe ua E Iloaina Moni ea le Mesia?

Na iai nisi o ona soo i le taimi na maliu ai Iesu i luga o le laau. Na latou iloaina o ia o le Mesia na folafolaina. Na iai foi taʻitaʻi Iutaia, o ē na faaauau ona faatauanauina se faailoga. “Ina faaola ia o ia ia te ia, pe afai o ia o le Keriso [po o le Mesia] a le Atua, o lē ua Filifilia!” (Luka 23:35) Pe o le a latou lē toe fesili ea mo se faailoga? E fai si tele o vavega na faia e Iesu. E lē gata i lena, o lona soifua mai, o lana faiva, o ona tofotofoga, o lona faasalaga, ma lona toe faatūina aʻe ua faataunuuina ai le tele o valoaga i Tusitusiga Eperu.—Tagai i le “All Scripture Is Inspired of God and Beneficial,” lomia e le Watchtower Bible and Tract Society of New York, Inc., itulau e 343-344.

Na tauemu ē na ui ane ia Iesu, ona o lo latou tetee i le faamaoniga o lona tulaga faa-Mesia. (Mataio 27:39,40) Na tufatufaina e fitafita ia i latou ofu o Iesu, ma faia ai le vili i lona ofu tino. (Ioane 19:23,24) O le mataʻu i tagata o se tasi lea o mafuaaga ua teena ai e nisi faamaoniga e uiga i le tulaga faa-Mesia o Iesu. O se faataitaiga, seʻi manatunatu ia Iosefa le Arimataia, o se sui o le ʻau Saniterini. “O ia o le soo o Iesu, ae faalilolilo ona o le fefe ia Iutaia.” Ina ua maliu le Mesia, na tausia e Iosefa ma Nikotemo le tino maliu o Iesu. Na foia e Iosefa lona mataʻu i tagata.—Ioane 19:38-40.

Pe ana faapea na e soifua i le uluai senituri, pe o le a e iloaina ea le avea o Iesu ma Mesia? O le faia faapea e manaomia ai lou taliaina o le faamaoniga faale-Tusi Paia, teena mafaufauga faaletino, ma le lē taaʻina i le mataʻu i tagata. I nei aso e gata ai, e ao ai ia i tatou taitoatasi ona fesili ifo ia te ia lava, ‘Pe ua ou iloaina ea o Iesu i le taimi lenei ua avea ma Tupu Faa-Mesia i le lagi?’ Ua lē o toe mamao ona ia pulea atoa lea o mea uma i le lalolagi. Afai e taunuu lena tulaga, pe o le a avea ea oe ma se tasi o i latou o ē ua iloaina moni lava le avea o Iesu Keriso e avea ma Mesia folafolaina?

[Ata i le itulau 28]

Aua lava neʻi e fulitua i le faamaoniga faapea o Iesu o le Tupu Faa-Mesia

[Ata i le itulau 31]

O le aʻoaʻoina e uiga i le Mesia e masani ona faauiga i le foiaina o le mataʻu i tala atonu e faia e isi tagata