Po o E Faaaʻoaʻo ea i lo Tatou Atua Lē Faailoga Tagata?

LĒ FAAILOGA TAGATA—o fea e mafai ona maua ai? O loo iai Lē e toatasi e lē faailoga tagata, e lē faaituʻau, e lē faaʻauʻau, ma e lē faailoga lanu. O ia lea o Ieova le Atua, o Lē na Foafoaina tagata. Ae peitai na tusi saʻo mai le tusitala Peretania o lona 19 o senituri, o Charles Lamb e faatatau i tagata e faapea: “Ou te taʻu saʻo atu, o aʻu e matuā tumu i le faaituʻau—ua faia aʻe i mea e fiafia i ai ma mea e lē fiafia i ai.”

E tusa ai ma le lē faailoga tagata, e faanoanoa ona o le tele o le faailoga tagata i faiā faaletagata. I le tele o senituri ua mavae, na mātauina ai e le tupu poto o Solomona o Isaraelu e faapea, “e pule ai le tasi tagata i le tasi, e leaga ai o ia lava.” (Failauga 8:9) O loo faaauau pea ona faateleina le feitagai i va o lanu, feteenaiga i va o atunuu, ma le feainaʻi i totonu o aiga. O lea la, po o se mea moni le talitonu e faapea, i le tuua na o i latou lava, e mafai lava e tagata ona ati ae se sosaiete e lē faailoga tagata?

E manaomia ni taumafaiga poto e pulea ai o tatou uiga ma aveesea ai mai ia i tatou so o se uiga ua mauaa o le faaituʻau. (Efeso 4:22-24) E aunoa ma le iloa, atonu o iai pea ia i tatou ni uiga na maua mai i ē o siomia i tatou, ma a tatou aumea faaleaoaoga, ma uiga na faavae mai i o tatou aiga, lanu, ma talaaga faaleatunuu. O nei manatunatuga e foliga mai e lē afaina, e masani lava ona mauaa ma aliai mai ai uiga e iu ai i le faailoga tagata. E oo lava i se tagata faatonu i faamasinoga ma o se faatonu i nusipepa, o le Alii o Francis Jeffrey mai Sikotilani, na ia ioeina e faapea: “E leai lava se mea e sili atu ona umi se taimi e lē o iloaina e le tagata, e pei o le tele ma le malosi o lona faaituʻau.”

O Lena, * o se tasi lea o tagata na ioe e faapea, e manaomia se taumafaiga iloga e tau ai faasaga i le manatu e manao e faailoga tagata. Ina ia tineia faalogona faaituʻau i se tagata, fai mai a ia, “ia fai ni taumafaiga se tele, auā o le auala e tausia aʻe ai se tagata, o se taaʻiga e matuā malosi tele.” Ua faailoa mai foi e Lena e faapea, e manaomia ona faamanatu mai pea.

Talaaga o le Lē Faailoga Tagata o Ieova

O Ieova o se faaaoaoga lelei atoatoa o le lē faailoga tagata. I itulau amata o le Tusi Paia, ua tatou faitau ai i le auala na ia faaalia ai lona lē faailoga tagata i ana feutagaiga ma tagata. E tele mea e mafai ona tatou aʻoaʻoina mai nei faaaoaoga silisili ona lelei ma faamanatuga.

Na faaalia e Ieova le lē faailoga tagata i lona faatulagaina o mea ina ia mafai ai ona folafolaina atu e le aposetolo Iutaia o Peteru le tala lelei ia Konelio ma isi tagata o Nuuese i le 36 T.A. I lena taimi na faapea atu ai Peteru: “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34, 35.

I ana feutagaiga uma ma le aiga faaletagata, na faaalia ai pea e Ieova lona lē faailoga tagata. Na faapea mai Keriso Iesu e uiga i lona Tamā: “O le na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) E lē gata i lea, o le  matuā viiviia o Ieova i le avea o se Atua e lē faailoga tagata, ua taʻutino mai ai e Peteru e faapea: “Ua onosai mai lava o ia ia te outou, ona ua le finagalo ia fano se tasi, a ia oo uma lava i le salamo.”—2 Peteru 3:9.

I aso o Noa, ina “ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava,” na poloaiina ai e Ieova le faaumatiaina o lena lalolagi o tagata. (Kenese 6:5-7, 11, 12) Ae peitai, i le poloaiga a le Atua, ma i le mātauina lelei e tagata o lana tupulaga, na fausia ai e Noa se vaa. A o ia fauina ma ona atalii le vaa, sa avea foi Noa ma “lē talaʻi le amiotonu.” (2 Peteru 2:5) E ui ina ia iloa mafaufauga leaga o loto o lena tupulaga, ae sa auina atu ma le lē faailoga tagata e Ieova se feau manino ia i latou. Na ia augani atu ina ia pāʻia o latou mafaufau ma loto e ala i le faatonuina o Noa e fau le vaa ma talaʻi. E tele avanoa na latou maua e tali atu ai, ae nai lo o lena, “na le iloa foi e i latou ina seia oo le lolo, ma aveesea ai i latou uma.”—Mataio 24:39.

Maeu se faaaoaoga silisili ona lelei o le lē faailoga tagata o Ieova! I nei aso faigata e gata ai, ua uunaia ai auauna a le Atua e folafola atu le tala lelei o le Malo ma lea lava uiga lē faailoga tagata. E lē gata i lea, latou te lē o faatalatū foi i le folafolaina atu o le aso o le tauimasui a Ieova. I luma o tagata lautele, latou te molioo atu ai le feau a Ieova e aunoa ma le faailoga tagata ina ia faalogo i ai tagata uma.—Isaia 61:1, 2.

O folafolaga a Ieova i augātamā anamua o Aperaamo, Isaako ma Iakopo, ua faaalia manino ai e lē o ia o se Atua e faailoga tagata. E ala i le gafa patino o lo latou aiga, o le a auala mai ai Lē ua tofia, o lē ‘o le a manuia moni ai lava atunuu o le lalolagi.’ (Kenese 22:18; 26:4; 28:14) Ua faamaonia o Keriso Iesu, o Lē ua tofia. E ala i le maliu ma le toe faatūina mai o Iesu, ua saunia ai e Ieova le auala i le faaolataga mo tagata usiusitai uma lava. Ioe, e mafai ona maua aogā mai le taulaga togiola a Keriso e aunoa ma le faailoga tagata.

I aso o Mose, na faaalia ai le lē faailoga tagata o Ieova i se auala e sili atu ona mataina e tusa ai ma afafine o Selofeata. Na fesagai nei fafine e toalima ma se mea faigata e tusa ai ma le tofi o lo latou tamā i le Nuu o le Folafolaga. Na tupu lenei mea ona o le tū a Isaraelu e tusa ai ma tofiga o le laueleele, e tatau ona tuuina atu i atalii o se tamaloa. Ae peitai, na maliu Selofeata e leai sona atalii e tuuina atu i ai le tofi. O lea, na tuuina atu ai e afafine e toalima o Selofeata la latou talosaga i luma o Mose mo se gaoioiga lē faailoga tagata i le faapea atu: “Pe tineia i se a le igoa o  lo matou tamā i lona aiga, ina ua leai sona atalii? Ina au mai ia ia te i matou so matou fanua faatasi ma le au uso o lo matou tamā.” Na faafofoga Ieova i la latou faatoga ma faatonuina Mose e faapea: “Afai e oti se tagata, a e leai sona atalii, ona outou tuuina atu ai lea o lona tofi i lona afafine.”—Numera 27:1-11.

Maeu se fuafuaga alofa ma le lē faailoga tagata! Ina ia faamautinoa e lē tuuina atu le tofi o lea ituaiga i se isi ituaiga pe a faaipoipo afafine, sa tatau ona latou faaipoipo atu e tau lava ‘i se tasi o le aiga o le ituaiga o lo latou tamā.’—Numera 36:5-12.

O se malamalamaga atili i le lē faailoga tagata o Ieova, na iloa lea i aso o le faamasino ma le perofeta o Samuelu. Na tofia e Ieova o ia ina ia faauuina se tupu fou o le ituaiga o Iuta i le aiga o Iese le Peteleema. Ae sa ia Iese o atalii e toavalu. O ai o le a faauuina e avea ma tupu? Sa fiafia Samuelu i le tino malosi o Eliapo. Ae peitai, e lei taaʻina ai Ieova i foliga vaaia. Na ia taʻu atu ia Samuelu: “Aua e te vaai i lona tino, po o le maualuga o lona tino . . . auā e le vaai Ieova pei o le vaai o tagata, auā e vaai tagata i le tino, a e vaai Ieova i le loto.” O Tavita le atalii aupito itiiti o Iese, na filifilia.—1 Samuelu 16:1, 6-13.

Aʻoaʻo Mai le Lē Faailoga Tagata o Ieova

E lelei mo toeaina Kerisiano ona faataitai ia Ieova e ala i le vaavaai i uiga faaleagaga o se uso talitonu. E faigofie lava ona tatou faamasinoina se tagata e ala i a tatou lava tapulaa, e ala i le faatagaina o o tatou lava faalogona totino e faapuaoa ai la tatou faamasinoga. E pei ona taʻua ai e se tasi toeaina e faapea, “ou te taumafai lava e feutagai ma isi i se auala e faafiafia ai Ieova, e lē faavaea i ni oʻu lava manatu.” Maeu le aogā mo auauna uma lava a Ieova ona faaaogā lana Afioga e fai ma a latou tapulaa!

O faaaoaoga faale-Tusi Paia o i luga, ua fesoasoani ia i tatou e tetee atu ai i faalogona faaituʻau o loo iai pea tau i le faailoga lanu po o faiga faaʻauʻau a atunuu. O le faataitai i le uiga lē faailoga tagata o Ieova, ua tatou puipuia ai le faapotopotoga Kerisiano mai i le faaituʻau, faailoga lanu, ma faiga faaʻauʻau.

Na iloa e le aposetolo o Peteru e faapea “e le faailogaina tagata e le Atua.” (Galuega 10:34) O faiga faaʻauʻau o le fili lea o le lē faailoga tagata ma e faaleagaina ai mataupu silisili o le alofa ma le autasi. Sa avea Iesu ma lē e fiafia i ai ē matitiva, ē vāivai, ma ē lē taualoa, ma sa ia faamāmā la latou avega. (Mataio 11:28-30) Sa iloga lona matuā eseese mamao ma taʻitaʻi lotu Iutaia, o ē na aliitai i tagata, lafo atu avega mamafa ia i latou e ala i le tuuina atu i ai o le tele o tulafono eseese. (Luka 11:45, 46) O le faia o lenei mea ma le faaalia o le faaʻauʻau i tagata mauoloa ma tagata maualuluga, o le mea moni sa lē ogatasi ma aʻoaʻoga a Keriso.—Iakopo 2:1-4, 9.

I aso nei, e gauai atu toeaina Kerisiano i le tulaga ulu o Keriso ma faaalia le lē faailoga tagata i tagata tuuina atu uma lava o Ieova. A o latou ‘leoleoina le lafu mamoe a le Atua o loo latou tausia,’ latou te faamamao ese mai le faaalia o le faaʻauʻau ona o tulaga tau tamaoaiga, eseese o uiga, po o faiā faaleaiga. (1 Peteru 5:2) O le faataitai i le Atua e lē faailoga tagata ma utagia lana lapataiga e faatatau i gaoioiga e faaalia ai le faaʻauʻau, e tatau i toeaina Kerisiano ona faalaeiauina le agaga o le lē faailoga tagata i totonu o le faapotopotoga.

O le faapotopotoga Kerisiano o Molimau a Ieova, o se auuso faavaomalo. O se faamaoniga olaola lea e iloa ai, e mafai ona iai moni lava se sosaiete e lē faaituʻau, e lē faailoga tagata i lalo o le taitaiga a Iesu Keriso. O Molimau, ua “oofu . . . i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:24) Ioe, o loo latou aʻoaʻo mai le faaaoaoga lelei atoatoa a le Atua e lē faailoga tagata, o Ieova, ma maua ai le faamoemoe o le ola e faavavau i le lalolagi fou e matuā leai lava se faailoga tagata.—2 Peteru 3:13.

[Faaopoopoga i lalo]

[Ata i le itulau 26]

Na iloa e le aposetolo o Peteru e faapea, e lē faailogaina tagata e le Atua