Akula ma Pisila—Se Ulugalii e Tatau Ona Faaaʻoaʻo i Ai

“UA OU alofa atu ia Pisila ma Akula, o ē na la faigaluega faatasi ma aʻu i le galuega a Keriso Iesu, o ē na tuu o la ola i se tulaga lamatia ona o aʻu, ina ia ou ola, e lē na o aʻu o loo faafetai atu ia te i laua, ae atoa foi ma ekalesia uma i nuu ese.”—Roma 16:3, 4, NW.

O nei upu a le aposetolo o Paulo i le faapotopotoga Kerisiano i Roma, ua faaalia ai lona manatu maualuga ma lona alofa māfana mo lenei ulugalii faaipoipo. Sa ia faamautinoa na te lei faagaloina i laua ina ua ia tusi atu i la latou faapotopotoga. Ae o ai nei ‘aumea faigaluega’ e toalua a Paulo, ma aisea sa matuā pele ai i laua ia te ia faapea ma faapotopotoga?—2 Timoteo 4:19.

O Akula o se Iutaia mai tagata Iutaia ia na faataapeapeina, ma o lona nuu moni o Pono, i le vaega i mātū o Asia Itiiti. Sa nonofo o ia ma lana avā o Pisila i Roma. Sa iai se vaega na toatele tagata Iutaia na nonofo ai, i lena aai talu mai le faatoilaloina e Pompey o Ierusalema i le 63 T.L.M., ina ua aauina atu se vaega e toatele o pagota i Roma e fai ma pologa. O le mea moni lava, ua faaalia mai i tusitusiga faa-Roma na vaneina i maa e faapea, pe tusa ma le sefululua pe sili atu foi sunako sa iai i le aai anamua. E toatele tagata Iutaia mai Roma sa iai i Ierusalema i le aso Penetekoso 33 T.A., na latou faalogologo ai i le tala lelei. E lē taumatea, o i latou na mafua ai ona oo atu mo le uluai taimi le feau faa-Kerisiano i le laumua o le Emepaea o Roma.—Galuega 2:10.

Ae peitai, na tutuli ese tagata Iutaia mai Roma i le tausaga e 49 po o le amataga o le tausaga e 50 T.A. e ala mai i le faatonuga a le emeperoa o Kalaotio. O lea la, i le aai o Korinito i Eleni, o iina na feiloai atu ai le aposetolo o Paulo ia Akula ma Pisila. Ina ua taunuu atu Paulo i Korinito, na ofoina atu i ai ma le agalelei e Akula ma Pisila ia te ia, e lē gata i le avea o ia ma a la mālō, ae na faapea foi ona ofoina atu i ai ma se galuega, auā sa tutusa o latou faiva—o le faia lea o faleie.—Galuega 18:2, 3.

Tagata Fai Faleie

Sa lē o se galuega faigofie lenei. O le faia o faleie, na aofia ai le tipiina ma le suʻiina faatasi o fasi ie malō ma talatala po o ie e fai i paʻu o manu. E tusa ai ma le faamatalaga a le tusitala o talafaasolopito o Fernando Bea, o “se galuega na manaomia ai le tomai ma le faaeteete” o tagata fai faleie o ē e galulue i ie “mafiafia, e faigata ona fālō, ia sa faaaogā e tolauapi ai a o faimalaga, ina ia malu ai mai le la ma le timu, pe mo le teuina ai o oloa i ana o vaa.”

Ua lāgā ai i lenei mea se fesili. Pe sa lei faapea mai ea Paulo o ia ‘na aʻoaʻoina moni e Kamalielu,’ ua saunia ai o ia mo se galuega e sili atu ona maualuga mo aso o i luma? (Galuega 22:3) E moni lava, ae peitai sa manatu foi tagata Iutaia o le uluai senituri e faapea, o se mea lelei foi le aʻoaʻoina o se tama talavou i se matātā faapitoa e tusa lava pe sa aʻoga o ia i se aʻoga maualuga. O lea la, atonu o le auala foi lena na maua ai e Akula ma Pisila lo la tomai i le faia o faleie a o talavou i laua. Sa faamaonia le aogā tele o lena poto masani i taimi mulimuli ane. Ae ona o i laua o ni Kerisiano, sa lē manatu ai i laua o le a avea le galuega totogi ma sini autū i o la olaga. Na faamatala mai e Paulo e faapea, o le galuega na ia faia i Korinito faatasi ma Akula ma Pisila sa na o se galuega e lagolagoina ai lana galuega autū, o le folafolaina lea o le tala lelei e aunoa ma le ‘faaee atu o se avega mamafa i se tasi.’—2 Tesalonia 3:8; 1 Korinito 9:18; 2 Korinito 11:7.

E manino lava, na fiafia Akula ma Pisila e  faia mea uma na la mafaia e fesoasoani ai i le auaunaga faamisionare a Paulo. O ai na iloa pe faafia ona mālōlō nei aumea e toatolu mai la latou galuega ina ia mafai ai ona avatu se molimau lē fuafuaina i a latou tagata e ō mai e faatau, po o ē ui ane! Ma e ui lava o la latou galuega o le fai o faleie o se galuega maulalo ma e faigata, ae sa latou fiafia lava e fai, na galulue ai e oo lava i “po ma ao” ina ia lagolagoina ai manaoga tau i le Malo o le Atua—e pei lava ona tausia e le toatele o Kerisiano i aso nei i latou lava e ala i galuega faavaitaimi pe mai i lea taimi i lea taimi, ina ia mafai ai ona tuuina atu le tele o le taimi o totoe e fesoasoani ai i tagata e faalogo i le tala lelei.—1 Tesalonia 2:9; Mataio 24:14; 1 Timoteo 6:6.

Faaaoaoga o le Talimalo

Atonu sa faaaogā foi e Paulo le fale o Akula ina ia faamautū atu i ai i lana galuega faamisionare mo le 18 masina lea na nofo ai o ia i Korinito. (Galuega 18:3, 11) E foliga mai foi la sa fiafia Akula ma Pisila ina ia avea Sila ma Timoteo ma a la mālō ina ua taunuu ane i laua mai Maketonia. (Galuega 18:5) O tusi e lua a Paulo ia na avatu i tagata Tesalonia na avea mulimuli ane ma kanona o le Tusi Paia, atonu na tusia a o nofo ai le aposetolo iina ia Akula ma Pisila.

E faigofie lava ona manatu e faapea, na avea moni lava le fale o Akula ma Pisila i lea taimi ma nofoaga autū o le galuega faatiokarate. E lē taumatea sa afea pea e le toatele o uo pele—o Setefana ma lona aiga, o uluai Kerisiano ia i le itumalo o Akaia na papatisoina e Paulo; o Iuso, o lē na faatagaina Paulo e faaaogā lona fale e fai atu ai ana lauga; ma Kiripo, o le alii pule i le sunako, o lē na talia le upu moni faatasi ma lona aiga uma. (Galuega 18:7, 8; 1 Korinito 1:16) Sa iai foi ia Fotunato ma Akaiko; o Kaio, o lē e foliga mai na faia ai foi sauniga a le faapotopotoga i lona fale; o Erato, o le tulafale sili o le aai; o Kuato, o le failautusi o lē na faalau i ai e Paulo lana tusi i le auuso i Roma; ma Fipe, o le tuafafine faamaoni o le faapotopotoga e latalata ane i Kenikerea, o lē atonu na ia avatua le tusi mai Korinito i Roma.—Roma 16:1, 22, 23; 1 Korinito 16:17.

O auauna a Ieova i aso nei o ē na latou mauaina le avanoa e faaalia atu ai le agaga talimalo i se faifeau faimalaga, ua latou iloa, e maeu le faalaeiauina ai ma o se mea e manatua pea. O mea tutupu e atiina ae ai na faamatalaina ai i na taimi, e mafai ona avea moni ma puna o faalaeiauga e toe faafouina ai faaleagaga mo tagata uma lava. (Roma 1:11, 12) Ma e pei ona sa faia e Akula ma Pisila, o i latou e tuuina atu o latou fale mo sauniga, atonu o se Suesuega Tautusi a le Faapotopotoga, ua latou mauaina le olioli ma le loto malie ona ua mafai ona latou faia se sao i le faaauilumaina o le tapuaiga moni i lenei auala.

Sa matuā vavalalata la latou mafutaga faaleuo ma Paulo, o lea na latou ō faatasi ai ma Akula ma Pisila ina ua tuua e Paulo Korinito i le tau e totogo ai mea i le 52 T.A., seia oo atu  i Efeso. (Galuega 18:18-21) Na latou nonofo ai i lena aai ma talaʻi ai, ua faataatia ai se faavae mo le isi asiasiga a le aposetolo. O iinei na ‘ave ai’ e nei faiaʻoga talenia o le tala lelei ia Apolo mauupu, ma na la olioli e fesoasoani atu ia te ia ina ia malamalama ‘atili i le saʻo o le ala o le Atua.’ (Galuega 18:24-26) Ina ua toe asiasi atu Paulo i Efeso i lana malaga faamisionare lona tolu, i se vaitaimi o le tau mālūlū o le 52 i le 53 T.A., na ia iloa ai ua matuā fua le fanua na faatoʻaina e lenei ulugalii sogasoga mo le seleseleina. Pe tusa ma le tolu tausaga na talaʻi ma aʻoaʻo atu ai Paulo iina e uiga i “Le Ala,” a o faia sauniga a le faapotopotoga i Efeso i le fale o Akula.—Galuega 19:1-20, 26; 20:31; 1 Korinito 16:8, 19.

Mulimuli ane, ina ua la foi atu i Roma, sa faaauau e nei uo e toalua a Paulo ona “tausisi i le alofa i tagata ese,” i le faaavanoaina o lo la fale mo sauniga faa-Kerisiano.—Roma 12:13; 16:3-5.

Na ‘Tuu o la Ola i se Tulaga Lamatia’ Ona o Paulo

Atonu sa nofo foi Paulo ia Akula ma Pisila a o iai o ia i Efeso. Pe sa nofo o ia ma i laua i le taimi na tupu ai le vevesi ona o le tagata gaosimea ario? E tusa ma le faamatalaga i le Galuega 19:23-31, ina ua fouvale tufuga gaosimea ario i le talaʻiga o le tala lelei, sa taofia e le auuso Paulo mai le tuuina atu o ia i se tulaga lamatia e ala i lona alu atu i le faapotopotoga o tagata faatupu faalavelave. Ua aʻoaʻo e nisi tagata fai manatu o le Tusi Paia e faapea, atonu o le taimi tonu lava lea na oo ai se tulaga matautia na ‘lē mautonu ai Paulo e oo i lona lava ola,’ na faasalavei ane ai Akula ma Pisila, ‘ma tuu ai o la ola i se tulaga lamatia’ ona o ia.—2 Korinito 1:8; Roma 16:3, 4.

Ina “ua uma le vavaō,” ona alu ese ai loa lea ma le poto Paulo mai le aai. (Galuega 20:1) O le mea mautinoa lava, na fesagai foi Akula ma Pisila ma teteega ma tauemuga. Ae pe na loto vaivai ai ea i laua ona o na mea? E leai, nai lo o lea, sa faaauau atu pea ma le loto tetele Akula ma Pisila i le faia o a laua taumafaiga faa-Kerisiano.

O se Ulugalii e Mafana le Mafutaga

Ina ua faaiuina le pulega a Kalaotia, ona toe foi atu lea o Akula ma Pisila i Roma. (Roma 16:3-15) Ae peitai, o le taimi mulimuli o loo taʻua ai i laua i le Tusi Paia, o le taimi lea ua toe foi ai i laua i Efeso. (2 Timoteo 4:19) Ua toe taʻua mai ai foi i le Tusi Paia e pei o isi faasinoga uma lava, e taʻua faatasi ai lava lenei tane ma le avā. Maeu se ulugalii e vavalalata ma autasi! E lē mafai lava ona mafaufau Paulo i lena uso pele o Akula ae lē taʻua ai le lagolagosua faamaoni a lana avā. Ma e maeu se faaaoaoga lelei mo ulugalii Kerisiano i aso nei, auā o le lagolagosua ma le loto faamaoni a se paaga tuutoina, ua mafai ai e se tagata ona faia le tele o ni mea “i le galuega a le Alii” ma i nisi taimi, atonu e faia ai mea e sili atu i mea e mafai ona faia e se tagata nofofua.—1 Korinito 15:58.

Sa auauna Akula ma Pisila i nisi o faapotopotoga eseese. I le pei o i laua, ua faapena foi i le toatele o Kerisiano maelega i aso nei ona faaavanoaina i latou e siitia atu e auauna i nofoaga o loo manaomia tele ai le fesoasoani. Ua latou tofo foi i le olioli ma le loto malie e maua mai i le vaai atu ua faatupuina manaoga o le Malo faapea ma le mafaia ona atiina ae ni faauooga māfana faapelepele.

E ala i la laua faaaoaoga uigaese o le alofa faa-Kerisiano, na matuā talisapaia ai e Paulo ma isi uso ia Akula ma Pisila. Ae o le mea e sili atu ona tāua, talu ai sa la faataatiaina se talaaga lelei na matuā faafiafiaina ai Ieova. Ua faamautinoaina mai i tatou e le Tusi Paia e faapea: “Auā e le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10.

Atonu e tatou te lē maua se avanoa e faalautele atu ai a tatou galuega i ni auala e pei ona faia e Akula ma Pisila, ae peitai, e mafai ona tatou faataitai i la laua faaaoaoga sili ona lelei. O le a tatou lagona le matuā loto malie a o tatou tuutoina atu lo tatou malosi ma le ola i le auaunaga paia, ʻaua lava neʻi galo ona “agalelei ma alolofa atu; auā o taulaga faapena e fiafia ai le Atua.”—Eperu 13:15, 16.