Le Upu Moni e Uiga ia Iesu

E FOLIGA mai ua leai se iuga i aʻoaʻoga ma manatunatuga e faatatau ia Iesu, i le po o ai o ia ma po o ā foi ni mea ua ia faataunuuina. Ae faapefea le Tusi Paia lava ia? O le ā se mea o taʻuina mai ai ia i tatou e faatatau ia Iesu Keriso?

Mea o Fai Mai ai le Tusi Paia

O le faitauina ma le faaeteete o le Tusi Paia, o le a e mātauina ai nei mea moni e fai ma ki:

□ O Iesu o le Alo pele e toatasi o le Atua, o le ulumatua o foafoaga uma.—Ioane 3:16; Kolose 1:15.

□ Pe tusa ma le lua meleniuma ua mavae, na faaliliuina mai ai e le Atua le soifua o Iesu i le manava o se taupou Iutaia ina ia fanau mai ai o se tagata.—Mataio 1:18; Ioane 1:14.

□ Sa sili atu Iesu nai lo o le na ona avea o se tagata lelei. I vala uma lava, sa ia faaatagia moni lava uiga totino matagofie o lona Tamā, o Ieova le Atua.—Ioane 14:9, 10; Eperu 1:3.

□ I le taimi o lana faiva i le lalolagi, na tausia ai ma le alofa e Iesu manaoga o ē tigaina. Sa ia faamālōlō faavavega ē na mamaʻi, ma oo foi ina faatutūina ē na feoti.—Mataio 11:4-6; Ioane 11:5-45.

□ Na folafolaina mai e Iesu le Malo o le Atua, ua na o lea le faamoemoe mo tagata ua mafatia, ma sa ia aʻoaʻoina foi ona soo ina ia latou faaauau pea ona faia o lenei galuega talaʻi.—Mataio 4:17; 10:5-7; 28:19, 20.

□ Ia Nisani 14 (pe tusa lea o Aperila 1), i le 33 T.A., na puʻea faapagota ai Iesu, faamasinoina, ma faasalaina i le oti ona o tuuaʻiga sese e faapea o ia o se tagata tetee i le malo.—Mataio 26:18-20, Mataio 26:48–27:50.

□ Na avea le maliu o Iesu ma togiola, ua faasaʻoloto ai tagata talitonu mai lo latou tulaga agasala, ma i lea ua tatalaina ai le auala i le ola e faavavau mo i latou uma o ē faaalia le faatuatua ia te ia.—Roma 3:23, 24; 1 Ioane 2:2.

□ Ia Nisani 16, na toe faatūina aʻe ai Iesu, ma e lei pine lava mulimuli ane, na toe afio atu ai loa o ia i le lagi ina ia totogi atu i le Tamā le aogā o le togiola o lona soifuaga lelei atoatoa faaletagata.—Mareko 16:1-8; Luka 24:50-53; Galuega 1:6-9.

□ I le avea ma Tupu tofia a Ieova, na maua ai e Iesu toe faatūina le pule atoatoa e faataunuuina ai le uluai fuafuaga a le Atua mo le tagata.—Isaia 9:6, 7; Luka 1:32, 33.

O lea la, ua faailoa mai ai e le Tusi Paia Iesu e faapea o ia o le tagata autū po o le ki lea i le faataunuuina o fuafuaga a le Atua. Ae, pe mafai faapefea ona e faamautinoaina o le Iesu moni lava lenei—o le Iesu lenei o le talafaasolopito, o lē na fanau mai i Peteleema ma na femaliuai i le lalolagi lenei, pe tusa ma le 2,000 tausaga ua mavae?

Faavae e Mautinoa Ai

E mafai ona aveesea le tele o masalosaloga i le na o le faitau lava i Tusitusiga Kerisiano Eleni faatasi ma se manatu e faaʻauʻau pe faaituʻau. O le faia faapea, o le a e iloa ai o faamatalaga a le Tusi Paia e lē o ni tala e lē manino o ni mea na tutupu, e pei o le tulaga o tala fatu. Nai lo o lea, o loo taʻua ai igoa, taimi patino, ma nofoaga tonu na tutupu ai mea. (Mo se faaaoaoga, tagai i le Luka 3:1, 2.) E lē gata i lea, o loo faamatalaina ai i se auala mataʻina le faamaoni uigaese o soo o Iesu faatasi ma se mamā aʻiaʻi ua atili faamausalī ai le mautinoa o lē faitau. Sa lē faaufiufia e le ʻau tusitala ni measese a tagata uma—e oo i  a latou lava measese—ona o le mananao e faia se talaaga lelei e moni ma faamaoni. Ioe o le a e iloa ai, o loo iai i le Tusi Paia le upu moni.—Mataio 14:28-31; 16:21-23; 26:56, 69-75; Mareko 9:33, 34; Kalatia 2:11-14; 2 Peteru 1:16.

Ae peitai, e iai ma nisi mea se tele. O mea na maua i suesuega na faia i toega o mea anamua, ua toe faamaonia atili ai foi faamaumauga a le Tusi Paia. E mo se faaaoaoga, afai e te asiasi atu i le Fale Mataaga o Isaraelu i Ierusalema, o le a e vaaia ai iina se maa o loo tusia ai le igoa o Ponotio Pilato. O isi mea na maua i suesuega o toega o mea anamua, ua faamautinoaina mai ai o Lusanio ma Sekio Paulo, ia o loo taʻua o la igoa i le Tusi Paia, o ni tagata moni lava, nai lo o le faapea mai o ni tagata i mafaufauga o uluai Kerisiano. O mea na tutupu o loo lipotia mai i Tusitusiga Kerisiano Eleni (Feagaiga Fou) ua maua ai le anoanoai o faamautinoaga ua faasino i ai tusitala anamua, e aofia ai Juvenal, Tacitus, Seneca, Suetonius, Pliny the Younger, Lucian, Celsus, ma le tusitala Iutaia o talafaasolopito o Josephus. *

O faamatalaga o loo aumaia i Tusitusiga Kerisiano Eleni, na talia e aunoa ma se masalosalo e le faitau afe o tagata na soifua ai i le uluai senituri. E oo lava i fili o le Faa-Kerisiano, na latou lē teena le moni aʻiaʻi o mea na lipotia mai na fetalaia ma faia e Iesu. E tusa ai ma le mafaia e le ausoo ona faatele ni faamatalaga e uiga ia Iesu ina ua mavae lona maliu, ua faapea mai ai Polofesa F. Bruce: “O le mea moni, e matuā lē faigofie lava e pei ona manatu ai nisi tusitala, ona fatuina afioga ma galuega a Iesu i na uluai tausaga a o soifua pea le toatele o Lona ausoo, o ē sa mafai ona manatua pea mea na tutupu ma mea e lei tutupu. . . . Sa fefefe le ausoo e faia ni tala sese (ae maise lava le suia ma le loto i ai o mea moni), ia e ono vave lava ona faaalialia e i latou e fiafia e faia faapea.

Le Pogai Latou te Lē Talitonu Ai

Ae peitai, o loo tumau pea ona masalosalo nisi tagata aʻoga. A o latou manatu i faamaumauga a le Tusi Paia e faapea o ni tala fatu, ua latou naunau ai e suesue i tusitusiga faaapokalifa ma talia ai e faapea o ni mea saʻo! Aisea? E manino lava, o loo iai i faamaumauga a le Tusi Paia mea e lē mananao le toatele o tagata faimafaufau i aso nei e talitonu i ai.

I lana tusi o le Union Bible Companion, na lomia i le 1871, na faatulai mai ai e S. Austin Allibone  se luʻi i tagata masalosalo. Na ia tusi mai e faapea: “Ia fesili atu i so o se tasi o loo faapea mai e masalosalo i le moni o le talafaasolopito o le Evagelia, pe aisea la ua ia talitonu ai na maliu Kaisara i le Fale Fono, pe na faapaleina foi e Pope Leo III ia Emeperoa Charlemagne e avea ma Emeperoa o atunuu i Sisifo i le tausaga e 800? . . . Tatou te talitonu i faamautinoaga uma . . . na faia e faatatau i nei tane; ma ona o loo iai foi ia i tatou faamaoniga o le talafaasolopito e uiga i le moni o i latou na. . . . Afai e iai nisi e tumau pea ona lē talitonu e ui lava i le saunia o faamaoniga e pei o lenei, e tatou te lafoaiina i latou o ni tagata loto maaa pe e faavalevalea foi. O le ā la sa tatou tala e fai atu ia i latou o ē o loo faapea mai e lē o talitonu e ui lava i le anoanoai o faamaoniga ua saunia nei e faatatau i le saʻo aʻiaʻi o le Tusi Paia? . . . Latou te lē mananao e talitonu i se mea e faamaulaloina ai o latou loto faamaualuga, ma o le a uunaia faamalosi ai i latou ina ia ola i ni olaga e ese mai ai.”

Ioe, e matuā ese mamao lava manatu o nisi tagata masalosalo i le pogai o loo latou teteeina ai ia Tusitusiga Kerisiano Eleni. O le faafitauli ia i latou, e lē o le pe moni ia tusitusiga, ae o ana tapulaa. E mo se faaaoaoga, na fetalai Iesu e faatatau i ona soo e faapea: “E le ni o le lalolagi i latou, faapei o aʻu, ou te lē so le lalolagi aʻu.” (Ioane 17:14) Ae peitai, o le toatele lava o ē ua faapea mai o i latou o Kerisiano, o loo matuā aafia i mataupu faapolotiki a lenei lalolagi, ua oo lava foi ina latou faia ni vaega i taua faamasaa toto. Nai lo o le faia aʻe o o latou olaga ina ia ogatusa ma tapulaa a le Tusi Paia, e toatele tagata ua mananao ina ia gauai atu le Tusi Paia i a latou lava tapulaa.

Seʻi manatu foi i le mataupu e faatatau i amioga. Na lapataia malosi e Iesu le faapotopotoga i Tuatira ona o le faatagaina pea o le faitaaga. Na ia taʻu atu ia i latou e faapea: “O aʻu lava o lē suesue i [“fatugaʻo,” NW] ma loto; ou te avatua foi ia te outou taitoatasi e tusa ma a outou galuega.” * (Faaaliga 2:18-23) Ae peitai, pe e lē moni ea e toatele i latou ua faapea mai o Kerisiano, ua lafoaia tulafono tau amio? Ua sili ia i latou le teena o fetalaiga a Iesu nai le o le lafoaia o a latou amioga lē mamā.

I le filifili maumauai ina ia teteeina le Iesu o le Tusi Paia, ua fausia aʻe ai e tagata popoto se Iesu ina ia tusa ai ma o latou lava mafaufauga. Ua oo ai ina latou nofo sala i le fatuina o se tala lea o loo latou faitioseseina ai tusitala o le Evagelia.  E latou taofimauina vaega o le soifuaga o Iesu lea latou te fiafia i ai, ae latou te teteeina isi vaega uma, ae faaopoopo i ai ni a latou lava faamatalaga. O le mea moni, o lo latou lava tagata poto fealuai solo po o tagata e fia suia amioga ma manatu o tagata, e lē o le Iesu lena o le talafaasolopito lea ua latou faapea mai o loo latou sailia; ae nai lo o lea, o le Iesu lea o loo latou manatu i ai, ua na o se tagata i mafaufauga o tagata popoto faasausili.

Mauaina o le Iesu Moni

Sa taumafai Iesu e fagufagu loto o i latou o ē o loo matelaina moni mo le upu moni ma le amiotonu. (Mataio 5:3, 6; 13:10-15) O ia ituaiga o tagata ua tali atu i le valaaulia a Iesu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.

O le Iesu moni, e lē mafai ona maua i tusi na tusia e tagata popoto o aso nei; e lē maua foi o ia i lotu a Kerisinetoma ia ua avea ma nofoaga autū e fofoa mai ai uputuu faaletagata. E mafai ona e maua le Iesu o le talafaasolopito i lau kopi o le Tusi Paia. Pe e te fia aʻoaʻo atili e uiga ia te ia? O le a fiafia tele Molimau a Ieova e fesoasoani atu ia te oe e faia faapea.

[Faaopoopoga i lalo]

[Pusa i le itulau 6]

AUGĀ SENITURI O FAITIOGA

O faitioga e uiga i le Tusitusiga Kerisiano Eleni, na amata i le sili atu i le 200 tausaga ua mavae, ina ua taʻutino mai e le faifilosofia Siamani o Hermann Samuel Reimarus (1694-​1768) e faapea: “Ua taʻutonuina i matou i le faia o se faaeseesega aʻiaʻi o aʻoaʻoga a le ʻau Aposetolo i a latou tusitusiga ma mea na folafola ma aʻoaʻoina e Iesu Lava Ia i le taimi o Lona soifuaga.” Talu mai taimi o Reimarus, e toatele tagata aʻoga ua aʻoaʻoina ia faapena o latou lagona.

Ua mātauina e le tusi, The Real Jesus e faapea, e toatele le ʻau faitio o aso anamua sa lē manatu ia i latou lava o ni aposetate. Nai lo o lea, “sa latou manatu ia i latou lava e faapea o ni Kerisiano moni lava ina ua saʻoloto mai faasasaaga o aʻoaʻoga ma uputuu.” Sa latou lagona, o le tele o le iloa o le Tusi Paia, sa avea o “se ituaiga o Faa-Kerisiano ua faamamāina.”

O le mea moni e faanoanoa ai, ua avea Kerisinetoma ma nofoaga e fofoa mai ai uputuu faaletagata. O aʻoaʻoga i le lē mafai ona oti o le solu, le Tolutasi, ma le afi i seoli, o nisi na o aʻoaʻoga ua feteenai ma le Tusi Paia. Ae peitai, e lē tuuaʻia le ʻau tusitala o le Tusitusiga Kerisiano Eleni ona o lenei faapioina o le upu moni. Nai lo o lea, sa latou tetee atu i uluai faailoga o aʻoaʻoga sese i le taulotoaiga o le uluai senituri, ina ua tusi mai Paulo e faapea, ‘ua galue’ le aposetasi ia i latou ua fai mai o Kerisiano. (2 Tesalonia 2:3, 7) E mafai ona faamautinoa ai ia i tatou e faapea, o mea o iai i le Tusitusiga Kerisiano Eleni, o se faamaumauga o upu moni o le talafaasolopito ma aʻoaʻoga.

[Pusa i le itulau 7]

O ANAFEA NA TUSIA AI EVAGELIA?

Ua tausisi le toatele o le ʻau faitio agaʻi i le Feagaiga Fou faapea, o Evagelia na tusia i se taimi umi talu ona mavae le tutupu o mea o loo faamatala mai ai, o le mea lea e mautinoa lava o loo iai ni measese.

Peitai ua faaalia e mea moni ua leva ona tusia le tusi o Mataio, Mareko, ma Luka. O ni faailoga i faaiuga o nisi o kopi o tusitusiga a Mataio, e faailoa ai o uluai tusitusiga na fai i aso anamua e tusa o le 41 T.A. O le Evagelia a Luka, atonu na tusia i le va o le 56 ma le 58 T.A., auā o le tusi o Galuega (atonu na maeʻa i le 61 T.A.) e faailoa mai ai o le taimi lea ua uma ona tusia e le tusitala o Luka lana “uluai tusi” o le Evagelia. (Galuega 1:1) O le Evagelia a Mareko, e manatu i ai na tusia i Roma i le vaitaimi a lē o le faafalepuipuiina muamua o le aposetolo o Paulo, po o lona lua​—atonu i le va o le 60 ma le 65 T.A.

E ioe Polofesa Craig L. Blomberg, o na Evagelia na tusia i se taimi muamua atu. Ua ia taʻua, e tusa pe tatou te faaopoopo i ai ma le Evagelia a Ioane, lea na tusia i le faaiuga o le uluai senituri, “ua tatou matuā lalata atu pea i le amataga o mea na tutupu pe a faatusatusa i le tele o tusitusiga o talafaasolopito i olaga o tagata i aso anamua. O se faaaoaoga, o uluai tusitusiga e lua i le olaga o Alesana le Sili, na tusia e Arrian ma Plutarch, e silia i le faselau tausaga mulimuli ane ina ua maliu Alesana i le 323 T.L.M., ae masani ona maufaatuatuaina e tusitala o talafaasolopito. I le faagasologa o senituri, na aliai mai ai ni talatuu e uiga i le olaga o Alesana, ae o le tele o na talatuu, na faatoʻā aliai mai i ni senituri ua mavae ina ua uma ona tusia e nei tusitala e toalua a la tusi.” O vaega o le talafaasolopito o le Tusitusiga Kerisiano Eleni e tatau lava ona talitonuina​—e pei o talafaasolopito na tusia e tusitala o le lalolagi.

[Ata i le itulau 8]

O le a pule aoao le olioli i tagata uma i le Parataiso faalelalolagi o loo fotuai mai