Pe E te Manatua?

Pe ua e olioli ea i le faitauina o lomiga talu ai nei o Le Olomatamata? Afai o lea, o le a e fiafia la e toe manatua mea o loo mulimuli mai:

□ O le ā le uiga o le upu Eleni pa·rou·si’a lea o loo faaaogā ai i le Mataio 24:3, 27, 37, 39?

Ua faapea mai le Expository Dictionary of New Testament Words a Vine: “PAROUSIA . . . ua faailoa ai le taunuu mai ma le faatasi e sosoo ane ai.” O lea, e lē tau ina faatatau atu i le taimi tonu e taunuu ai, ae o le faatasi ai e afua i le taimi e taunuu ai ma faasolo atu ai i luma.—8/15, itulau 11.

□ Na faapefea ona ‘faapuupuuina na aso’ ina ia mafai ai ona faasaoina ‘tagata’ i le uluai senituri, ma o le a faapefea ona tupu i sona tulaga e sili atu? (Mataio 24:22)

I le 66 T.A., na faafuasei ai ona faapuupuu e autau a Roma la latou osofaiga ia Ierusalema, ma mafai ai e ‘tagata’ Kerisiano ona sosola ese. O le a faapena foi, tatou te faatalitalia le osofaiga o le a oo mai ia Papelonia le Aai Tele o le a oo ina faapuupuuina. Ona mafai ai lea e Kerisiano faauuina ma a latou aumea ona sao mai se faaumatiaga e ono oo i ai.—8/15, itulau 18-20.

□ O ā o tatou uiga e ao ona iai pe a amata ona ʻai ma inu se tagata i le areto ma le uaina o le Faamanatuga pe ua ia lē toe faia foi faapena?

E lē manaomia fua e isi Kerisiano ona popole. Na fetalai Iesu: “O aʻu nei o le leoleo mamoe lelei; ua ou iloa aʻu mamoe.” E pei ona matuā mautinoa mai, e silafia e Ieova i latou o ē ua ia filifilia o ni atalii faaleagaga. (Ioane 10:14; Roma 8:16, 17)—8/15, itulau 31.

□ O le ā le fuafuaga autū na iai o le Tulafono Faa-Mose?

I le tulaga autū, na aʻoaʻo atu e le tulafono ia Isaraelu lo latou manaomia o le Mesia, o lē o le a na togiolaina i latou mai lo latou tulaga agasala. (Kalatia 3:24) Ua faapena foi ona aʻoaʻo atu e le Tulafono le mataʻu ma le usiusitai i le Atua, ma sa fesoasoani le tulafono ia Isaraelu ina ia tausisia le vavae ese mai faiga faapiopio a nuu o siosiomia ai. (Levitiko 18:24, 25)—9/1, itulau 9.

□ O le ā le fuafuaga o le feagaiga fou? (Ieremia 31:31-34)

Ina ia maua mai ai se malo o tupu ma ositaulaga e manuia ai tagata uma. (Esoto 19:6; 1 Peteru 2:9; Faaaliga 5:10)—9/1, itulau 14, 15.

□ Aisea e tatau ai ona tatou faamasani i le faia o faatoesega?

O se faatoesega e mafai ona fesoasoani ai e faaitiitia se tiga ua māfua ona o le lē lelei atoatoa, ma e mafai ona faaleleia ai faiā. O faatoesega uma tatou te faia o se lesona lea o le lotomaulalo ma toleniina ai i tatou ina ia sili atu ona magafagafa mo faalogona o isi.—9/15, itulau 24.

□ Pe o se mea moni i talafaasolopito le Lolo i le lalolagi aoao i aso o Noa?

Ioe. O faamatalaga anamua ua taʻua ai le lolo i le lalolagi aoao e mafai ona maua i le lalolagi atoa, mai vaega o Amerika e oo i Ausetalia. O le mamao o le salalau atu o lenei manatu ua faaopoopo i le lagolagoina o le mea moni e faapea na tupu moni le lolo i le lalolagi aoao, e pei ona lipotia mai i le Tusi Paia. (Kenese 7:11-20)—9/15, itulau 25.

□ O le ā ua aofia ai i le agaga talimalo? (Roma 12:13)

Ua faaliliuina le upu talimalo mai le upu Eleni lea e faia aʻe i upu autū e lua e faauiga i le “alofa” ma le “tagata ese.” O lea, e uiga moni lava le talimalo i le “alofa atu i tagata ese.” Ae e tele atu nisi mea e aofia ai nai lo le alofa e faavae i mataupu silisili, lea atonu e faia ona o se tiute po o se matafaioi. E faavae aʻe i le moni o lagona naunau, o lagona māfana, ma lagona faauo.—10/1, itulau 9.

□ O le ā na finau atu ai Paulo e faatatau i le faaipoipo ma le tulaga nofofua i lana uluai tusi i Kerisiano i Korinito, i le mataupu e 7?

E talafeagai le faaipoipo ma, i nisi o tulaga, ua lelei ona faia faapea e nisi. Ae o le nofofua e lē mafaafitia le aogā mo se alii po o se tamaitai Kerisiano o loo manao ina ia auauna ia Ieova e aunoa ma le tele o ni mea e fetosoaiina ai.—10/15, itulau 13.

□ E faapefea e se toeaina ona ‘tausi i lona aiga’? (1 Timoteo 5:8)

E tatau i se toeaina ona ‘tausi i lona aiga’—i lana avā faapea ma lana fanau—i le itu faaletino, le itu faaleagaga, ma tau i faalogona.—10/15, itulau 22.

□ E faapefea ona foaiina mai pea e Ieova faamafanafanaga i ana auauna?

E gaoioi le agaga paia o le Atua o se ‘faamafanafanaloto.’ (Ioane 14:16, faamatalaga faaopoopo i le pito i lalo o le mau i le NW) O le isi auala e saunia ai e le Atua faamafanafanaga e ala mai lea i le Tusi Paia. (Roma 15:4) E silafia e le Atua o tatou manaoga taitoatasi ma ua mafai ona ia faaaogā i tatou e avea ma faamafanafanaga o le tasi i le isi, e pei lava ona sa maua e Paulo faamafanafanaga e ala mai i lipoti a Tito e uiga i uso i Korinito. (2 Korinito 7:11-13)—11/1, itulau 10, 12.

□O le ā ua faasino atu ai le faamatalaina e Paulo o Ieova e faapea “o le Tamā e ona le alofa mutimuti vale,” lea e taʻua i le 2 Korinito 1:3?

O le nauna Eleni ua faaliliuina i le “alofa mutimuti vale” e sau mai se upu o loo faaaogā e faaali atu ai lagona faanoanoa i mafatiaga o se isi. O lea ua faamatala ai e Paulo lagona mutimutivale o le Atua mo so o se tasi o Ana auauna faamaoni o loo mafatia i puapuaga.—11/1, itulau 13.

□ O le ā na faataunuuina e le anapogi a le fanauga a Isaraelu i le Aso o le Togisala faaletausaga? (Levitiko 16:29-31; 23:27)

O le faamamaluina o le anapogi sa uunaia ai tagata Isaraelu e matuā amanaiaina lo latou tulaga agasala ma le manaoga mo le togiolaina. O le faia faapea latou te faailoa atu ai lo latou faanoanoa mo a latou agasala ma le salamō i luma o le Atua.—11/15, itulau 5.

□ O le ā ua faasino i ai le poloaiga i tagata talavou: “O lenei, ia e manatua le na faia oe”? (Failauga 12:1)

Ua taʻua i se tasi molimau e faapea o le upu Eperu ua faaliliuina “manatua” e masani ona faasino i “mafaufauga ma gaoioiga alofa māfana ua tutupu aʻe pe a toe manatua se mea.” O le utagiaina la o lenei poloaiga e aofia ai nisi mea nai lo le tau ina mafaufau ia Ieova. E aofia ai gaoioiga, le faia o mea e fiafia i ai o ia.—12/1, itulau 16.