Pe o ia te Oe le Silafaga a le Atua i le ʻAva Malosi?

PE TUSA ma le 20 tausaga ua teʻa, na eliina aʻe ai e tagata o loo latou suesueina toega o mea o loo tanumia i le eleele, ia se fale ua matuā tuai lava sa fai i piliki na fai mai i palapala, i tafatafa o le taulaga o Urmia i Irana. Na latou mauaina ai foi se fagu ʻele, lea e talitonu saienitisi ua faitau afe tausaga le leva, e mai lava i tuā i le taimi na faatoʻā amata ʻaināina ai na vaipanoa e tagata. Sa faaaogaina talu ai nei le malamalamaga faasaienitisi faaonaponei e iloilo ai le fagu. Ma na maofa saienitisi i lo latou mauaina ai i totonu o ni faamaoniga o vailaau ua aupito sili ona leva sa faaaogaina i le faiga o uaina.

O loo manino foi ona faatulaga mai e le Tusi Paia e faapea i aso anamua sa taumafaina ai le uaina, o le pia, ma isi ʻava malosi. (Kenese 27:25; Failauga 9:7; Nauma 1:10) E pei lava o isi taumafa, ua tuu mai e Ieova ia i tatou taitoatasi le filifiliga—pe taumafa le ʻava malosi pe leai. Sa masani ona taumafa e Iesu le uaina i le taimi o ana taumafataga. Sa taumamao Ioane le Papatiso mai le ʻava malosi.—Mataio 11:18, 19.

E faasaina e le Tusi Paia le soona inutele e aunoa ma le pulea. O le onā o se agasala i le Atua. (1 Korinito 6:9-11) I le ogatasi ma lenei, e lē faatagaina e Molimau a Ieova se tagata onā e lē salamō e tumau i le faapotopotoga Kerisiano. O tagata o le faapotopotoga e filifili e taumafa le ʻava malosi e ao ona fai fuafua lelei.—Tito 2:2, 3.

Le Vaaiga e Lē Tusa ma le Silafaga a le Atua

E toatele tagata i aso nei e lē o ia i latou le silafaga a le Atua e tusa ai ma le faaaogaina o le ʻava malosi. E faigofie lava ona iloa atu o loo faapogaia e Satani le faaaogaseseina o lenei mea ua leva ona iai talu mai anamuā. Mo se faataitaiga, i nisi motu o le Pasefika, o se mea e masani ai mo tamaloloa lo latou faapotopoto faatasi e inu se vaega tele o se pulū na fai lava e i latou. O nei inuga e ono faaaluina ai ni itula se tele, ma e faifai soo—e toatele tamaloloa ua avea ma a latou masani le faia o lea mea i  aso uma. O nisi ua manatu i ai o se vaega o la latou aganuu. I nisi taimi e inu ai le pia ma fagu malosi e sui aʻi—ia po o le faaopoopo atu foi i le pulū lea na fai lava e i latou. O le iuga masani lava o le onanā ai.

I se tasi nuu o le Pasefika, o le faaaogaina ma le fuafua tatau o le ʻava malosi e seāseā ona e faalogo i ai. Auā o le manatu masani, pe a latou inu e latou te inu ia onanā. E masani lava, i aso e totogi ai galuega e faatasitasi ai se vaega o tamaloloa ma faatau ni pusa pia, e tusa e 24 fagu i le pusa e tasi. Faatoʻā uma lava le inuga ina ua leai se pia o totoe. O le iuga, o se mea e masani ai le onā i le mea e tumu ai tagata.

O pia ia e fai lava e i latou (faamafu), e pei o le uaina e faia i sua o le niu, faapena foi ma isi pulū e masani ai, e faaaogā tele i atunuu Aferika. I nisi nuu o se tū e masani ai le faaaogā o le ʻava malosi pe a tali ni malo. O le tagata talimalo lelei la, e tatau ona ia avatua le ʻava malosi e sili atu i le mea e mafai e ana malo ona inuina. I se tasi vaipanoa o le aganuu le tuu o fagu pia e 12 i luma o le malo e toatasi.

E toatele kamupani Iapani latou te fuafuaina ni tafaoga e ō i pasi mo a latou tagata faigaluega. E ave ai ma se aofaiga tele o le ʻava malosi, ma e lē popole pe a onanā ai. O nisi o tafaoga a nei kamupani e alu mo le lua i le tolu aso. E tusa ai o le faamatalaga a le mekasini Iapani, o le Asiaweek, “mai faifaatoaga araisa e oo i le aufaipolotiki mauoa, o le tulaga e iloa ai se tama tane e masani lava ona iloa i le tele o le pia e na te inuina.” O loo mātauina le mea lava lena e tasi i isi atunuu i Asia. Na taʻua e le Asiaweek e faapea: “Ua sili atu nei pia ua inu e le tagata e toatasi i Korea i Saute nai lo se isi lava tagata inu pia i so o se vaipanoa o le lalolagi.”

O le isi mea ua fai ma masani i nofoaga o kolisi i le Iunaite Setete o le soona inu. E tusa ai ma le faamatalaga a le Journal of the American Medical Association, “o le toatele o le ʻau soona inu e lē manatu o loo iai so latou faafitauli i le inu ʻava.” * E lē o se mea lenei e ofo ai auā i le tele o atunuu e uunaia ai e faasalalauga ia le inu o se tulaga e tofo ai i mea fou, e faia e tagata uma lava, ma iloa ai foi le tele o tulaga faalelalolagi. E masani lava o lenei faiga e taulai patino lava i ē iti.

I Peretania, ua faaluaina le malosi o le inu i totonu o le vaitaimi e 20 tausaga, a o le faaaogaina o ʻava i fagu malosi ua faatoluina. O tagata inu ʻava ua vave amata a o talavou, ma ua faateleina fafine ua inu ʻava. O le mea lava e tasi o loo mātauina i Europa i Sasaʻe ma atunuu i  Amerika Latina. Ua mātauina lenei mea i le alualu pea i luga o le aofai o i latou ua pulea e le ʻava malosi, atoa ma faalavelave tau taavale matuia e māfua ona o le ʻava malosi. E manino lava, ua faateteleina le faaaogaseseina o le ʻava malosi i le lalolagi aoao.

E Faapefea Ona Iloa ua Ova Lau Inu ʻAva Malosi?

O le manatu o le Tusi Paia i le faaaogaina o le ʻava malosi e paleni. I le isi itu ua faapea mai le Tusi Paia o le uaina o le mea alofa mai ia Ieova le Atua ma “e faafiafia ai loto o tagata.” (Salamo 104:1, 15) I le isi itu, i le taʻusalaina o le soona inu, e faaaogā e le Tusi Paia faaupuga e pei o le “onā,” “inu tele i uaina, ma poula, ma inugāava,” ‘fia inu uaina e tele,’ “faapologaina i latou i le uaina.” (Luka 21:34; 1 Peteru 4:3; 1 Timoteo 3:8; Tito 2:3) Peitai e faapefea ona iloa “ua tele le uaina”? E faapefea i se Kerisiano ona iloa po o le ā e aofia i le silafaga a le Atua i le faaaogaina o le ʻava malosi?

E faigofie lava ona iloa ua onā. O ona āuga o loo faamatalaina i le Tusi Paia i upu e pei o le: “E ia te ai ea le aue? e ia te ai ea mala? e ia te ai misa? e ia te ai le atuatuvale ? e o ai ea manunua fua? e ia te ai ea mata mūmū? O e ua faatuai i le uaina; o e o atu e saili i le uaina filogia. . . . E vaai ou mata i fafine ese; e tautala foi lou loto i mea faapiopio.”—Faataoto 23:29-33.

O le tele naʻuā o le ʻava malosi e māfua ai le fenuminumiai, faaseseina ai le mafaufau, ua lē toe iloa ai se mea, ma isi lava tulaga lē paleni o le mafaufau ma le tino. Pe a aafia i le ʻava malosi, e mafai ona lē pulea ai e le tagata lana amio, e faaleagaina ai o ia po o isi. O tagata onanā e masani ona amio vālea, fai mea matagā, po o amioga lē mamā.

O le inu ia onā, ma ona āuga e pei ona taʻua i luga, o le mea moni lena o le inu tele po o le ova o le inu. Peitai, e mafai e le tagata ona faaalia le inu lē fuafua lelei e aunoa ma le faaalia o faailoga e iloa ai le tagata ua onā. O le mea lea, e masani ai lava ona iai finauga pe ua tele le inu a le tagata. E faapefea la ona iloa le inu fuafua ma le soona inu?

Ia Puipuia Lou Tomai e Manatunatu Ai

E lē o faatulaga maia e le Tusi Paia ni tapulaa e ala i le taʻu mai o pasene e tatau ona iai le ʻava malosi i le toto o le tagata ina ia iloa ai ua ova le inu po o se isi fua. E eseese āuga o le ʻava malosi mai lea tagata i lea tagata. Peitai, o mataupu silisili o le Tusi Paia e faatatau i Kerisiano uma ma e fesoasoani ia i tatou e ati ae le silafaga a le Atua i le faaaogaina o le ʻava malosi.

O le tulafono muamua, na fetalai i ai Iesu e faapea, “ia e alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37, 38) E aafia tuusaʻo ai lava le mafaufau i le ʻava malosi, ma pe afai e ova le inu, o le a faalavelaveina ai lou usiusitai atu i lenei tulafono ua silisili i tulafono uma. O le a matuā afaina loloto ai le faia o ni filifiliga lelei, le tomai e faaleleia ai faafitauli, le faatinoina o le pulea totino, ma isi faagaoioiga tāua o le mafaufau. Ua fautua mai le Tusi Paia ia i tatou e faapea: “Ia e taofi [“leoleo,” NW] mau i le poto ma le mafaufau; e fai ia mea ma ola o lou agaga, ma mea matagofie i lou ua.”—Faataoto 3:21, 22.

Na pulunaunauina e le aposetolo o Paulo Kerisiano: “Ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.” (Roma 12:1) Faamata e ‘talileleia e le Atua’ se Kerisiano pe afai na te inuina le ʻava malosi seia oo lava ina lē toe mafai ona faaaogā lelei ‘le mafaufau’? E masani lava, o le tagata e soona inu e iu ina masani i le ʻava malosi. E ono manatu lenei tagata o lana inu tele e tusa ai ma ia e lē oo i le tulaga o le onā. Ae atonu, ua ia maua i se maʻi o le faalagolago atu i le ʻava malosi. Pe mafai e lea ituaiga tagata ona tuuina atu lona tino o se “taulaga ola, e paia”?

Afai o le tele o le ʻava malosi ua iai ua faaitiitia pe ua afaina ai lou “atamai ma lou mafaufau” o se Kerisiano, ua tele la le ʻava malosi ua ia te oe.

O le ā o Faatonutonuina Lau Vaaiga i le ʻAva Malosi?

E ao i se Kerisiano ona iloilo lona manatu agaʻi i le inu ʻava pe e lē o taaʻina i aʻega  faaonaponei po o aganuu. E faatatau i le faaaogaina o le ʻava malosi, e lē tatau ona e manao e fai lau filifiliga e faavae i tū ma aganuu ma aʻega o loo tusia i nusipepa faasalalau. I le iloiloina o ou lava manatu, fesili ifo ia te oe, po o tosina ea laʻu inu i le ʻava malosi i mea ua masani ai tagata o le nuu? Po o le isi fesili, po o pulea laʻu inu e mataupu silisili o le Tusi Paia?’

E ui o Molimau a Ieova e lē o ni tagata e faatautee i tū ma aganuu, ae ua latou iloa e ʻinoʻino Ieova i le tele o mea o loo talia e le toatele i aso nei. O tagata i nisi vaipanoa e lē afaina ia i latou ia le faapaʻū tama, le tuigātoto, tauatane, po o le fai o ʻau taunonofo. Peitai, e amioaʻi Kerisiano e tusa ai ma le silasila a le Atua i ia mea. Ioe, o le silafaga a le Atua o le a uunaia ai se Kerisiano e ʻinoʻino i nei faiga e tusa lava pe o ni tū masani e talia e le toatele pe leai foi.—Salamo 97:10.

O loo tautala le Tusi Paia i le “manao o nuu ese,” lea o loo aofia ai le “inu tele i uaina” ma “inugāava.” O le faaupuga “inugāava” ua faaoo mai le manatu e faapea o ni potopotoga toatele sa faatulagaina ma le fuafuaga ina ia matuā inu ai ni pia se tele. E foliga mai i le taimi o le Tusi Paia, o ē sa femitai ona o lo latou malosi e inu ai le tele o le ʻava malosi e aunoa ma le onā, sa taumafai ia faumalo i isi, ia po o le taumafai foi e iloa po o ai e sili lana inu. Sa faasino atu le aposetolo o Peteru i lenei ituaiga amioga o le “ulavale silisili” lea ua lē o toe auai Kerisiano ua salamō.—1 Peteru 4:3, 4.

Pe e talafeagai ea mo se Kerisiano ona iai ia te ia le manatu e faapea o le mea tāua lava o le ʻaua le onā, ae e lē o afaina po o fea e inu ai, po o le ā le taimi e inu ai, po o le ā foi le tele o lana inu? E mafai ona tatou fesili ifo faapenei, Pe o le silafaga ea lena a le Atua? Ua fai mai le Tusi  Paia e faapea: “O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Korinito 10:31) O se vaega o ni tane o loo faapotopoto i se nofoaga faitele ma inu ai ni pia se tele atonu e lē onanā uma, ae pe o mauaina ea se viiga o Ieova i a latou amio? Ua fautua mai le Tusi Paia e faapea: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.”—Roma 12:2.

Alofia le Faatautevatevaina o Isi

O le mea e malie ai, ona o aganuu e masani i le soona inu ua latou faitio pe afai o le tagata inu tele o loo faapea mai o ia o se tagata o le Atua. I se tasi nuu laititi i le Pasefika i Saute, na faapea mai ai se faamatalaga a se tagata mātau mea: “E ese loʻu fiafia ia te outou. O loo outou talaʻia le upu moni. Ae peitai o le faafitauli lea o loo matou iloaina, e ese le inu tele o a outou tamaloloa.” E tusa ai o le lipoti, e lē faapea o tagata ia na onanā, ae peitai o lena mea moni sa lē malamalama lelei i ai le toatele o tagata o le nuu. O tagata e mātau maia i tatou o loo faigofie lava ona manatu e faapea, e pei lava ona faapotopoto le tele o tamaloloa ma inu faatasi, o loo faapena foi ona onanā Molimau a Ieova. Pe e mafai e se faifeau Kerisiano o lē o loo auai i ni inugā ava faaumiumi, ona faatumauina sona talaaga lelei ma faataunuuina lana faiva i le lautele ma le lē taʻusalaina pe ma le faamalosi lava?—Galuega 28:31.

O se lipoti mai se tasi atunuu i Europa, ua faaalia ai e faapea e iai taimi e taunuu atu ai nisi uso ma tuafafine i le Maota o le Malo ae o loo manogi ʻava malosi la latou mānava. Ua afaina ai i lenei mea loto fuatia ifo o isi. Ua faatonu mai le Tusi Paia: “E lelei pe a le ʻai ni aano o manu, ma ia le inu uaina, po o se tasi mea e tausuai ai lou uso.” (Roma 14:21) O le silafaga a le Atua i le faaaogaina o le ʻava malosi o le a uunaia ai se Kerisiano taʻumatuaina e faaeteete i loto fuatia ifo o isi, e tusa lava pe e uiga ai i le taumamao mai le ʻava malosi i nisi tulaga e tulai mai.

E Mautinoa le Matuā Ese o Kerisiano

Ma le faanoanoa lava, ua fai e lenei lalolagi le tele o mea e faatiga ai i le finagalo o Ieova e ala i le faaaogaseseina o mea na ia foai mai i tagata, e aofia ai le ʻava malosi. E ao i Kerisiano tuutoina taitoatasi ona taumafai malosi e alofia le vaaiga ua masani ai e lē tusa ma le silafaga a le Atua. O le a mafai ai e tagata ona “iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.”—Malaki 3:18.

Pe a oo mai i le ʻava malosi, o le ‘eseesega’ o Molimau a Ieova ma le lalolagi e ao ona matuā mautinoa le manino lelei. E lē faatāuaina i olaga o Kerisiano moni le inuina o le ʻava malosi. Latou te lē tofotofo po o le ā le malosi o le latou inu, ma oo atu ai i se tulaga matautia o le toetoe lava onā; latou te lē faatagaina foi le ʻava malosi e faaleagaina po o le faalavelaveina ai foi i so o se tulaga la latou auaunaga i le Atua ma le loto atoa ma le manatu atoa.

I le avea o se vaega, ua iai i Molimau a Ieova le silafaga a le Atua i le faaaogaina o le ʻava malosi. Ae faapefea oe? E mafai e i tatou uma ona faatalitali atu i faamanuiaga a Ieova a o tatou mulimuli atu i le faatonuga a le Tusi Paia “Ia tatou teteʻa ese ma le faalematau atoa ma tuʻinanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga.”—Tito 2:12.

[Faaopoopoga i lalo]

[Pusa/Ata i le itulau 28]

Faalogo Atu i Ē Pele ia te Oe

O le tagata ʻava malosi e aunoa ma le fuafua lelei e masani lava, o ia e mulimuli iloa o loo iai sona faafitauli. O tauaiga, o uo, ma toeaina Kerisiano e ao ona aua neʻi taofia le avatua o le fesoasoani i ē pele o ē e lē o pulea lelei le inu. I le isi itu, a faamatala atu e ē pele ia te oe lo latou lē fiafia ona o lau masani o le inu ʻava malosi, e masani lava e iai o latou mafuaaga lelei mo le faia faapea. Iloilo po o le ā o latou fai atu ai.—Faataoto 19:20; 27:6.