Ua A‘oa‘oina e Fai le Finagalo o Ieova
Ua Aʻoaʻoina e Fai le Finagalo o Ieova
“Ia e aʻoaʻo mai ia te au e fai lou finagalo; auā o oe lava loʻu Atua.”—SALAMO 143:10.
1, 2. (a) O afea e tatau ona aʻoaʻoina ai i tatou, faatasi ai ma le ā le vaaiga moni? (e) Aisea e matuā tāua ai le aʻoaʻoina e Ieova?
O ASO taitasi o loo ola ma gaoioi ai le tagata, e mafai ona ia aʻoaʻoina se mea e aogā. Ua moni lena ia te oe, ma ua moni foi i isi. Ae o le ā e tupu pe a oti? E lē mafai ona aʻoaʻoina se mea pe iloaina se mea pe afai ua oo i lena tulaga. Ua manino le faapea mai o le Tusi Paia o ē ua feoti “latou te le iloa se mea.” E leai se poto i Seoli, o le tuugamau o tagata. (Failauga 9:5, 10) Pe o le uiga ea o lenei mea e faapea o le aʻoaʻoina o i tatou, lo tatou faatupuina aʻe o le poto, e leai se aogā? E faalagolago lena i mea o tatou aʻoaʻoina ma le auala o loo tatou faaaogā ai lena poto.
2 Pe afai e na o mea faalelalolagi o loo aʻoaʻoina ai i tatou, e leai la so tatou lumanai tumau. Ae fiafia ai, auā e faitau miliona tagata i atunuu uma ua latou aʻoaʻoina le finagalo o le Atua faatasi ai ma le faamoemoe i le ola e faavavau. O le faavae mo lenei faamoemoe e faalagolago atu i le aʻoaʻoina e Ieova, le Puna o le poto e maua ai le ola.—Salamo 94:9-12.
3. (a) Aisea e mafai ai ona faapea atu o Iesu o le uluai tagata aʻoga lea a le Atua? (e) O ā faamautinoaga ua ia i tatou e iloa ai o le a aʻoaʻoina tagata e Ieova, faatasi ai ma ā iuga?
3 O le Alo ulumatua o le Atua, o Lana uluai tagata aʻoga, sa aʻoaʻoina e fai le finagalo o lona Tamā. (Faataoto 8:22-30; Ioane 8:28) Ua faaalia mai e Iesu faapea, e anoanoai tagata o le a faasolosolo ona aʻoaʻoina e lona Tamā. O ā faamoemoega mo nisi o i tatou ua aʻoaʻoina e le Atua? Na fetalai Iesu: “Ua tusia i le au perofeta, E aʻoaʻoina i latou uma lava e le Atua. O lenei, o i latou uma o e faalogo i le Tamā, o e aʻoaʻoina foi, e o mai i latou ia te au; . . . E moni, e moni, ou te fai atu ia te outou, o lē faatuatua mai ia te au, ua ia te ia le ola faavavau.”—Ioane 6:45-47.
4. Ua faapefea ona aafia le faitau miliona o tagata i aʻoaʻoga mai le Atua, ma o ā faamoemoega ua ia i latou?
4 Sa sii mai e Iesu le Isaia 54:13, lea na faasino atu i le fafine faafaatusa a le Atua, le Siona faalelagi. E iai se faatatauga patino o lena valoaga i ana fanau, o soo fanauagagaina e toʻa 144,000 o Iesu Keriso. O le vaega totoe o na atalii faaleagaga o loo galulue pea i aso nei, i le taulamua i le polokalame tau aʻoaʻoga i le lalolagi aoao. O le iuga, e faitau miliona isi o ē o loo faia aʻe ai le “motu o tagata e toatele” ua aogā foi ia i latou le aʻoaʻoina e Ieova. Ua ia i latou le faamoemoe tutasi o le aʻoaʻoina e aunoa ma le oo i ai o le oti. E mafai faapefea? Ua iai i latou i le tulaga e faasaoolaina atu i le “puapuaga tele” lea ua vave ona oo mai, ma olioli ai i le ola e faavavau i luga o le lalolagi parataiso.—Faaaliga 7:9, 10, 13-17.
Le Faamamafaina Atili o le Faia o le Finagalo o le Atua
5. (a) O le ā le mau o le tausaga mo le 1997? (e) E tatau ona faapeī o tatou lagona e faatatau i le auai atu i sauniga faa-Kerisiano?
5 A o faagasolo le 1997, i faapotopotoga e silia i le 80,000 i le lalolagi aoao, o le a teu mau pea i mafaufau o Molimau a Ieova upu amata o le Salamo 143:10: “Ia e aʻoaʻo mai ia te au e fai lou finagalo.” O le mau lena o le tausaga mo le 1997. O na upu, e faaalia matilatila i Maota o le Malo, o le a fai ma faamanatuga e faapea o le nofoaga sili e maua mai ai aʻoaʻoga tauatua, o sauniga ia a faapotopotoga, o iina e mafai ona tatou tofu sao ai i le polokalame faifai pea o aʻoaʻoga. A o auai faatasi ma o tatou uso i sauniga ina ia aʻoaʻoina e lo tatou Aʻoaʻo Silisili, e mafai ona ia i tatou lagona e pei ona sa iai i le faisalamo, o lē na tusi mai: “Na ou fiafia ina ua latou fai mai ia te au, Tatou te o i le fale o Ieova.”—Salamo 122:1; Isaia 30:20.
6. I upu a Tavita, o le ā ua tatou ioeina?
6 Ioe, tatou te faanaunau ina ia aʻoaʻoina i tatou e fai le finagalo o le Atua nai lo le mea e loto i ai lo tatou fili le Tiapolo, po o faanaunauga o tagata lē lelei atoatoa. O lea, i le pei o Tavita, tatou te faailoa atu le Atua o lē o loo tatou tapuai ma auauna i ai: “Auā o oe lava loʻu Atua; ia taʻitaʻiina atu aʻu e lou Agaga lelei i le laueleele laulelei.” (Salamo 143:10) Nai lo le manao e miomiō faatasi ma tagata tala pepelo, sa sili ia Tavita le iai i le mea sa fai ai le tapuaiga ia Ieova. (Salamo 26:4-6) Ona o le agaga o le Atua lea na taʻitaʻia ona laasaga, na mafai ai e Tavita ona uia ala o le amiotonu.—Salamo 17:5; 23:3.
7. Ua faapefea ona gaoioi le agaga o le Atua i le faapotopotoga Kerisiano?
7 Sa faamautinoa atu e le Tavita Sili, o Iesu Keriso, i aposetolo e faapea, o le a aʻoaʻoina i latou e le agaga paia i mea uma ma toe faamanatu ia i latou mea uma na ia fetalai atu ai ia i latou. (Ioane 14:26) Talu mai le Penetekoso, ua faasolosolo ai pea ona faaalia mai e Ieova ‘mea loloto e uiga i le Atua’ o loo i lana Afioga tusia. (1 Korinito 2:10-13) Ua ia faia lenei mea e ala i se auala vaaia na faaigoa e Iesu o “le auauna faamaoni ma le mafaufau.” Ua saunia ai meaʻai faaleagaga lea o loo talanoaina i polokalame tau aʻoaʻoga mo faapotopotoga a tagata o le Atua i le lalolagi aoao.—Mataio 24:45-47.
Ua Aʻoaʻoina le Finagalo o Ieova i a Tatou Sauniga
8. Aisea e tāua tele ai le faia o se sao i le Suesuega o Le Olomatamata?
8 O mataupu i le Suesuega o Le Olomatamata a le faapotopotoga i vaiaso taitasi, e masani lava ona talanoaina ai le faatatauga o mataupu silisili o le Tusi Paia. E mautinoa le fesoasoani o lenei mea ia i tatou ina ia onosaia popolega o le olaga. I isi suesuega, o loo talanoaina ai upu moni loloto faaleagaga po o valoaga a le Tusi Paia. Maeu le tele o mea ua tatou aʻoaʻoina i na suesuega! I le tele o atunuu ua matuā faatumulia Maota o le Malo mo nei sauniga. Peitai e iai nisi atunuu, ua paʻū ifo ai aofia o sauniga. Aisea ua faapea ai? Pe atonu ea ua faataga e nisi a latou galuega e faalavelavea ai lo latou faapotopoto faatasi e lē aunoa “ina ia taufaatupu ai le alofa ma galuega lelei”? Pe atonu ua tele atu le taimi e faaalu i meafai o le olaga pe matamata foi i le televise, ua foliga ai ua matuā tumu saisai a latou faasologa mo fuafuaga totino, ma ua lē mafai ai ona ō atu i sauniga uma? Ia manatua le timaʻiga faagaeeina i le Eperu 10:23-25. Pe ua lē sili atu ai ea ona tāua i le taimi nei le faapotopoto faatasi mo le mauaina o aʻoaʻoga mai le Atua a o tatou “iloa o le Aso o loo tāulata mai”?
9. (a) E mafai faapefea e le Sauniga o le Auaunaga ona faaauupegaina i tatou mo le faiva? (e) O le ā le uiga e tatau ona ia i tatou e faatatau i le molimau atu?
9 O se tasi o a tatou tiute tauave o loo sili ona faamuamua o le auauna lea o ni faifeau a le Atua. Ua fuafuaina le Sauniga o le Auaunaga e aʻoaʻoina ai i tatou i le auala e mafai ona tatou faataunuu ai ma le uigā lenei tiute tauave. Ua tatou aʻoaʻoina le auala e faafeiloai atu ai i tagata, o upu e tautala atu ai, le auala e tali atu ai pe a talileleia mai, e oo lava foi i le mea e fai pe a tetee mai tagata i la tatou feau. (Luka 10:1-11) A o talanoaina ma faataitaia auala uigā i lenei sauniga faalevaiaso, ua lelei ai ona sauniunia i tatou ina ia oo atu i tagata, e lē gata i le ō atu mai lea fale i lea fale ae faapea foi pe a talaʻi atu i magaala, i mea e pāka ai taavale, i auala o loo femalagaai ai tagata lautele, i malaevaalele, i pisinisi, po o aʻoga. I le ogatusa ma la tatou talosaga, “Ia e aʻoaʻo mai ia te au e fai lou finagalo,” o le a tatou mananao ai e faaaogā tatau avanoa uma e faia ai e pei ona faalaeiau mai lo tatou Matai: “Ia faapea ona pupula atu lo outou malamalama i luma o tagata, ina ia latou . . . vivii atu ai i lo outou Tamā o i le lagi.”—Mataio 5:16.
10. E mafai faapefea ona tatou fesoasoani moni atu i ‘ē ua tatau ai’?
10 I na sauniga a le faapotopotoga, ua aʻoaʻoina ai foi i tatou e faia isi ma soo. O le taimi lava e maua ai se tasi e naunau fiafia pe tuuina ai ni lomiga, o lo tatou sini pe a faia toe asiga o le amataina lea o ni suesuega faale-Tusi Paia i aiga. I sona uiga, ua talitutusa lenei mea ma le ‘nonofo o le ausoo i ē ua tatau ai’ ina ia aʻoaʻoina i latou i mea na poloai atu ai Iesu. (Mataio 10:11; 28:19, 20) O le iai o fesoasoani e sili ona lelei, e pei o le tusi o Le Poto e Taʻitaʻia ai i le Ola e Faavavau, ua matuā faaauupegaina lelei ai i tatou e faataunuu maeʻaeʻa la tatou faiva. (2 Timoteo 4:5) I vaiaso taitasi a o e auai atu i le Sauniga o le Auaunaga ma le Aʻoga o le Faiva Faatiokarate, ia taumafai e puʻepuʻe maua ma faaaogā manatu aogā na o le a mafai ai ona avea oe o se tasi o faifeau ua agavaa lelei a le Atua, o loo faia lona finagalo.—2 Korinito 3:3, 5; 4:1, 2.
11. Ua faapefea ona faataitaia e nisi le faatuatua i upu na o loo maua i le Mataio 6:33?
11 O le finagalo o le Atua ina ia tatou “muai saili lona malo ma lana amiotonu.” (Mataio 6:33) Seʻi fesili ifo ia te oe lava, ‘O le a faapefea ona ou faatatauina lenei mataupu silisili pe afai o manaoga i laʻu galuega [po o le galuega a laʻu paaga] ua faalavelavea ai loʻu auai atu i le sauniga?’ E toatele ē taʻumatuaina faaleagaga o le a faia ni taumafaiga e talanoa atu ai i o latou pule o galuega e uiga i le mataupu. Na taʻu atu e se tasi faifeau faataimi atoa i lona pule lona manaomia o se taimi e faaavanoa mai le galuega i vaiaso taitasi ina ia mafai ona auai atu i sauniga a le faapotopotoga. Sa talia e le pule le talosaga. Ae ona o le fia iloa po o ā mea e faia i sauniga, na ia fesili atu ai pe mafai ona auai. O iina na ia faalogo ai i se faasilasilaga o se tauaofiaga itumalo o le a sosoo mai. O le iuga, na fuafua e le pule ina ia faaalu se aso atoa e tasi i le tauaofiaga. O le ā le lesona e te maua mai lenei faaaoaoga?
Ua Aʻoaʻoina le Finagalo o Ieova e Ala i Mātua e Alolofa i le Atua
12. Ina ia aʻoaʻoina le fanau i le finagalo o Ieova, o le ā e tatau i mātua Kerisiano ona faia i le onosai ma le maumauai?
12 Ae o sauniga a le faapotopotoga ma tauaofiaga ua lē na o le pau na o sauniuniga mo le aʻoaʻoina e fai le finagalo o le Atua. Ua poloaia mātua o ē alolofa i le Atua ia aʻoaʻo, aoai, ma tausia aʻe a latou fanau ina ia vivii atu ia Ieova ma faia lona finagalo. (Salamo 148:12, 13; Faataoto 22:6, 15) O le faia faapea e manaomia ai le avatu o a tatou “tama iti” i sauniga o iina e mafai ona latou ‘faalogo ma aʻoaʻoina ai,’ ae faapefea le aʻoaʻoina o i latou mai tusitusiga paia i le aiga? (Teuteronome 31:12; 2 Timoteo 3:15) E tele aiga ua sogasogā e amata polokalame o suesuega faale-Tusi Paia e lē aunoa a le aiga, ae lei umi ae lē toe faia faalausosoo po o le matuā mou atu lava. Pe ua tupu ea ia te outou lena mea? Pe o le a e faapea mai ea e lē o talafeagai le fautuaga ina ia faia se suesuega faapena e lē aunoa pe e ese le tulaga o le tou aiga ma o le a lē aogā i lo outou tulaga? Po o le ā lava le tulaga, ae faamolemole outou mātua, ia toe autalu mataupu matagofie e pei o le “O lo Matou Tofi Sili Faaleagaga” ma le “O Taui o le Finafinau” i Le Olomatamata o Aokuso 1, 1995.
13. E mafai faapefea ona aogā i aiga le talanoaina o le mau o aso taitasi?
13 Ua faalaeiauina aiga e fai ma masani le talanoaina o le mau o aso taitasi mai le Iloiloina o le Tusi Paia i Aso Taitasi. E lelei le tau ina faitau o le mau ma faitau le faaopoopoga, ae sili atu ona aogā pe a talanoaina le mau ma faatatauina. Mo se faaaoaoga, pe a talanoaina le Efeso 5:15-17, e mafai e tagata o le aiga ona fai ni manatu i le auala e ‘faaaogā tatau ai le taimi avanoa’ mo suesuega totino, e auai atu i nisi vala o le faiva faataimi atoa, ma tausia isi tofiga faatiokarate. Ioe, o le talanoaina e le aiga o le mau o aso taitasi e mafai ona iu atu ai i se tasi pe sili atu foi o le a ‘matuā atoatoa ona iloa le finagalo o Ieova.’
14. O ā ituaiga o faiaʻoga ua faaalia e le Teuteronome 6:6, 7 e tatau ona iai mātua, ua manaomia ai le ā?
14 E tatau ona avea mātua o ni faiaʻoga maelega o a latou fanau. (Teuteronome 6:6, 7) Ae ua lē na o se mataupu o le otegiaina pe faifai faatonuga ai i a latou fanau. E manaomia foi e le tamā ma le tinā ona faalogo atu, o le auala lena e atili mafai ai ona la iloa mea o loo manaomia ona faamatala, faamanino, faataitai, pe toe taʻu atu. I se tasi aiga Kerisiano, e uunaia ai e mātua ni fesootaiga saʻoloto e ala i le faalaeiau o le la fanau e faia ni fesili e uiga i ni mea latou te lē o malamalama ai po o māfua ai ni o latou popolega. O iina na la iloa ai o loo faafaigata i lo la atalii talavou ona malamalama faapea o Ieova e leai sona amataga. Sa mafai e mātua ona faaaogā faamatalaga mai lomiga a le Sosaiete o le Olo Matamata, e faaalia ai ua ioeina e leai se mutaaga o le taimi ma le vateatea. Sa aogā lena e faataitaia ai le manatu autū, ma faamalieina ai lo la atalii. O lea, seʻi faaalu se taimi e tali manino ai ma tali mai i le Tusi Paia fesili a lau fanau, e fesoasoani lea ia i latou e iloa, o le aʻoaʻo ina ia faia le finagalo o le Atua e mafai ona matuā faamalieina ai. O ā isi mea ua aʻoaʻoina ai i aso nei tagata o le Atua—o ē talavou ma ē matutua?
Ua Aʻoaʻoina ia Alofa ma ia Tau le Taua
15. O fea le taimi e ono tofotofoina ai le moni aʻiaʻi o lo tatou alofa faaleuso?
15 I le ogatusa ma le poloaiga fou a Iesu, ua ‘aʻoaʻoina ai i tatou e le Atua ina ia fealofani.’ (1 Tesalonia 4:9) Pe a toʻafilemu ma sologa lelei mea, atonu tatou te lagona o loo tatou alolofa atu i o tatou uso uma. Ae o le ā e tupu pe a mapuna aʻe feeseeseaiga totino pe ua tiga o tatou faalogona ona o se upu po o se gaoioiga a se isi Kerisiano? O le tulaga la lenei e tofotofoina ai le moni aʻiaʻi o lo tatou alofa. (Faatusatusa i le 2 Korinito 8:8.) O le ā ua aʻoaʻoina i tatou e le Tusi Paia e fai i tulaga faapena? O se tasi o mea o le tauivi e faaalia le alofa i se tulaga e matuā atoatoa. (1 Peteru 4:8) Nai lo le sailia o o tatou lava lelei, le itaitagofie i ni masei laiti, pe mātau ni leaga, e tatau ona tatou taumafai malosi e faataga le alofa e ufiufi ai agasala e tele. (1 Korinito 13:5) Ua tatou iloa o le finagalo lenei o le Atua, auā o le mea lea o loo aʻoaʻoina e lana Afioga.
16. (a) O le ā le ituaiga o faiga taua lea ua aʻoaʻoina Kerisiano ina ia auai? (e) Ua faapefea ona faaauupegaina i tatou?
16 E ui e lē tuufaatasia e le toatele o tagata le alofa ma faiga taua, ae o faiga taua o se isi lea mea ua aʻoaʻoina ai i tatou, peitai o se isi ituaiga o faiga taua faapitoa. Sa iloa e Tavita lona ola faalagolago ia Ieova ina ia aʻoaʻo mai o ia e faataunuu le faiga taua, e ui sa aofia ai foi i lena mea i ona vaitaimi, ni faiga taua moni lava ma fili o Isaraelu. (1 Samuelu 17:45-51; 19:8; 1 Tupu 5:3; Salamo 144:1) Ae faapefea la tatou taua i aso nei? E lē faaletino a tatou auupega. (2 Korinito 10:4) O la tatou taua e faaleagaga, lea tatou te manaomia ai ona faaauupegaina i le ofutau faaleagaga. (Efeso 6:10-13) E ala mai i lana Afioga ma ona tagata ua faapotopotoina, o iina ua aʻoaʻoina ai i tatou e Ieova ia tau le taua manumalo faaleagaga.
17. (a) O ā mailei e faaaogā e le Tiapolo ina ia tataʻi ese ai i tatou? (e) O le ā e tatau ona tatou alofiaina ma le atamai?
17 I ni ala faaʻoleʻole, taufaasese, ua masani ona faaaogā ai e le Tiapolo faaosoosoga a le lalolagi, o aposetate, ma isi tagata o loo tetee i le upu moni, i se taumafaiga e tataʻi ese ai i tatou e faia ni mea e lē aogā. (1 Timoteo 6:3-5, 11; Tito 3:9-11) E tai pei lava ua ia iloa e itiiti sona avanoa e manumalo ai ia i tatou i ni osofaiga tuusaʻo o loo tatou iloa atu, ona ia taumafai lea e faatausuai i tatou e ala i lo tatou faitio soo ma faia ni fesili lē fetaui, lea e leai se tāua faaleagaga e maua ai. Ona o i tatou o ni tagata tau mataalia, e tatau ai ona tatou matuā mataala i na lamatiaga e pei lava ona tatou mataala i osofaiga tuusaʻo o loo tatou iloa atu.—1 Timoteo 1:3, 4.
18. O le ā moni e aofia ai i lo tatou lē toe ola mo i tatou lava?
18 Tatou te lē faaauilumaina tuʻinanauga o tagata po o manaoga o atunuu. Ua aʻoaʻoina i tatou e Ieova e ala mai i le faaaoaoga a Iesu ina ia tatou lē toe ola mo i tatou lava; ae nai lo lea, e tatau ona faaauupegaina i tatou i le mafaufau e pei ona sa iai ia Keriso Iesu ma ola e faia le finagalo o le Atua. (2 Korinito 5:14, 15) I taimi ua tuanai, atonu na tatou iai i ni olaga sa matuā lē pulea ma tuufau, na maimau i ai le taimi tautele. O fiafiaga lē pulea, o tauvaga inuga ʻava, ma amioga lē mamā ua mātaulia ai lenei lalolagi amioleaga. Nei la ua aʻoaʻoina i tatou e faia le finagalo o le Atua, pe tatou te lē loto faafetai la ona ua tatou vavae ese mai lenei lalolagi leaga? O lea seʻi o tatou tau ai le taua faigata faaleagaga ina ia alofia le auai i faiga faalelalolagi e faaleagaina ai.—1 Peteru 4:1-3.
Ua Aʻoaʻoina i Tatou ia Tatou Manuia Ai
19. O le aʻoaʻoina i le finagalo o Ieova ma faatinoina o le a taʻitaʻia atu ai i ā aogā?
19 E tāua tele ona iloa, o le aʻoaʻoina e fai le finagalo o Ieova o le a tatou matuā manuia ai. O le mea mautinoa, e ao ona faia la tatou vaega e ala i le uaʻi totoʻa atu ina ia aʻoaʻo ma mulimuli ai i faatonuga o loo aumai ia i tatou e ala mai i lona Alo faapea ma lana Afioga ma tagata ua faapotopotoina. (Isaia 48:17, 18; Eperu 2:1) O lo tatou faia faapea, o le a faamalosia ai i tatou e tutū mausalī i nei taimi o mala ma saogalemu ai mai afā o faafitauli o ono pepesi mai. (Mataio 7:24-27) E oo lava i le taimi nei, o le a tatou faafiafiaina le Atua e ala i le faia o lona finagalo, ma o le a faamautinoa ai le taliina o a tatou tatalo. (Ioane 9:31; 1 Ioane 3:22) Ma o le a tatou tofo i le fiafiaga moni.—Ioane 13:17.
20. O le ā e lelei ona mafaufau loloto i ai a o e vaavaai atu i le mau o le tausaga a o faagasolo le 1997?
20 A o faagasolo le 1997, o le a ia i tatou pea avanoa e faitau ma talanoaina ai le mau o le tausaga, le Salamo 143:10: “Ia e aʻoaʻo mai ia te au e fai lou finagalo.” A o tatou faia lenei mea, seʻi o tatou faaaogā nisi o avanoa e toe mafaufau ai i sauniuniga ua faia e le Atua mo i tatou ina ia aʻoaʻoina i tatou, e pei ona faamatalatala mai luga. Ma seʻi o tatou faaaogā le mafaufau loloto i na upu e fai ma uunaiga e gaoioi ai pea lava pea ia ogatusa ma lena aioiga, i le iloa “o lē fai le finagalo o le Atua, e tumau lea e faavavau.”—1 Ioane 2:17.
O le a Faapefea Ona E Tali?
□ O ai i aso nei ua aʻoaʻoina e faia le finagalo o Ieova?
□ E ao faapefea ona aafia i tatou i le Salamo 143:10 a o faagasolo le 1997?
□ Ua faapefea ona aʻoaʻoina i tatou e fai le finagalo o Ieova?
□ O le ā e manaomia mai mātua Kerisiano i le aʻoaʻoina o a latou fanau?
[Fesili mo le Suʻesuʻega]