v Pe o Pei Lou Faatuatua o le Faatuatua o Aperaamo?

“A sau le Atalii o le tagata, pe maua ea e ia le faatuatua i le lalolagi?”—LUKA 18:8.

1. Aisea ua faigata ai ona tausia e se tasi se faatuatua malosi i aso nei?

E LĒ faigofie ona tausia e se tasi se faatuatua malosi i aso nei. E matuā malolosi omiga o loo uunai mai e le lalolagi i Kerisiano ina ia tataʻi ese ai o latou mafaufau mai le uaʻi atu i mea faaleagaga. (Luka 21:34; 1 Ioane 2:15, 16) O loo tauivi le toatele ina ia sao mai taua, o mala, o faamaʻi, po o le matelaina. (Luka 21:10, 11) I nisi atunuu, o loo malosi ai le tausisia o tu masani, ma e so o se tasi o loo taumafai e ola aʻe e tusa ai o o latou faatuatuaga, e manatu i ai faapea e lē magafagafa, pe faapea foi ua soona maelega valea. E lē gata i lea, e toatele Kerisiano ua sauaina ona o lo latou faatuatua. (Mataio 24:9) Ua matuā talafeagai la le fesili na lāgā e Iesu i le toetoe 2,000 tausaga ua mavae, e faapea: “A sau le Atalii o le tagata, pe maua ea e ia le faatuatua i le lalolagi?”—Luka 18:8.

2. (a) Aisea e matuā tāua ai le iai o se faatuatua malosi mo se Kerisiano? (e) O le faaaoaoga o le faatuatua o ai e aogā ona tatou talanoaina?

² Peitai, o le mea moni, e matuā tāua lena faatuatua malosi pe afai tatou te fia taulau manuia i le olaga i le taimi nei ma maua le ola e faavavau i le lumanai lea na folafola mai. I lona toe sii mai o fetalaiga a Ieova ia Sapakuka, na tusi ai faapea le aposetolo o Paulo: “E ola lē amiotonu i le faatuatua; i le ma lea, A tuumuli, e le fiafia lava loʻu loto ia te ia. . . . A leai foi se faatuatua e le mafai ona fiafia mai [le Atua].” (Eperu 10:38–11:6; Sapakuka 2:4) Na taʻu atu e Paulo ia Timoteo: “Ia e tau le taua lelei i la le faatuatua, tago atu ia i le ola faavavau, na valaauina ai foi oe.” (1 Timoteo 6:12) E mafai la faapefea, ona iai se faatuatua e lē maluelue? I le talanoaina o lena fesili, e aogā ai lo tatou taulai atu i se tane o lē na soifua i le tusa ma le 4,000 tausaga ua mavae, peitai o loo maualuga pea le amanaiaina o lona faatuatua i lotu tetele e tolu—le faa-Isalama, le faa-Iutaia, ma le Faa-Kerisiano. O lena tane o Aperaamo lea. Aisea sa mataina tele ai lona faatuatua? Pe mafai ona tatou faataitai atu ia te ia i aso nei?

Usitai i le Taitaiga a le Atua

3, 4. Aisea na ave ai e Tara lona aiga ma tuua Uro ae ō atu i Karana?

³ O Aperaamo (na igoa muamua o Aperamo) sa uluai taʻua o ia i le amatamataga lava o le Tusi Paia. I le Kenese 11:26, tatou te faitau ai e faapea: “[O] Tara . . . [na] fanaua lea e ia o Aperamo, ma Nakori, ma Arana.” Sa nonofo Tara ma lona aiga i Uro i Kaletaia, o se aai tamaoaiga i le itu i saute o Mesopotamia. Peitai, sa latou lei tumau ai iina. “Na ave foi e Tara lona atalii o Aperamo, ma Lota le atalii o Arana, o le atalii lea o lona atalii, o Sarai [Sara] foi le avā a lona atalii, o le avā lea a lona atalii o Aperamo; ona latou o atu lea ma i latou ai Uro i Kaletaia, o le a o atu i le nuu o Kanana; ona latou oo lea i Karana ma nonofo ai.” (Kenese 11:31) Na see atu foi Nakori, le uso o Aperaamo, ma lona aiga i Karana. (Kenese 24:10, 15; 28:1, 2; 29:4) Ae, aisea, na ō ese ai Tara mai le nuu tamaoaiga o Uro, ae ō atu i le nuu mamao o Karana?

⁴ Pe ā ma le 2,000 tausaga ina ua mavae atu taimi o Aperaamo, a o tautala atu le tagata faatuatua o Setefano i luma o le au Saniterini  Iutaia, na ia faamatalaina ai lenei siitia atu uigaese na faia e le aiga o Tara. Fai mai a ia: “Na faaali le Atua e ona le mamalu i lo tatou tamā o Aperaamo, ina o i Mesopotamia o ia, a o lei oo i lona nofo i Karana, ua na fetalai mai foi ia te ia, Ina tuua ia o lou nuu ma lou aiga, a e alu atu i le nuu ou te faasino atu ai ia te oe. Ona tuua lea e ia o le nuu o Kaletaia, a e nofo i Karana.” (Galuega 7:2-4) Sa gauai atu Tara i le finagalo o Ieova mo Aperaamo ina ua ia aveina lona auaiga i Karana.

5. O fea na agaʻi i ai Aperaamo ina ua maliu lona tamā? Aisea?

⁵ Ona faamautu ai lea o le aiga o Tara i lo latou aai fou. I tausaga mulimuli ane ina ua taʻua e Aperaamo “loʻu nuu,” sa ia faauiga atu i le vaipanoa o Karana, ae lē o Uro. (Kenese 24:4) E ui i lea, sa lei fuafuaina Karana e avea ma nuu tumau mo Aperaamo. E tusa ai o le faamatalaga a Setefano, ina “ua oti [le] tamā [o Aperaamo], ona ia aumaia lea o ia [e le Atua] nai lea mea e nofo i le nuu nei, ua outou nonofo ai.” (Galuega 7:4) I le usitai atu i le taitaiga a Ieova, na sopoia ai e Aperaamo faatasi ma Lota, le Eufirate ma oo atu i le laueleele o Kanana. *

6. O le ā le folafolaga na fofoga atu e Ieova ia Aperaamo?

⁶ Aisea na finagalo ai Ieova ia alu atu Aperaamo i Kanana? O le mafuaaga e fesootai atu ma fuafuaga a le Atua mo lena tane faamaoni. Na fetalai Ieova ia Aperaamo: “Ia tuua e oe o lou nuu, ma tagata o lou nuu, ma le aiga o lou tamā, a e alu atu i se nuu ou te faasino atu ai ia te oe. Ou te faia oe ma nuu tele, ou te faamanuia foi ia te oe, ou te matuā faamamaluina lou igoa; e manuia foi oe. Ou te faamanuia atu ia te i latou o e faamanuia ia te oe, ou te faamalaia atu foi ia te i latou o e fetuu ia te oe; e manuia foi ia te oe o aiga uma o le lalolagi.” (Kenese 12:1-3) O le a avea Aperaamo ma tamā o se nuu tele o le a mauaina le puipuiga a Ieova ma o le a fai mo latou le laueleele o Kanana. O se folafolaga ofoofogia! Peitai sa tatau ona faia e Aperaamo ni suiga tetele i lona olaga ina ia mafai ona fai mona tofi lena laueleele.

7. O ā suiga sa tatau ona sauniuni Aperaamo e fai ina ia ona maua ai le folafolaga a Ieova?

⁷ Ina ua tuua e Aperaamo Uro, sa tuua ai e ia se aai tamaoaiga ma e foliga mai na ia tuua ai foi ma le aiga atoa o lona tamā—o puna tāua o se olaga saogalemu i na taimi o augātamā anamua. Ina ua ia tuua Karana, sa alu ese o ia mai le auaiga o lona tamā, e aofia ai le aiga o lona uso o Nakori, ma see atu ai i se laueleele e lē masani ai. A o iai i Kanana, sa ia lei sailia sona olaga saogalemu i totonu o pa tetele o se aai. Aisea? Auā ina ua faatoʻā ulu atu Aperaamo i le laueleele, na fetalai ai Ieova ia te ia: “Ina fealualuai i le nuu i lona umi ma lona lautele; auā ou te foaiinaatua mo oe.” (Kenese 13:17) Sa usitai atu Aperaamo ua 75 ona tausaga, faapea lana avā o Sara ua 65 ona tausaga, i nei faatonuga. “O le faatuatua sa āumau ai o ia i le nuu na  folafolaina, ina o fai mo tagata ese, sa nofo i fale ie.”—Eperu 11:9; Kenese 12:4.

Le Faatuatua e Pei o Aperaamo i Aso Nei

8. I le matauina o le faaaoaoga a Aperaamo ma isi molimau anamua, o le ā e tatau ona tatou atiina ae?

⁸ Ua iai faatasi igoa o Aperaamo ma lona aiga i igoa o le “faapotopotoga [tele] o molimau [a o lei oo mai i taimi o uluai Kerisiano]” o loo taʻua i le Eperu mataupu e 11. I le matauina o le faatuatua o nei uluai auauna a le Atua, ua faalaeiauina ai e Paulo Kerisiano ina ia “tuu ese ia o mea mamafa uma, atoa ma le agasala [o le leai o se faatuatua] e faalavelavegofie ai i tatou.” (Eperu 12:1) Ioe, e mafai e le leai o se faatuatua ona ‘faalavelave ia i tatou.’ Ae i aso o Paulo faapea foi o tatou aso, ua mafai ai e Kerisiano moni ona ati ae se faatuatua malosi e talitutusa i le faatuatua o Aperaamo ma isi o aso anamua. I le tautala faasino ia te ia lava ma ona uso Kerisiano, ua faapea atu ai Paulo: “O i tatou e le o ni e tuumuli i le malaia, a o ni e faatuatua e ola ai le agaga.”—Eperu 10:39.

9, 10. O le ā se faamaoniga ua iai e faapea e toatele tagata i aso nei o loo iai foi le faatuatua lea sa iai ia Aperaamo?

⁹ E moni, ua suia le lalolagi talu mai taimi o Aperaamo. E ui i lea, o loo tatou auauna pea i le “Atua o Aperaamo,” ma e lē liliu o ia. (Galuega 3:13; Malaki 3:6) Ua tatau ona tapuaia Ieova i aso nei e pei lava ona sa iai o ia i taimi o Aperaamo. (Faaaliga 4:11) E toatele ua tuuina atu atoatoa i latou ia Ieova, ma i le pei o Aperaamo, ua latou faia so o se suiga talafeagai i o latou olaga ina ia faia ai le finagalo o le Atua. I le tausaga talu ai, e toʻa 316,092 na latou faamaonia i le lautele lo latou tuuina atu e ala i le faatofuina i le papatisoga i le vai “i le suafa o le Tamā, ma le Atalii, ma le Agaga Paia.”—Mataio 28:19.

¹⁰ O le toatele o nei Kerisiano fou sa lē manaomia ona malaga atu i ni nuu mamao e lē masani ai ina ia faataunuu lo latou tuuina atu. Ae i se uiga faaleagaga, e toatele i latou na fai sina mamao o ni faigamalaga na latou faia. Mo se faaaoaoga, i Mauritius, sa avea muamua ai Elsie o se taulaitu. E fefefe uma tagata ia te ia. Na faatulaga e se paeonia faapito se suesuega faale-Tusi Paia e faia ma le tama teine a Elsie, ma o iina na maua ai le avanoa mo Elsie ‘e liliu ese ai mai le pouliuli i le malamalama.’ (Galuega 26:18) Ona o le naunau tele o lana tama, na malie ai Elsie e suesue i Laʻu Tusi o Tala o Le Tusi Paia. E faatolu i le vaiaso ona fai lana suesuega talu ai lona manaomia o ni faalaeiauga faifai pea. Sa leai se fiafia na ia maua mai ana faiga faataulaitu, ma sa tele ni ona faafitauli totino. Peitai, na iu ina mafai ona ia faamaeʻaina se faigamalaga umi e alu ese ai mai faiga faatemoni ae alu atu i le tapuaiga moni. Ina ua saili atu tagata ia te ia mo ana faiga faataulaitu, sa ia faamalamalama i ai faapea, e na o Ieova lava e mafai ona ia puipuia i latou mai mea leaga. Ua avea nei Elsie o se Molimau papatisoina, ma e toʻa 14 tagata o lona aiga ma ē latou te masani ua taliaina le upu moni.

11. O ā fetuutuunaiga ua loto malilie i latou ua tuuina atu i latou lava ia Ieova e fai?

¹¹ O le toatele o i latou na faia se tuuina atu i le tausaga ua mavae ina ia auauna i le Atua sa lē manaomia ona latou faia na suiga tetele. Ae ua suia uma lava i latou mai le oti faaleagaga i le ola faaleagaga. (Efeso 2:1) E ui o loo iai pea i le lalolagi i le itu faaletino, ae ua lē o toe faia ai sa latou vaega. (Ioane 17:15, 16) I le pei o Kerisiano faauuina o ē o lo latou “nuu moni ua i le lagi lea,” ua faapei ai i latou o ni “tagata ese ma e āumau.” (Filipi 3:20; 1 Peteru 2:11) Ua latou faaogatusa o latou olaga ma tapulaa a le Atua, ua sili ona uunaia i le alofa i le Atua ma le alofa i tuaoi. (Mataio 22:37-39) Latou te lē tulimataia ni sini manatu faapito, ma le matapeapea, pe lagonaina se manaoga ina ia ausia ni mea mo i latou lava i lenei lalolagi. Na i lo lea, e taulai atu la latou vaai i le folafolaga o le ‘lagi fou ma le lalolagi fou e mau ai le amiotonu.’—2 Peteru 3:13; 2 Korinito 4:18.

12. O ā galuega o le tausaga talu ai ua lipotia mai, e faamaonia ai ua maua e Iesu i le taimi o lona faatasi mai “le faatuatua i le lalolagi”?

¹² Ina ua see atu Aperaamo i Kanana, sa na o ia lava ma lona aiga na iai iina, faatasi ai ma Ieova sa lagolago atu ma puipuia i latou. Peitai, o lenei toʻa 316,092 o Kerisiano fou papatisoina  e mautinoa lava e lē o tuua na o i latou. O le mea moni, o loo lagolagoina ma puipuia i latou e Ieova e ala i lona agaga, e pei ona sa ia faia ia Aperaamo. (Faataoto 18:10) Peitai, e faaopoopo atu i ai, ua ia lagolagoina i latou e ala i se “nuu” lauolaola faava-o-atunuu lea ua sili atu ona toatele lona faitau aofai na i lo nisi atunuu o le lalolagi i aso nei. (Isaia 66:8) I le tausaga talu ai, o se tumutumuga e toʻa 5,888,650 o tagatānuu o lena nuu na faamaonia mai ai lo latou faatuatua olaola e ala i le talanoa atu i o latou tuaoi e uiga i folafolaga a le Atua. (Mareko 13:10) Sa latou faaaluina se aofaiga uigaese o itula e 1,186,666,708 i lenei galuega, i le saili e maua ē naunau fiafia. O le iuga, e 4,302,852 suesuega faale-Tusi Paia na faia ma isi o ē o loo faanaunau e ati ae le faatuatua. Mo se faaaliga atili o lo latou maelega, na auai ai le toʻa 698,781 o lenei “nuu” i le auaunaga faapaeonia, pe faataimi atoa pe i se masina e tasi pe sili atu. (O auiliiliga o le galuega a Molimau a Ieova i le tausaga na teʻa nei o loo maua i le itulau e 12 e oo i le 15.) O lenei faamaumauga sili ona mataina o se tali mautinoa lea, ma le olaola i le fesili a Iesu, “A sau le Atalii o le tagata, pe maua ea e ia le faatuatua i le lalolagi?”

Faatuatua e Ui i Tofotofoga

13, 14. Faamatala mai nisi o faigata na fetaiai ma Aperaamo ma lona aiga i Kanana.

¹³ Sa masani ona faigata tulaga o mea mo Aperaamo ma lona auaiga i Kanana. I se tasi o taimi, na tupu ai se oge matautia lea na iu ina latou ō ese atu ai mai Kanana ma agaʻi atu i Aikupito. E lē gata i lea, sa taumafai le pule o Aikupito faapea ma le pule o Kira (e latalata i Kasa) e ave le avā a Aperaamo, o Sara, ina ia fai ma a la avā. (Kenese 12:10-20; 20:1-18) Sa iai foi ni feteenaiga i le va o leoleo manu a Aperaamo ma leoleo manu a Lota, ma na avea lena ma mafuaaga na valavala ai auaiga e lua. I le aunoa ma se manatu faapito, na faataga ai e Aperaamo Lota e filifili muamua i le laueleele, ona filifili ai lea o Lota e nofo i le Itumalo o le Ioritana, lea sa peiseai o Etena lona foliga mai i le lauusiusi ma le matagofie.—Kenese 13:5-13.

¹⁴ Mulimuli ane, ona aafia lea o Lota i se taua na sii atu e le tupu o le nuu mamao o Elama ma isi tupu sa aufaatasi ma ia, i tupu o aai e lima i le Vanu o Setima. Na faaumatia uma e tupu mai nuu ese tupu o le nuu ma latou ave faamalosi le tele o mea, e aofia ai Lota ma ana oloa. Ina ua faalogo Aperaamo i le mea na tupu, ona ia tuliloaina lea ma le lē fefe tupu o nuu ese ma mafai ai ona toe maua mai Lota ma lona auaiga, faapea oloa a tupu o le nuu. (Kenese 14:1-16) Peitai ane, e lē o le mea lena na sili ona leaga sa tupu ia Lota i Kanana. Atonu e iai se mafuaaga na oo ai ina nofo i Sotoma, e ui i le talaaga o amioga lē mamā a le aai. * (2 Peteru 2:6-8)  Ina ua lapataia e agelu e toalua faapea o le a faaumatia le aai, ona sosola ese lea o Lota ma lana avā ma le la fanau teine. Peitai, sa lē amanaia e le avā a Lota faatonuga maʻoti a agelu, ma o le iuga, na liu tupua masima o ia ma oti ai. Mo sina taimi, na nonofo ai Lota i se tulaga faatauvaa i totonu o se ana i Soara faatasi ma ona afafine e toalua. (Kenese 19:1-30) Atonu sa matuā mafatia lava Aperaamo i nei mea na tutupu, ae maise o lea na ō mai Lota i Kanana o ia o se tasi o le auaiga o Aperaamo.

15. E ui i faafitauli na fesagai ma Aperaamo a o maumausolo i faleie i se nuu ese, ae o ā mafaufauga sese e manino mai sa ia alofia?

¹⁵ Pe sa tau mānatu ea Aperaamo pe na tatau i a laua ma Lota ona nonofo i le siomaga malupuipuia i Uro, faatasi ma le aiga toatele o lona tamā, pe nonofo foi i Karana faatasi ma lona uso o Nakori? Pe na iai ea se taimi na ia moomoo ai maimau pe ana mafai ona ia nofo ma le saogalemu i se aai ua siomia e pa tetele na i lo le nofo i faleie? Pe na ia fesiligia ea le atamai o le faataulagaina na ia faia a o avea o ia ma se tagata maumausolo i se laueleele e lē masani ai? I le tautala e faatatau ia Aperaamo ma lona aiga, na faapea mai ai le aposetolo o Paulo: “Ana manatua e i latou le nuu ua latou o mai ai, po ua mafaia e i latou ona toe foi atu i ai.” (Eperu 11:15) Peitai, latou te lei toe foi. Na i lo le faavaivaia i faigata, na latou nonofo ai pea i le mea sa finagalo Ieova latou te nonofo ai.

Onosai i Aso Nei

16, 17. (a) O ā faigata o loo fesagai ma le toatele o Kerisiano i aso nei? (e) O ā uiga mautinoa o loo iai i Kerisiano? Aisea?

¹⁶ E faapena foi le onosai o loo vaaia i Kerisiano i aso nei. E ui o le auauna atu i le Atua o se puna o lo latou olioli tele, ae lē o faigofie le olaga mo Kerisiano moni i nei aso e gata ai. E ui o loo ola i se parataiso faaleagaga, ae o loo latou mafatia foi i omiga tau le tamaoaiga na o loo omia ai o latou tuaoi. (Isaia 11:6-9) E toatele ua afaina fua i taua a malo, ma o isi ua mafatia i le matuā lē tagolima ae lē faapea na māfua ona o i latou. E lē gata i lea, o loo latou onosaia faafitauli o le iai i se vaega toaitiiti e lē fiafia i ai le toatele. I le tele o atunuu ua latou talaʻia ai le tala lelei a o fesagai ma le faateteleina o uiga faalēano mai o tagata. I isi atunuu, ua latou mafatia ai i osofaiga taufaasese a i latou o ē “ua fai ma tulafono le faatiga” ma “faasalaina le tagata e leai sana agasala.” (Salamo 94:20, 21) E oo lava i atunuu e lē o fesagai ai Kerisiano ma ni osofaiga ma o loo viiviia ai i latou e nisi ona o tapulaa maualuluga o loo latou ola ai, ae ua latou iloa e ese i latou mai a latou uo i aʻoga ma galuega—e tai pei o Aperaamo, o lē na maumausolo i faleie ae o loo nonofo lelei le toatele o tagata i o latou fale i aai. Ioe, e lē faigofie le ola ai i le lalolagi ae “le ni o le lalolagi.”—Ioane 17:14.

¹⁷ Pe ua tatou salamō ea la, ona ua tatou tuuina atu i tatou i le Atua? Pe tatou te moomoo ea maimau pe ana avea pea i tatou ma vaega o le lalolagi, ma pei ai o isi uma tagata? Pe tatou te toe feauina ea mea ua tatou faataulagaina i le auaunaga a Ieova? E matuā leai lava! Na i lo le toe tepa i tua ma ni faanaunauga moomoo, ua tatou iloa lelei so o se mea atonu ua tatou faataulagaina e leai sona aogā moni pe a faatusatusa atu i faamanuiaga ua tatou olioli ai nei ma faamanuiaga o le a olioli ai i le lumanai. (Luka 9:62; Filipi 3:8) E lē gata i lea, po o fiafia ea tagata o le lalolagi? O le mea moni, o le toatele o i latou o loo saili atu mo tali ia ua uma ona tatou iloa. O loo mafatia i latou ona o le lē usitaia o taiala ia o loo tatou mulimuli ai mai le Atua e ala mai i le Tusi Paia. (Salamo 119:105) Ma e toatele i latou o loo moomoo atu mo se ituaiga o faauooga faa-Kerisiano ma se auaufaatasiga fiafia lea o loo tatou olioli ai faatasi ma uso talitonu.—Salamo 133:1; Kolose 3:14.

18. O le ā le iuga e oo i ai pe a faaalia e Kerisiano le lototele e pei o Aperaamo?

 ¹⁸ E moni, o nisi taimi e tatau ai ona tatou loto tetele e pei o Aperaamo ina ua ia tuliloa ia i latou na aveina faapagota Lota. Ae pe a tatou faia faapea, e faamanuia e Ieova le taunuuga. Mo se faaaoaoga, i Aialani i Mātū, ua matuā mauaa ai le feitagai ona o faiga sauā a vaega faalotu, ma e manaomia ai lava le lototele ina ia solitu ai. Peitai, ua usitaia e Kerisiano faamaoni fetalaiga a Ieova ia Iosua: “Ia e faamalosi, ma loto tele; aua e te fefe, aua e te mataʻu; auā o Ieova lou Atua o loo ia te oe i mea uma e te alu i ai.” (Iosua 1:9; Salamo 27:14) A o faagasolo tausaga, ua avea lo latou onosai ma le lē fefefe ma pogai ua faaaloalogia ai i latou e isi, ma i aso nei ua mafai ona latou talaʻi atu ma le saoloto i vaipanoa uma o lena atunuu.

19. O fea le nofoaga e fiafia Kerisiano e ō i ai, ma o le ā le iuga latou te faatalitalia ma le mautinoa pe a latou mulimuli i taiala a Ieova?

¹⁹ E lē tatau lava ona tatou masalosalo faapea, po o le ā lava le tulaga tatou te fesagai, ae afai tatou te mulimuli i taiala a Ieova, o le iuga mulimuli e oo i ai, o le a viia ai o ia ma e mo lo tatou lelei mo se taimi umi. E ui i luʻi ma faataulagaina ua fai, ae leai lava se isi nofoaga tatou te fia iai na i lo le iai i le auaunaga ia Ieova, ma olioli ai i le aufaatasiga ma o tatou uso Kerisiano, ma tulimatai atu ma le mautinoa i le lumanai e faavavau lea ua folafola mai e le Atua.

[Faaopoopoga i lalo]

E te Manatua?

□ Aisea e manaomia ai se faatuatua malosi?

□ Na faapefea ona faaalia e Aperaamo sa ia te ia se faatuatua malosi?

□ E faapefea i le tuuina atu ona ō mai faatasi ma suiga i le olaga o se tasi?

□ Aisea ua tatou fiafia ai e auauna atu i le Atua e ui lava i ni faafitauli tatou te ono fesagai?

[Fesili mo le Suʻesuʻega]

[Ata i le itulau 7]

Sa lotomalie Aperaamo e fai ni suiga tetele i lona olaga ina ia mafai ona fai mona tofi le folafolaga

[Ata i le itulau 9]

Ua faaalia i faamaoniga faapea ua maua e Iesu i le taimi o lona faatasi mai “le faatuatua i le lalolagi”