Na Latou Faia le Finagalo o Ieova

Se Gaoioiga o le Faamagalo ua Tatala ai le Ala mo le Faaolataga

NA IAI i atalii e toasefulu o Iakopo lea na tutū i luma o le palemia o Aikupito se mea lilo e matuā leaga lava. I tausaga muamua atu na latou faatau atu ai lo latou ʻafa uso o Iosefa ina ia fai ma pologa, ma taupulepule ai e taʻu atu i lo latou tamā ua aina o ia e se manu feai ma oti ai.—Kenese 37:18-35.

O lea, i le 20 tausaga mulimuli ane, na oo ai se oge tele ma faamalosia ai nei alii e faimalaga atu i Aikupito e faatau mai ai ni saito. Ae sa lei faigofie le tulaga o mea iina. Na tuuaia i latou e le palemia o lē sa pule i le faatauina o meaʻai, faapea o i latou o ni sipai. Na ia faafalepuipuiina le tasi ma faatonuina isi ina ia foi i lo latou aiga ma aumai lo latou uso laitiiti, o Peniamina. Ina ua latou faia faapea, na faatinoina ai loa e le palemia se fuafuaga ina ia mafai ona taofia ai Peniamina.—Kenese 42:1–44:12.

Na teena e Iuta, o se tasi o atalii o Iakopo. ‘Afai matou te toe foi i lo matou aiga e aunoa ma Peniamina,’ na ia faapea atu ai, ‘o le a oti lo matou tamā.’ Peitai na iai se mea na tupu sa lei faatalitalia e Iuta ma ona uso. Ina ua maeʻa ona faatonuina tagata uma e tuua le potu vaganā ai le fanau a Iakopo, ona tagi leotele ai lea o le palemia. Ina ua toʻa lelei, ona ia faailoa atu lea: “O aʻu o Iosefa.”—Kenese 44:18–45:3.

Alofa Mutimutivale ma le Faasaolotoga

Na fesili atu Iosefa i ona ʻafa uso. “O ola mai pea ea loʻu tamā?” Na leai se isi na tali mai. E mautinoa, na matuā lē magagana lava ʻafa uso o Iosefa. Pe na tatau ea ona latou matuā olioli, pe na tatau ona latou fefefe? Auā foi i tausaga e 20 ua tuanai na latou faatau atu ai lenei tama e fai ma pologa. Sa ia Iosefa le pule e faafalepuipui ai i latou, auina atu i lo latou aiga e aunoa ma ni meaʻai, po o—le oo i se tulaga e sili ona leaga lea sa latou mafaufau i ai—o le fasiotia lea! Ona o se mafuaaga tatau, sa ‘lē mafai ai e [ʻafa uso o Iosefa] ona tali mai ia te ia, auā ua matuā atuatuvale i ona luma.’—Kenese 45:3.

Sa vave lava ona faatoʻafilemu e Iosefa manatu o nei alii. Na ia faapea atu: “Ina soso mai ia ia te au.” Ona latou faia lea faapea. Ona ia toe faapea atu lea: “O aʻu o lo outou uso o Iosefa, na outou faatau mai i Aikupito. O lenei, aua neʻi tiga outou, pe fai ma mea leaga i o outou manatu ina ua outou faatau mai ia te au i le mea nei; auā na auina mai aʻu e le Atua e muamua ia te outou e fai ma faaola.”—Kenese 45:4, 5.

Sa lei faalautele atu le alofa o Iosefa e aunoa ma se faavae. Ua ia vaaia faamaoniga o lo latou salamō. Mo se faataitaiga, ina ua tuuaia e Iosefa ona ʻafa uso o ni sipai, na ia lagona atu lo latou fetautalatalaai ia i latou lava: “E moni lava, ua tatou sala ona o lo tatou uso . . . o le mea lea ua oo mai ai ia te i tatou lenei puapuaga.” (Kenese 42:21) E lē gata i lena, ae na ofo atu e Iuta o ia e fai ma pologa e sui ai Peniamina ina ia toe foi atu le tama i lona tamā.—Kenese 44:33, 34.

O lea, sa saʻo Iosefa i le faalautele atu o lona alofa. O le mea moni, sa ia iloa o le faia faapea e iu ai i le faaolataga o lona aiga atoa. Ona o lena, na faatonuina ai e Iosefa ona ʻafa uso ina ia toe foi ma taʻu atu i lo latou tamā, o Iakopo, e faapea: “O faapea mai lou atalii o Iosefa, ‘Ua fai aʻu e le Atua ma alii o Aikupito uma; ia e sau ia te au, aua e te tuai mai. E te nofo foi i le nuu o Kosena, e te latalata mai ia te au, o oe, ma au fanau, ma fanau a au fanau, ma au mamoe, ma au povi, ma au mea uma; ou te tausi foi ia te oe i lea mea.’ ”—Kenese 45:9-11.

Le Iosefa Sili

E mafai ona taʻua Iesu Keriso o le Iosefa Sili, auā e iai vala mataina e tutusa ai i laua. E pei lava  o Iosefa, sa oo foi faiga lē alofa ia Iesu mai ona lava uso, i latou na tupuga mai ia Aperaamo. (Faatusatusa i le Galuega 2:14, 29, 37.) Ae peitai, na tofo i laua i se tulaga mataina o le matuā suia o na mea. I lena taimi, na suia ai le tulaga o Iosefa o se pologa i le avea ma palemia, na o ia e sosoo atu ia Farao. I se tulaga talitutusa, na faatuina ai e Ieova ia Iesu mai le oti ma faaeaina i se tulaga maualuga “e le aao taumatau o le Atua.”—Galuega 2:33; Filipi 2:9-11.

I le avea o se palemia, sa mafai ai e Iosefa ona faasoa atu taumafa ia i latou uma na ō atu i Aikupito e faatau saito. I aso nei, o loo iai i le lalolagi le vasega o le auauna faamaoni ma le mafaufau a le Iosefa Sili lea o loo ala mai ai lona faasoasoaina mai o taumafa faaleagaga “i ona itu aso.” (Mataio 24:45-47; Luka 12:42-44) E mautinoa o i latou e ō mai ia Iesu e “le toe fia aai, e le toe fia inu foi . . . Auā o le Tamai mamoe o loo i luma o le nofoālii na te fafaga ia i latou, ma taʻitaʻi ia te i latou i puna o vai ola.”—Faaaliga 7:16, 17.

Lesona mo i Tatou

Ua saunia e Iosefa se faataitaiga iloga o le alofa. O le maumauai i lana faamasinoga tonu sa ono uunaia ai o ia e faasalaina ē na latou faatauina atu o ia e fai ma pologa. I se faaeseesega, sa ono mafai e ona faalogona ona uunaia o ia e faagaloina la latou agasala. Ae leai se tasi o na mea na faia e Iosefa. Na i lo lena, sa ia tofotofoina le salamō o ona ʻafa uso. Ina ua ia iloa ua moni lo latou faanoanoa, ona ia faamagalo loa lea o i latou.

E mafai ona tatou faataitai ia Iosefa. Afai e faaalia e se tasi na agasala mai ia i tatou se suiga moni mai le loto, ua tatau la ona faamagalo atu ia te ia. O le mea moni, e lē tatau ona faatagaina o tatou faalogona ootia e faatauasoina ai i tatou i amioga leaga. I le isi itu, e lē tatau ona faatagaina faalogona o le lē faamalieina e faatauasoina ai i tatou mai gaoioiga o le salamō moni. O lea seʻi o tatou “fefaapalepaleai, ma ia fefaamagaloai.” (Kolose 3:13) I le faia faapea, o le a tatou faaaoao atu ai i lo tatou Atua, o Ieova, o lē “faamagalo sala.”—Salamo 86:5; Mika 7:18, 19.