Pe e Talia e Isi Au Fautuaga?

O SE fautuaga talafeagai e avatu i le auala saʻo, e masani lava ona maua ai iuga lelei. Pe e saʻo? E sese! E oo lava i se fautuaga e silisili ona lelei e avatu e tagata faufautua atamamai e masani lava ona faaleamanaiaina pe teena foi.—Faataoto 29:19.

O le mea lena na tupu ina ua fautuaina e Ieova Kaino, o lē na ita i lona uso, o Apelu. (Kenese 4:3-5) I le silafiaina o le tulaga lamatia na faamalumalu ane ia Kaino ona o lenei mea, na fetalai atu ai le Atua ia te ia e faapea: “Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? a e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia.”—Kenese 4:6, 7.

O le mea lea ua faatusaina ai e Ieova le agasala i se manu feai o loo faapuna e osofai atu ia Kaino pe afai e faaauau pea ona teuloto se faalogona ita faasaga i lona uso. (Faatusatusa i le Iakopo 1:14, 15.) Sa lava le taimi e suia ai e Kaino ona uiga, i le ‘liliu atu lea e faia le amio lelei’ na i lo o le tausisia o se ala faamalaiaina. O le mea e faanoanoa ai, ona sa lei utagia e Kaino le lapataiga. Sa ia teena le fautuaga a Ieova, ma oo ai i ni iuga mafatia.

E feita nisi ma teena so o se fautuaga. (Faataoto 1:22-30) Pe faamata o le sese a lē o loo fautua atu ua teena ai le fautuaga? (Iopu 38:2) O oe lē avatua le fautuaga, po o e avatua i se auala e faafaigata ai ona talia e isi? Ona o le lē lelei atoatoa faaletagata ua avea ai lena mea o se lamatiaga moni lava. Ae e mafai lava ona e faaitiitia le ono tupu mai o lena mea e ala i le mulimuli ma le faaeteete i mataupu silisili o le Tusi Paia. Seʻi o tatou iloiloina nisi o na mea.

‘Ia Faasaʻo i se Agaga Agamalu’

“Le au uso e, pe afai ua uia e se tasi se laasaga sese a o lei iloa lelei e ia, o outou o loo iai agavaa faaleagaga, ia taumafai e toe faasaʻo lē ua faapeaina i se loto agamalu, ae ia faaeteete foi oe ina neʻi faaosoosoina oe.” (Kalatia 6:1, NW) I lea na faasino atu ai e le aposetolo o Paulo e faapea, o i latou e iai “agavaa faaleagaga” e tatau ona taumafai ina ia toe faasaʻo se Kerisiano o sē ‘ua uia se laasaga sese a o lei iloa lelei e ia.’ I nisi taimi e foliga mai o i latou e itiiti lava se agavaa e faia ai faapea, e sili atu ona naunau e avatu se fautuaga. O lea, aua le vavevave i le fautuaina o isi. (Faataoto 10:19; Iakopo 1:19; 3:1) E masani lava o toeaina o le faapotopotoga o ē  ua agavaa faaleagaga, o i latou ia e ofoina atu le fautuaga. E moni, o so o se Kerisiano taumatuaina lava e tatau ona avatua se lapataiga pe afai ua ia iloa ua agaʻi atu se uso i se tulaga lamatia.

Afai e te ofoina atu se lapataiga po o se fautuaga, ia mautinoa ua faavae mea o e fai atu ai i le atamai faaleatua, ae lē o manatu ma filosofia faaletagata. (Kolose 2:8) Ia faapei oe o se tagata kuka mataalia, o lē na te faamautinoa ua atoatoa ona mamā mea uma o ia faaaogaina ma ia leai se mea e ono faaoonaina ai. Ia faamautinoa o lau fautuaga e faavae mausalī i le Afioga a le Atua ma ia lē na o ou lava manatu. (2 Timoteo 3:16, 17) I le faia o lenei mea, ua mafai ai ona e mautinoa o le a lē tupu se mea leaga i se tasi ona o lau fautuaga.

O le sini autū o le fautuaga, ina ia “toe faasaʻo” lē ua faia le mea sese, ae lē o le taumafai e suia faamalosi ae lē o loto i ai. O le upu Eleni ua faaliliuina i le “toe faasaʻo” e fesootai atu ma le upu e faatatau i le toe faatulaga saʻo o se ponaivi na see ese ina ia puipuia ai mai le faaleagaina atili. E tusa ai ma le faamatalaga a le tusitala o W. E. Vine, ua fautua mai ai foi “le tatau ona onosai ma maumauai i le faia o lenei gaoioiga.” Manatu i le gaoioiga faifailemu ma le tomai e manaomia ina ia alofia ai le faatupuina o tiga o le tino e lē o manaomia. E faapena foi ona manaomia e se faufautua le matuā faaeteete ina ia alofia ai le faatiga i se tasi o avatu i ai le fautuaga. E matuā faigata lava lenei mea pe afai e talosagaina e se tasi se fautuaga. Afai e lei talosagaina sau fautuaga, e manaomia lava se tomai e sili atu ma ia magafagafa.

E mautinoa lava o le a lē mafai ona e “toe faasaʻo” se tagata pe afai e te faaesea o ia. Ina ia alofia le faia o lenei mea, ia manatua le manaomia ona faaalia “le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Afai e lē onosai se fomai ma soona fai ma le lē alofa ana tagata mamaʻi, e ono faaleamanaia ai e tagata mamaʻi lana fautuaga ma lē toe sau ai mo ona togafitiga manaomia.

E lē o le uiga o lenei mea e faapea, o le a lē tatau ona maumauai le auala e avatu ai fautuaga. Sa maumauai Iesu Keriso ina ua ia fautuaina faapotopotoga e fitu i le itumalo o Asia. (Faaaliga 1:4; 3:1-22) Sa ia tuuina atu ia te i latou ni fautuaga matuā tuusaʻo na sa manaomia ona latou faalogo i ai ma faatatauina. Ae sa paleni pea le maumauai o Iesu ma uiga e pei o le tigaalofa ma le agalelei, na atagia mai ai le agaga alofa o lona Tamā faalelagi.—Salamo 23:1-6; Ioane 10:7-15.

Fautua Atu ma le Alofa

“Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata taitoatasi uma.” (Kolose 4:6) O le masima, e mafai ona faaleleia ai le tofo o meaʻai, e mafai ona faaoso ai le  fiafia e ʻai. Afai e te manao ina ia talisapaia lau fautuaga, e tatau ona avatu “ma le alofa, ia faamāi i le masina.” E tusa lava pe faaaogā mea e sili atu ona lelei e fai ai meaʻai, ae peitai, e mafai ona lē lelei le sauniaina, po o le na ona laʻu atu foi i luga o se ipu i se auala e lē manaia i le vaai. E lē faaoso ai se fia ʻai o se tasi. O le mea moni, atonu o le a faigata ona folo e oo lava i sina mama se tasi.

Pe a avatua se fautuaga, e tāua tele le filifilia o upu saʻo. Na faapea mai le tagata atamai o Solomona: “O le upu ua fai faatatauina, o moli [“apu,” NW] auro ia i ato ario togitogi faamamanuina.” (Faataoto 25:11) Atonu o loo ia manatunatu i se tanoa ario faamamanuina ua matagofie ona teuteuina ma ni apu auro ua vaevaeina. Maeu se matagofie i le vaai, ma maeu lou talisapaia pe a e mauaina sea meaalofa! E faapena foi ona e filifilia lelei upu alofa e mafai ona matuā faafiafiaina ai lē o loo e taumafai e fesoasoani atu i ai.—Failauga 12:9, 10.

I le tuufaafeagai, “o le upu faatiga e tupu ai le ita.” (Faataoto 15:1) O upu e lē talafeagai, e faigofie lava ona oso ai le tiga ma le ita na i lo o le loto faafetai. O le mea moni, e lē na o upu lē talafeagai ae o le sese foi o le leo o fai atu ai e ono faapogai ai ona teena e se tagata se fautuaga lelei lava. O le avatu o le fautuaga i se auala lē tomai, ma faaoso ita, e mafai ona faaleagaina ai e pei ua osofaia se tasi i se auupega. Ua faapea mai le Faataoto 12:18: “O i ai lē soona tautala, e pei o tutuʻi i le pelu.” Aisea e tautala lē mafaufau ai ma faafaigata ai i se tasi ona faalogo i le fautuaga?—Faataoto 12:15.

E pei ona fai mai Solomona, o se upu faufautua e tatau ‘ona fai atu i le taimi tatau.’ O le taimi tatau e tāua tele pe afai e te manao ia taulau manuia le fautuaga! Ua iloa lelei e ono lē talisapaia e se tagata ua leai se lagona fia ʻai ia meaʻai. Atonu sa muai taumafa sana ʻaiga telē, pe ona ua maʻi. E lē o se faiga atamai la pe talia foi le fafaga faamalosi o se tasi e lē o fia ʻai.

Ia Fautua Atu ma le Lotomaulalo

“Ina faaatoatoa mai ia e outou loʻu olioli . . . Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo ua sili nisi ia te ia. Aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:2-4) Afai o oe o se faufautua lelei, o le a uunaia oe e le “manatu” mo le lelei o isi. O le a e faaalia foi le “loto maulalo” pe a feutagai ma uso ma tuafāfine faaleagaga, i le manatu e sili isi ia te oe. O le ā le uiga o lena mea?

O le lotomaulalo o le a puipuia ai oe mai le faatupuina o se uiga po o se leo fiasili. E leai se tasi o i tatou e iai se mafuaaga e lagona ai faapea e sili o ia i uso talitonu. O i tatou uma lava tatou te sese mai lea taimi i lea taimi. Talu ai e lē mafai ona e iloa atu le mea o i le loto, e tāua faapitoa ai lava la  le aua le faamasinoina uiga o lē o loo e avatu i ai le fautuaga. Atonu e leai ni ona uiga leaga ma na te lē o iloaina foi se vaaiga sese po o ni gaoioiga leaga. E tusa lava pe foliga mai o loo ia iloaina ua ia faia se laasaga sese e tusa ai ma mea e manaomia e le Atua, e mautinoa lava o le a faigofie ia te ia ona talia le fautuaga pe afai e avatu ma le lotomaulalo faatasi ma le naunau moni lava mo lona lelei faaleagaga.

Seʻi manatu i le lagona e oo ia te oe pe afai sa valaaulia oe mo se taumafataga ae sa lē talileleia ma ʻinoʻino ia te oe lē sa talimalo! E mautinoa lava o le a e lē fiafia i le taumafataga. O le mea moni, “e sili ona lelei o le faaalumaga o laau ʻaina, a o i ai le alofa, i le povi ai le fale povi, a o i ai le ʻinoʻino.” (Faataoto 15:17) E faapena foi, e oo lava i le fautuaga e sili atu ona lelei e mafai ona faafaigata ona talia pe afai e faaalia e lē o loo avatua le fautuaga se ʻinoʻino i lē o ia fautuaina, pe taʻufaatauvaaina ma faamaasiasi o ia. Ae peitai, o le alofa, o le faaaloalo o le tasi i le tasi, ma le maufaatuatuaina o le a faafaigofie ai ona avatu ma talia le fautuaga.—Kolose 3:14.

Se Fautuaga na Talia

Na faaalia e le perofeta o Natano le lotomaulalo ina ua ia fautuaina le tupu o Tavita. O le alofa ma le faaaloalo ia Tavita na faaalia i upu ma gaoioiga na faia e Natano. Na amata le fautuaga a Natano i se faataoto ona o lona manatu i le ono faafaigata ona faalogo mai Tavita i le fautuaga. (2 Samuelu 12:1-4) Na augani atu le perofeta i le naunau o Tavita i le faamasinotonu ma le amiotonu, e ui lava sa lei faaalia i ana gaoioiga na aafia ai Patesepa. (2 Samuelu 11:2-27) Ina ua faamatilatila atu le manatu o le faataoto, na tali atu Tavita ma lagona mai lona loto e faapea: “Ua ou agasala lava ia Ieova.” (2 Samuelu 12:7-13) I le lē pei o Kaino, o lē na lē faalogo ia Ieova, na talia ma le lotomaulalo e Tavita le faasaʻoga.

E mautinoa sa taitaia e Ieova Natano, i lona silafia o le lē lelei atoatoa o Tavita ma le tulaga atonu o le a lē talileleia e Tavita le fautuaga. Sa faalatalata atu ma le matuā faautauta Natano ma e manino mai sa ia iloa lelei e sili Tavita ona o lona tulaga, o ia o le tupu tofia a Ieova. Afai e te iai i se tulaga pule, atonu e te avatua ai se fautuaga tatau, ae e ono faafaigata ona talia pe afai e lē taulau ona e faaalia le lotomaulalo.

Na toe faasaʻo e Natano ia Tavita i se agaga o le lotomaulalo. Sa matuā agalelei ma sauniunia ma le faaeteete upu a le perofeta ina ia mafai ai ona talia e Tavita i se auala o le a sili atu ona lelei mo ia. Sa lei uunaia Natano ona e mo sona lelei totino, sa faapena foi ona lē taumafai o ia e manatu faapea e sili atu ona lelei lana amio pe e sili atu lona tulaga faaleagaga i lo Tavita. Maeu se faaaoaoga lelei o le fai atu o upu saʻo i se auala talafeagai! Afai e te faaalia se agaga faapena, e foliga mai o le a sili atu ai ona talia e isi au fautuaga.

[Ata i le itulau 22]

I le pei o meaʻai susua, e tatau ona mamā au fautuaga

[Ata i le itulau 23]

Pe e te avatua lau fautuaga i se auala e faafiafia ai le loto e pei o apu auro i totonu o se ipu ario faamamanuina?

[Ata i le itulau 24]

Na augani atu ma le lotomaulalo le perofeta o Natano i le naunau o Tavita i le faamasinotonu ma le amiotonu