Po o Au Tatalo o ‘Saunia e Faapei o Mea Manogi e Mu’?

“Ia saunia laʻu tatalo e faapei o le mea manogi e mu i ou luma.”—SALAMO 141:2.

1, 2. O le faamuina o mea manogi e fai ma faailoga o le ā?

NA POLOAI atu Ieova le Atua i lana perofeta o Mose ina ia saunia le mea manogi paia e faaaogā i le falefetafai e fai ai tapuaiga a Isaraelu. E tusa ai o le fua tauatua, sa manaomia se paluga e palu faatasi ai ni mea manogi se fā. (Esoto 30:34-38) Sa faamaonia le matuā sasala manaia o lona manogi.

² O le feagaiga o le Tulafono lea sa ola ai le nuu o Isaraelu, na manaomia ai le faamuina o mea manogi i aso taitasi. (Esoto 30:7, 8) Pe sa iai se uiga faapitoa o le faaaogaina o le mea manogi? Ioe, auā na pese le faisalamo e faapea: “Ia saunia laʻu tatalo e faapei o le mea manogi e mu i ou luma [Ieova le Atua]; o le sii i luga o oʻu lima ia pei o le taulaga e fai i le afiafi.” (Salamo 141:2) I le tusi o Faaaliga, o loo faamatala ai e le aposetolo o Ioane i latou o siomiaina le nofoalii o le Atua faapea, o loo tofu i latou ma ipu auro ua tumu i mea manogi e mu. Ona faapea mai lea o le tala faagaeeina, o “mea manogi e mu, o talosaga ia a le au paia.” (Faaaliga 5:8) O lea la, o le faamuina o mea manogi lelei sa faatusa i ai tatalo na taliaina, sa ofo atu e auauna a Ieova i le ao ma le po.—1 Tesalonia 3:10; Eperu 5:7.

3. O le ā e tatau ona fesoasoani ia i tatou e ‘sauniunia ai a tatou tatalo ia pei o ni mea manogi e mu i luma o le Atua’?

³ Pe a fia taliaina e le Atua a tatou tatalo, e ao ona tatou tatalo atu ia te ia e ala i le suafa o Iesu Keriso. (Ioane 16:23, 24) Ae mafai faapefea ona tatou faaleleia le uigā o a tatou tatalo? O le iloiloina o nisi o faaaoaoga faale-Tusi Paia e tatau ona fesoasoani ia i tatou e sauniunia ai a tatou tatalo ia pei o ni mea manogi e mu i luma o Ieova.—Faataoto 15:8.

Ia Faia Tatalo i le Faatuatua

4. Ua faapefea ona fesootai atu le faatuatua i tatalo e talileleia?

 ⁴ Ina ia oo atu a tatou tatalo i le Atua e pei o ni mea manogi lelei, e ao la ona faia a tatou tatalo i le faatuatua. (Eperu 11:6) Pe a maua e toeaina se tagata maʻi faaleagaga o lē na te talileleia a latou fesoasoani faale-Tusi Paia, o a latou ‘tatalo e faia i le faatuatua e faaolaina ai le maʻi.’ (Iakopo 5:15) O tatalo e faia i le faatuatua e logomālie i lo tatou Tamā faalelagi, e faapena foi i le suesueina faatasi ma le tatalo o le Afioga a le Atua. Sa faaalia e le faisalamo se uiga lelei ina ua ia pese: “Ou te sii foi i luga oʻu lima i au poloaiga ua ou naunau i ai; ou te mafaufau lava i au tulafono. Ia e aʻoaʻo mai ia te au i le faautauta lelei ma le poto; auā ua ou faamaoni i au poloaiga.” (Salamo 119:48, 66) Seʻi o tatou ‘sii i luga o tatou lima’ i le tatalo e faia i le lotomaulalo ma faaalia le faatuatua e ala i le usitaia o poloaiga a le Atua.

5. O le ā e tatau ona tatou fai pe a lē o ia i tatou le atamai?

⁵ Seʻi faapea e lē o ia i tatou le atamai manaomia e faafetaiaia ai se faafitauli. Atonu e iai se valoaga patino a le Tusi Paia tatou te lē o mautinoa pe ua faataunuuina nei. Na i lo le faataga o lena mea e faaluafesasi ai lo tatou tulaga faaleagaga, seʻi o tatou tatalo atu mo le atamai. (Kalatia 5:7, 8; Iakopo 1:5-8) O le mea moni, e lē mafai ona tatou faatalitalia le Atua e tali mai ia i tatou i se auala e matuā mataina. E manaomia ona tatou faaalia le faamaoni i a tatou tatalo e ala i le faia o mea o loo ia faatalitalia ona tagata uma lava e fai. E manaomia tele mo le faatupuina o le faatuatua ona tatou suesueina le Tusi Paia, faatasi ai ma le fesoasoani o lomiga ua saunia mai e “le auauna faamaoni ma le mafaufau.” (Mataio 24:45-47; Iosua 1:7, 8) E manaomia foi ona faalautele atu lo tatou poto e ala i le faia e lē aunoa o so tatou sao i sauniga a tagata o le Atua.—Eperu 10:24, 25.

6. (a) O le ā e tatau ia i tatou uma ona iloa e faatatau i o tatou aso ma le faataunuuga o valoaga o le Tusi Paia? (e) E faaopoopo atu i le tatalo mo le faapaiaina o le suafa o Ieova, o le ā e ao ona tatou faia?

⁶ I aso nei, o loo sailia ai e nisi Kerisiano o latou lava manaoga totino ma galuega, ma aliali mai ai ua galo ia i latou o lea ua tatou iai nei i le ooooga o “ona po o le iuga.” (Tanielu 12:4) E talafeagai ai mo uso talitonu ona latou tatalo ina ia mafai e na Kerisiano ona toe faaolaola pe faamalosia lo latou faatuatua i faamaoniga faale-Tusi Paia e faapea, na amata le faatasi mai o Keriso i le 1914 ina ua faatulaga o ia e Ieova e avea ma Tupu faalelagi ma o loo pule nei o ia i le lotolotoi o ona fili. (Salamo 110:1, 2; Mataio 24:3) E tatau ia i tatou uma lava ona iloa, o mea tutupu na valoia mai e pei o le faaumatiaga o lotu sese—“Papelonia le aai tele”—o le osofaiga faasatani a Koku o Makoku i tagata o Ieova, ma le faasaoina o i latou e le Atua e Ona le Malosi Uma Lava i le taua o Amaketo, e mafai ona gāpā faafuasei ma e mafai ona tupu uma lava i totonu o sina vaitaimi puupuu. (Faaaliga 16:14, 16; 18:1-5; Esekielu 38:18-23) O lea seʻi o tatou tatalo ai mo le fesoasoani a le Atua ina ia tatou mataala faaleagaga. Tau ina ia tatou tatalo uma ma le naunautai mo le faapaiaina o le suafa o Ieova, mo lona Malo ina ia oo mai, ma le faia o lona finagalo i luga o le lalolagi e pei ona faia i le lagi. Ioe, tau ina ia faaauau ona tatou faaalia le faatuatua ma ia faamaonia atu e faamaoni a tatou tatalo. (Mataio 6:9, 10) Ioe, tau ina ia muai saili e i latou uma o ē alolofa ia Ieova le Malo ma lana amiotonu, ma faia se sao sili e mafai i le talaʻia o le tala lelei a o lei oo mai le iuga.—Mataio 6:33; 24:14.

Ia Vivii ma Faafetai Atu ia Ieova

7. O le ā o e maofa ai e faatatau i le tatalo a Tavita lea o loo faamauina sona vaega i le 1 Nofoaiga a Tupu 29:10-13?

 ⁷ O se auala tāua e ‘sauniunia ai a tatou tatalo ia pei o ni mea manogi e mu’ o le taʻu atu lea o viiga mai le loto ma le agaga faafetai i le Atua. O se tatalo faapena na ofo atu e le tupu o Tavita ina o latou faia ma tagata Isaraelu se sao i le fausiaina o le malumalu o Ieova. Na tatalo faapenei Tavita: “Ia faamanuina oe, Ieova e, le Atua o Isaraelu, lo matou tamā, mai le vavau e oo i le faavavau. Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. Mai ia te oe le oloa ma le mamalu, o oe e te pule i mea uma lava; o i ai foi i lou aao le mamana ma le malosi, o ia te oe foi e faateleina ma faamalosia tagata uma lava. O lenei, lo matou Atua e, ua matou faafetai atu ia te oe, ma vivii atu i lou suafa mamalu.”—1 Nofoaiga a Tupu 29:10-13.

8. (a) O ā upu o viiga i le Salamo 148 e oo i le 150 e sili ona pāʻia ai lou loto? (e) Pe afai tatou te ioe faatasi i moomooga o loo faaleo mai i le Salamo 27:4, o le ā o le a tatou faia?

⁸ Maeu ni faaupuga matagofie o viiga ma le faafetai! Atonu e lē faapena le matuā mananaia o a tatou tatalo, ae mafai ona tutusa i le sau mai o tatou loto. Ua tumu le tusi o Salamo i tatalo o faafetai ma viiga. O upu matagofie o viiga o loo maua i le Salamo 148 e oo i le 150. O loo faaupuina le agaga faafetai i le Atua i le tele o salamo. Na pese Tavita e faapea: “E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou saili i lona malumalu.” (Salamo 27:4) Seʻi o tatou gaoioi e ogatusa ma na tatalo e ala i le faia ma le maelega o so tatou sao i gaoioiga uma a le vao o tagata o Ieova ua faapotopotoina. (Salamo 26:12) O le faia faapea ma le manatunatu loloto i le Afioga a le Atua i aso taitasi o le a aumaia ai ia i tatou le tele o mafuaaga e faalatalata atu ai ia Ieova i viiga mai le loto ma le agaga faafetai.

Saili ma le Lotomaulalo le Fesoasoani a Ieova

9. Na faapefea ona tatalo le tupu o Asa, faatasi ai ma le ā le iuga?

⁹ Pe afai tatou te auauna ia Ieova ma le loto atoa o ni ana Molimau, e mafai ona tatou mautinoa e faafofoga o ia i a tatou tatalo mo se fesoasoani. (Isaia 43:10-12) Seʻi manatu ia Asa le tupu o Iuta. O uluai tausaga e 10 o lana nofoaiga e 41 tausaga le umi (977-937 T.L.M.) sa mataulia i le filemu. Ona osofai ane lea o ʻau e tasi le miliona a Sera le Aitiope. E ui i le matuā toatele o le fili, ae na ō atu Asa ma lana ʻau e faafetaia le auosofai. Peitai, a o lei faia le taua, sa tatalo faatauanau Asa. Sa ia taʻua le iai ia Ieova o le mana e laveai ai. I le ole atu mo se fesoasoani, na faapea atu le tupu: “Matou te faalagolago ia te oe, ua matou o atu i lou suafa lava e tau ma lena toatele. Ieova e, o oe lava lo matou Atua; aua neʻi manumalo mai tagata ia te oe.” Na iu i se manumalo atoatoa a o laveaiina e Ieova Iuta ona o lona suafa sili. (2 Nofoaiga a Tupu 14:1-15) Pe laveaiina i tatou e le Atua mai se puapuaga pe faamalosia i tatou ina ia onosaia lena puapuaga, e mautinoa lava e faafofoga mai o ia i a tatou olega mo lana fesoasoani.

10. Pe afai e iai se faafitauli patino ua tatou lē iloa le auala e faafetaiaia ai, e mafai faapefea ona aogā ia i tatou le tatalo a le tupu o Iosefatu?

 ¹⁰ Pe afai e iai se faigata patino ua tatou lē iloa le auala e faafetaiaia ai, e mafai ona tatou mautinoa o le a faafofoga mai Ieova i a tatou olega mo se fesoasoani. Na faataitaia mai lenei mea i aso o Iosefatu le tupu o Iuta, o lē na amata lana pulega e 25 tausaga le umi, i le 936 T.L.M. Ina ua faamataʻuina Iuta e autau tuufaatasi a Moapi, Amoni, ma le mauga o Seira, ona aioi atu lea o Iosefatu: “Lo matou Atua e, e te le faamasino ea ia te i latou? Auā e leai so matou malosi e tetee i lenei vao tagata e toatele, ua o mai e tau ma i matou; ua matou le iloa foi se mea e fai; a ua faasaga atu i matou ia te oe.” Na tali mai Ieova i lena tatalo lotomaulalo, ma ia tau ai mo Iuta e ala i le faafenumiaia o autau a le fili ona latou toe fefasiai ai lea o i latou lava. O le iuga, na oo ina matataʻu nuu tuaoi, ma atili faateleina ai le filemu i totonu o Iuta. (2 Nofoaiga a Tupu 20:1-30) Pe a lē iai ia i tatou le atamai lea e manaomia ina ia faafetaia ai se faigata, e mafai ona tatou tatalo atu e pei o Iosefatu: ‘Ua matou lē iloa foi se mea e fai; a ua faasaga atu i matou ia te oe, Ieova e.’ E ono fesoasoani ia i tatou le agaga paia ina ia tatou manatua ni manatu faale-Tusi Paia o manaomia e foia ai le faafitauli, pe ono fesoasoani mai foi le Atua ia i tatou i se auala e matuā lei mafaufauina e se tagata.—Roma 8:26, 27.

11. O le ā e mafai ona tatou aʻoaʻoina e uiga i le tatalo, mai gaoioiga a Neemia e fesootai atu ma pa o Ierusalema?

¹¹ Atonu e manaomia ona tatou finafinau i le tatalo mo le fesoasoani a le Atua. Sa faanoanoa, tagi, anapogi, ma tatalo Neemia mo le tele o aso, ona o pa ua faaleagaina o Ierusalema ma le mala matautia na oo i ē na nonofo i Iuta. (Neemia 1:1-11) E foliga mai sa oo atu ana tatalo i le Atua e peiseai o ni mea manogi lelei. I se tasi aso na fesili atu ai le tupu Peresia o Aretaseta ia Neemia o lē o loo matuā mafatia: “Se a ea le mea e te manao ai?” Ua faapea mai Neemia: “Ona ou tatalo atu lea i le Atua o le lagi.” O lena tatalo puupuu ma le lē leoa na taliina mai, auā na faataga ai Neemia e faataunuu le manaoga o lona loto e ala i le alu atu i Ierusalema e toe fausia pa ua faaleagaina.—Neemia 2:1-8.

Seʻi Aʻoaʻoina Oe e Iesu i le Auala e Tatalo Ai

12. I au lava upu, o le a faapefea ona e aoteleina manatu autū o le tatalo faaaʻoaʻo a Iesu?

¹² Mai tatalo uma lava ua faamauina i le Tusi Paia, o le tatalo e sili ona aʻoaʻoina mai ai, o le tatalo faaaʻoaʻo lea na faatulaga mai e pei o se mea manogi lelei e Iesu Keriso. Ua faapea mai le Evagelia a Luka: “Ona fai mai lea ia [Iesu] o le tasi o lona au soo, ‘Le Alii e, ia e aʻoaʻo mai ia te i matou i tatalo; e faapei o Ioane foi ona aʻoaʻo i ona soo.’ Ua fetalai atu o ia ia te i latou, ‘Pe a outou tatalo, ia outou fai atu: Le Tamā e, Ia paia lou suafa. Ia oo mai lou malo. Ia e foai mai ia te i matou i lea aso ma lea aso a matou mea e ʻai e tatau ma le aso. Ia e faamagalo ia te i matou i a matou agasala, Auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le faaosoosoga.’” (Luka 11:1-4; Mataio 6:9-13) Seʻi o tatou iloiloina lenei tatalo, e lei fuafuaina e tautū i ai ae sa fuafua e fai ma taiala.

13. O le a faapefea ona e faamatala le uiga o upu, “Le Tamā e, Ia paia lou suafa”?

¹³ “Le Tamā e, Ia paia lou suafa.” O le faalagilagi atu o Ieova o le Tamā o se faaeaga faapitoa i ana auauna tuuina atu. E pei ona saoloto le fanau e faalatalata atu i se tamā loto alofa i so o se popolega, e ao foi ia i tatou ona tatou faaaluina se taimi e avatu ai tatalo faifai pea e mamalu ma faaaloalo i le Atua. (Salamo 103:13, 14) E tatau i a tatou tatalo ona atagia atu ai lo tatou manatu mamafa i le faapaiaina o le suafa o Ieova auā tatou te fia vaai atu ua faamamāina mai faifaiga uma ua faafaupue atu i ai. Ioe, tatou te fia faatulaga ese le suafa o Ieova ma ia faasilisilia e mamalu, pe paia.—Salamo 5:11; 63:3, 4; 148:12, 13; Esekielu 38:23.

14. O le ā le uiga o le tatalo atu, “Ia oo mai lou Malo”?

 ¹⁴ “Ia oo mai lou malo.” O le Malo o le pulega lea a Ieova ua faailoa mai e ala i le pulega faalelagi faa-Mesia i aao o lona Alo ma le “au paia” o loo auaufaatasi ma Iesu. (Tanielu 7:13, 14, 18, 27; Faaaliga 20:6) E lē pine ona “oo” mai lea e faaumatia i latou uma o i le lalolagi o loo tetee i le pule silisili ese a le Atua, ma tafiesea ai i latou e lē toe vaaia. (Tanielu 2:44) Ona faia loa lea o le finagalo o Ieova i luga o le lalolagi, e pei ona faia i le lagi. (Mataio 6:10) Maeu se olioli o le a aumaia ai i foafoaga faamaoni uma o loo auauna atu i le Pule Silisili Ese Aoao!

15. O le ole atu ia Ieova mo a ‘tatou mea e ʻai i lea aso ma lea aso’ e faaalia ai le ā?

¹⁵ “Ia e foai mai ia te i matou i lea aso ma lea aso a matou mea e ʻai e tatau ma le aso.” O le ole atu ia Ieova mo meaʻai o “le aso” e faaalia ai tatou te lē o talosagaina le anoanoai o ni sauniuniga ae na o o tatou manaoga o aso taitasi. E ui tatou te faatuatua atu i le Atua na te saunia maia mea, ae tatou te galulue foi ma faaaogā so o se auala talafeagai tatou te iloa ina ia maua ai meaʻai ma isi mea manaomia talafeagai. (2 Tesalonia 3:7-10) O le mea moni, e tatau ona tatou faafetaia Lē Saunia Mea mo i tatou o loo afio i le lagi talu ai o lona alofa, lona atamai, ma lona malosi ua māfua ai nei sauniuniga.—Galuega 14:15-17.

16. E mafai faapefea ona tatou maua le faamagaloga a le Atua?

¹⁶ “Ia e faamagalo ia te i matou i a matou agasala, Auā foi matou te faamagaloina atu ia i latou uma o e agaleaga mai ia te i matou.” Talu ai tatou te lē lelei atoatoa ma agasala, e lē mafai ai ona tatou matuā faafetaui atu i tapulaa atoatoa ona lelei a Ieova. O lea, e manaomia ai ona tatou tatalo mo lana faamagaloga e faavae i le taulaga togiola a Iesu. Peitai pe afai tatou te mananao i “Le faafofoga tatalo” ina ia faasafua mai le aogā o lena togiola i a tatou agasala, e ao la ona tatou salamō ma lotomalie e taliaina so o se aoaiga na te tuuina mai ia i tatou. (Salamo 65:2; Roma 5:8; 6:23; Eperu 12:4-11) E lē gata i lea, e mafai ona tatou faatalitalia e faatoʻā faamagaloina i tatou e le Atua pe afai tatou te “faamagaloina atu i e ua agaleaga mai” ia i tatou, i latou e faia mai agasala ia i tatou.—Mataio 6:12, 14, 15.

17. O le ā le uiga o upu, “Aua foi e te taitaiina i matou i le faaosoosoga”?

¹⁷ “Aua foi e te taitaiina i matou i le faaosoosoga.” I nisi taimi e faapea mai ai le Tusi Paia e faia e Ieova mea ae semanū o loo na ona ia faatagaina o na mea e tutupu. (Ruta 1:20, 21) E lē faaosoosoina e le Atua i tatou e faia le agasala. (Iakopo 1:13) O faaosoosoga e faia le mea leaga e māfua mai le Tiapolo, i o tatou tino agasala, ma lenei lalolagi. O Satani o le Faaosooso o loo taumafai e faaseseina i tatou ina ia agasala i le Atua. (Mataio 4:3; 1 Tesalonia 3:5) Pe a tatou faia le talosaga, “Aua foi e te taitaiina i matou i le faaosoosoga,” lona uiga o loo tatou ole atu i le Atua ina ia aua neʻi ona faatagaina i tatou e paʻūū pe a faaosoosoina i tatou ia lē usiusitai ia te ia. E mafai ona ia taitaia i tatou ina ia lē lolo atu ma lē manumalo ai Satani, ‘lē o leaga.’—Mataio 6:13; 1 Korinito 10:13.

Gaoioi e Ogatusa ma Au Tatalo

18. E mafai faapefea ona tatou gaoioi e ogatusa ma a tatou tatalo mo se fiafia i le faaipoipoga ma le olaga faaleaiga?

¹⁸ O le tatalo faaaʻoaʻo a Iesu ua aofai ai vaega autū tāua, peitai e mafai lava ona tatou tatalo atu mo so o se mataupu. Mo se faaaoaoga, tatou te ono tatalo atu e uiga i so tatou faanaunauga mo se faaipoipoga fiafia. Ina ia tausisia le mamā seia oo atu i le liʻo o le faaipoipoga, tatou te ono tatalo ai mo le pulea totino. Ona tatou gaoioi lea e ogatusa ma a tatou tatalo e ala i le alofia o lomiga  ma faafiafiaga lē mamā. Seʻi o tatou maumauai foi e ‘faaipoipo atu tau lava i lē ua i le Alii.’ (1 Korinito 7:39; Teuteronome 7:3, 4) Pe a oo ina faaipoipo, o le a manaomia ona tatou gaoioi e ogatusa ma a tatou tatalo mo se fiafiaga e ala i le faatatauina o fautuaga a le Atua. Ma afai e iai ni a tatou fanau, e lē lava le tau ina tatalo ina ia avea i latou o ni auauna faamaoni a Ieova. E tatau ona tatou fai mea uma tatou te mafaia ina ia faagoto ifo ai upu moni a le Atua i o latou mafaufau e ala i se suesuega faale-Tusi Paia ma le auai atu faatasi ma i latou e lē aunoa i sauniga faa-Kerisiano.—Teuteronome 6:5-9; 31:12; Faataoto 22:6.

19. O le ā e tatau ona tatou fai pe afai tatou te tatalo atu mo la tatou faiva?

¹⁹ Po o tatou tatalo ea mo ni faamanuiaga i le faiva? Seʻi o tatou gaoioi la e ogatusa ma na tatalo e ala i le faia o se sao uigā i le galuega talaʻi o le Malo. Pe afai tatou te tatalo mo avanoa e fesoasoani atu ai i isi ina ia maua le ala i le ola e faavavau, e manaomia la ona tatou teu lelei ni faamaumauga o ē loto fiafia ma ia naunau e faaofi i ai le faia o ni suesuega faale-Tusi Paia i aiga i la tatou faasologa. E faapefea pe afai tatou te faanaunau e auai i le galuega talaʻi faataimi atoa i le avea o se paeonia? Seʻi o tatou uia la laasaga e ogatusa ma a tatou tatalo e ala i le faateleina o la tatou galuega talaʻi ma le auai i le faiva faatasi ma paeonia. O le uia o na laasaga o le a faaalia ai o loo tatou gaoioi e ogatusa ma a tatou tatalo.

20. O le ā o le a talanoaina i le mataupu o sosoo mai?

²⁰ Pe afai o loo tatou auauna ma le faamaoni ia Ieova, e mafai ona tatou mautinoa o le a tali mai o ia i a tatou tatalo na e ogatusa ma lona finagalo. (1 Ioane 5:14, 15) E mautinoa, e iai ni manatu aogā ua maua mai le iloiloina o nisi o tatalo ua faamauina i le Tusi Paia. I la tatou mataupu o sosoo mai, o le a tatou talanoaina ai isi taiala faale-Tusi Paia mo i latou o loo faanaunau ina ia ‘sauniunia a latou tatalo e pei o se mea manogi i luma o Ieova.’

O le a Faapefea Ona E Tali?

□ Aisea e tatau ai ona tatou ofoina atu tatalo i le faatuatua?

□ O le ā le matafaioi e ao ona faia e viiga ma faafetai i a tatou tatalo?

□ Aisea e mafai ai ona tatou saili atu ma le mautinoa e ala i le tatalo mo le fesoasoani a Ieova?

□ O ā nisi o manatu autū o le tatalo faaaʻoaʻo?

□ E mafai faapefea ona tatou gaoioi e ogatusa ma a tatou tatalo?

[Fesili mo le Suʻesuʻega]

[Ata i le itulau 12]

I le pei o le tupu o Iosefatu, e iai taimi tatou te ono tatalo ai faapea: ‘Ua matou lē iloa foi se mea e fai; a ua faasaga atu i matou ia te oe, Ieova e’

[Ata i le itulau 13]

Po o e tatalo ea e ogatusa ma le tatalo faaaʻoaʻo a Iesu?